1 ఇంకను యెషయా ఇట్లు చెప్పలేదా: మేము తెలియజేసిన సమాచారము ఎవడు నమ్మెను? ప్రభువు బాహువు ఎవనికి బయలుపరచబడెను?

2 లేత మొక్కవలెను ఎండిన భూమిలో మొలిచిన మొక్కవలెను అతడు ఆయన యెదుట పెరిగెను; అతనికి సురూపమైనను సొగసైనను లేదు; మనము అతని చూచి, ఆపేక్షించునట్లుగా అతనియందు సురూపము లేదు.

3 అతడు తృణీకరింపబడినవాడును ఆయెను; మనుష్యుల వలన విసర్జింపబడినవాడును, వ్యసనాక్రాంతుడుగాను, వ్యాధిననుభవించిన వాడుగాను, మనుష్యులు చూడనొల్లనివాడుగాను ఉండెను. అతడు తృణీకరింపబడినవాడు గనుక మనము అతడిని ఎన్నిక చేయకపోతిమి.

4 నిశ్చయముగా అతడు మన రోగములను భరించెను, మన వ్యసనములను వహించెను; అయినను మొత్తబడినవానిగాను దేవునివలన బాధింపబడిన వానిగాను శ్రమనొందినవానిగాను మనమతనిని ఎంచితిమి.

5 మన అతిక్రమక్రియలనుబట్టి అతడు గాయపరచబడెను, మన దోషములనుబట్టి నలుగగొట్టబడెను; మన సమాధానార్థమైన శిక్ష అతనిమీద పడెను; అతడు పొందిన దెబ్బలచేత మనకు స్వస్థత కలుగుచున్నది.

6 మనమందరము గొఱ్ఱెల వలే త్రోవ తప్పిపోతిమి; మనలో ప్రతివాడును తనకిష్టమైన త్రోవకు తొలిగెను; ప్రభువు మన అందరి దోషమును అతనిమీద మోపెను.

7 అతడు దౌర్జన్యము నొందెను, బాధింపబడినను అతడు నోరు తెరవలేదు; వధకు తేబడు గొఱ్ఱెపిల్లయు బొచ్చు కత్తిరించు వాని యెదుట గొఱ్ఱెయు మౌనముగా ఉండునట్లు అతడు నోరు తెరవలేదు.

8 అన్యాయపు తీర్పునొందినవాడై అతడు కొనిపోబడెను; అతడు నా జనుల అతిక్రమమును బట్టి మొత్తబడెను గదా. సజీవుల భూమిలో నుండి అతడు కొట్టివేయబడెను; అయినను అతని తరమువారిలో ఈ సంగతి ఆలోచించిన వారెవరు?

9 అతడు మరణమైనప్పుడు భక్తిహీనులతో అతనికి సమాధి నియమింపబడెను; ధనవంతుని యొద్ద అతడు ఉంచబడెను; నిశ్చయముగా అతడు అన్యాయమేమియు చేయలేదు, అతని నోట ఏ కపటమును లేదు.

10 అతడిని నలుగగొట్టుటకు ప్రభువుకు ఇష్టమాయెను; ఆయన అతనికి వ్యాధి కలుగజేసెను; ఆయన అతడిని అపరాధపరిహారార్థబలి చేయగా అతడు తన సంతానమును చూచును, అతడు దీర్ఘాయుష్మంతుడగును, ప్రభువు ఉద్దేశ్యము అతని వలన సఫలమగును.

11 అతడు తనకు కలిగిన వేదనను చూచి తృప్తినొందును; నీతిమంతుడైన నా సేవకుడు జనుల దోషములను భరించి తనకున్న అనుభవజ్ఞానము చేత అనేకులను నిర్దోషులుగా చేయును.

12 కావున గొప్ప వారితో నేనతనికి పాలుపంచిపెట్టెదను, ఘనులతో కలిసి అతడు కొల్లసొమ్ము విభాగించుకొనును; ఏలయనగా మరణమునొందునట్లు అతడు తన ప్రాణమును ధారపోసెను; అతిక్రమము చేయువారిలో యెంచబడినవాడాయెను; అనేకుల పాపమును భరించుచు తిరుగుబాటు చేసినవారిని గూర్చి విజ్ఞాపనము చేసెను.