1 Iwe iei, nengeni, ua mochen ekis kapas ngeni ekkewe mwirimwirin nussun ekkei aramas ekkewe ir mi manau, ika pwe Kot epwe ngeni ir ai kewe kapas, pwe repwe tongeni sinei usun ekkewe mettoch usun semer kewe; ewer, ua kapas ngenikemi, ami mwirimwirin nussun ewe imwen Israel; iwe ikkei ekkewe kapas minne ua apasa:

2 Oupwe sinei pwe ami seni ewe imwen Israel.

3 Oupwe sinei pwe oupwe fokkun feito ngeni aier, are esap ina ouse tongeni manau.

4 Oupwe sinei pwe oupwe fokkun watiw ami kewe pisekin maun, me ousap chiwen pwapwa non assukun cha, me ousap chiwen angeir sefan, tiwenon chok ika pwe Kot epwe annuku ngenikemi.

5 Oupwe sinei pwe oupwe fokkun angei ewe mirit usun sememi kewe, me aier seni ami kewe tipis me angangangaw, me nuku non Jises Kraist, pwe i ewe Noun Kot, me pwe i a ninnino me ren ekkewe chon Jew, iwe ren ewe manamanen ewe Sam a fen manausefan, ren minne a angei ewe win ne akkufano ewe peias; iwe non i ewe emmetekin mano epwe kuf.

6 Iwe a efisi ewe manausefan an ekkewe mi mano, ren minne aramas repwe fokkun manausefan pwe repwe uta me mwen an we nenien mwottun kapung.

7 Iwe i a efisi ewe ngasenon fonufan, ren minne i ewe a pwá pwe ese tipis me mwen i atun ewe ranin kapung epwe mumuta ngeni i pwe epwe nonnom me mwen mesen Kot non muun we, pwe esap much an kon mwareiti fiti ewe mwichen chon kon asan, ngeni ewe Sam, me ngeni ewe Nau, me ngeni ewe Ngun mi Fel, minne ir emon Kot, non ew nikinikin pwapwa minne ese wor soponon.

8 Iei minne aier, me oupwe papatais non iten Jises, me etiwa ewe kapas allimen Kraist, minne epwe nonnom mwemi, esap chok non ei uruo nge pwan non ewe uruo minne epwe feito ngeni ekkewe chon Gentile seni ekkewe chon Jew, minne uruo epwe feito seni ekkewe chon Gentile ngenikemi.

9 Pun nengeni, ei a makketiw ren ewe popun pwe oupwe tongeni nuku ena; iwe ika oupwe nuku ena oupwe pwan nuku ei; iwe ika oupwe nuku ei oupwe sinei usun sememi kewe, me pwan ekkewe angang mi amwarar minne ra fis me ren ewe manamanen Kot neimi.

10 Iwe oupwe pwan sinei pwe ami ew nussun ewe mwirimwirin Jacob; iei minne oua anneanong me nein ekkewe aramasen ewe aewin pwon mi pin; iwe ika pwe oupwe nuku non Kraist, me oua papatais, aewin ren konik, mwirin ren ekkei me ren ewe Ngun mi Fel, appiru ach we Chon Amanau, anongonong won met minne i a fen annuku ngenikich, epwe murino remi me non ewe ranin kapung. Amen.