1 Dóó kʼad shí, Moroni, éí shizhéʼé Mormon bizaad tʼáá áłtsʼíísígo ánáánáshdlééh, éí éí oodląʼ, chohooʼíinii, dóó diyingo ayóó óʼóʼníinii yaa yááłtiʼę́ę; kótʼéego éí diné yichʼįʼ yááłtiʼ, sodizin bá hooghan ádayiilaa biyiʼ neineeztą́ą́ʼ.

2 Dóó kʼad shí, Mormon, nihichʼįʼ yáshtiʼ, shikʼisóó ayóí ánihííníshʼníinii; dóó aTaaʼ Diyin God diyingo joobaʼ bikʼehgo dóó Bóhólníihii Jesus Christ binahjįʼ, dóó diyingo íinízinígíí bikʼehgo, háálá binaʼanish yee shikʼihojisdliʼígíí bąą, kweʼé saad bee nihichʼįʼ hadeesdzihígíí éí yee shá hoołʼaʼ.

3 Ákohgo, shí nihichʼįʼ haasdziih sodizin bee daʼnoohtahígíí, kʼé bee Christ bikééʼ nisoozínígíí, dóó Bóhólníihii bił hazʼą́ bee baa doohʼááł bíighah danohsinígíí dóó deinohdlánígíí, kodóó náasjįʼ áko deínohsin dóó ńléí yáʼąąshdi éí bił háádasoołyį́įʼjįʼ.

4 Dóó kʼad shikʼisóó danohłíinii, shí éí kótʼéego bee nihiníshʼį́ háálá kʼé bikʼehgo éí bílaʼashdlaʼii baʼáłchíní bitaahłdeeh.

5 Háálá shí éí Diyin God bizaad kóníigo bénáshniih, binaanish ádeiilʼínígíí binahjįʼ béédahonohsin doo; háálá binaanish yáʼátʼéehgo éí bídóʼ diné yáʼátʼéehii nilį́į doo.

6 Jó áko, Diyin God áníigo éí diné doo yáʼáshóonii éí yáʼátʼéehii doo íidoolíił da; háálá naalyéhé aa yiléego, éí doodago Diyin God sodizin yee yichʼįʼ haadzíiʼgo, tʼáá hazhóʼó tʼáá aaníí áátʼįįdgo tʼéiyá néididoolééł doodago éí tʼáadoo nílíní da.

7 Jó áko, éí éí yáʼátʼééhjí doo há wóltaʼ da.

8 Jó áko, diné doo yáʼátʼéhígíí naalyéhé aa yiléego, éí doo íinízin da ndi ákótʼįįh; ákohgo Diyin God éí doo aa jiniláágóó yółtaʼ, ákohgo Diyin God bichʼįʼgo éí doo yáʼájítʼééhgóó haa ntsáhákees.

9 Dóó tʼáá áko náánátʼéego, diné doo tʼáá aaníí áníigo bijéí biyiʼdóó sodilzingo, éí diné doo yáʼájítʼéehgo baa ntsíhodookos, dóó sodizin eí tʼáadoo nanídlíní da, háálá Diyin God éí ákótʼéhígíí doo yiyíistsʼą́ąʼ da.

10 Ákohgo, diné doo yáʼátʼéehgo naagháago éí haʼátʼííshį́į́ yáʼátʼéhígíí doo íidoolíił da, índa naalyéhé yáʼátʼéhígíí doo éí dooléeł da.

11 Jó áko, tó díchʼíiʼgo háálį́įgo éí doo áádę́ę́ʼ tó łikango hadoonah da, índa tó łikango háálį́įgo ałdóʼ doo áádę́ę́ʼ tó díchʼíiʼgo hadoonah da; ákohgo, diné chʼį́įdii beʼiiníziinii yá naalnishgo éí doo Christ yikééʼ ndoogaał da; dóó Christ yikééʼ sizį́įgo éí doo chʼį́įdii beʼiiníziinii yá ndoolnish da.

12 Ákohgo, tʼáá ałtsoní yáʼádaatʼéehii éí Diyin God bitsʼą́ą́dóó; dóó doo yáʼátʼéehii éí chʼį́įdii beʼiiníziinii bitsʼą́ą́dę́ę́ʼ; háálá chʼį́įdii beʼiiníziinii éí Diyin God yeʼenaʼí nilį́, doo tʼáá áłahjįʼ hoł ahigą́, dóó adoolzih wóshdę́ę́ʼ dóó kodi ní, dóó tʼáá áłahjįʼ bąąhági átʼéii baa njigháa doo biniiyé.

