ບົດທີ 12
ອະບີນາໄດຖືກເອົາເຂົ້າຄຸກເພາະການທຳນາຍຂອງເພິ່ນເຖິງການທຳລາຍຂອງຜູ້ຄົນ ແລະ ເຖິງການແກ່ກຳຂອງກະສັດໂນອາ—ປະໂລຫິດຈອມປອມກ່າວອ້າງພຣະຄຳພີ ແລະ ທຳທ່າວ່າຮັກສາກົດຂອງໂມເຊ—ອະບີນາໄດເລີ່ມສິດສອນພຣະບັນຍັດສິບປະການ. ປະມານ 148 ປີ ກ່ອນ ຄ.ສ.
1 ແລະ ເຫດການໄດ້ບັງເກີດຂຶ້ນຄື ຫລັງຈາກນັ້ນເປັນເວລາສອງປີຄື ອະບີນາໄດໄດ້ປອມຕົວມາໃນບັນດາພວກເຂົາ ຈົນວ່າຄົນທັງຫລາຍຈຳເພິ່ນບໍ່ໄດ້ເລີຍ, ແລະ ເພິ່ນໄດ້ທຳນາຍໃນບັນດາພວກນັ້ນ, ມີຄວາມວ່າ: ພຣະຜູ້ເປັນເຈົ້າໄດ້ບັນຊາຂ້າພະເຈົ້າດັ່ງນີ້—ອະບີນາໄດ, ເຈົ້າຈົ່ງໄປທຳນາຍແກ່ຜູ້ຄົນຂອງເຮົາ, ເພາະພວກເຂົາໄດ້ເຮັດໃຈແຂງກະດ້າງຕໍ່ຄຳຂອງເຮົາ; ພວກເຂົາບໍ່ໄດ້ກັບໃຈຈາກການເຮັດຄວາມຊົ່ວຂອງພວກເຂົາ; ສະນັ້ນ, ເຮົາຈະມາຢ້ຽມຢາມພວກເຂົາໃນຄວາມພິໂລດຂອງເຮົາ, ແທ້ຈິງແລ້ວ, ໃນຄວາມພິໂລດອັນຮຸນແຮງຂອງເຮົາ, ເຮົາຈະມາ ຢ້ຽມຢາມພວກເຂົາໃນຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາ.
2 ແທ້ຈິງແລ້ວ, ວິບັດແກ່ຄົນລຸ້ນນີ້! ແລະ ພຣະຜູ້ເປັນເຈົ້າໄດ້ກ່າວກັບຂ້າພະເຈົ້າວ່າ: ເຈົ້າຈົ່ງຍື່ນມືຂອງເຈົ້າອອກໄປ ແລະ ທຳນາຍວ່າ: ພຣະຜູ້ເປັນເຈົ້າໄດ້ກ່າວດັ່ງນີ້, ເຫດການຈະບັງເກີດຂຶ້ນຄື ເພາະຄວາມຊົ່ວຮ້າຍຂອງພວກເຂົາ, ຄົນລຸ້ນນີ້ຈະຖືກນຳໄປເປັນ ທາດ, ແລະ ຈະຖືກ ຕົບໜ້າ; ແທ້ຈິງແລ້ວ, ແລະ ຈະຖືກຄົນມາກວາດເອົາໄປ, ແລະ ຖືກຂ້າຖິ້ມ; ແລະ ແຮ້ງໃນອາກາດ, ແລະ ໝາ, ແລະ ສັດປ່າຈະມາກິນເນື້ອໜັງຂອງພວກເຂົາ.
3 ແລະ ເຫດການຈະບັງເກີດຂຶ້ນຄື ຊີວິດຂອງກະສັດໂນອາອາດຈະມີຄຸນຄ່າເທົ່າກັບອາພອນໃນ ເຕົາໄຟອັນຮ້ອນ; ເພື່ອເຂົາຈະໄດ້ຮູ້ວ່າ ເຮົາຄືພຣະຜູ້ເປັນເຈົ້າ.
