1 Ma o lenei sa oo ina ua uma ona faai’u atu e Apinati nei upu, sa poloai atu le tupu i faitaulaga ia latou ave o ia ma faia ia fasioti ia te ia.

2 Peitai sa i ai se tasi i totonu o i latou o lona igoa o Alema, o ia foi o sē e tupuga mai ia Nifae. Ma o ia o se alii talavou, ma sa talitonu o ia i upu na tautala i ai Apinati, ona sa iloa e ia e uiga i le amioletonu lea sa molimau atu ai Apinati e faasaga ia te i latou; o lea sa amata ai ona aioi atu o ia i le tupu ia aua ne’i ita o ia ia Apinati, ae tuu o ia e alu ese atu i le filemu.

3 Peitai sa atili ita le tupu, ma faia ia tuli i fafo Alema mai totonu o i latou, ma auina atu ana auauna e tuliloa ia te ia ina ia latou fasioti ia te ia.

4 Peitai sa sola o ia mai i o latou luma ma faalafi o ia lava ma sa latou le maua ai o ia. Ma a’o lafi o ia mo ni aso e tele sa tusi e ia upu uma na tautala i ai Apinati.

5 Ma sa oo ina faia e le tupu ia si’o e ana leoleo Apinati ma pu’e o ia; ma sa latou saisai o ia ma lafo i totonu o le falepuipui.

6 Ma ina ua mavae aso e tolu, ina ua uma ona fono o ia faatasi ma ana faitaulaga, sa faia e ia ia toe aumai o ia i ona luma.

7 Ma sa fai atu o ia ia te ia: Apinati, ua matou maua se tuua’iga e faasaga ia te oe, ma ua tatau le oti ia te oe.

8 Ona sa e fai mai o le a afio ifo le Atua lava ia i totonu o le fanauga a tagata; ma o lenei, ona o lenei mafuaaga o le a fasioti ai oe vagana ai ua e toe faafo’ia upu leaga uma na e tautalagia e uiga ia te a’u ma lo’u nuu.

9 O lenei sa fai atu Apinati ia te ia: Ou te fai atu ia te oe, ou te lē faafo’ia upu na ou tautala atu ai ia te oe e uiga i lenei nuu, ona ua moni ia; ma ina ia e iloa ai lo latou moni o lea ua ou tuu atu ai a’u lava ia i o outou lima.

10 Ioe, ma o le a ou tigaina e oo lava i le oti, ma ou te lē faafo’ia lava a’u upu, ae o le a latou tutula’i o se molimau e faasaga ia te outou. Ma afai tou te fasiotia a’u, o le a outou faamasaaina se toto lē sala, ma o le a tula’i foi lea o se molimau e faasaga ia te outou i le aso gataaga.

11 Ma o lenei sa toeitiiti a tatala atu o ia e le tupu o Noa, ona sa mata’u o ia i ana upu; ona sa fefe o ia ne’i oo mai i ona luga faamasinoga a le Atua.

12 Peitai sa sii i luga e faitaulaga o latou leo e faasaga ia te ia, ma amata ona latou tuua’i o ia, fai mai: Ua upu leaga o ia i le tupu. O lea na oso ai le ita o le tupu e faasaga ia te ia, ma sa tuu atu e ia o ia ina ia fasiotia.

13 Ma sa oo ina latou ave o ia ma saisai ia te ia, ma susunu lona tino i fusi laau, ioe, seia oti ai.

14 Ma o lenei ina ua amata ona mu o ia i apeafi, sa alaga mai o ia ia te i latou, e faapea:

15 Faauta, e pei ona outou faia ia te a’u, o le a faapea lava ona oo ina faia e a outou fanau ia mafatia le toatele i tigā ua ou mafatia ai, o tigā lava ia o le oti i le afi; ma o lenei ona ua latou talitonu i le faaolataga a le Alii lo latou Atua.

16 Ma e oo ina o le a faapuapuagatiaina outou i ituaiga o faama’i eseese ona o a outou amioletonu.

17 Ioe, ma o le a taia outou i itu uma lava, ma o le a tulia ma faataapeapeina outou i lea mea ma lea mea, e pei lava ona tulia se lafu segisegi e manu ’aivao ma fe’ai.

18 Ma i lena aso o le a tulia ai outou, ma o le a ave outou e lima o o outou fili, ma ona outou mafatia ai lea, e pei lava ona ou mafatia, i tigā o le oti i le afi.

19 E faapena ona faaoo mai e le Atua le tauimasui i luga o i latou o e latou te faaumatiaina ona tagata. Le Atua e, talia mai ia lo’u agaga.

20 Ma o lenei, ina ua uma ona fai atu e Apinati o nei upu, sa pa’ū o ia i lalo, ina ua mafatia i le oti i le afi; ioe, ina ua fasiotia o ia ona sa lē faafitia e ia poloaiga a le Atua, ma faamaufaailogaina ai le moni o ana upu i lona maliu.