1 Mo nao mi finisim histri blong mi long saed blong ol pipol blong mi, Ol Man blong Nifae we oli prapa spolem gud. Mo i bin hapen se mifala i stap long fored blong Ol Man blong Leman mo mifala i maj i go.

2 Mo mi, Momon, mi raetem wan leta i go long king blong Ol Man blong Leman, mo mi wantem hem blong letem long mifala, blong mifala i save karem ol pipol blong mifala oli kam tugeta long graon blong Kumora, kolosap wan hil we oli singaotem Kumora, mo long ples ia bae mifala i save faet agensem olgeta.

3 Mo i bin hapen se king blong Ol Man blong Leman i letem long mi, samting ia we mi bin wantem.

4 Mo i bin hapen se mifala i maj i go long graon blong Kumora, mo mifala i stanemap ol tenet blong mifala raonabaot long hil Kumora; mo hemia i long wan graon we i gat plante wota, reva, mo springwota; mo long ples ia mifala i bin hop blong gat janis ova long Ol Man blong Leman.

5 Mo taem we tri handred mo eiti mo fo yia i bin pas i go, mifala i bin karem i kam tugeta evri pipol blong mifala we oli stap yet, long graon blong Kumora.

6 Mo i bin hapen se taem we mifala i karem i kam tugeta evri pipol blong mifala oli wan i go long graon blong Kumora, luk mi, Momon, mi stat blong kam olfala; mo from mi save se hemia bae i lasfala faet blong ol pipol blong mi, mo from Lod i bin givim oda long mi se mi no mas letem ol tabu histri ia we ol papa blong mifala oli bin pasem i kam daon, we oli tabu, blong go long han blong Ol Man blong Leman, (from Ol Man blong Leman bae oli prapa spolem gud olgeta) from hemia, mi bin mekem histri ia aot long ol buk blong Nifae, mo mi haedem long hil Kumora evri histri we han blong Lod i bin givim long mi wetem tras, be smol namba blong ol buk ia nomo we mi bin givim long boe blong mi, Moronae.

7 Mo i bin hapen se ol pipol blong mi, wetem ol waef blong olgeta mo ol pikinini blong olgeta, naoia oli stap luk ol ami blong Ol Man blong Leman oli stap maj i kam from olgeta; mo wetem nogud fraet blong ded we i fulumap jes blong evri man nogud, oli stap wet blong kasem olgeta.

8 Mo i bin hapen se oli kam blong faet agensem mifala, mo evri sol i kam fulap wetem bigfala fraet from namba blong olgeta i bigwan tumas.

9 Mo i bin hapen se oli faet agensem ol pipol blong mi wetem naef blong faet, mo wetem bonara, mo wetem ara, mo wetem akis, mo wetem eni kaen tul blong faet.

10 Mo i bin hapen se oli katemdaon ol man blong mi, yes, mo tu, ol ten taosen blong mi we oli stap wetem mi, mo mi bin foldaon wetem kil long medel blong olgeta; mo oli pas kolosap long mi be oli no putum wan en long laef blong mi.

11 Mo afta we oli pas tru mo oli katemdaon evri pipol blong mi, be twante mo fo blong mifala, (we long medel blong mifala, i gat boe blong mi Moronae) mo from se mifala nomo i stap laef yet afta long ded blong ol pipol blong mifala, mifala i luk long nekis dei, taem we Ol Man blong Leman i bin gobak long ol kamp blong olgeta, long antap blong hil Kumora, ol ten taosen blong ol pipol blong mi we oli bin katemdaon, we mi bin stap long fored blong olgeta blong lidim olgeta.

12 Mo tu, mifala i bin luk ten taosen blong ol pipol blong mi, we boe blong mi Moronae i bin lidim olgeta.

13 Mo luk, ten taosen blong Gidgidona oli bin foldaon, mo hem tu long medel blong olgeta.

14 Mo Lama i bin foldaon wetem ol ten taosen blong hem; mo Gilgal i bin foldaon wetem ol ten taosen blong hem; mo Limha i bin foldaon wetem ol ten taosen blong hem; mo Jeneum i bin foldaon wetem ol ten taosen blong hem, mo Kumenaeha, mo Moronaeha, mo Antionam, mo Siblom, mo Sem, mo Jos, oli bin foldaon wetem ol ten taosen blong olgeta tu.

15 Mo i bin hapen se i gat ten moa lida we i bin foldaon tru long naef blong faet, wetem ol ten taosen blong wanwan long olgeta tu; yes, evri pipol blong mi oli bin foldaon, be twante mo fo ia nomo we oli bin stap wetem mi, mo tu, wan smol namba we oli bin ronwe long ol kantri long Saot, mo wan smol namba we oli aot blong joenem Ol Man blong Leman; mo ol mit, mo ol bun, mo blad blong olgeta i ledaon long fes blong graon; han blong olgeta we i kilimded olgeta i bin livim olgeta blong kam roten long graon, mo blong roten mo gobak long mama graon blong olgeta.

16 Mo sol blong mi i bin trabol tumas from mi harem nogud tumas, from ol ded blong ol pipol blong mi, mo mi bin singaot:

17 “!O yufala ol naes wan, hao nao yufala i bin save aot long ol fasin blong Lod! !O yufala ol naes wan, hao nao yufala i bin save sakemaot Jisas ia, we i bin stanap wetem ol han blong hem we oli open rere blong akseptem yufala!

18 Luk, sapos yufala i no bin mekem samting ia, bae yufala i no save foldaon. Be luk, yufala i bin foldaon, mo mi krae from lus blong yufala.

19 !O yufala ol naes boe mo gel, yufala ol papa mo ol mama, yufala ol hasban mo ol waef, yufala ol naes wan, hao nao yufala i save foldaon olsem!

20 Be luk, yufala i aot, mo ol harem nogud blong mi i no save mekem yufala i kambak.

21 Mo dei i kam i no longtaem, we bodi blong yufala we i save ded i mas putum bodi we i nomo save ded, mo ol bodi ia we oli stap roten naoia i no longtaem oli mas kam ol bodi we i nomo save roten; mo afta, yufala i mas stanap long fored blong jea blong jajmen blong Kraes, blong kasem jajmen folem ol wok blong yufala; mo sapos i olsem se yufala i stret mo gud, nao bae yufala i kasem blesing wetem ol papa blong yufala we oli bin go bifo long yufala.

22 O sapos yufala i bin sakem sin nomo bifo oli prapa spolem nogud yufala evriwan. Be luk, yufala i aot, mo Papa, yes, Papa we i No Save Finis blong heven, i save se yufala i stap olsem wanem; mo hem i mekem samting wetem yufala folem jastis mo sore blong hem.”