1 Iwe iei Apinatai a apasa ngeni ir: Ua mochen pwe oupwe weweiti pwe Kot pwisin won inisin epwe feitiw nein ekkewe noun aramas, me epwe angasano noun kewe aramas.

2 Iwe pokiten a nonnom non aion i epwe iteni ewe Noun Kot, iwe pokiten a anemenema ewe aion ngeni mochenin ewe Sam, i ewe Sam me ewe Nau—

3 Ewe Sam, pokiten a fis me ren ewe manamanen Kot; me ewe Nau, pokiten ewe aion; iei a winiti ewe Sam me Nau—

4 Iwe ir ra emon Kot, ewer, ewe ennetin Sam Esemuch seni nang me seni fonufan.

5 Iwe iei ewe aion epwe nom fan nemenien ewe Ngun, are ewe Nau ngeni ewe Sam, ir emon Kot, a engino ngeni sossot, me ese fang ngeni sossot, nge a mutata inisin pwe repwe turunufasei, me ninni, me katuruu, me epwe ketiwengaw me ren noun kewe aramas.

6 Mwirin meinisin ekkei, mwirin an epwe anganga chommong manaman mi napanap me nein ekkewe noun aramas, i epwe emmwenino, ewer, pwan mwo usun Isaiah a apasa, usun emon siip me mwen ewe chon fichi unan ese tongeni kapas, iwe ese suki awan.

7 Ewer, usun chok an epwe emmwenino, irapengesino, me ninnino, ewe aion epwe pwan nom fan nemenien mano, ewe mochenin ewe Nau epwe kuf ren mochenin ewe Sam.

8 Iwe iei Kot a muti ekkewe senin mano, pokiten i a awesano an akkufu mano; a ngeni ewe Nau manaman an epwe fori ew affor fan iten ekkewe noun aramas—

9 A feita ngeni nang, a wor ren ewe nenuken umoumoch; a uren kirekiroch ngeni ekkewe noun aramas; a uta nefinen ir me pungoch; a muti ekkewe senin mano, a wata pwisin won ar angangangaw me ar atai annuk, a fen angasereno, me a amenemenochu ekkewe mochenin pungoch.

10 Iwe iei ua apasa ngenikemi, ion epwe affata mwirimwirin? Nengeni, ua apasa ngenikemi, pwe nupwen ngunun epwe foruno pwe epwe ew asor fan iten tipis i epwe kuna mwirimwirin. Iwe iei met oupwe apasa? Me ion epwe mwirimwirin?

11 Nengeni ua apasa ngenikemi, pwe ir ekkewe ra fen rongorong ekkewe kapasen ekkewe soufos, ewer, ekkewe soufos mi fel meinisin ekkewe ra fen osini usun wareton ewe Samon—Ua apasa ngenikemi, pwe ekkewe meinisin ra fen ausening ngeni ar kewe kapas, me nuku pwe ewe Samon epwe angasano noun kewe aramas, me ekkewe ra fen esuku ena ran ren ew omusomusen ar kewe tipis, ua apasa ngenikemi, pwe ikkei ir mwirimwirin, are ir ekkewe repwe muuni ewe muun Kot.

12 Pun ikkei ir ekkewe ar tipis i a fen engino ngeni; ikkei ir ekkewe i a fen mano fan iter, a angasereno seni ar atai annuk. Iwe iei, esap ir mwirmwirin?

13 Ewer, me esap ekkewe soufos, emon me emon a fen suki awan pwe epwe osini, ewe esamo turutiw non atai annuk, ua ekieki usun ekkewe soufos mi fel meinisin nupwen ewe fonufan a poputa? Ua apasa ngenikemi pwe ir ekkewe mwirimwirin.

14 Iwe ikkei ir ekkewe ra fen afanafana kinamwe, ekkewe ra fen wato porousen pwapwan mettoch mi och, ekkewe ra fen afanafana amanau; me a apasa ngeni Zion: Om Kot a nemenem!

15 Iwe O ifa me ningen won ekkewe chuk ikewe pecher epwe nonnom ie!

16 Iwe pwan, ifa me ningen won ekkewe chuk ikewe pechen ekkewe ra afanafana kinamwe!

17 Iwe pwan, ifa me ningen won ekkewe chuk ikewe pechen ekkewe ir repwe afanafana kinamwe mwirin ei fansoun, ewer, seni ei fansoun tori feinfeino me esap much!

