1 Im ālikin men kein bwe iaar ilo̧k ilubwiljin riNipai ro, im kar ukeļo̧k jān kanejnej eo iaar kōm̧m̧ane bwe i ban kar jipan̄ er ļo̧k wōt; im raar letok n̄an eō bar maron̄ n̄an tōl jarin tariņae ko aer, bwe raar reilo̧k n̄an eō āinwōt n̄e iaar maron̄ kōtļo̧k er jān en̄taan ko aer.

2 A lo, eaar jako aō kōjatdikdik, bwe iaar jeļā ekajet ko an Irooj ko renaaj itok ioer; bwe raar jab ukeļo̧k jān nana ko aer, a raar kakkōt kōn mour ko aer im jab kūr ioon Eo eaar kōm̧anm̧an er.

3 Im ālikin men kein riLeman ro raar kōm̧m̧alijar ņae kōm ke kōm ar ko n̄an jikin kwelo̧k in Jordan; a lo, kar kokak likļo̧k er bwe raar jab bōk jikin kwelo̧k eo ilo iien eo.

4 Im ālikin men kein raar kōm̧m̧alijar ņae kōm bar juon alen, im kōm ar dāpij jikin kwelo̧k eo. Im eaar wōr barāinwōt jikin kwelo̧k ko jet kar dāpij er jān riNipai ro, ko raar jikin koone reppen rekar m̧wijkōkļo̧k bwe ren jab maron̄ deļo̧n̄ ilo āneo kar im̧aam, n̄an ko̧kkure ro ilo āneo āneem.

5 A ālikin men kein jabdewōt āne ko kōm ar eļļā jān i, im ro ie raar jab kuktok, kar ko̧kkure er jān riLeman ro, im jikin ko reļļap aer, im jikin ko reddik, im jikin kwelo̧k ko kar tili kōn kijeek; im āindein jilubukwi im jiljilimjuonn̄oul im ruwatimjuon iiō ko raar eļļāļo̧k.

6 Im ālikin men kein ilo jilubukwi im ruwalitōkn̄oul iiō eo riLeman ro raar bar itok ņae kōm n̄an pata, im kōm ar jutak ņae er ilo pen; a eaar aolep ilo waan, bwe ekanooj ļap kar oraer jon̄an raar jujuri armej in riNipai ium̧win neer.

7 Im ālikin men kein kōm ar bar ko, im ro eaar ko eaar innitōtļo̧k jān m̧ōkaj an riLeman ro raar ļe, im ro eaar ko eaar jab ļapļo̧k jān m̧ōkaj an riLeman ro kar juok laļļo̧k im ko̧kkure er.

8 Im kiiō lo, n̄a, Mormon, ij jab kōņaan kaen̄taan jetōb ko an armej ilo joļo̧k im̧aer jekjek in bōtōktōk im ibeebjauwe in ekanooj nana āinwōt eaar waļo̧k im̧aan meja; a n̄a, kōnke i jeļā bwe men kein em̧ool aikuj in jeļā kaki, im bwe aolep men ko rej ņojak ren waļo̧k ioon bōrwaj ko—

9 Im barāinwōt bwe jeļāļo̧kjeņ eo kōn men kein eaikuj itok n̄an m̧ōttan eo an armej rein, im barāinwōt n̄an ro riAelōn̄ ko, ro Irooj eaar ba enaaj kajjeplōklōk armej rein, im armej rein rej aikuj bōnbōn ejjeļo̧k tokjāer ilubwiljier—kōn menin ij jeje juon kakkobaba edik, ij jab peran in kōnono n̄an lewōj dipiio in bwebwenato in men ko iaar loi, kōnke naan in jiron̄ eo letok n̄an eō, im barāinwōt bwe kom̧in maron̄ jab bōk eļap būrom̧ōj kōnke jero̧wiwi eo an armej rein.

10 Im kiiō lo, men in ij kōnono n̄an ro ineer, im barāinwōt n̄an ro riAelōn̄ ko ro raar eddo kōn m̧weo im̧ōn Israel, ro rej kile im jeļā jān ia jeraam̧m̧an ko aer rej itok.

11 Bwe i jeļā bwe rein renaaj būrom̧ōj kōn jorrāān ko an m̧weo im̧ōn Israel; aaet, renaaj būrom̧ōj kōn ko̧kkure eo an armej rein; renaaj būrom̧ōj bwe armej rein raar jab ukeļo̧k bwe ren maron̄ dāpdep ilo pā ko pein Jisōs.

