1 Mo i bin hapen se mi go long medel blong Ol Man blong Nifae, mo mi sakem sin from strong promes ia we mi bin mekem, mo se bae mi no helpem olgeta bakegen; mo oli putum mi bakegen blong mi lidim ol ami blong olgeta, from oli luk long mi olsem we mi save mekem olgeta oli kam fri long ol hadtaem blong olgeta.

2 Be luk, mi no bin gat hop, from mi save ol jajmen blong Lod we bae i kam long olgeta; from oli no sakem ol rabis fasin blong olgeta, be oli traehad from ol laef blong olgeta, oli no prea long God we i bin mekem olgeta.

3 Mo i bin hapen se Ol Man blong Leman oli kam agensem mifala long taem ia we mifala i bin ronwe i go long bigtaon blong Jodan; be luk, oli pusumbak olgeta mekem se oli no tekem bigtaon long taem ia.

4 Mo i bin hapen se oli kam agensem mifala bakegen, mo mifala i holemtaet bigtaon ia. Mo tu, i gat ol narafala bigtaon we Ol Man blong Nifae i holem olgeta, we ol strong ples blong haed ia, i bin stopem olgeta mekem se oli no save go insaed long kantri we i stap long fored blong mifala, blong kilimded olgeta we oli stap laef long graon blong mifala.

5 Be i bin hapen se eni graon we mifala i pas long olgeta, mo olgeta we oli stap laef long olgeta oli no kam tugeta, Ol Man blong Leman oli kilimded olgeta, mo ol taon blong olgeta, mo ol vilej, mo ol bigtaon i bin bon wetem faea; mo olsem ia nao tri handred mo seventi mo naen yia i bin pas i go.

6 Mo i bin hapen se long nambatri handred mo eiti yia, Ol Man blong Leman oli kam bakegen agensem mifala blong faet, mo mifala i stanap strong agensem olgeta; be evri samting i blong nating, from namba blong olgeta i bin bigwan tumas, mekem se oli purumbut long ol pipol blong Ol Man blong Nifae andanit long ol leg blong olgeta.

7 Mo i bin hapen se mifala i ronwe bakegen, mo olgeta we ronwe blong olgeta i moa spid bitim Ol Man blong Leman, oli bin fri, mo olgeta we ronwe blong olgeta i no bitim Ol Man blong Leman, oli swipim olgeta mo kilimded olgeta.

8 Mo nao luk, mi, Momon, mi no wantem blong givim hadtaem long sol blong ol man, blong tokbaot long fored blong olgeta, rabis pikja blong blad mo fasin blong kilim man i ded, olsem we i stap long fored blong ol ae blong mi; be mi, from mi save se ol samting ia, i tru, Lod i mas soemaot, mo se evri samting we i haed, oli mas stap antap long ol haos mo talemaot—

9 Mo tu, se, wan save long saed blong ol samting ia i mas kam long smol haf blong ol pipol ia we oli laef yet, mo tu, long Ol Jentael, we Lod i bin talem se bae hem i mas seraotem ol pipol ia oli go olbaot, mo ol pipol ia, bae oli kaontem olgeta olsem nating long medel blong olgeta—from hemia, mi raetem wan sot histri ia nomo, from mi fraet blong givim wan ful histri blong ol samting we mi bin luk, from komanmen we mi bin kasem, mo tu, blong mekem se yufala i no save harem nogud tumas from fasin nogud blong ol pipol ia.

10 Mo nao luk, hemia mi talem long ol pikinini blong olgeta, mo tu, long Ol Jentael we oli gat wok blong lukaotem laen blong Isrel, we oli luksave mo save long weaples nao, ol blesing blong olgeta oli stap kam long hem.

11 From mi save se olgeta olsem, bae oli harem nogud from trabol blong laen blong Isrel; yes, bae oli harem nogud from Lod i prapa spolem gud ol pipol ia; bae oli harem nogud se ol pipol ia oli no bin sakem sin, blong mekem se, maet, Jisas i save holem olgeta long han blong hem.

