1 Iwe iei nupwen ewe king a rongorong ekkei kapas, a apasa ngeni noun kewe pris: Asueno ei mwan, me nieno i; pun met sipwe fori ngeni, pun i mi umwes.

2 Iwe ra uta me sossot ne wata pour won; nge a ungeni ir, me apasa ngeni ir:

3 Ousap attapaei, pun Kot epwe wichikemi ika oupwe wata poumi woi, pun usamo apasa ewe porous minne ewe Samon a tinieito pwe upwe apasa; usamo pwan erenikemi met minne oua fen eis pwe upwe apasa; iei minne, Kot esap mutata pwe upwe ninnino atun ei fansoun.

4 Nge upwe apwonueta ekkewe annuk ren minne Kot a fen annuku ngeniei; iwe pokiten ua fen erenikemi ewe ennet oua song rei. Iwe pwan, pokiten ua fen apasa ewe kapasen Kot oua apungaeino pwe ngang mi umwes.

5 Iei non ewe fansoun mwirin Apinatai a apasa ekkei kapas ekkewe aramasen king Noah rese pwaracho ne wata pour won, pun Ngunun ewe Samon a nom won; iwe mesan a saram ren saramaram mi napanap, pwan mwo usun mesan Moses we a saram nupwen a nom won ewe chukun Sinai, nupwen a kapas ngeni ewe Samon.

6 Iwe a kapas ren manaman me mumuta seni Kot; iwe a sopweno an kewe kapas, a apasa:

7 Oua kuna pwe ese wor ami pochokun ami oupwe nieino, iei minne ua awesano ai porous. Ewer, ua weweiti pwe a pokukemi tori netipemi pokiten ua erenikemi ewe ennet usun ami angangangaw.

8 Ewer, iwe ai kewe kapas ra aurakemino ren mwar me esukusuk, me ren song.

9 Nge ua awesano ai porous; iwe mwirin ese auchea ian upwe feino ie, ika pwe upwe manau.

10 Nge ei ukukun ua erenikemi, met oupwe fori ngeniei, mwirin ei, epwe pwan usun ew napanap me ununun mettoch minne repwe feito.

11 Iwe iei ua annea ngenikemi amuchunon ekkewe annukun Kot, pun ua weweiti pwe rese makketiw non netipemi; ua weweiti pwe oua fen kaeo me afanafana mettoch mi ngaw non unusen manauemi.

12 Iwe iei, oupwe chechemeni met ua apasa ngenikemi: Ousap fori ngenikemi ekkoch nios mi fanafan are ekkoch nikinikin mettoch minne ra nom non nang asan, are minne ra nom non fonufan fan, are minne ra nom non ewe konik fan ewe fonufan.

13 Iwe pwan: Ousap chappetiw ngeni ir, are angang ngeni ir; pun ngang ewe Samon ami Kot ngang emon Kot mi uren memef, upwe churi ekkewe semirit ren niwinin tipis pokiten angangangawen semer kewe, tori ewe aunungatin me aruwanun tappin aramasen ir ekkewe ra oput ngang;

14 Me pwarano umoumoch ngeni ngorowun me neir ekkewe ra tongeiei me aneasochisi ai kewe annuk.

15 Ousap pan-muani iten ewe Samon ami Kot; pun ewe Samon esap apungu i pwe mi nimenimoch ewe a pan-muani itan.

16 Chechemeni ewe ranin sabbath, pwe oupwe pinini.

17 Wonu ran oupwe angang, me fori ami angang meinisin;

18 Nge ewe afisuwen ran, ewe sabbath an ewe Samon ami Kot, ousap fori och angang, ami, are noumi anuon, are noumi fopun, noumi kewe mwan chon angang, are noumi kewe fefin chon angang, are noumi man, are noumi wasona ewe mi nom non kinikinin neniemi;

19 Pun non wonu ran ewe Samon a fori nang me fonufan, me ewe sat, me ekkewe mettoch meinisin ra nom non; ina minne ewe Samon a efeiochu ewe ranin sabbath, me epinano.

20 Sufonu sememi me inemi, pwe ranimi kewe repwe nangatam me won ewe fonu minne ewe Samon ami Kot a ngenikemi.

21 Ousap ninni.

22 Ousap fori nisou. Ousap sona.

23 Ousap tipi muan ngeni chon orumi.

24 Ousap mocheniaiti imwen chon orumi, ousap mocheniaiti punuwen chon orumi, are noun we mwan chon angang, are noun we fefin chon angang, are noun oks, are noun tongki, are mettoch an chon orumi.

25 Iwe non ewe fansoun mwirin Apinatai a awesano ekkei kapas pwe a apasa ngeni ir: Oua fen aiti ekkei aramas pwe repwe achocho ne fori ekkei mettoch meinisin ar repwe aneasochisi ekkei annuk?

26 Ua apasa ngenikemi, Apw; pun ika oua fen fori, ewe Samon esap fen fori pwe upwe feito me osini mettoch mi ngaw usun ekkei aramas.

27 Iwe iei oua fen apasa pwe amanau a feito seni ewe annukun Moses. Ua apasa ngenikemi pwe mi auchea pwe oupwe aneasochisi ewe annukun Moses iei; nge ua apasa ngenikemi, pwe ewe fansoun epwe feito nupwen esap chiwen auchea ami oupwe aneasochisi ewe annukun Moses.

28 Iwe soposopono, ua apasa ngenikemi, pwe amanau ese feito chok seni ewe annuk; iwe ika esap fan iten ewe achasefan, minne Kot pwisin epwe fori fan iten tipisin me angangangawen noun kewe aramas, repwe wesewesen fokkun mano non pekin ngun, ina mwo ewe annukun Moses.

29 Iwe iei ua apasa ngenikemi pwe mi auchea pwe epwe wor ew annuk epwe kawor ngeni ekkewe aramasen Israel, ewer, pwan mwo ewe annuk mi tichik; pun ra aramas nukumach, ra mwitir ne fori mettoch mi ngaw, me mang ne chechemeni ewe Samon ar Kot;

30 Iei minne mi fen wor ew annuk a kawor ngeni ir, ewer, ew annukun mwokutukut me angangepin, ew annuk minne repwe tichik ne aneasochisi seni ran me ran, ar repwe nonnom non chechemenien Kot me wiiser ngeni i.

31 Nge nengeni, ua apasa ngenikemi, pwe ekkei mettoch meinisin ir esisinen mettoch repwe feito.

32 Iwe iei, ra weweiti ewe annuk? Ua apasa ngenikemi, Apw, meinisin rese weweiti ewe annuk; iwe ei pokiten pochokunen netiper; pun rese weweiti pwe ese tongeni wor emon epwe manau tiwenon chok ika epwe seni ewe ngasenon Kot.

33 Pun nengeni, met Moses ese osini ngeni ir usun ewe wareton ewe Messiah, me Kot epwe angasano noun kewe aramas? Ewer, me pwan ekkewe soufos meinisin ekkewe ra fen osini nupwen ewe fonufan a poputa—met rese mwo kapas chommong are chokukkun usun ekkei mettoch?

34 Met resamo apasa pwe Kot pwisin won inisin epwe feitiw nein ekkewe noun aramas, me wata pwisin won ewe napanapen aramas, me feino non manaman mi napanap won unungen fonufan?

35 Ewer, iwe met resamo fen pwan apasa pwe i epwe efisi ewe manausefanin ekkewe mi mano, me i, pwisin won inisin, epwe weires me riaffou?