1 Im ālikin men kein ke em̧ōj kōtaan eo ruo iiō aetokan, Abinadai eaar itok ilubwiljier ilo kōjakkōlkōl e, bwe ren jab jeļā e, im kar jino n̄an kanaan ilubwiljier, im ba: Āindein Irooj eaar jiron̄ eō, im ba—Abinadai, ilo̧k im kanaan n̄an armej rein Aō, bwe raar kapene burueer ņae Aō innaan, raar ukeļo̧k jaab jān kōm̧m̧an ko aer renana; kōn menin, Inaaj loļo̧k er ilo Aō illu, aaet, ilo Aō illu ebwil Inaaj loļo̧k er ilo jero̧wiwi im mennin jōjō ko aer.

2 Aaet, wo en n̄an epepen in! Im Irooj Eba n̄an eō: Kwōn erļo̧keļo̧k peium̧ im kanaan, im ba: Āindein Irooj ej ba, enaaj itok iien eo bwe epepen in, kōnke jero̧wiwi ko aer, naaj bōkļo̧k er ilo ineen kōm̧akoko, im naaj ubrare ilo jepen; aaet, im armej naaj lukwarkwareļo̧k er, im naaj m̧an er; im bao vulture ko, im kidu ko, aaet, kidu ko rawiia, naaj oran̄ļo̧k kanniōkier.

3 Im enaaj kūrm̧ool bwe mour eo an kiin̄ Noa naaj watōke em̧ool āinwōt juon m̧ōttan nuknuk ilo kijeek ebwil; bwe enaaj jeļā bwe N̄aij Irooj.

4 Im bwe Inaaj den̄ļo̧ke armej rein Aō kōn kaen̄tanaan ko rōkōmmetak, aaet, kōn n̄ūta im kōn nan̄inmej; im Inaaj kōm̧m̧an bwe ren naaj in̄n̄ūr aolepān raan eo.

5 Aaet, im Inaaj kōm̧m̧an bwe ren naaj lukwōj eddo ko ioon ālikier; im naaj lukwarkware er im̧aan āinwōt donkey ewūdeakeak.

6 Im ālikin men kein Inaaj jilkinļo̧k wōt dekā ko ilubwiljier, im enaaj m̧an er; im renaaj barāinwōt mej jān kūtuon rear; im māniddik ko renaaj ko̧kkure āneo āneer barāinwōt, im oran̄ļo̧k aer grain.

7 Im naaj den̄ļo̧ke er kōn juon nan̄inmej eļap—im aolep men in Inaaj kōm̧m̧an kōnke jero̧wiwi ko im nana ko aer.

8 Im ijello̧kun wōt n̄e rej ukeļo̧k Inaaj lukkuun ko̧kkure er jān mejān laļ in; ijoke renaaj likūt juon ļo̧o̧k ilikier, im Inaaj kōjparoki n̄an laļ ko renaaj bōk āneo; aaet, em̧ool men in Inaaj kōm̧m̧an bwe In maron̄ kwaļo̧k mennin jōjō ko an armej rein n̄an laļ ko jet. Im elōn̄ men ko Abinadai eaar kanaan ņae armej rein.

9 Im ālikin men kein raar illu ippān; im raar bōk e im ineekļo̧k elokjak im̧aan kiin̄ eo, im ba n̄an kiin̄ eo: Lo, kōm ar bōktok juon em̧m̧aan im̧am̧ eo eaar kanaan nana kōn armej rein am̧, im ej ba bwe Anij enaaj ko̧kkure er.

10 Im eaar barāinwōt kanaan nana kōn mour eo am̧, im ej ba bwe mour eo am̧ naaj āinwōt juon m̧ōttan nuknuk ilo kijeek ebwil.

11 Im bar juon alen, ej ba bwe kwōnaaj āinwōt juon kilin wūt, em̧ool āinwōt kilin wūt em̧ōrā in meļaaj eo, eo ej mennin mour ko rej ettōr ioon im jujuri ium̧win ne.

12 Im bar juon alen, ej ba kwōnaaj āinwōt ebbōl ko in juon mar kuuj, eo, n̄e ej lukkuun kalo, eļan̄n̄e kōto ej m̧akroro, ej pookļo̧k e ioon mejān āneo. Im e ej ba etan n̄e Irooj eaar kōnono e. Im e ej ba aolep men in naaj itok ioom̧ ijello̧kun wōt n̄e kwōj ukeļo̧k, im men in kōnke jero̧wiwi ko am̧.

13 Im kiiō, O kiin̄, ta nana in eļap kwaar kōm̧m̧ane, ak ta jero̧wiwi ko armej ro doom raar kōm̧m̧ani, bwe jen aikuj in bōk liaakeļo̧k an Anij ak ekajet jān ļein?

14 Im kiiō, O kiin̄, lo, kōm ejjeļo̧k ruōm̧, im kwe, O kiin̄, kwaar jab jero̧wiwi; kōn menin ļein eaar riab kōn kwe, im eaar kanaan ilo waan.

15 Im lo, kōm kajoor, kōm naaj jab itok ilo ineen kōm̧akoko, ak po jān ro am rikōjdat; aaet, im kwaar jeraam̧m̧an ilo āneo, im kwōnaaj barāinwōt jeraam̧m̧an.

