1 Ioe, e oo ia Isaia pe le’i fai mai ea: O ai ea ua talitonu i la matou tala, ma o ai ua faaali i ai le aao o le Alii?

2 Ona o le a tupu a’e o ia i ona luma e pei o se laau mu’amu’a, ma pei o se a’a ua totogo a’e mai le eleele mātūtū; ua leai sona aulelei po o se matagofie; ma a tatou vaai ia te ia e leai sona lalelei tatou te mananao ai ia te ia.

3 Ua inosia ma teena o ia e tagata; o se tagata o faanoanoa, ma ua masani ma le tigā; e peiseai ua ’alo ese o tatou mata mai ia te ia; sa inosia o ia, ma ua tatou lē amanaia o ia.

4 E moni lava ua tauave e ia o tatou tigā, ma tauave o tatou faanoanoa; peitai sa tatou manatu ia te ia ua taia, ua fasia e le Atua, ma ua faapuapuagatia.

5 Peitai sa faamanu’alia o ia mo a tatou solitulafono, sa tu’imomomo o ia mo a tatou amioletonu; sa i ona luga le a’oa’iga mo lo tatou filemu; ma o ona faalavalava ua faamaloloina ai i tatou.

6 O i tatou uma, e pei o mamoe, ua se ese; ua tatou taitasi ma liliu atu le tagata i lona lava ala; ma ua tauave e le Alii i ona luga amioletonu a i tatou uma.

7 Na sauaina o ia, ma sa faapuapuagatiaina o ia, ae sa lē tatalaina e ia lona fofoga; ua aumai o ia e pei o se tamai mamoe a fasia, ma e pei o se mamoe gūgū i luma o ona selefulufulu ua faapea ona lē tatalaina ai e ia lona fofoga.

8 Sa aveese atu o ia mai le falepuipui ma mai le faamasinoga; ma o ai na te tala atu lona tupulaga? Ona sa vavae ese o ia mai le laueleele o tagata soifua; ona sa taia o ia mo solitulafono a lo’u nuu.

9 Ma sa fai e ia lona tuugamau faatasi ma le amioleaga, ma faatasi ma le mau’oa i lona maliu; ona sa le’i faia e ia se mea leaga, pe sa i ai se taufaasesē i lona fofoga.

10 Peitai sa finagalo le Alii e faamanu’alia o ia; ua ia tuu o ia ia faanoanoa; pe a e faia lona agaga o se taulaga mo agasala, o le a vaai o ia i ana fanau, o le a ia faalevalevaloa ona aso, ma o le a manuia le finagalo o le Alii i lona aao.

11 O le a silasila o ia i le mafatia o lona agaga, ma o le a malie i ai; o lona malamalama o le a ta’uamiotonu ai e la’u auauna amiotonu le toatele; ona o le a tauave e ia a latou amioletonu.

12 O lea o le a ou vavae atu ai ia te ia se vaega faatasi ma e ua silisili, ma o le a ia vaevaeina le vete faatasi ma e malolosi; ona sa sasaa atu e ia lona agaga e oo i le oti; ma sa faitauina o ia faatasi ma e solitulafono; ma sa ia tauaveina agasala a le toatele, ma faia le ’ai’oiga mo e solitulafono.