13 Jó ndi, Diyin God bitsʼą́ą́dę́ʼígíí éí tʼáá áłahjįʼ yáʼátʼééh bee ádoolníiłii hágo dóó wóshdę́ę́ʼ yiłní; ákohgo tʼáá ałtsoní yáʼátʼéehii tʼéiyá hágo dóó wóshdę́ę́ʼ hałnínígíí, dóó Diyin God ayóí ájóʼní, dóó bá naashnish doo jinízingo áhósinígíí, éí Diyin God bitsʼą́ą́dę́ę́ʼ yidiłii átʼé.

14 Ákohgo, díí deísínóołtsʼą́ą́ʼ, shikʼisóó ayóí ánihííníshʼníinii, áko bąąhági átʼéii éí Diyin God bitsʼą́ą́dę́ę́ʼ doo dínóosįįł da, éí doodago yáʼátʼéehii dóó Diyin God bitsʼą́ą́dę́ʼígíí éí chʼį́įdii beʼiiníziinii bitsʼą́ą́dę́ę́ʼ doo dínóosįįł da.

15 Jó áko, shikʼisóó danohłíinii, ntsáhákees éí nihaa yilyá, yáʼátʼéhígíí dóó doo yáʼátʼéhígíí bee ałʼąą átʼéhígíí nihił bééhózin doo biniiyé, índa baa ntsíhodookosígíí átʼéego ałdóʼ tʼáá bééhózíní, díí tsʼídá nizhónígo nihił bééhózin doo, éí díí adinídíín dóó chahałheeł ałʼąą átʼéhígíí átʼéego baa ákonohsin doo.

16 Jó áko, Christ biiʼSizíinii éí tsʼídá diné tʼáá ałtso bee yilyá, éí baa yáʼátʼéehii dóó doo yáʼátʼéehii bee ałʼąą átʼéhígíí bił bééhózin doo biniiyé; ákohgo díí baa ntsáhákeesígíí nihił ííshją́ą́ áshłééh; háálá tʼáá ałtsoní yáʼátʼééh ádoohłííł hałnínígíí, dóó Christ yiniidlą́ągo hałnínígíí, éí Christ bibee adziilii dóó bibee aʼiilyéii bee bidaʼiisniiʼ; ákohgo tsʼídá tʼáadoo naaki nílíní nihił bééhózin doo díí éí Diyin God bitsʼą́ą́dę́ę́ʼ.

17 Ndi tʼáá haʼátʼííshį́į́ diné doo yáʼátʼéehii bíniʼ ádeileʼígíí, dóó biniinaa Christ doo dayoodlánígíí, dóó doo deinízinígíí, índa biniinaa Diyin God doo yá ndaalnishígíí; éí tsʼídá tʼáá aaníí nihił béédahózin doo, díí éí chʼį́įdii beʼiiníziinii bitsʼą́ą́dę́ę́ʼ; jó háálá kótʼéego éí chʼį́įdii beʼiiníziinii naalnish, háálá diné yáʼátʼéhígíí doo yichʼįʼ yiłʼáa da, dooda, doo tʼááłáʼí ndi, doo bá naalʼaʼii ndi, doo ndi áájí akééʼ deizįʼígíí da.

18 Dóó kʼad, shikʼisóó danohłíinii, díí adinídíín bee ééhózingo bikʼehgo ntsáhákeesígíí éí nihił béédahózin, éí adinídíín bee ééhózinii éí Christ bibee adinídíín átʼé, hazhóʼó baa ntsídaahkees áko doo ákótʼéego bee woohsį́į́h lágo, háálá baa ntsísookéézígíí dóó bee woohsį́ʼígíí éí bikʼehgo nihí ałdóʼ nihaa nihodootʼááł.

19 Ákohgo, bił akʼisóó nohłíinii, díí baa nánihooshkąąh, Christ beʼadinídíín tsʼídá yéigo ndaałkaah áko yáʼátʼéehii dóó doo yáʼátʼéehii bee ałʼąą átʼéhígíí nihił bééhózin doo; dóó tsʼídá tʼáá ałtsoní yáʼátʼéehii daoohłtsóodgo, dóó doo nahjįʼ kódaahłéhę́ęgo, áko éí tsʼídá tʼáá aaníí Christ beʼawééʼ nohłį́į dooleeł.

