1 Ma sa oo ina toe foi mai le autau a le tupu, i le sailiga o le nuu o le Alii ae lē maua.

2 Ma o lenei faauta, sa toaitiiti le autau a le tupu, ona ua faaitiitia, ma sa amata ona i ai o se fevaevaeaiga i totonu o e na totoe o le nuu.

3 Ma sa amata ona manavaina atu e le vaega toaitiiti o le nuu upu faamata’u e faasaga i le tupu, ma sa amata ona i ai o se finauga tele i totonu o i latou.

4 Ma o lenei sa i ai i totonu o i latou se tagata na igoa ia Kitiona, ma ona o ia o se tagata malosi ma o se fili foi i le tupu, o lea na se’i ai e ia lana pelu, ma tauto i lona ita, o le a ia fasioti i le tupu.

5 Ma sa oo ina tau o ia ma le tupu; ma ina ua vaai atu le tupu o le a toilalo o ia ia te ia, sa sola o ia ma momo’e ma alu a’e i luga o le ’olo sa latalata ane i le malumalu.

6 Ma sa tuliloa o ia e Kitiona ma toeitiiti lava alu a’e i luga o le ‘olo e fasioti le tupu, ae vaai atu le tupu faataamilo agai i le laueleele o Semulona, ma faauta, sa i ai le autau a sa Lamanā i totonu o tuaoi o le laueleele.

7 Ma o lenei sa oo ina ’aioi atu le tupu i le atuatuvale o lona agaga, fai mai: Kitiona e, faaola mai ia te a’u, ona ua oo mai sa Lamanā i o tatou luga, ma o le a latou faaumatia i tatou; ioe, o le a latou faaumatia lo’u nuu.

8 Ma o lenei sa lē popole tele le tupu e uiga i lona nuu nai lo lona popole e uiga i lona lava ola; ae ui i lea, sa faasaoina e Kitiona lona ola.

9 Ma sa poloaiina e le tupu le nuu ia latou sosola ese a o le’i oo mai sa Lamanā, ma sa muamua atu o ia lava i o latou luma, ma latou sosola i le vao, faatasi ma o latou fafine ma a latou fanau.

10 Ma sa oo ina tuliloa i latou e sa Lamanā, ma sa maua atu i latou, ma amata ona fasioti i latou.

11 O lenei sa oo ina poloai atu le tupu ia te i latou ia tuua e tane uma a latou avā ma a latou fanau, ma sosola ese mai luma o sa Lamanā.

12 O lenei e toatele e sa lē fia tuua i latou, ae sa sili le nonofo ma fano faatasi ma i latou. Ae o le vaega na totoe sa tuua a latou avā ma a latou fanau ae sosola ese.

13 Ma sa oo ina o i latou o e na nonofo faatasi ma a latou avā ma a latou fanau sa faia ia tutula’i atu o latou afafine lalelei ma ’aioi atu i a sa Lamanā ia aua ne’i o latou fasiotia i latou.

14 Ma sa oo ina alolofa sa Lamanā ia te i latou, ona ua faafiafiaina i latou i le lalelei o o latou fafine.

15 O lea na faasao ai e sa Lamanā o latou ola, ma ave i latou faatagataotaua ma toe auina i latou i le laueleele o Nifae, ma tuu atu ia te i latou ia fai mo i latou le laueleele, i lalo o tuutuuga ia latou tuu atu le tupu o Noa i lima o sa Lamanā, ma tuu atu a latou meatotino, po o le afa o mea uma ua latou maua, o le afa o a latou auro, ma a latou ario, ma a latou mea taua uma, ma faapea ona tatau ona latou totogi atu o lafoga i le tupu o sa Lamanā mai lea tausaga i lea tausaga.

16 Ma o lenei sa i ai se tasi o atalii o le tupu sa faatasi ma e na ave faatagataotauaina, o lona igoa o Limae.

17 Ma o lenei sa lē manao Limae ia faaumatiaina lona tamā; ae ui i lea, sa lē pouliuli Limae i amioletonu a lona tamā, o ia lava ia o se tagata amiotonu.

18 Ma sa oo ina auina atu faalilolilo e Kitiona ni tagata i le vao, e saili le tupu ma i latou o e na faatasi ma ia. Ma sa oo ina latou fetaui ma tagata uma i le vao, vagana ai le tupu ma ana faitaulaga.

19 O lenei sa latou tauto i o latou loto latou te foi atu i le laueleele o Nifae, ma afai ua fasiotia a latou avā ma a latou fanau, ma i latou foi o e sa nonofo faatasi ma i latou, o le a latou saili e tauimasui, ma fano foi faatasi ma i latou.

20 Ae sa poloai atu le tupu ia te i latou ia aua ne’i o latou toe foi atu; ae sa latou feita i le tupu, ma faia ia mafatia o ia, i le oti i le afi.

21 Ma sa toeitiiti o latou ave foi o faitaulaga ma fasioti ia te i latou, peitai sa sosola ese i latou mai o latou luma.

22 Ma sa oo ina o le a latou toe foi atu i le laueleele o Nifae, ae latou fetaui loa ma tagata o Kitiona. Ma sa ta’u atu e tagata o Kitiona ia te i latou mea uma ua oo ia latou avā ma a latou fanau; ma ua tuu mai e sa Lamanā ia te i latou e mafai ona latou fai mo i latou le laueleele e ala i le totogi atu o se lafoga ia sa Lamanā o le afa o mea uma latou te maua.

23 Ma sa ta’u atu e le nuu i tagata a Kitiona ua latou fasiotia le tupu, ma ua sosola ana faitaulaga mai ia te i latou ua o mamao atu i totonu o le vaomatua.

24 Ma sa oo ina ua uma ona latou faaiu o le tu masani, sa latou toe foi atu i le laueleele o Nifae, ua olioli, ona sa le’i fasiotia a latou avā ma a latou fanau; ma sa latou ta’u atu ia Kitiona le mea ua latou faia i le tupu.

25 Ma sa oo ina faia e le tupu o sa Lamanā se tautoga ia te i latou, o le a lē fasiotia i latou e lona nuu.

26 Ma sa faia foi e Limae, ona o ia o le atalii o le tupu, ma ona ua faaee e le nuu i ona luga le malo, se tautoga i le tupu o sa Lamanā, o le a totogi atu e ona tagata se lafoga ia te ia, o le afa lea e tasi o mea uma latou te maua.

27 Ma sa oo ina amata e Limae ona faatu le malo ma faatu le filemu i totonu o lona nuu.

28 Ma sa faatutu faataamilo e le tupu o sa Lamanā leoleo i le laueleele, ina ia mafai ona taofi ai e ia le nuu o Limae i totonu o le laueleele, ina ia latou lē o ese atu i le vao; ma sa lagolagoina e ia ana leoleo mai le lafoga lea sa maua e ia mai ia sa Nifaē.

29 Ma o lenei sa maua pea lava pea e le tupu o Limae le filemu i lona malo i le va o le lua tausaga, sa lē faatiga mai sa Lamanā ia te i latou, pe saili e faaumatia i latou.