1 Ma sa oo ina amata ona matou toe faatuina le malo ma amata ona toe fai mo matou le laueleele i le filemu. Ma sa ou faia ia tatau ona i ai ni ’auupega o taua o ituaiga eseese e fausia, ina ia mafai ona ia te au ni ’auupega mo lo’u nuu auā le taimi e toe o mai ai sa Lamanā e faasagatau mai i lo’u nuu.

2 Ma sa ou tuu ni leoleo faataamilo i le laueleele, ina ia lē toe o mai sa Lamanā ia te i matou e aunoa ma le iloa ma faaumatia i matou; ma sa faapea ona ou leoleoina o lo’u nuu ma a’u lafu, ma tausia i latou mai le pa’u’ū atu i lima o o matou fili.

3 Ma sa oo ina matou faia mo o matou tofi le laueleele o o matou tamā mo le tele o tausaga, ioe, mo le va o tausaga e lua sefulu ma le lua.

4 Ma sa ou faia e tatau i tane ona galueaiina le eleele, ma totō ituaiga uma o saito ma ituaiga o laau ’aina eseese uma.

5 Ma sa ou faia e tatau i fafine ona lagafilo, ma toaaga, ma galulue, ma faia ituaiga uma o ie lino lelei, ioe, ma ie o ituaiga eseese uma, ina ia mafai ona matou faaoofuina lo matou lē lavalava; ma sa faapea ona matou manuia i le laueleele—sa faapea ona matou maua o le filemu e lē aunoa i le laueleele mo le va o le lua sefulu ma le lua tausaga.

6 Ma sa oo ina oti le tupu o Lamana, ma sa amata ona nofotupu lona atalii e suitulaga ia te ia. Ma sa amata ona faaoso e ia ona tagata i le fouvale faasaga mai i lo’u nuu; o lea na amata ai ona latou sauni mo taua, ma o mai e tau faasaga mai i lo’u nuu.

7 Peitai sa ou auina atu a’u sipai faataamilo i le laueleele o Semulona, ina ia mafai ona ou iloa a latou sauniuniga, ina ia mafai ona ou puipui faasaga ia te i latou, ina ia lē mafai ona latou o mai i lo’u nuu ma faaumatia i latou.

8 Ma sa oo ina latou o a’e i luga i le itu i matu o le laueleele o Seloma, ma a latou autau e toatele, o tane ua faa’auupegaina i aufana, ma ufanafana, ma pelu, ma simetea, ma ma’a, ma ma’ata; ma sa latou tafi o latou ulu sa lē ufiufia i latou; ma sa latou suluina se fusi pa’u manu faataamilo i o latou sulugatiti.

9 Ma sa oo ina ou faia ia tatau ona faalalafi fafine ma tamaiti o lo’u nuu i le vao; ma sa ou faia foi e tatau i o’u alii matutua uma o e e mafai ona faaaoga ’auupega tau, ma o’u alii talavou uma o e e mafai ona faaaoga ’auupega tau, ona latou faapotopoto faatasi i latou lava e o atu e faasagatau ia sa Lamanā; ma sa ou tofi i latou i o latou tulaga, o tagata taitoatasi e tusa ma le matua o ona tausaga.

10 Ma sa oo ina matou o a’e e faasagatau ia sa Lamanā; ma o a’u, e oo lava ia te a’u, i o’u tausaga matua, sa ou alu a’e e faasagatau ia sa Lamanā. Ma sa oo ina matou o a’e i le malosi o le Alii, e tau le taua.

11 O lenei, sa le iloa e sa Lamanā se mea e uiga i le Alii, po o le malosi o le Alii, o lea sa latou faalagolago ai i lo latou lava malosi. Peitai o i latou o ni tagata malolosi, e tusa ai ma le malolosi o tagata.

12 O i latou o ni tagata ’aivao, ma sauā, ma faamasaatoto, ua talitonu i uputuu a o latou tamā, e faapenei—Ua latou talitonu na tutuli ese i latou mai le laueleele o Ierusalema ona o amioletonu a o latou tamā; ma e faapea sa agaleagaina i latou i le vao e o latou uso, ma sa agaleagaina foi i latou a’o latou sopoia le sami;

13 Ma lea foi, e faapea sa agaleagaina i latou a’o latou i ai i le laueleele o lo latou ulua’i tofi, ina ua mavae ona latou sopoia mai o le sami, ma o nei mea uma na faia ona e faapea sa sili atu le faamaoni o Nifae i le tausiga o poloaiga a le Alii—o lea na alofagia ai o ia e le Alii, ona sa faafofoga mai le Alii i ana tatalo ma tali mai, ma sa tauave e ia le taitaiga o la latou malaga i le vao.

14 Ma e sa feita ona uso ia te ia ona sa latou lē malamalama i fegalegalea’iga a le Alii; ma e faapea sa latou feita foi ia te ia i luga o vai ona sa latou faamaaa o latou loto e faasaga i le Alii.

15 Ma lea foi, e faapea sa latou feita ia te ia ina ua latou taunuu i le laueleele na folafolaina, ona sa latou fai mai ua fao e ia le pulega o le nuu mai o latou lima; ma sa latou saili e fasioti ia te ia.

16 O lenei foi, e faapea sa latou feita ia te ia ona sa alu ese atu o ia i le vao e pei ona sa poloaiina ai o ia e le Alii, ma ave talafaamaumau sa togitogia i luga o papatusi apamemea, ona sa latou fai mai ua ia gaoia i latou.

17 Ma o lea sa latou a’oa’o ai a latou fanau ia latou feita ia te i latou, ma ia latou fasioti ia te i latou, ma ia latou gaoi ma fao faamalosi mai ia te i latou, ma fai mea uma e mafai ona latou faia e faaumatia ai i latou; o lea ua i ai ia te i latou se ita e faavavau i le fanau a Nifae.

18 O lenei lava le pogai na ’olegia ai a’u e le tupu o Lamana, i lona poto, ma le faitogafiti pepelo, ma ana folafolaga logomalie, ia ou aumai ai lo’u nuu nei i le laueleele lenei, ina ia mafai ai ona latou faaumatia i latou; ioe, ma ua matou mafatia i le tele o nei tausaga i le laueleele.

19 Ma o lenei o a’u, o Senifa, ina ua uma ona ou ta’u atu o nei mea uma i lo’u nuu e uiga ia sa Lamanā, sa ou faaoso i latou e o atu e tau ma lo latou malosi, ma tuu atu lo latou faalagolago i le Alii; o lea, sa matou tau faafesagai ai lava, ma i latou.

20 Ma sa oo ina matou toe tutuli ese i latou mai lo matou laueleele; ma sa matou fasioti i latou i se fasiga tele, ma o le toatele na’uā sa matou lē faitauina ai i latou.

21 Ma sa oo ina matou toe foi mai i lo matou lava laueleele, ma sa amata e lo’u nuu ona toe tausia a latou lafu, ma galueaiina o latou fanua.

22 Ma o lenei ona o a’u, ua ou toeaina, sa ou faaee atu ai le malo i se tasi o o’u atalii; o lea, ou te lē toe fai atu se isi upu. Ma talosia ia faamanuia mai le Alii i lo’u nuu. Amene.