1 Iwe iei ua kapas usun papatais. Nengeni, elter, pris, me sense ra papatais; iwe rese papatais tiwenon chok ra awora uwar mi fich ngeni ir.

2 Rese pwan etiwa emon ngeni papatais tiwenon chok ika ra feito ren ew netip mi netipechou me netip niemam, me pwarata ngeni ewe mwichefen pwe ra ennetin aier seni ar kewe tipis meinisin.

3 Iwe ese wor emon a mumuta ngeni papatais tiwenon chok ika ra wata wor iten Kraist, me a wor rer ew pochokunen mochen pwe repwe angang ngeni i tori nesoponon.

4 Iwe mwirin ar ra fen mumuta ngeni papatais, me ra ememef me nimochuno me ren manamanen ewe Ngun mi Fel, ra anneanong nein ekkewe aramasen ewe mwichefenin Kraist; iwe iter ra makketiw, pwe repwe tongeni chechemeni ir me tumun me ren ewe kapas mi öch an Kot, pwe epwe annomur non ewe aan mi pung, pwe epwe annomur ar repwe tumunuoch ne iotek, repwe apinukunuk chok won ekkewe fofforun Kraist, i ewe popun me ewe chon ounusa ar nuku.

5 Iwe ewe mwichefen a mwich fengen fan chommong, pwe repwe echikipin me iotek, me pwe repwe kapas fengen nefiner usun tufichin ngunur.

6 Iwe ra mwich fengen fan chommong pwe repwe mwongo seni ewe pinewa me wain, non achechemenien ewe Samon Jises.

7 Iwe ra tichik ne tumunuochu pwe esap wor angangangaw me neir; iwe ion chok a pwá pwe a fori angangangaw, iwe unumon chon pwarata seni ewe mwichefen ra apungur me mwen ekkewe elter, iwe ika rese aier, me pwarata, iter kewe ra tottonuu, iwe rese chiwen anneanong nein ekkewe aramas noun Kraist.

8 Nge fan chommong ar aier me kutta omusomusen tipis, ren ennetin mochen, ra musono.

9 Iwe ar kewe mwich ra emmwen me ren ewe mwichefen anongonong won napanapen angangen ewe Ngun, me ren manamanen ewe Ngun mi Fel; pokiten usun nupwen manamanen ewe Ngun mi Fel a emmweni ir ika repwe afanafan, are pesepes, are iotek, are tingor, are kon, iwe epwe fisino.