4 ແລະ ເຫດການຈະບັງເກີດຂຶ້ນຄື ເຮົາຈະລົງໂທດຜູ້ຄົນພວກນີ້ຂອງເຮົາດ້ວຍຄວາມທຸກຢ່າງແສນສາຫັດ, ແທ້ຈິງແລ້ວ, ດ້ວຍຄວາມອຶດຢາກ ແລະ ດ້ວຍ ພະຍາດໂລຄາ; ແລະ ເຮົາຈະໃຫ້ພວກເຂົາຮ້ອງ ຄ່ຳຄວນຕະຫລອດທັງວັນ.
5 ແທ້ຈິງແລ້ວ, ແລະ ເຮົາຈະໃຫ້ ພາລະໜັກຕິດຢູ່ເທິງຫລັງຂອງພວກເຂົາ; ແລະ ຖືກໄລ່ກວາດໄປທາງໜ້າຄືກັບໂຕລໍທີ່ບໍ່ມີຄວາມຄິດ.
6 ແລະ ເຫດການຈະບັງເກີດຂຶ້ນຄື ເຮົາຈະສົ່ງໝາກເຫັບໃຫ້ຕົກລົງມາໃນບັນດາພວກເຂົາ, ແລະ ມັນຈະຕົກຖືກພວກເຂົາ; ແລະ ພວກເຂົາຈະຖືກລົງໂທດດ້ວຍ ລົມຂອງຕາເວັນອອກນຳອີກ; ແລະ ແມງໄມ້ຈະລົງມາກິນພືດພັນໃນແຜ່ນດິນຂອງພວກເຂົາ.
7 ແລະ ພວກເຂົາຈະຖືກລົງໂທດດ້ວຍພະຍາດໂລຄາອັນຮ້າຍແຮງ—ແລະ ເຮົາຈະເຮັດທຸກຢ່າງນີ້ເພາະ ຄວາມຊົ່ວຮ້າຍ ແລະ ຄວາມໜ້າກຽດຊັງຂອງພວກເຂົາ.
8 ແລະ ເຫດການຈະບັງເກີດຂຶ້ນຄື ຖ້າຫາກພວກເຂົາບໍ່ກັບໃຈ ເຮົາຈະ ທຳລາຍພວກເຂົາໃຫ້ໝົດສິ້ນໄປຈາກຜືນແຜ່ນດິນໂລກ; ເຖິງຢ່າງໃດກໍຕາມ ພວກເຂົາຈະປະ ບັນທຶກໜຶ່ງໄວ້ ເພື່ອຈະໄດ້ຮັກສາມັນໄວ້ໃຫ້ປະຊາຊາດອື່ນທີ່ຈະມາເປັນເຈົ້າຂອງແຜ່ນດິນ; ແທ້ຈິງແລ້ວ, ເຮົາເຮັດໄປເພື່ອເຮົາຈະເປີດໂສມໜ້າຂອງຜູ້ຄົນພວກນີ້ແກ່ປະຊາຊາດອື່ນ. ແລະ ອະບີນາໄດໄດ້ທຳນາຍແກ່ຜູ້ຄົນພວກນີ້ຫລາຍເລື່ອງ.
9 ແລະ ເຫດການໄດ້ບັງເກີດຂຶ້ນຄື ພວກເຂົາຄຽດແຄ້ນໃຫ້ເພິ່ນ; ແລະ ພວກເຂົາໄດ້ຈັບມັດເພິ່ນ ແລະ ພາເພິ່ນໄປຢູ່ຕໍ່ໜ້າກະສັດ, ແລະ ກ່າວກັບກະສັດວ່າ: ຈົ່ງເບິ່ງ, ພວກຂ້ານ້ອຍໄດ້ຈັບເອົາຄົນຜູ້ນີ້ມາຢູ່ຕໍ່ໜ້າທ່ານ ຜູ້ໄດ້ທຳນາຍເຖິງຄວາມຊົ່ວກ່ຽວກັບຜູ້ຄົນຂອງທ່ານ, ແລະ ກ່າວວ່າພຣະເຈົ້າຈະທຳລາຍພວກເຂົາ.