12 Kiiō men kein kar jei n̄an m̧ōttan eo an im̧ōn Jekab; im rekar jeje ilo̧kan wāween in, kōnke Anij e jeļā bwe jero̧wiwi e ban kwaļo̧ki tok n̄an er; im rej ņojak n̄an Irooj bwe ren maron̄ waļo̧k tok ilo iien eo An make.

13 Im en̄in ej naan in jiron̄ eo iaar bōk e; im lo, renaaj waļo̧k tok ekkar n̄an naan in jiron̄ eo an Irooj, n̄e Enaaj lo ekkar, ilo ļoļātāt eo An.

14 Im lo, renaaj ilo̧k n̄an riJu ro rejjab tōmak; im kōn jibadbad in renaaj ilo̧k—bwe ren maron̄ bun̄bōro bwe Jisōs ej RiKraist, eo Nejin Anij emour; bwe Jemān en maron̄ bōktok, kōn eo Nejin ejitōnbōrotata, un eo an eļap im ejjeļo̧k jem̧ļo̧kin, ilo kōjepļaaktok riJu ro, ak aolep m̧weo im̧ōn Israel, n̄an āneo āneen aer jolōt, eo Irooj aer Anij eaar leļo̧k n̄an er, n̄an kūrm̧ool in bujen eo An;

15 Im barāinwōt bwe ineen armej rein ren maron̄ ļapļo̧k aer tōmak gospel eo An, eo enaaj ilo̧k n̄an er jān ro riAelōn̄ ko; bwe armej rein renaaj ejjeplōklōk, im naaj erom armej emarok, eo ettoon, im ekajjōjō, ilōn̄ inļo̧k jekjek eo jan̄in kar lo ilubwiljid, aaet, em̧ool eo eaar pād ilubwiljin riLeman ro, im men in kōnke aer jab tōmak im kabun̄-jar n̄an ekjab.

16 Im lo, Jetōb eo an Irooj eaar dedeļo̧k an jab pād ippān ro jemāer; im rej pād jaab ippān Kraist im Anij ilo laļ in; im kar kokakto-kokaktak er āinwōt kilin wūt im̧aan kōto.

17 Rekar juon alen juon armej ekarbōb, im rekar bōk Kraist aer seperd; aaet, kar tōl er em̧ool jān Anij Jemān.

18 A kiiō, lo, rej bōk tōl jān Setan, em̧ool āinwōt kilin wūt eo uukļo̧k im̧aan kōto, a āinwōt wa eo kinōōrto-kinōōrtak ioon ņo ko, eo ejjeļo̧k an wōjļā im emjak, ak ejjeļo̧k jabdewōt men eo ej kajebwābweiki; im em̧ool āinwōt wa in, āindein er.

19 Im lo, Irooj eaar dāpij jeraam̧m̧an ko aer, ko remaron̄ kar būki ilo āniin, bwe ro riAelōn̄ ko renaaj bōk āne in.

20 A lo, enaaj jejjet bwe naaj kokakļo̧k er im kajjeplōklōk er jān ro riAelōn̄ ko; im ālikin kar kokakļo̧k im kajjeplōklōk er jān ro riAelōn̄ ko, lo, innām Irooj enaaj keememej bujen eo Eaar kōm̧m̧ane n̄an Ebream im n̄an aolepān m̧weo im̧ōn Israel.

21 Im barāinwōt Irooj enaaj keememej jar ko an ro reweeppān, ko kar lilōn̄ļo̧k n̄an e kōn er.

22 Innām, O kom̧ ro riAelōn̄ ko, ekōjkan ami jutak im̧aan kajoor eo an Anij, ijello̧kun wōt n̄e kom̧ naaj ukeļo̧k im oktak jān iaļ ko renana ami?

23 Kom̧ij jab jeļā ke bwe kom̧ij pād ilo pein Anij? Kom̧ij jab jeļā ke bwe An aolep kajoor, im ilo naan in jiron̄ eo An eļap laļ enaaj lemlem ippān doon āinwōt juon bok lemlem?

24 Kōn menin, kom̧in ukeļo̧k, im kōttāik kom̧ make im̧aan Mejān, n̄e E ab itok kōn ekajet ņae kom̧—n̄e m̧ōttan in ineen Jekab ab naaj ilo̧k ilubwiljimi āinwōt juon ļaioon, im kekōl kom̧ ilo m̧ōttan ko reddik, im ejjeļo̧k naaj kōtļo̧k e.