1 Iwe iei ua awesi ai uruo usun tanon nei kewe aramas, ekkewe chon Nifai. Iwe non ewe fansoun pwe am aua karis me mwen ekkewe chon Leiman.

2 Iwe ngang, Mormon, ua makkei echo toropwe ngeni ewe kingen ekkewe chon Leiman, me ua mochen seni i pwe i epwe mut ngenikem pwe am aupwe tongeni ionfengeni noum kewe aramas ngeni ewe fonuen Kamwora, arap ngeni ew chukuchukuta minne a iteni Kamwora, iwe ikewe am aupwe maun ngeni ir.

3 Iwe non ewe fansoun pwe ewe kingen ekkewe chon Leiman a mut ngenikem ewe mettoch minne ua mochen.

4 Iwe non ewe fansoun pwe am aua karis ngeni ewe fonuen Kamwora, iwe am aua aueta imwem imw mangaku pweni ewe chukuchukuta Kamwora; iwe a nom non ew fonuen chommong konik, chonupupu, me konik mi puwacheta; iwe ikei am aua apinukunuku pwe am aupwe angei pochokun won ekkewe chon Leiman.

5 Iwe nupwen wunupuku wanik me ruanu ier a wesino, am aua ionfengenienong nussun noum kewe aramas meinisin ngeni ewe fonuen Kamwora.

6 Iwe non ewe fansoun pwe nupwen am aua ionfengenienong noum kewe aramas meinisin non ew mwicheich ngeni ewe fonuen Kamwora, nengeni ngang, Mormon, a poputa ai chinnap; iwe pokiten ua sinei pwe ai iei amuchunon maun an nei ewe aramas, me pokiten ua fen annuk me ren ewe Samon pwe usap mutata ekkewe uruo minne ra fen keititiw me ren semem kewe, minne ir mi monomon, ar repwe turunong ne poun ekkewe chon Leiman, (pun ekkewe chon Leiman repwe atareno) iei minne ua fori ei uruo seni ekkewe seleichen Nifai, me opano won ewe chukuchukuta Kamwora ekkewe uruo meinisin minne ra fen ewiis ngeniei me ren poun ewe Samon, tiwenon chok ekkei ekkoch seleich minne ua ngeni nei we anuon Moronai.

7 Iwe non ewe fansoun pwe nei kewe aramas, fiti punuwer kewe me nour kewe, iei ra kuna ekkewe sounfiun ekkewe chon Leiman ar karis ngeni ir; iwe ren ena anoninenin nuokusun mano minne a aurano fan mwarin ekkewe aramas mi ngaw meinisin, ra awitiwiti ar repwe etiwer.

8 Iwe non ewe fansoun pwe ra feito pwe repwe maun ngenikem, iwe meinisin aramas ra uren nuokus pokiten watten chochor kewe.

9 Iwe non ewe fansoun pwe ra turuta won nei kewe aramas ren ewe ketinas, me ren ewe nikappich, me ren ewe foun nikappich, me ren ewe kouk, me ren sokopaten napanapen pisekin maun meinisin.

10 Iwe non ewe fansoun pwe nei kewe mwan ra pokupokutiw, ewer, pwan mwo engon ngorow ir mi nom rei, iwe ua turuno ren ai feiengaw neir; iwe ra nuno seniei ina popun rese awesano manauei.

11 Iwe nupwen ra feino neim me pokuetiw nei kewe aramas meinisin tiwenon chok rue me fomon neim, (me neir ekkei nei we anuon Moronai) iwe mwirin am mi manau nupwen meinisin noum kewe aramas mi mano, am aua kuna non ewe sorotan, nupwen ekkewe chon Leiman ra niwin ngeni ar kewe nenien asoso, seni won unungen ewe chukuchukuta Kamwora, ekkewe engon ngorowun nei kewe aramas ekkewe ra pokupokutiw, ekkewe ra emmwen me mwan me rei.

12 Iwe am aua pwan kuna ekkewe engon ngorowun nei kewe aramas ekkewe ra fen emmwen me ren nei ewe Moronai.

13 Me kuna, ekkewe engon ngorow noun Kitkitonai ra turuno, me pwan i me neir,

14 Iwe Leima a mano fiti noun engon ngorow; me Gilgal a mano fiti noun engon ngorow; me Lima a mano fiti noun engon ngorow; me Jeneum a mano fiti noun engon ngorow; me Kumenaia, me Moronaia, me Antionum, me Siplom, me Shem, me Jos, ra mano emon me emon fiti nour engon ngorow.

15 Iwe non ewe fansoun pwe mi pwan wor engon ra mano ren ewe ketinas, fiti nour engon ngorow emon me emon; ewer, pwan nei kewe aramas meinisin, tiwenon chok ekkewe rue me fomon ir mi nom rei, me pwan ekkoch ekkewe ra suno ngeni ekkewe fonu eor, me ekkoch ekkewe ra rikino ngeni ekkewe chon Leiman, ra mano; iwe futuker, me chur, me char ra nom won unungen ewe puun, ra nikitino me ren poun ekkewe ra nireno pwe repwe ngaweno me won ewe fonu, me repwe moromorotiw me niwin ngeni iner we puun.

16 Iwe nguni a ur ren riaffou, pokiten ninninon nei kewe aramas, iwe ua puchor:

17 O ami aramas ningoch, ifa usun oua tongeni nikitano ekkewe eerenien ewe Samon! O ami aramas ningoch, ifa usun ouse etiwa ena Jises, ewe a uta ren poun mi suk pwe epwe etiwakemi!

18 Nengeni, ika ouse fen fori ei, ousap fen kuf. Nge nengeni, oua kuf, iwe ua netipetani ami kewe mi mano.

19 O ami anuon me fopun mi atoch me nioch, ami sam me in, ami mwan mi pupunu me fefin mi pupunu, ami aramas ningoch, ifa usun oua tongeni kuf!

20 Nge nengeni, oua fen suno, iwe ai netipechou ese tongeni eniwini kemito.

21 Iwe ewe ran a arapeto pwe inisimi kewe mi tongeni mano repwe pwinitanong inis ese tongeni mano, iwe ekkei inis minne ra moromorotiw iei non kiteter repwe winiti inis esap kiteter; iwe non na fansoun oupwe fokkun uta me mwen ewe nenien mwottun kapung an Kraist, pwe oupwe kapung anongonong won ami kewe angang; iwe ika pwe ami mi tupwon, iwe oua feioch fiti sememi kewe ekkewe ra fen mano me mwemi.

22 O ika pwe oufen aier me mwen ei weiresin kiteter a feito womi. Nge nengeni, oua fen suno, iwe ewe Sam, ewer, ewe Semen nang Esemuch, mi sinei usun nonnomumi; iwe a fori ngenikemi anongonong won an pungoch me umoumoch.