16 Lo, en̄in armej in, kōmij lewōj ilo peium̧; kwo m̧aron̄ kōm̧m̧an n̄an e āinwōt kwōj lo em̧m̧an.

17 Im ālikin men kein kiin̄ Noa eaar kōm̧m̧an bwe Abinadai en ilo̧k ilo kalbuuj; im eaar jiron̄ bwe pris ro ren kuktok ippān doon bwe en maron̄ kōm̧m̧ane juon pepe ippāer kōn ta en aikuj kōm̧m̧ane kōn e.

18 Im ālikin men kein raar ba n̄an kiin̄ eo: Kwōn bōktok e ijin bwe kōmin maron̄ kajitūkin e; im kiin̄ eo eaar jiron̄ bwe en itok im̧aer.

19 Im raar jino kajitūkin e, bwe ren maron̄ aujiidi e, bwe kōn menin ren maron̄ wōr men eo n̄an ņa ruōn; a eaar uwaak er ilo kajoor, im jutak ņae aolep kajjitōk ko, aaet, n̄an aer kanooj bwilōn̄; bwe eaar jutak ņae er ilo aolep kajjitōk ko aer, im eaar kaikōn̄ er ilo aolep naan ko aer.

20 Im ālikin men kein juon iaer eaar ba n̄an e: Ta meļeļein naan ko kar jeje, im ko kar katakin jān ro jemād, im ba:

21 Renan̄in wūlio ioon toļ ko rej neen eo ej bōktok naan ko rem̧m̧an; eo ej kajeeded aenōm̧m̧an; eo ej bōktok naan ko rem̧m̧an kōn em̧m̧an; eo ej kajeeded lo̧mo̧o̧r; eo ej ba n̄an Zaion, Am̧ Anij ej irooj;

22 Rikakkōl ro am renaaj kotak ainikier; kōn ainikien eo rej naaj jim̧or al; bwe renaaj lo māj n̄an māj n̄e Irooj enaaj bar bōktok Zaion.

23 Kom̧in n̄irļo̧k ilo lan̄lōn̄; kom̧in al ippān doon kom̧ jikin ko rejeepepļo̧k ilo Jerusalem; bwe Irooj eaar kaenōm̧m̧an armej ro An, Eaar lo̧mo̧o̧ren Jerusalem;

24 Im Irooj eaar kakeelwaan pein ekwōjarjar ilo mejān aolep laļ ko, im aolepān jeban ko in laļ renaaj lo lo̧mo̧o̧r eo an ad Anij?

25 Im kiiō Abinadai eaar ba n̄an er: Kom̧ pris ro, kom̧ij riab n̄an katakin armej rein, im n̄an meļeļe jitōbōn kanaan, im mekarta kom̧ kōņaan jeļā jān eō ta meļeļein men kein ke?

26 Im ij ba n̄an kom̧, wo en n̄an kom̧ kōn kaankekeik iaļ ko an Irooj! Bwe eļan̄n̄e kom̧ meļeļe men kein kom̧ ar jab katakin kaki; kōn menin, kom̧ ar kaankeke iaļ ko an Irooj.

27 Kom̧ ar jab ajeļo̧k būruōmi n̄an meļeļe; kōn menin, kom̧ ar jab mālōtlōt. Kōn menin, ta kom̧ij katakin armej rein?

28 Im rej ba: Kōmij katakin kien Moses.

29 Im bar juon alen eba n̄an er: Eļan̄n̄e kom̧ij katakin kien Moses etke kom̧ij jab kōjparok e? Etke kom̧ij likūt būruōmi ioon m̧weie ko? Etke kom̧ij kōm̧m̧ani jerbal in ļōn̄ ko im joļo̧k ami kajoor ippān kōrā ro rekijon̄, aaet, im kōm̧m̧an bwe armej rein ren kōm̧m̧an jero̧wiwi, bwe Irooj en kōm̧m̧an n̄an jilkintok eō n̄an kanaan ņae armej rein, aaet, em̧ool juon nana eļap ņae armej rein?

30 Kom̧ij jab jeļā ke n̄aij kōnono m̧ool eo? Aaet, kom̧ jeļā bwe ij kōnono m̧ool eo; im kom̧ij aikuj in wūdiddid im̧aan Anij.

31 Im kom̧ naaj jako kōn jero̧wiwi ko ami, bwe kom̧ ar ba bwe kom̧ij katakin kien Moses. Im ta kom̧ jeļā kōn kien Moses? Lo̧mo̧o̧r ej itok ke jān kien Moses? Ta kom̧ij ba?

32 Im raar uwaak im ba bwe lo̧mo̧o̧r eaar itok jān kien Moses.

33 A kiiō Abinadai eba n̄an er: I jeļā bwe eļan̄n̄e kom̧ij kōjparok kien ko an Anij kom̧ naaj mour; aaet, eļan̄n̄e kom̧ij kōjparok kien ko Irooj eaar liļo̧k n̄an Moses ilo toļ Sainai, im ba:

34 N̄aij Irooj am̧ Anij, eo Eaar bōktok eok jān āneen Ijipt, jān im̧ōn ineen kōm̧akoko.

35 En ejjeļo̧k bar Anij ippam̧ ijello̧kū.

36 Kwōn jab kōm̧anm̧an n̄an eok jabdewōt ekjab, ak jabdewōt āinwōt wāween in ilan̄, ak men ko rej pād ilaļ ium̧win.

37 Kiiō Abinadai eba n̄an er, Kom̧ ar kōm̧m̧an ke aolep men in? Ij ba n̄an kom̧, Jaab, kom̧ ar jab. Im kom̧ ar katakin armej rein bwe ren kōm̧m̧an aolep men kein? Ij ba n̄an kom̧, Jaab, kom̧ ar jab.