20 Dóó kʼad, shikʼisóó nohłíinii, haash yitʼéego éí tsʼídá yáʼádaatʼéehii yizhdoołtsoł?

21 Dóó kʼad éí oodląʼ, baa hodeeshnih dishnínę́ę baa hoolzhiizh; dóó díí tʼáá ałtsoní yáʼátʼéehii bee yidooltsołígíí éí bee nihił hodeeshnih.

22 Jó háálá, Diyin God hoolʼáádę́ę́ʼ dóó hoolʼáágóó hólóonii, éí tʼáá ałtsoní bił bééhózin, jó, éí diyin bá naalʼaʼii bílaʼashdlaʼii baʼáłchíní yíká adoojah biniiyé yitah ayisʼaʼ, Christ yigháhígíí éí bił béédahózin doo; dóó Christ bitsʼą́ą́dóó éí tsʼídá tʼáá ałtso yáʼátʼéehii hólónígíí bił béédahózin doo biniiyé.

23 Dóó Diyin God tʼáá bí bizééʼdę́ę́ʼ bá dahalneʼii, Christ éí doogááł, níigo yee yichʼįʼ haadzííʼ.

24 Jó áádóó tʼóó ahayóí ałʼąą átʼéego yáʼádaatʼéehii bílaʼashdlaʼii baʼáłchíní yichʼįʼ ííshjání áyiilaa; dóó tsʼídá tʼáá ałtso yáʼátʼéehii éí Christ bitsʼą́ą́dę́ę́ʼ, éí doo átʼéego éí diné Diyin God yitsʼádínéesdlį́į́ʼ doo ńtʼę́ę́ʼ, dóó yáʼátʼéehii tsʼídá doo baa doolyéeł da ńtʼę́ę́ʼ.

25 Ákohgo, diyin yá ndaalʼaʼii áká anájahgo binahjįʼ, dóó tsʼídá tʼáá átʼé Diyin God bizééʼdę́ę́ʼ saad yee hahadziihígíí binahjįʼ, diné Christ dayoodlą́ silį́į́ʼ; dóó ákótʼáo beʼoodląʼ bee, tsʼídá yáʼádaatʼéehii dayiiltsood; dóó díí tʼáá ákótʼéego Christ níyá.

26 Dóó éí níyáádóó bikʼijįʼ diné bízhiʼ dayoodlą́ągo yee yisdánáhaskai ałdóʼ; dóó beʼoodląʼ bee, Diyin God biYeʼ daazlį́į́ʼ. Dóó tsʼídá tʼáá aaníí Christ hináago díí nihizhéʼé danilínę́ę yichʼįʼ haadzííʼ, kóníigo; tsʼídá tʼáá ałtsoní, yáʼátʼéehii, nihiTaaʼ shízhiʼ binahjįʼ, deinohdlą́ągo, shaa doolyééł danohsingo, jó, éí bee nihikʼihozhdoodliił.

27 Ákohgo, shikʼisóó ayóí ánihííníshʼníinii, Christ yáʼąąshgóó náásdlį́ʼígíí, dóó Diyin God binishʼnáájígo dah neezdá, bílaʼashdlaʼii baʼáłchíní aTaaʼ yitsʼą́ą́dóó hojoobaʼ yoosbánígíí biniinaa, álílee naʼanishígíí ninítʼiʼ?

28 Háálá éí éí beehazʼáanii ninítʼiʼjįʼ ałtso yiʼiilaa, dóó tʼáá ałtso daboodlánígíí éí shí yiłní; dóó daboodlánígíí éí tʼáá ałtso yáʼátʼéhígíí dayótąʼ dooleeł; ákohgo bílaʼashdlaʼii baʼáłchíní bí biniiyéii yánáʼookąąh, dóó hoolʼáágóó yáʼąąshdi kééhatʼį́.

29 Dóó háálá díí kódzaagoósh biniinaa álílee naʼanishii ninítʼiʼ, shikʼisóó ayóí ánihííníshʼníinii? Jó shí éí, Ndagaʼ nihidishní; doo ndóʼ diyin yá naalʼaʼii da tʼahdii bílaʼashdlaʼii baʼáłchíní yíká ańdaajah.

30 Jó háálá, bí éí bikʼeh dahółʼį́, éí bizaadígíí bikʼehgo áká ańdaajah, hazhóʼó diyingo hashtʼentsídahaskézígíí dóó beʼoodląʼ dabidziilígíí éí yichʼįʼ ííshjání ádaʼdiilyaa.