10 ແລະ ລາວໄດ້ທຳນາຍເຖິງຄວາມຊົ່ວກ່ຽວກັບຊີວິດຂອງທ່ານນຳອີກ, ແລະ ກ່າວວ່າຊີວິດຂອງທ່ານຈະເປັນຄືກັນກັບອາພອນໃນເຕົາໄຟ.
11 ແລະ ລາວໄດ້ເວົ້າອີກວ່າ, ທ່ານຈະເປັນຄືກັນກັບຕົ້ນເຂົ້າທີ່ແຫ້ງໃນທົ່ງ, ຊຶ່ງຖືກຝູງສັດແລ່ນທັບ ແລະ ຢຽບຍ່ຳຢູ່ໃຕ້ຕີນ.
12 ແລະ ອີກຢ່າງໜຶ່ງ, ລາວກ່າວວ່າ ທ່ານຈະເປັນຄືດອກໄມ້ຂອງຕົ້ນໜາມ ຊຶ່ງເວລາມັນບານເຕັມທີ່, ຖ້າລົມພັດມາ ມັນຈະປິວໄປທົ່ວແຜ່ນດິນ. ແລະ ລາວອ້າງວ່າພຣະຜູ້ເປັນເຈົ້າໄດ້ຮັບສັ່ງເລື່ອງນີ້. ແລະ ລາວເວົ້າວ່າທັງໝົດນີ້ຈະເກີດກັບທ່ານ ຖ້າຫາກທ່ານບໍ່ກັບໃຈ, ແລະ ນີ້ເພາະຄວາມຊົ່ວຮ້າຍຂອງທ່ານ.
13 ແລະ ບັດນີ້, ໂອ້ ກະສັດເອີຍ ທ່ານໄດ້ເຮັດຄວາມຊົ່ວອັນໃຫຍ່ຫລວງແນວໃດ, ຫລື ຜູ້ຄົນຂອງທ່ານໄດ້ກະທຳບາບອັນໃຫຍ່ຫລວງແນວໃດ, ຈົນວ່າພວກເຮົາຖືກພຣະເຈົ້າລົງໂທດ ຫລື ຄົນຜູ້ນີ້ຕັດສິນເອົາເອງ?
14 ແລະ ບັດນີ້, ໂອ້ ກະສັດເອີຍ ພວກເຮົາບໍ່ມີຄວາມຜິດ, ແລະ ໂອ້ ກະສັດເອີຍ ທ່ານບໍ່ໄດ້ເຮັດບາບແນວໃດເລີຍ; ສະນັ້ນ, ຄົນຜູ້ນີ້ຈຶ່ງເວົ້າຕົວະກ່ຽວກັບທ່ານ ແລະ ລາວທຳນາຍໄປລ້າໆ.
15 ຈົ່ງເບິ່ງ, ພວກເຮົາເຂັ້ມແຂງ, ພວກເຮົາຈະບໍ່ໄປສູ່ຄວາມເປັນທາດຢ່າງເດັດຂາດ, ຫລື ຖືກສັດຕູເອົາໄປເປັນຊະເລີຍ; ແທ້ຈິງແລ້ວ, ທ່ານເປັນຜູ້ຈະເລີນຮຸ່ງເຮືອງໃນແຜ່ນດິນ ແລະ ຈະຈະເລີນຮຸ່ງເຮືອງຕໍ່ໄປ.
16 ຈົ່ງເບິ່ງ, ນີ້ຄືຄົນຜູ້ທີ່ພວກຂ້ານ້ອຍຈະມອບໃຫ້ຢູ່ໃນມືຂອງທ່ານ; ທ່ານຈົ່ງເຮັດກັບລາວສຸດແລ້ວແຕ່ທ່ານຈະເຫັນດີ.
