1 ’E i muri a’era, ’ua ha’amata fa’ahou ihora mātou i te fa’ati’a i te bāsileia ’e ’ua ha’amata fa’ahou ihora mātou i te pārahi i te fenua ma te hau. ’E ’ua fa’aue au ’ia hāmanihia te mau huru mauha’a tama’i ato’a, ’ia ineine te mau mauha’a tama’i nā tō’u ra mau ta’ata i te tau e haere mai ai te mau ’āti Lamana e ’aro mai i tō’u ra mau ta’ata.

2 ’E ’ua tu’u ho’i au i te mau tīa’i ē ’ati noa a’e te fenua, ’ia ’ore te mau ’āti Lamana ’ia haere huna fa’ahou mai nō te ’aro ia mātou ’e ’a ha’amou ai ia mātou ; ’ua nā reira vau i te tīa’i i tō’u ra mau ta’ata ’e i tā’u ra mau nana, ’e i te ha’apa’o ho’i ia rātou, ’ia ’ore ’ia riro i roto i te rima o tō mātou ra mau ’enemi.

3 ’E i muri a’era, ’ua pārahi noa ihora mātou i te fenua o tō mātou ra mau metua e rave rahi matahiti, ’oia ïa, nō te ārea e piti ’ahuru ’e ma piti matahiti te maoro.

4 ’E ’ua fa’aue atu vau i te mau tāne ’ia fa’a’apu i te fenua, ’e ’ia fa’atupu i te mau huru sītona ato’a ’e te mau huru mā’a hotu ato’a ho’i.

5 ’E ’ua fa’aue atu ho’i au i te mau vahine ’ia nino, ’e ’ia ha’a, ’e ’ia rave i te ’ohipa, ’e ’ia hāmani ho’i i te mau huru ’ahu paruai maita’i, ’oia ïa, te mau huru ’ahu ato’a ’ia ti’a ia mātou ’ia fa’a’ahu i tō mātou tino vai taha’a noa ; ’e ’ua nā reira mātou i te manuia i ni’a i te fenua—’e ’ua fāri’i tāmau noa mātou i te hau i ni’a i te fenua nō te ārea e piti ’ahuru ’e ma piti matahiti te maoro.

6 ’E i muri a’era, ’ua pohe ihora te ari’i ra ’o Lamana, ’e ’ua ha’amata ihora tāna tamaiti i te fa’atere ’ei mono nōna. ’E ’ua ha’amata ihora ’oia i te fa’ati’arepu i tōna ra mau ta’ata ’ia haere mai e ’aro i tō’u ra mau ta’ata ; nō reira ’ua fa’aineine ihora rātou nō te ’arora’a, ’e ’ua haere mai ra rātou e ’aro i tō’u ra mau ta’ata.

7 ’Āre’a rā ’ua tono vau i tō’u mau ta’ata tāmoemoe ē ’ati noa a’e te fenua ra nō Semelona, ’ia ’ite au i tā rātou mau fa’aineinera’a, ’ia ti’a iā’u ’ia pārahi ineine noa nō te ’aro atu ia rātou, ’ia ’ore rātou ’ia haere mai i ni’a iho i tō’u ra mau ta’ata ’e ’a ha’amou ai ia rātou.

8 ’E i muri a’era, ’ua haere mai ra rātou i te pae i apato’erau i te fenua ra nō Siloma ma tō rātou mau nu’u fa’ehau e rave rahi, ’e ’ua rave mai te mau tāne i te mau mauha’a mai te fana, ’e te te’a, ’e te ’o’e, ’e te simetera, ’e te ’ōfa’i, ’e te ma’a ; ’e ’ua hahuhia ho’i tō rātou upo’o ’e ’ua vai taha’a noa te reira ; ’e ’ua tātuahia tō rātou tau’upu i te ’iri puaa.

9 ’E i muri a’era, ’ua fa’aue ihora vau ’ia fa’atāpunihia te mau vahine ’e te mau tamari’i a tō’u ra mau ta’ata i roto i te mēdēbara ; ’e ’ua ha’aputuputu ihora vau i tō’u mau ta’ata pa’ari ato’a ’o tē ti’a ’ia amo i te mauha’a, e tō’u feiā ’āpī tāne ato’a ho’i ’o tē ti’a ’ia amo i te mauha’a, ’ia haere i ni’a e ’aro atu i te mau ’āti Lamana ; ’e ’ua fa’anaho ihora vau ia rātou, te ta’ata tāta’itahi ’ia au i tōna matahiti.

10 ’E i muri a’era, ’ua haere atu ra mātou i ni’a nō te ’aro atu i te mau ’āti Lamana, ’e ’ua haere ato’a atu vau, ’o vau iho i tō’u ruhiruhiāra’a, e ’aro atu i te mau ’āti Lamana. ’E i muri a’era, ’ua haere atu ra mātou i ni’a ma te pūai o te Fatu nō te tama’i.