12 Nao ol samting ia oli raetem i go long smol haf blong laen blong Jekob we oli laef yet; mo oli raetem olgeta long fasin ia, from God i save se fasin nogud bae i no karem ol samting ia i go long olgeta; mo oli mas haedem ol samting ia wetem Lod, blong oli save kamaot long taem we hem i jusum.

13 Mo hemia i komanmen we mi bin kasem; mo luk, olgeta bae oli kamaot folem komanmen blong Lod, long taem we bae hem i luk se i stret, long waes tingting blong hem.

14 Mo luk, olgeta bae i go long Ol Jiu we oli no biliv; mo from plan ia bae oli go—blong oli save winim tingting blong olgeta se Jisas i Kraes, Pikinini blong God we i stap laef; se Papa bae i mekem i hapen, tru long Pikinini we hem I Lavem Tumas i bitim ol narawan, bigfala plan ia blong hem we i no save finis, blong karembak Ol Jiu, o ful laen blong Isrel, i go long graon blong olgeta we i kam long ol papa, we Lod, God blong olgeta i bin givim long olgeta, blong mekem kavenan blong hem i hapen;

15 Mo tu, blong ol pikinini blong ol pipol ia i save bilivim moa gospel blong hem, we bae i aot long Ol Jentael i go long olgeta; from ol pipol ia bae oli seraot i go olbaot, mo bae oli kam wan dak, wan doti, mo wan rabis pipol, i bitim wanem we man i tokbaot long medel blong mifala bifo, yes, mo tu, bitim olgeta we i bin stap long medel blong Ol Man blong Leman, mo hemia from fasin ia blong olgeta blong no gat biliv mo stap wosipim aedol.

16 From luk, Spirit blong Lod i bin stop finis blong wok wetem ol papa blong olgeta; mo oli no gat Kraes mo God long wol; mo oli ronem olgeta olbaot olsem doti blong skin blong wit we win i tekem i go.

17 Oli bin wan gudfala pipol long wan taem, mo oli bin gat Kraes olsem man blong olgeta blong lukaot long sipsip; yes, God we i Papa, i bin lidim olgeta tu.

18 Be nao, luk, Setan i stap lidim olgeta olbaot, semmak olsem doti blong skin blong wit we win i tekem i go, o olsem wan sip we ol wef i stap sakem olbaot, we i no gat sel o angka, o i no gat eni samting blong stiarem hem; mo semmak olsem we hem i stap, olgeta ia oli olsem tu.

19 Mo luk, Lod i bin holemtaet ol blesing blong olgeta, we maet oli bin save kasem long graon, blong Ol Jentael we bae oli tekem graon.

20 Be luk, bae i kam blong hapen se, Ol Jentael bae oli ronem olgeta mo seraotem olgeta i go olbaot; mo afta we Ol Jentael oli ronem olgeta mo seraotem olgeta i go olbaot, luk, afta nao bae Lod i tingbaot kavenan we hem i bin mekem wetem Ebraham, mo wetem ful laen blong Isrel.

21 Mo tu, Lod bae i tingbaot ol prea we olgeta we oli gat stret mo gud fasin oli sendem antap i go long hem from olgeta.

22 Mo afta, O yufala Ol Jentael, ?olsem wanem nao yufala i save stanap long fored blong paoa blong God, sapos yufala i no sakem sin mo no tanem yufala aot long ol nogud fasin blong yufala?

23 ?Yufala i no save se yufala i stap long han blong God? ?Yufala i no save se hem i gat evri paoa, mo long bigfala oda blong hem, bae hem i rolem wol tugeta olsem wan skrol?

24 From hemia, yufala i sakem sin, mo putum tingting blong yufala i stap daon long fored blong hem, nogud bae hem i kamaot long jastis agensem yufala—nogud se wan smol haf blong ol pikinini blong Jekob we oli laef yet bae oli go long medel blong yufala olsem wan laeon, mo terem yufala long pisis, mo i no gat wan we oli save mekem i go fri.