31 Dóó binaanish bá ádaalyaaí éí diné niheʼiinaʼ łahgo áńdaahdleʼ deiłní, dóó aTaaʼ beʼahadaʼdeetʼaahii yindaalnish dóó ałtso yee daʼaleʼ, éí nihookááʼ diné baʼáłchíní yá áyiilaa, áko bílaʼashdlaʼii baʼáłchíní bitah góyaa hashtʼedahalééh, Christ bizaad Bóhólníihii átsʼáyiisnilígíí yee ndeinitingo, áko éí éí baa dahalneʼ dooleeł biniiyé.

32 Dóó kódáátʼį́įgo, Bóhólníihii Diyin God diné chʼéédzíʼígíí Christ dayoodlą́ą doogo yá hashtʼedahalééh áko Iiʼsizį́ Diyinii bibee adziilii bee bijéí biiʼ dahólǫ́ǫ doo; kótʼéego aTaaʼ bílaʼashdlaʼii baʼáłchíní yił ahadaʼdeetʼánę́ę ałtso yidaʼaleʼ.

33 Dóó Christ ání: Dashiinohdlą́ągo éí tʼáá ałtsoní nihá yáʼátʼééh nisinígíí ádadoohłííł.

34 Dóó ałdóʼ kódííniid: Tʼáá ánółtso nihookáaʼgi kéédahohtʼíinii niheʼiinaʼ łahgo áńdaahdlééh, dóó shaa hohkááh, dóó tó bee danihiʼdiilzį́į́h shízhiʼ binahjįʼ, dóó dashiinohdlą́, áko yisdánádahidoohkááh.

35 Dóó kʼad nááná, shikʼisóó ayóí ánihííníshʼníinii, díí tʼáá aaníí kótʼéego dóó saad bee nihichʼįʼ haasdzíʼę́ę tʼáá aaníigo, dóó Diyin God tsʼídá akéeʼdi yoołkáłígíí biyiʼ bibee adziilii binahjįʼ, díí tʼáá aaníígíí nihił ííshją́ą́ íidoolííł, dóó díí tʼáá aaníigo daʼ álílee naʼanishígíí ninítʼiʼ?

36 Éí doodagoósh diyin yá ndaalʼaʼii bílaʼashdlaʼii baʼáłchíní doo yichʼįʼ ííshjání áńdaʼdiilʼįįh da silį́į́ʼ? Éí doodagoósh Iiʼsizį́ Diyinii bibee adziiliísh yitsʼą́ą́ʼ tʼą́ą́ʼ yótąʼ ńtʼę́ę́ʼ? Éí doodagoósh éí ákódoonííł, tʼah oolkił bá hazʼą́ąjįʼ, éí doodago nahasdzáán tʼah dah siʼą́ągo, éí doodago bikáaʼgi diné tʼááłáʼí yisdádooltéeł ndi?

37 Jó ánihidishníigo éí, Ndagaʼ; háálá oodlánígíí tʼéí binahjįʼ álílee naʼanish; dóó oodlánígíí binahjįʼ diyin yá ndaalʼaʼii diné yaa ńdaakah dóó yíká anájah; ákohgo, díí ndahaaztʼiʼ silį́įʼgo éí bílaʼashdlaʼii baʼáłchíní doo bá yáʼátʼéeh da dooleeł, háálá éí éí doo daʼoodlánígíí biniinaa, dóó tʼáá ałtso tʼáadoo biniiyéhé da dooleeł.

38 Háálá Christ bizaad bikʼehgo éí diné doo yisdáńdoodáał da, tʼáá hazhóʼó bízhiʼ dayoodlą́ągo tʼéiyá; ákohgo, díí niʼ ádáádzaago, áko daatsʼí oodlánígíí ałdóʼ ninítʼiʼ; tsʼídá doo yáʼáshǫ́ǫgo diné bił hazʼą́ą doo, háálá Christ yisdánáʼiildéehgo áyiilaaígíí éí tʼáadoo ádzaa da nahalin doo.

39 Jó ndi, shikʼisóó ayóí ánihííníshʼníinii, shí éí doo ákódooníił da nisin, háálá aa hojoobaʼ ádeinohsingo biniinaa Christ deinohdlą́ nisin; jó doo deinohdlą́ągo éí bisodizin bá hooghan yee dah deíkáhígíí anohtahgo doo bíínóhghah da dooleeł.

40 Dóó nááná, shikʼisóó ayóí ánihííníshʼníinii, bíká ił chohooʼínígíí bee nihichʼįʼ hadeesdzih. Haash yitʼéego éí oodląʼ hwiiʼ hólǫ́ǫ dooleeł, tʼáá hazhóʼó bíká hoł chohooʼį́įgo tʼéiyá?

