1 Mme jaanong go ne ga diragala gore fa Abinatae a sena go fetsa dipolelo tse, gore kgosi o ne a laela gore baperesiti ba mo tseye mme ba dire gore a bolawe.

2 Mme go ne go le mongwe gareng ga bone yo leina la gagwe e neng e le Alema, le ene a le kokomana ya ga Nifae. Mme e ne e le lekawana, mme o ne a dumela mafoko a Abinatae a neng a a buile, gonne o ne a itse mabapi le boikepi jo Abinatae a neng a bopakile kgatlhanong le bone; jalo he o ne a simolola go rapela kgosi gore a seka a šakgalela Abinatae, mme a letle gore o ka tsamaya ka kagiso.

3 Mme kgosi o ne a galefile go feta, mme a dira gore Alema a kobiwe go tswa gareng ga bone, mme a romela batlhanka ba gagwe morago ga gagwe gore ba ka tla ba mmolaya.

4 Mme o ne a tshaba go tswa fa pele ga bone mme a iphitlha gore ba seka ba mmona. Mme ene a ne a fitlhegile malatsi a le mantsi o ne a kwala mafoko otlhe a Abinatae a neng a a buile.

5 Mme go ne ga diragala gore kgosi a dire gore batlhokomedi ba gagwe ba dikaganyetse Abinatae mme ba mo tseye; mme ba ne ba mmofa mme ba mo latlhela mo kgolegelong.

6 Mme morago ga malatsi a le mararo, a gakololane le baperesiti ba gagwe, a dira gore a tlisiwe gape fa pele ga gagwe.

7 Mme o ne a re go ene: Abinatae, re bone molato kgatlhanong le wena, mme o lekanwe ke loso.

8 Gonne o rile Modimo ka boene o tlaa fologela tlase gareng ga bana ba batho; mme jaanong, ka ntlha e o tlaa bolawa fa e se fela o ka busa mafoko otlhe a o a buileng bosula mabapi le nna le batho ba me.

9 Jaanong Abinatae o ne a re go ene: Ka re go lona, ga ke kitla ke busa mafoko a ke a buileng go lona mabapi le batho ba, gonne a boammaaruri; mme gore lo ka itse ka bonnete jwa one ke itetleletse gore ke wetse mo diatleng tsa lona.

10 Ee, mme ke tlaa sotlega le go fitlhelela loso, mme ga ke na go busa mafoko a me, mme a tlaa ema e le bopaki kgatlhanong le lona. Mme fa lo mpolaya lo tlaa tsholola madi a a senang molato, mme se le sone se tlaa ema e le bopaki kgatlhanong le lona ka letsatsi la bofelo.

11 Mme jaanong kgosi Noa o ne a le gaufi le go mo golola, gonne o ne a tshaba lefoko la gagwe; gonne o ne a tshaba gore dikatlholo tsa Modimo di tlaa tla mo go ene.

12 Mme baperesiti ba ne ba tsholetsa mantswe a bone kgatlhanong le ene, mme ba simolola go mo latofatsa, ba re: O kgadile kgosi. Jalo he kgosi e ne ya fuduega mo tšhakgalong kgatlhanong le ene mme o ne a mo neela gore a tle a bolawe.

13 Mme go ne ga diragala gore ba mo tseye mme ba mmofa, mme ba babola letlalo la gagwe ka disikalala, ee, le go ya losong tota.

14 Mme jaanonng fa kgabo e simolola go mo babola, o ne a kuela go bone, a re:

15 Bonang, fela jaaka lo dirile mo go nna, jalo go tlaa diragala gore peo ya lona e tlaa dira gore bontsi bo tlaa utlwa ditlhabi tse ke di utlwang, le ditlhabi tsa loso ka molelo; mme se ka ntlha ya gore ba dumela mo polokong ya Morena Modimo wa bone.

16 Mme go tlaa diragala gore lo tlaa bogisiwa ka mekgwa yotlhe ya malwetse ka ntlha ya boikepi jwa lona.

17 Ee, mme lo tlaa itewa mo seatleng sengwe le sengwe, mme lo tlaa gatelelwa lo bo lo phatlalaletswa kwa le kwa, le jaaka letsomane la naga le gatelelwa ke diphologolo tsa naga tse di bogale.

18 Mme ka letsatsi leo lo tlaa tsongwa, mme lo tlaa tsewa ka seatla sa baba ba lona, mme jaanong foo lo tlaa sotlega, jaaka ke sotlega, ditlhabi tsa loso ka molelo.

19 Jalo Modimo o diragatsa ipusolosetso mo go bao ba ba bolayang batho ba gagwe. O Modimo, amogela botho jwa me.

20 Mme jaanong, fa Abinatae a sena go bua mafoko a, a wa, a sotlegile loso ka molelo; ee, a tlisitswe mo losong ka ntlha ya gore o ne a seka a latola ditaelo tsa Modimo, a kanne boammaaruri jwa mafoko a gagwe ka loso lwa gagwe.