17 ແລະ ເຫດການໄດ້ບັງເກີດຂຶ້ນຄື ກະສັດໂນອາໄດ້ສັ່ງໃຫ້ເອົາອະບີນາໄດເຂົ້າຄຸກ; ແລະ ເພິ່ນໄດ້ສັ່ງໃຫ້ ພວກປະໂລຫິດມາເຕົ້າໂຮມກັນເພື່ອຈະມີກອງປະຊຸມປຶກສາຫາລືກັນວ່າ ຈະເຮັດແນວໃດກັບເພິ່ນ.
18 ແລະ ເຫດການໄດ້ບັງເກີດຂຶ້ນຄື ພວກເຂົາກ່າວກັບກະສັດວ່າ: ຈົ່ງເອົາຄົນຜູ້ນັ້ນມານີ້ ເພື່ອພວກເຮົາຈະໄດ້ຊັກຖາມ; ແລະ ກະສັດໄດ້ສັ່ງໃຫ້ນຳເອົາອະບີນາໄດມາຢູ່ຕໍ່ໜ້າພວກເຂົາ.
19 ແລະ ພວກເຂົາເລີ່ມສອບຖາມເພິ່ນ, ເພື່ອຈະໄດ້ຈັບເອົາຄວາມຜິດຈາກເພິ່ນ, ເພື່ອພວກເຂົາຈະມີອັນໃດອັນໜຶ່ງເພື່ອກ່າວຫາເພິ່ນ; ແຕ່ເພິ່ນໄດ້ຕອບພວກເຂົາຢ່າງອາດຫານ, ແລະ ແກ້ຄຳຖາມຂອງພວກເຂົາໄດ້ທຸກຂໍ້, ແທ້ຈິງແລ້ວ, ໄດ້ເຮັດໃຫ້ພວກເຂົາປະຫລາດໃຈ; ເພາະເພິ່ນຕອບຄຳຖາມຂອງພວກເຂົາ ໄດ້ທຸກຂໍ້, ແລະ ເຮັດໃຫ້ພວກເຂົາຍອມຈຳນົນໃນຄຳເວົ້າຂອງພວກເຂົາເອງ.
20 ແລະ ເຫດການໄດ້ບັງເກີດຂຶ້ນຄື ຄົນຜູ້ໜຶ່ງໃນພວກເຂົາກ່າວກັບອະບີນາໄດວ່າ: ຂໍ້ຄວາມຊຶ່ງຂຽນໄວ້, ແລະ ຊຶ່ງບັນພະບຸລຸດໄດ້ສິດສອນໄວ້ໝາຍຄວາມວ່າແນວໃດ, ທີ່ວ່າ:
21 ຕີນຂອງຜູ້ທີ່ຢູ່ເທິງພູນັ້ນງາມ ພຽງໃດ ຜູ້ທີ່ໄດ້ນຳເອົາຂ່າວປະເສີດມາ; ທີ່ໄດ້ປະກາດສັນຕິສຸກ; ທີ່ນຳເອົາຂ່າວປະເສີດຂອງຄວາມດີມາ; ທີ່ປະກາດຄວາມລອດ; ທີ່ກ່າວກັບຊີໂອນວ່າ ພຣະເຈົ້າຂອງເຈົ້າຊົງປົກຄອງ;
22 ຄົນຍາມຂອງເຈົ້າຈະເປັ່ງສຽງ; ພວກເຂົາຈະຮ້ອງເປັນສຽງດຽວກັນ; ເພາະພວກເຂົາຈະເຫັນກັບຕາ ເວລາພຣະຜູ້ເປັນເຈົ້າຈະນຳເອົາຊີໂອນກັບຄືນມາອີກ;
23 ຈົ່ງເປັ່ງສຽງປິຕິຍິນດີ; ຮ້ອງເພງນຳກັນ, ກຸງເຢຣູຊາເລັມເອີຍ ເຈົ້າຜູ້ທີ່ເປັນເມືອງຮົກຮ້າງ; ເພາະພຣະຜູ້ເປັນເຈົ້າໄດ້ອອຍໃຈຜູ້ຄົນຂອງພຣະອົງແລ້ວ, ພຣະອົງໄດ້ໄຖ່ກຸງເຢຣູຊາເລັມແລ້ວ;
24 ພຣະຜູ້ເປັນເຈົ້າໄດ້ກາງ ແຂນອັນສັກສິດຂອງພຣະອົງໃນສາຍຕາຂອງປະຊາຊາດທັງປວງ, ແລະ ທົ່ວທີ່ສຸດຂອງແຜ່ນດິນໂລກຈະເຫັນການຊ່ວຍໃຫ້ລອດຂອງພຣະເຈົ້າຂອງພວກເຮົາ.