11 ’E i teienei, ’aore ho’i te mau ’āti Lamana i ’ite i te parau nō ni’a i te Fatu, ē tae noa atu i te pūai o te Fatu, nō reira ’ua ti’aturi rātou i tō rātou iho pūai. E feiā pūai rā rātou i te pūai o te ta’ata nei.

12 E feiā ’ōviri ho’i rātou, ’e te taehae, ’e te hina’aro taparahi ta’ata, ’e te ti’aturi i te mau peu tumu a tō rātou mau metua ; ’oia ho’i—te ti’aturira’a ē, ’ua ti’avaruhia rātou i rāpae i te fenua ra nō Ierusalema nō te mau ’ohipa ’ī’ino a tō rātou mau metua, ’e ’ua hāmani-’ino-hia rātou e tō rātou mau taea’e i roto i te mēdēbara, ’e ’ua hāmani-’ino-ato’a-hia rātou ’a tere mai ai rātou nā ni’a i te moana ;

13 ’E teie fa’ahou, tē ti’aturi ato’a ra ho’i rātou ē, ’ua hāmani-’ino-hia rātou i tō rātou fenua ’āi’a mātāmua, i muri iho i tō rātou taera’a mai nā ni’a i te moana, ’e ’ua nā-reira-hia nō te mea ’ua ha’apa’o maita’i Nephi i te mau fa’auera’a a te Fatu—nō reira ’ua ha’amaita’ihia ’oia e te Fatu, ’e ’ua fa’aro’o ho’i te Fatu i tāna ra mau pure ’e ’ua pāhono mai ho’i i te reira, ’e nāna ho’i i arata’i ia rātou i tō rātou tere i roto i te mēdēbara.

14 ’E ’ua riri tōna mau taea’e iāna nō te mea ’aita rātou i māramarama i te mau ’ohipa a te Fatu ; ’ua riri ato’a rātou iāna i ni’a i te mau pape nō te mea ’ua fa’a’eta’eta rātou i tō rātou ’ā’au i te Fatu.

15 ’E teie fa’ahou, ’ua riri rātou iāna i tō rātou taera’a i te fenua i fafauhia ra, nō te mea tē parau ra rātou ē, ’ua rave ’oia i te mana i tō rātou rima ’ia fa’atere i te mau ta’ata ; ’e ’ua tītau rātou ’ia taparahi iāna.

16 ’E teie fa’ahou, ’ua riri rātou iāna nō te mea ’ua haere atu ’oia i roto i te mēdēbara mai tā te Fatu i fa’aue mai iāna, ’e ’ua hōpoi atu ’oia i te mau pāpa’a parau i ’ō’otihia i ni’a iho i te mau ’api veo, ’e ’ua parau ho’i rātou ē, ’ua ’eiā ’oia i te reira ia rātou ra.

17 ’E ’ua nā reira rātou i te ha’api’i i tō rātou mau hua’ai ’ia ’ino’ino mai ia rātou, ’e ’ia taparahi mai ia rātou, ’e ’ia ’eiā ’e ’ia haru i tā rātou ra, ’e ’ia rave i te mau mea ato’a nō te ha’amou ia rātou ; nō reira tē vai ra tō rātou ’ino’ino mure ’ore nō te mau hua’ai o Nephi.

18 ’E teie te tumu i ha’avare mai ai te ari’i ra ’o Lamana iā’u, nā roto i tāna rāve’a ha’avare, ’e te ’ohipa tāviri, ’e tāna mau parau fa’atīaniani ; ’e ’ua arata’i mai au i tō’u nei mau ta’ata i ni’a i teie nei fenua, ’ia ha’amouhia e rātou ; ’oia ïa, ’e ’ua fāri’i mātou i te mau ’ati e rave rahi matahiti i ni’a i te fenua.

19 ’E i teienei, i muri iho i to’u, ’o Zenifa, fa’a’itera’a atu i teie mau mea ato’a nō ni’a i te mau ’āti Lamana i tō’u mau ta’ata, ’ua fa’aitoito ihora vau ia rātou ’ia haere i te tama’i ma tō rātou pūai ato’a, e ma te ti’aturi i te Fatu ; nō reira, ’ua ’aro atu mātou ia rātou, te mata i te mata.

20 ’E i muri a’era, ’ua ti’avaru fa’ahou atu ra mātou ia rātou i rāpae i tō mātou fenua ; ’e e rave rahi ho’i tō rātou ’o tā mātou i taparahi, ’e nō te rahi ’aita atu ra i tai’o i te reira.

21 ’E i muri a’era, ’ua ho’i fa’ahou mai ra mātou i tō mātou iho fenua, e ha’amata fa’ahou ihora tō’u mau ta’ata i te tīa’i i tā rātou mau nana, ’e i te fa’a’apu ho’i i tō rātou fenua.

22 ’E i teienei, ’ua ruhiruhiā vau, ’e ’ua hōro’a atu vau i te bāsileia i te hō’ē o tā’u mau tamaiti ; nō reira, ’o te hope’a ïa o tā’u parau. ’E ’ia ha’amaita’i mai te Fatu i tō’u mau ta’ata. ’Āmene.