41 Dóó haʼátʼíísh éí bíká nihił chohooʼį́į doo? Jó ánihidishníigo éí Christ nihibąąhági átʼéii yikʼé nináʼídláhígíí biníkááʼ góneʼ dóó anoonééł yił náádiidzáhą́ą binahjįʼ, nihídóʼ hoolʼáágóó iiná biyiʼjįʼ náánihididoołjahígíí éí bíká nihił chohooʼį́į doo, díí éí Christ beʼoodląʼ dahólónígíí yee yá nihoníʼánę́ę bikʼehgo iinohdlą́ą doo.

42 Ákohgo, diné beʼoodląʼ hólǫ́ǫgo éí ałdóʼ bił chohooʼį́į doo, háálá oodląʼ tʼáá géedgo éí bíká chohooʼínígíí ádin doo.

43 Dóó nááná, jó ánáánihidishníigo doo éí hweʼoodląʼ dóó hoł chohooʼį́į da doo, tʼáá hazhóʼó aa hojoobaʼgo, dóó ajéí hojoobaʼ íinízingo tʼéiyá.

44 Díí ákótʼéego, hweʼoodląʼ dóó hoł chohooʼínígíí éí tʼáadoo biniiyéhé da, háálá Diyin God bidááhdóó éí doo bił nilíní da, tʼáá hazhóʼó aa hojoobaʼgo dóó ajéí hojoobaʼ íiznízingo tʼéiyá bił jílį́į dooleeł; dóó diné da łaʼ aa hojoobaʼgo dóó ajéí hojoobaʼ íinízingo, dóó Iiʼsizį́ Diyinii bibee adziilii bee Jesus éí Christ átʼį́ níigo, éí éí diyingo ayóó óʼóʼní bee hólǫ́ǫ doo, háálá diyingo ayóó óʼóʼní doo bee hólǫ́ǫ́góó éí tʼáadoo nilíní da; ákohgo diyingo ayóó óʼóʼní bee hólǫ́ǫ doo.

45 Dóó diyingo ayóó óʼóʼníinii éí nízaadgóó haʼólní, dóó éí joobaʼ, dóó doo oołchʼį́įd da, dóó doo ádaa haʼniih da, dóó doo éí áchą́ ádeilnáa da, dóó doo ndi bá háchįʼ da, dóó doo nichxǫ́ǫ́ʼígo ntsídaakees da, dóó bąąhági átʼéii doo yaa bił honeeni da, ndi éí tʼáá aaníinii yaa bił hózhǫ́, dóó tʼáá ałtsoní yichʼįʼ bidziil, dóó tʼáá ałtsojįʼ oodląʼ, dóó tʼáá ałtsojįʼ bił chohooʼį́, dóó tʼáá ałtsoní yichʼįʼ haʼólní.

46 Ákohgo, shikʼisóó ayóí ánihííníshʼníinii, diyingo ayóó óʼóʼníinii nihee ádingo éí tʼáadoo nohłíní da, háálá diyingo ayóó óʼóʼníinii éí tʼáadoo yiʼoh neelʼání da. Ákohgo, diyingo ayóó óʼóʼníinii yéigo yínítąʼ, háálá éí éí tsʼídá aláahdi átʼé, háálá tʼáá ałtsoní éí yiʼoh daneelʼą́ą dooleeł—

47 Ndi diyingo ayóó óʼóʼníinii éí Christ beʼayóó óʼóʼní doo bąąh chiní átʼé, áádóó éí hoolʼáágóó dinaʼii átʼé; dóó tʼáá háiida, akéeʼdi yoołkáałdi bee hólónígíí, éí tʼáá aaníí bá yáʼátʼéeh dooleeł.

48 Ákogo, shikʼisóó ayóí ánihííníshʼníinii, tsʼídá tʼáá átʼé adziil nihijéí biiʼ hólónígíí bee aTaaʼ bichʼįʼ sodadoołzin, áko díí ayóó óʼóʼní nihiyiʼ hadidoobį́į́ł, tʼáá aaníí biYeʼ Jesus Christ yikééʼ naazínígíí yee yikʼidajisdliʼę́ę; áko nidóʼ Diyin God baʼáłchíní nílį́į doo; áko níyáago bígi ádaniitʼée doo, háálá tʼáá átʼéhígi átʼáo deidiiltsééł; áko díí chohooʼínígíí nihí dooleeł, nihídóʼ doo nihąąh chinígóó ánihidiʼdoolnííł bí doo bąąh chinígi átʼáo. Amen.