25 ແລະ ບັດນີ້ອະບີນາໄດກ່າວກັບພວກເຂົາວ່າ: ພວກທ່ານເປັນ ປະໂລຫິດແມ່ນບໍ, ແລະ ອ້າງຕົນເອງເພື່ອສິດສອນຜູ້ຄົນພວກນີ້, ແລະ ເຂົ້າໃຈວິນຍານແຫ່ງການທຳນາຍແລ້ວ, ແລະ ປານນັ້ນຍັງປາດຖະໜາຢາກຮູ້ຈັກຈາກຂ້າພະເຈົ້າວ່າ ສິ່ງເຫລົ່ານີ້ໝາຍຄວາມວ່າແນວໃດ?
26 ຂ້າພະເຈົ້າກ່າວກັບພວກທ່ານວ່າ, ວິບັດແກ່ພວກທ່ານ ເພາະວ່າພວກທ່ານບິດເບືອນທາງຂອງພຣະຜູ້ເປັນເຈົ້າ! ເພາະວ່າຖ້າຫາກພວກທ່ານເຂົ້າໃຈເລື່ອງເຫລົ່ານີ້ ເປັນຫຍັງພວກທ່ານຈຶ່ງບໍ່ສິດສອນພວກເຂົາ; ສະນັ້ນ, ພວກທ່ານໄດ້ບິດເບືອນທາງຂອງພຣະຜູ້ເປັນເຈົ້າ.
27 ພວກທ່ານບໍ່ໄດ້ຕັ້ງໃຈເພື່ອໃຫ້ ເຂົ້າໃຈເລີຍ; ສະນັ້ນ, ພວກທ່ານຈຶ່ງບໍ່ສະຫລາດ. ສະນັ້ນ, ພວກທ່ານສິດສອນສິ່ງໃດແດ່ກັບຜູ້ຄົນພວກນີ້?
28 ແລະ ພວກເຂົາຕອບວ່າ: ພວກເຮົາສິດສອນກົດຂອງໂມເຊ.
29 ແລະ ເພິ່ນໄດ້ກ່າວກັບພວກເຂົາອີກວ່າ: ຖ້າຫາກພວກທ່ານສິດສອນ ກົດຂອງໂມເຊແລ້ວ ເປັນຫຍັງພວກທ່ານຈຶ່ງບໍ່ຮັກສາມັນ? ເປັນຫຍັງພວກທ່ານຈຶ່ງໝົກໝຸ້ນຢູ່ກັບຂອງມີຄ່າ? ເປັນຫຍັງພວກທ່ານຈຶ່ງທຳ ການໂສເພນີ ແລະ ໃຊ້ກຳລັງຂອງພວກທ່ານກັບພວກຜູ້ຍິງໂສເພນີ, ແທ້ຈິງແລ້ວ, ເປັນເຫດໃຫ້ຜູ້ຄົນພວກນີ້ກະທຳບາບນຳກັນອີກ, ຈົນເປັນເຫດໃຫ້ພຣະຜູ້ເປັນເຈົ້າສົ່ງຂ້າພະເຈົ້າມາທຳນາຍແກ່ຜູ້ຄົນພວກນີ້, ແທ້ຈິງແລ້ວ, ຄວາມຊົ່ວອັນໃຫຍ່ຫລວງຈະມາລົງໂທດຜູ້ຄົນພວກນີ້?
