1 ’E i teienei, i muri a’era, ’ia oti a’era tā Abinadi paraura’a i teie nei mau parau, ’ua fa’atoro atu ra ’oia i tōna rima, ’e ’ua nā ’ō atu ra : Tē vai ra te taime e ’ite ai te mau ta’ata ato’a i te fa’aorara’a a te Fatu ; ’ei reira tō te mau nūna’a ato’a, ’e tō te mau ’ōpū ato’a, ’e tō te mau reo ato’a, ’e te mau ta’ata ato’a e ’ite ai te mata ’e te mata ’e e fā’i ai i mua i te Atua ē, e mea parauti’a tāna ra mau ha’avāra’a.

2 ’E i reira te feiā parauti’a ’ore e hurihia ai i rāpae ma te ’auē, ’e te ’oto ’e te autā, ’e te ’au’au i tō rātou niho ; ’e ’ua ro’ohia rātou i teie nei mau mea nō te mea ’aita rātou i ha’apa’o i te reo o te Fatu ; nō reira ’aita te Fatu e fa’aora ia rātou.

3 ’E nō te hina’aro pae tino ho’i rātou ’e nō te diabolo, ’e e mana tō te diabolo i ni’a ia rātou ; ’oia ïa, ’o taua ’ōphī tahito ra tei ha’avare i tō tātou nā metua mātāmua ra, ’o te tumu ïa nō tō rāua hi’ara’a ; ’e ’o te reira ho’i te tumu i riro ai te mau ta’ata ato’a ’ei mea hina’aro i tō te ao nei, i tō te tino, ’e i tā te diabolo, ma te ’ite i te maita’i ’e te ’ino, ’e ’a auraro ai i te diabolo ra.

4 ’E nā reira ho’i te mau ta’ata ato’a i te mo’e ; ’E inaha, ’ua mo’e rātou ē a muri noa atu ’āhiri ’aita te Atua i fa’aora i tōna ra mau ta’ata i roto i tō rātou huru mo’era’a ’e te hi’ara’a.

5 ’A ha’amana’o rā ē, ’o ’oia ’o tē onoono noa i roto i tōna iho huru tāhuti ra, ’e ’a tāmau noa ai i te haere nā ni’a i te ’ē’a o te hara ’e te mārō i te Atua, e vai noa ’oia i roto i tōna huru hi’ara’a, ’e tei raro a’e ’oia i te mana o te diabolo. Nō reira, tē vai ra ïa ’oia mai te au ra ē, ’aita e fa’aorara’a i ha’apa’ohia ra, ’e e ’enemi ïa ’oia nō te Atua ; e ’enemi ato’a ho’i te diabolo nō te Atua.

6 ’E i teienei, ’āhiri ’aita te Mesia i tae mai i te ao nei, ’aita ato’a e fa’aorara’a. Tē parauhia nei te reira nō ni’a i te mau mea e tae mai, mai te mea ra ē ’ua tupu mau te reira i teienei.

7 ’E ’āhiri ’aita te Mesia i ti’afa’ahou mai mai te pohe mai, ’e ’aore rā i hahae i te mau tā’amu nō te pohe ra ’ia ’ere tō te mēnema rē, ’ia ’ore ho’i tō te pohe e tara, ’aita roa ïa e ti’afa’ahoura’a i reira.

8 Tē vai ra rā te ti’afa’ahoura’a, nō reira ’aita tō te mēnema e rē ; ’e te tara o te pohe, ’ua horomi’ihia ïa i te Mesia ra.

9 ’O ’oia te māramarama ’e te ora o te ao nei ; ’oia ïa, te hō’ē māramarama hope ’ore, ’o tē ’ore roa e pōiri ; ’oia ïa, ’o te ora hope ’ore ato’a ïa, ’e ’aita roa e pohe fa’ahou.

10 ’E teie nei tino tāhuti, e riro ïa ’ei tino tāhuti ’ore, ’e teie nei tino pohe noa, e riro ïa ’ei tino pohe ’ore, ’e e fa’ati’ahia i mua i te ha’avāra’a a te Atua, ’ia ha’avāhia e ana mai te au i tā rātou ra mau ’ohipa, mai te mea e mea maita’i te reira ’e ’aore rā mai te mea e mea ’ino te reira—

11 ’O tei maita’i ra, i te ti’afa’ahoura’a nō te ora hope ’ore ’e te ’oa’oa hope ’ore ; ’e ’o tei ’ino ra, i te ti’afa’ahoura’a i te pohe hope ’ore ; i te tu’ura’ahia atu i te diabolo, ’o tei fa’aauraro ia rātou, ’o te pohe ïa—

12 I haere noa rātou nā roto i tō rātou iho mau hina’aro pae tino ’e mau mana’o pae tino ; ma te ’ore roa e ti’aoro atu i te Fatu ’a fa’atoro noa mai ai ’oia i tōna rima aroha ia rātou ra ; ’e ’ua fa’atoro-noa-hia mai ho’i te rima aroha ia rātou ’e ’aita rā rātou e fāri’i atu ; ’ua a’ohia rātou nō ni’a i tā rātou mau ’ohipa ’ī’ino ’e ’aita roa rātou i fa’aru’e ’ē atu i te reira ; ’e ’ua fa’auehia rātou ’ia tātarahapa ’e ’aita roa rātou i tātarahapa.

13 ’E i teienei, ’aita ānei e ti’a ia ’outou ’ia rurutaina ’e ’ia tātarahapa i tā ’outou mau hara, ’e ’ia ha’amana’o ho’i ē, nā roto i te Mesia ana’e ra e fa’aorahia ai ’outou ?

14 Nō reira, mai te mea e ha’api’i atu ’outou i te ture a Mose ra, ’a ha’api’i ato’a atu ē ’ua riro te reira ’ei ata nō te mau mea e tupu a muri atu—

15 ’A ha’api’i atu ia rātou ē, e tae mai te fa’aorara’a nā roto mai i te Mesia i te Fatu, ’o te Metua mure ’ore mau ho’i ’oia. ’Āmene.