ບົດທີ 7
ມໍມອນເຊື້ອເຊີນຊາວເລມັນໃນຍຸກສຸດທ້າຍໃຫ້ເຊື່ອໃນພຣະຄຣິດ, ໃຫ້ຮັບເອົາພຣະກິດຕິຄຸນຂອງພຣະອົງ, ແລະ ຮັບຄວາມລອດ—ທຸກຄົນທີ່ເຊື່ອໃນພຣະຄຣິສຕະທຳຄຳພີຈະເຊື່ອໃນພຣະຄຳພີມໍມອນ. ປະມານ ຄ.ສ. 385.
1 ແລະ ບັດນີ້, ຈົ່ງເບິ່ງຂ້າພະເຈົ້າຈະເວົ້າກັບ ຜູ້ທີ່ເຫລືອຢູ່ຂອງຜູ້ຄົນພວກນີ້ ຜູ້ທີ່ໄດ້ຮັບການຍົກເວັ້ນ, ຖ້າຫາກເປັນໄປວ່າ ພຣະຜູ້ເປັນເຈົ້າຈະປະທານສິ່ງທີ່ຂ້າພະເຈົ້າຈະເວົ້າໄປນີ້ໃຫ້ແກ່ພວກເຂົາ, ເພື່ອພວກເຂົາຈະໄດ້ຮູ້ຈັກເຖິງເລື່ອງຕ່າງໆຂອງບັນພະບຸລຸດຂອງພວກເຂົາ; ແທ້ຈິງແລ້ວ, ຂ້າພະເຈົ້າເວົ້າກັບທ່ານວ່າ, ທ່ານຜູ້ເປັນເຊື້ອສາຍອິດສະຣາເອນທີ່ເຫລືອຢູ່; ແລະ ນີ້ຄືຄຳທີ່ຂ້າພະເຈົ້າກ່າວ:
2 ຈົ່ງຮູ້ໄວ້ວ່າ ທ່ານເປັນ ເຊື້ອສາຍອິດສະຣາເອນ.
3 ຈົ່ງຮູ້ໄວ້ວ່າ ທ່ານຕ້ອງກັບໃຈ ຖ້າບໍ່ດັ່ງນັ້ນ, ທ່ານຈະລອດບໍ່ໄດ້.
4 ຈົ່ງຮູ້ໄວ້ວ່າ ທ່ານຕ້ອງປະຖິ້ມອາວຸດແຫ່ງສົງຄາມຂອງທ່ານເສຍ, ແລະ ບໍ່ໃຫ້ເບີກບານໃນການຫລັ່ງເລືອດອີກຕໍ່ໄປ, ແລະ ບໍ່ຕ້ອງຈັບມັນຂຶ້ນມາອີກ ເວັ້ນເສຍແຕ່ເວລາທີ່ພຣະເຈົ້າບັນຊາທ່ານເທົ່ານັ້ນ.
5 ຈົ່ງຮູ້ໄວ້ວ່າ ທ່ານຕ້ອງມາຫາ ຄວາມຮູ້ເລື່ອງກ່ຽວກັບບັນພະບຸລຸດຂອງທ່ານ, ແລະ ກັບໃຈຈາກບາບ ແລະ ຄວາມຊົ່ວຮ້າຍທັງໝົດຂອງທ່ານ, ແລະ ເຊື່ອໃນພຣະເຢຊູຄຣິດ, ວ່າພຣະອົງເປັນພຣະບຸດຂອງພຣະເຈົ້າ, ແລະ ວ່າພຣະອົງໄດ້ຖືກຊາວຢິວຂ້າ, ແລະ ໂດຍອຳນາດຂອງພຣະບິດາ ພຣະອົງໄດ້ເປັນຄືນມາມີຊີວິດອີກ, ຊຶ່ງໂດຍການນັ້ນ ພຣະອົງໄດ້ ໄຊຊະນະເໜືອຫລຸມສົບ; ແລະ ໃນພຣະອົງຄວາມເຈັບປວດແຫ່ງຄວາມຕາຍໄດ້ຖືກກືນໄວ້ນຳອີກ.
6 ແລະ ພຣະອົງເຮັດໃຫ້ເກີດມີ ການຟື້ນຄືນຊີວິດຂອງຄົນຕາຍ, ຊຶ່ງໂດຍການນັ້ນມະນຸດຈະຕ້ອງຖືກຍົກຂຶ້ນມາຢືນຢູ່ຕໍ່ໜ້າ ບັນລັງພິພາກສາຂອງພຣະອົງ.