30 ພວກທ່ານບໍ່ຮູ້ຈັກບໍວ່າ ຂ້າພະເຈົ້າເວົ້າຄວາມຈິງ? ແທ້ຈິງແລ້ວ, ພວກທ່ານຮູ້ຈັກວ່າຂ້າພະເຈົ້າເວົ້າຄວາມຈິງ; ແລະ ພວກທ່ານຄວນຈະສັ່ນສະທ້ານຢູ່ຕໍ່ພຣະພັກຂອງພຣະເຈົ້າ.
31 ແລະ ເຫດການຈະບັງເກີດຂຶ້ນຄື ພວກທ່ານຈະຖືກລົງໂທດເພາະຄວາມຊົ່ວຮ້າຍຂອງພວກທ່ານ, ເພາະພວກທ່ານກ່າວວ່າ ພວກທ່ານສິດສອນກົດຂອງໂມເຊນັ້ນ. ແລະ ພວກທ່ານຮູ້ຈັກຫຍັງແດ່ກ່ຽວກັບກົດຂອງໂມເຊ? ຄວາມລອດມາເຖິງໂດຍທາງກົດຂອງໂມເຊ ບໍ? ພວກທ່ານຈະຕອບວ່າແນວໃດ?
32 ແລະ ພວກເຂົາໄດ້ຕອບວ່າ ຄວາມລອດມາເຖິງໂດຍທາງກົດຂອງໂມເຊ.
33 ແຕ່ບັດນີ້ອະບີນາໄດໄດ້ກ່າວກັບພວກເຂົາວ່າ: ຂ້າພະເຈົ້າຮູ້ຈັກວ່າ ຖ້າຫາກພວກທ່ານຮັກສາພຣະບັນຍັດຂອງພຣະເຈົ້າແລ້ວ ພວກທ່ານຈະລອດ; ແທ້ຈິງແລ້ວ, ຖ້າຫາກພວກທ່ານຮັກສາພຣະບັນຍັດທີ່ພຣະຜູ້ເປັນເຈົ້າໄດ້ນຳມາໃຫ້ໂມເຊຢູ່ເທິງ ພູຊີນາຍ, ກ່າວວ່າ:
34 ເຮົາຄືພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າ, ຜູ້ ພາເຈົ້າອອກຈາກແຜ່ນດິນເອຢິບ, ອອກຈາກບ້ານເຮືອນແຫ່ງຄວາມເປັນທາດ.
35 ເຈົ້າຈະບໍ່ມີພຣະເຈົ້າອົງ ອື່ນຕໍ່ໜ້າເຮົາ.
36 ເຈົ້າຈະບໍ່ເຮັດຮູບຄວັດສະຫລັກອັນໃດສຳລັບຕົນເອງ ຫລື ເຮັດຮູບສົມມຸດໃນສະຫວັນເບື້ອງເທິງ, ຫລື ສິ່ງຂອງຊຶ່ງຢູ່ໃນແຜ່ນດິນເບື້ອງລຸ່ມ.
37 ບັດນີ້ອະບີນາໄດກ່າວກັບພວກເຂົາວ່າ, ພວກທ່ານເຮັດເລື່ອງທັງໝົດນີ້ແລ້ວບໍ? ຂ້າພະເຈົ້າກ່າວກັບພວກທ່ານ ວ່າ, ບໍ່ເລີຍ, ພວກທ່ານບໍ່ໄດ້ເຮັດ. ແລະ ພວກທ່ານ ສິດສອນຜູ້ຄົນພວກນີ້ໃຫ້ພວກເຂົາເຮັດສິ່ງເຫລົ່ານີ້ທັງໝົດແລ້ວບໍ? ຂ້າພະເຈົ້າກ່າວກັບພວກທ່ານວ່າ, ບໍ່ເລີຍ, ພວກທ່ານບໍ່ໄດ້ສິດສອນ.