1 Ut anajwan kik’ulman naq chirix naq kixchoy laj Abinadi xyeeb’al li aatin a’in, naq li rey kixtaqla naq eb’ laj tij te’xchap ut te’xk’e chi kamsiik.

2 A’b’anan kiwan jun sa’ xyanqeb’, aj Alma xk’ab’a’, a’an ajwi’ ralal xk’ajol laj Nefi. Ut a’an saaj winq, ut kixpaab’ li aatin kixye chaq laj Abinadi, xb’aan naq naxnaw chirix li maa’usilal kixch’olob’ laj Abinadi chirixeb’; jo’kan naq ki’ok chirelajinkil ru chiru li rey naq ink’a’ taajosq’o’q rik’in laj Abinadi, naq tixkanab’ b’an chi xik sa’ tuqtuukilal.

3 A’b’an li rey q’axal wi’chik kijosq’o’, ut kixtaqla risinkil chaq laj Alma sa’ xyanqeb’, ut kixtaqlaheb’ lix moos chirix re te’xkamsi.

4 A’b’anan a’an ki’eelelik chaq chiruheb’ ut kixmuq rib’, jo’kan naq ink’a’ ke’xtaw. Ut a’an chi muqmu chiru k’iila kutan kixtz’iib’a chixjunil li aatin kixye chaq laj Abinadi.

5 Ut kik’ulman naq li rey kixtaqla naq eb’ lix moos aj kolol rix te’xsuti rix laj Abinadi ut te’xchap; ut ke’xb’ak’ ut ke’xtz’ap sa’ tz’alam.

6 Ut naq numenaq oxib’ kutan, chirix xk’uub’ankil xna’leb’ rochb’eeneb’ laj tij chiru, kixtaqla naq taak’ame’q wi’chik chiru.

7 Ut kixye re: At Abinadi, qatawom jun aajitb’al, ut aak’ulub’ li kamk.

8 Xb’aan naq laa’at xaye naq li Dios ajwi’ taakub’eeq sa’ xyanqeb’ li ralal xk’ajoleb’ li winq; ut anajwan, xb’aan a’in tatk’ehe’q chi kamk wi ink’a’ taawisi chixjunil li aatin katmaa’usilan wi’ chiwix laa’in ut lin tenamit.

9 Anajwan laj Abinadi kixye re: Ninye eere, ink’a’ tinwisi li aatin kinye eere chirix li tenamit a’in, xb’aan naq yaal ajwi’; ut re teenaw lix ch’olch’ookil kinkanab’ wib’ chi t’ane’k sa’ lee ruq’.

10 Relik chi yaal, ut tink’ul rahilal toj reetal li kamk, ut ink’a’ tinwisi li waatin, ut taawanq chixch’olob’ankil li yaal cherix. Ut wi nikineekamsi teehoy li kik’ maak’a’ xmaak, ut a’in ajwi’ taawanq chixch’olob’ankil li yaal cherix sa’ roso’jik li kutan.

11 Ut anajwan li rey aj Noe ok raj re chirach’ab’ankil, xb’aan naq naxxuwa ru li raatin; xb’aan naq kixxuwa naq taachalq lix raqb’a-aatin li Dios sa’ xb’een.

12 A’b’anan eb’ laj tij ke’xtaqsi xyaab’eb’ xkux chirix, ut ke’ok chixjitb’al, ut ke’xye: A’an xhob’ li rey. Jo’kan naq li rey ki’eek’asiik sa’ josq’il chirix, ut kixq’axtesi re taakamsiiq.

13 Ut kik’ulman naq ke’xk’am ut ke’xb’ak’, ut ke’xk’at xtz’uumal rik’in si’, relik chi yaal, toj reetal naq kikam.

14 Anajwan ut naq ki’ok li raq’ xam chixk’atb’al, kixjap re chiruheb’, ut kixye:

15 K’ehomaq reetal, jo’ chanru ajwi’ xeb’aanu we, chi jo’kan taak’ulmanq naq lee riyajil te’xk’eheb’ naab’al chixk’ulb’al li rahilal nink’ul laa’in, a’an xrahil li kamk rik’in xam; ut a’in xb’aan naq eb’ a’an neke’xpaab’ lix kolb’a-ib’ li Qaawa’ lix Dios.

16 Ut taak’ulmanq naq textawasiiq rik’in li jar paay chi yajel sa’ xk’ab’a’ lee maa’usilal.

17 Relik chi yaal, ut texsak’e’q chaq yalaq b’ar, ut tex’alinasiiq ut texjek’iiq chi ka’pak’al, jo’ chanru na’alinasiik jun ch’uut chi k’iche’ aj xul xb’aaneb’ li josq’ aj xul re k’iche’.

18 Ut sa’ li kutan a’an texyohe’q, ut texchape’q xb’aan ruq’eb’ li xik’ neke’ilok eere, toja’ ut naq teek’ul, jo’ nink’ul laa’in, xrahil li kamk rik’in xam.

19 Chi jo’kan li Dios naxk’anjela li eeqajunk sa’ xb’eeneb’ li neke’sachok re lix tenamit. At Dios, chak’ul li waam.

20 Ut anajwan, chirix naq laj Abinadi kixye li aatin a’in, kit’ane’, chirix xk’ulb’al li kamk rik’in xam, relik chi yaal, chirix k’ehe’k chi kamk xb’aan naq ink’a’ kiraj xtz’eqtaanankil xyaalal lix taqlahom li Dios, chirix xtz’apb’al xyaalalil li raatin rik’in xkamik.