7 ແລະ ພຣະອົງໄດ້ນຳ ການໄຖ່ມາສູ່ໂລກ, ຊຶ່ງໂດຍການນັ້ນຜູ້ທີ່ຖືກພົບວ່າ ບໍ່ມີຄວາມຜິດຕໍ່ພຣະພັກຂອງພຣະອົງໃນວັນພິພາກສາ ຍ່ອມໄດ້ຮັບອະນຸຍາດໃຫ້ເຂົ້າ ໄປຢູ່ໃນທີ່ປະທັບຂອງພຣະເຈົ້າໃນອານາຈັກຂອງພຣະອົງ, ເພື່ອຮ້ອງເພງສັນລະເສີນໂດຍບໍ່ຢຸດຢັ້ງຮ່ວມກັບ ຜູ້ຂັບຮ້ອງຢູ່ເບື້ອງເທິງ, ເພື່ອສັນລະເສີນພຣະບິດາ, ແລະ ພຣະບຸດ, ແລະ ພຣະວິນຍານບໍລິສຸດ, ຊຶ່ງເປັນ ພຣະເຈົ້າດຽວກັນ, ໃນສະພາວະແຫ່ງ ຄວາມສຸກອັນບໍ່ມີທີ່ສຸດ.
8 ສະນັ້ນ ຈົ່ງກັບໃຈ, ແລະ ຮັບບັບຕິສະມາໃນພຣະນາມຂອງພຣະເຢຊູ, ແລະ ຍຶດໝັ້ນໃນ ພຣະກິດຕິຄຸນຂອງພຣະຄຣິດ, ຊຶ່ງຈະຖືກວາງຢູ່ຕໍ່ໜ້າທ່ານ, ບໍ່ພຽງແຕ່ມີຢູ່ໃນ ບັນທຶກນີ້ເທົ່ານັ້ນ ແຕ່ມີຢູ່ໃນບັນທຶກຊຶ່ງຈະມາຫາຄົນຕ່າງຊາດ ຈາກຊາວຢິວນຳອີກ, ຊຶ່ງບັນທຶກນັ້ນຈະອອກຈາກຄົນຕ່າງຊາດ ມາຫາທ່ານ.
9 ເພາະຈົ່ງເບິ່ງ, ເລື່ອງນີ້ມີຂຽນໄວ້ໂດຍມີເຈດຕະນາທີ່ຈະໃຫ້ທ່ານ ເຊື່ອເລື່ອງນັ້ນ; ແລະ ຖ້າຫາກທ່ານເຊື່ອເລື່ອງນັ້ນ; ທ່ານຈະເຊື່ອເລື່ອງນີ້ຄືກັນ; ແລະ ຖ້າຫາກທ່ານເຊື່ອເລື່ອງນີ້ ທ່ານຈະຮູ້ກ່ຽວກັບບັນພະບຸລຸດຂອງທ່ານ, ແລະ ຈະຮູ້ກ່ຽວກັບວຽກງານອັນໜ້າອັດສະຈັນໃຈນຳອີກ ຊຶ່ງກະທຳຂຶ້ນໂດຍອຳນາດຂອງພຣະເຈົ້າໃນບັນດາພວກເຂົາ.
10 ແລະ ທ່ານຈະຮູ້ອີກວ່າ ທ່ານເປັນສ່ວນໜຶ່ງທີ່ເຫລືອຢູ່ຂອງເຊື້ອສາຍຂອງຢາໂຄບ; ສະນັ້ນ ທ່ານຈຶ່ງຖືກນັບເຂົ້າຢູ່ໃນບັນດາຜູ້ຄົນແຫ່ງພັນທະສັນຍາທຳອິດ; ແລະ ຖ້າຫາກເປັນໄປວ່າ ທ່ານເຊື່ອໃນພຣະຄຣິດ, ແລະ ຮັບບັບຕິສະມາດ້ວຍນ້ຳກ່ອນ, ແລ້ວດ້ວຍໄຟ ແລະ ດ້ວຍພຣະວິນຍານບໍລິສຸດ, ຕາມ ຕົວຢ່າງຂອງພຣະຜູ້ຊ່ວຍໃຫ້ລອດຂອງພວກເຮົາ, ຕາມສິ່ງທີ່ພຣະອົງບັນຊາພວກເຮົາ, ມັນຈະດີກັບທ່ານໃນວັນແຫ່ງການພິພາກສານັ້ນ. ອາແມນ.