18 Iwe nengeni, ua apasa ngenikemi, esap ikkei meinisin. Pun O ifa me ningen won ekkewe chuk ikewe pechen i ewe a wato porousen pwapwan mettoch mi och, i ewe a forata kinamwe, ewer, pwan mwo ewe Samon, ewe a angasano noun kewe aramas; ewer, i ewe a awora amanau ngeni noun kewe aramas;

19 Pun ika esap ren ewe ngaseno minne i a fen fori fan iten noun kewe aramas, minne a monneta seni ewe nongonongen fonufan, ua apasa ngenikemi, ika esap ren ei, aramas meinisin repwe fokkun mano non pekin ngun.

20 Nge nengeni, ekkewe senin mano repwe muno, iwe ewe Nau epwe nemenem, me epwe wor an pochokun won mano; iei minne, a efisi ewe manausefanin ekkewe mi mano.

21 Iwe a feito ew manausefan, pwan mwo ew aewin manausefan; ewer, pwan mwo ew manausefanin ekkewe ir mi manau akkom, me manau iei, me ekkewe repwe manau, pwan mwo ewe manausefanin Kraist—pun iei met epwe iteni.

22 Iwe iei, ewe manausefanin ekkewe soufos meinisin, me ekkewe meinisin ra fen nuku non ar kewe kapas, are ekkewe meinisin ra fen aneasochisi ekkewe annukun Kot, repwe feito non ewe aewin manausefan; iei minne, ir ekkewe aewin manausefan.

23 Ra manaueta pwe repwe nonnom ren Kot ewe a fen angasereno; iei a wor ar manau esemuch me non Kraist, ewe a fen muti ekkewe senin mano.

24 Iwe ikkei ir ekkewe epwe wor ar kinikin non ewe aewin manausefan; me ikkei ir ekkewe ra fen mano me mwen an Kraist feito, non ar rese sinei, ewe afanafanen amanau ese kawor ngeni ir. Iwe iei ewe Samon a efisi niwin sefaniton ekkei; iwe a wor ar kinikin non ewe aewin manausefan, are a wor ar manau esemuch, pokiten ra ngaseno me ren ewe Samon.

25 Iwe kukkun semirit a pwan wor ar manau esemuch.

26 Nge nengeni, me nuokus, me chechech me mwen Kot, pun ita oupwe chechech; pun ewe Samon esap angasano emon ekkena sokkun ekkewe ra ungeni i me mano non ar tipis; ewer, pwan mwo ekkewe meinisin ra fen mano non ar tipis nupwen ewe fonufan a poputa, ekkewe ra fen finata repwe ungeni Kot, ekkewe ra fen sinei usun ekkewe annukun Kot, me resap aneasochisi ir; ikkei ir ekkewe ese wor ar kinikin non ewe aewin manausefan.

27 Iei minne met ita ousap chechech? Pun amanau esap feito ngeni emon ekkena sokkun; pun ewe Samon esap angasano emon ekkena sokkun; ewer, ewe Samon esap pwan tongeni angasano ekkena sokkun; pun i ese tongeni amam inisin; pun i ese tongeni amam pungoch nupwen a angei nemenian.

28 Iwe iei ua apasa ngenikemi pwe ewe fansoun epwe feito pwe amanauen ewe Samon epwe fatteno ngeni muu meinisin, einang, sokopaten kapas, me aramas.

29 Ewer, Samon, noumi kewe chon mas repwe anoumwongata neuwer; ren mongungur fengen repwe kon; pun repwe kuna ren meser, nupwen ewe Samon epwe uweiato sefan Zion.

30 Puchoruu non pwapwa, kon fengen, ami neni mi pon non Jerusalem; pun ewe Samon a fen ekinamwei noun kewe aramas, i a fen angeisefani Jerusalem.

31 Ewe Samon a fen pwarano poun mi fen me ne mesan ekkewe muu meinisin; me unusen nesopun ewe fonufan meinisin repwe kuna ewe amanauen ach Kot.