1 Ma o lenei ou te tautala atu e uiga i le papatisoga. Faauta, sa papatisoina toeaina, faitaulaga, ma a’oa’o; ma sa le papatisoina i latou vagana ai ua latou fua mai fua e tatau ai e iloa ai ua latou agavaa.

2 Pe na latou talia foi soo se tasi i le papatisoga vagana ai ua latou o mai i luma ma le loto momomo ma le agaga salamo, ma molimau mai i le ekalesia ua latou salamo faamaoni i a latou agasala uma.

3 Ma sa leai se tasi na talia i le papatisoga vagana ai ua latou ave i o latou luga le suafa o Keriso, ma ua i ai le naunautai e auauna atu ia te ia e oo i le iuga.

4 Ma ina ua uma ona taliaina o i latou i le papatisoga, ma galueaiina ma faamamāina e le mana o le Agaga Paia, sa faitauina i latou i totonu o tagata o le ekalesia a Keriso; ma sa ave o latou igoa, ina ia manatua i latou ma tausia i le afioga lelei a le Atua, e faatutumau ai i latou i le ala sa’o, e faatutumau ai i latou ia mataala e le aunoa i le tatalo, ia faalagolago tasi i galuega tauleleia a Keriso, o lē o le amataga ma le taunuuga o lo latou faatuatua.

5 Ma sa potopoto soo faatasi le ekalesia, e anapopogi ma tatalo, ma talatalanoa o le tasi i le isi, e uiga i le soifua manuia o o latou agaga.

6 Ma sa latou potopoto soo faatasi e taumamafa i le areto ma le vai, i le faamanatuina o le Alii o Iesu.

7 Ma sa latou tausisi ma le faaeteete ina ia leai se amioletonu e i totonu o i latou; ma o soo se tasi e maua ua ia faia le amioletonu, ma e toatolu molimau o le ekalesia e ta’usalaina i latou i luma o toeaina, ma afai latou te le salamo, ma lē faatoese, sa tineia ese o latou igoa, ma sa le faitauina i latou i totonu o tagata o Keriso.

8 Ae o soo se taimi sa latou salamo ai ma saili le faamagaloga, ma le faamoemoe faamaoni, sa faamagaloina i latou.

9 Ma sa taitaiina a latou sauniga e le ekalesia e tusa ma galuega a le Agaga, ma le mana o le Agaga Paia; ona a’o taitaiina i latou e le mana o le Agaga Paia pe tala’i, pe apoapoai, pe tatalo, pe aioi atu, pe pepese, sa faapea lava ona faia.