O Le Tusi a Moronae

1 O lenei o a’u o Moronae, ina ua uma ona ou faia o le faaiuga o le otootoga o le tala o le nuu o Iareto, sa ou manatu o le a ou le toe tusia ni isi mea faaopoopo, peitai ou te le’i oti lava; ma ou te le faailoa atu a’u lava i sa Lamanā ne’i o latou faaumatia a’u.

2 Auā faauta, ua matuā malolosi tele a latou taua i totonu o i latou lava; ma ona o lo latou ita ua latou fasiotia ai sa Nifaē uma o ē e le faafitia le Keriso.

3 Ma o a’u, o Moronae, ou te le faafitia le Keriso; o le mea lea, ou te fealuai solo ai i soo se mea e mafai ona ou alu i ai mo le puipuiga o lo’u lava ola.

4 O le mea lea, ou te tusia ai ni isi mea faaopoopo itiiti, e le tusa ma le mea na ou manatu i ai; ona sa ou manatu o le a ou le toe tusia ni isi mea faaopoopo; ae o le a ou tusia ni nai faaopoopo itiiti, atonu o le a aogā i o’u uso, o sa Lamanā, i se aso i le lumanai, e tusa ai ma le finagalo o le Alii.