1 Ut kik’ulman naq li teep aj pleet re li rey kisutq’i, chirix xsik’b’aleb’ lix tenamit li Qaawa’ chi ink’a’ ke’xtaw.

2 Ut anajwan k’ehomaq reetal, moko k’iheb’ ta lix teepal li rey, xb’aan naq ch’inanb’il li rajlankileb’, ut ki’ok chi wank jun li jachok-ib’ sa’ xyanqeb’ rela’ li tenamit.

3 Ut li jun raqal li ka’ch’ineb’ xk’ihal ke’ok chixyeechi’inkil rahilal sa’ xb’een li rey, ut ki’ok chi wank jun li nimla wech’ok-ib’ sa’ xyanqeb’.

4 Anajwan ut, wan jun li winq sa’ xyanqeb’, aj Gideon xk’ab’a’, ut a’an jun winq kaw rib’ ut aj xik’ ilonel re li rey, jo’kan naq kixbotz’ lix yok’leb’ ch’iich’, ut kixxaqab’ aatin sa’ xjosq’il naq tixkamsi li rey.

5 Ut kik’ulman naq kipleetik rik’in li rey, ut naq kiril li rey naq ok re chi numtaak sa’ xb’een, ki’eelelik ut xko’o sa’ aanil, ut kitaqe’ sa’ xb’een li najt xteramil kab’l li nach’ wan rik’in li santil ochoch.

6 Ut laj Gideon kixtaaqe ut ok re chi taqe’k sa’ li najt xteramil kab’l re xkamsinkil li rey, ut li rey kixb’eresi li rilob’aal chixsutam sa’ xjayal li ch’och’ Xemlon, ut k’ehomaq reetal, jun teep aj pleet reheb’ laj Lamanita okenaqeb’ chiru lix nub’aal li ch’och’.

7 Ut anajwan li rey kixjap re rik’in xyot’am li raam, ut kixye: At Gideon, minaakamsi, xb’aan naq chalenaqeb’ laj Lamanita sa’ qab’een, ut toohe’xsach; relik chi yaal, te’xsach lin tenamit.

8 Ut anajwan li rey moko naxk’oxla ta eb’ lix tenamit jo’ chanru naxk’oxla xkolb’al xyu’am a’an, a’b’anan laj Gideon kixkol lix yu’am.

9 Ut li rey kixtaqlaheb’ li tenamit naq te’eeleliq chiruheb’ laj Lamanita, ut a’an ajwi’ xko’o chiruheb’, ut ke’eelelik chiru li yamyookil ch’och’, rik’ineb’ li rixaqil ut li ralal xk’ajoleb’.

10 Ut kik’ulman naq eb’ laj Lamanita ke’xtaaqeheb’, ut ke’xtaweb’, ut ke’ok chixkamsinkileb’.

11 Anajwan kik’ulman naq li rey kixtaqla reheb’ naq chixjunileb’ li winq te’xkanab’eb’ li rixaqil ut li ralal xk’ajoleb’, ut te’eeleliq chiruheb’ laj Lamanita.

12 Anajwan wankeb’ naab’al li ink’a’ ke’raj xkanab’ankileb’, ke’raj b’an kanaak ut kamk rochb’eeneb’. Ut li jun ch’ol chik ke’xkanab’eb’ li rixaqil ut eb’ li ralal xk’ajol, ut ke’eelelik.

13 Ut kik’ulman naq eb’ li ke’kana rik’ineb’ li rixaqil ut li ralal xk’ajol ke’xk’e naq te’xxaqab’ rib’ chi uub’ej lix chaq’al ru rab’ineb’ ut te’xtz’aama chiruheb’ laj Lamanita naq ink’a’ te’xkamsiheb’.

14 Ut kik’ulman naq eb’ laj Lamanita ke’xtoq’ob’aheb’ ru, xb’aan naq q’unob’resinb’ileb’ xch’ool xb’aan xch’ina-usaleb’ li rixqilaleb’.

15 Jo’kan naq eb’ laj Lamanita ke’xkoleb’ xyu’am, ut ke’xchapeb’ choq’ preex ut ke’xk’ameb’ wi’chik sa’ li ch’och’ Nefi, ut ke’xk’e reheb’ naq te’reechani li ch’och’, a’ut ka’ajwi’ wi te’xq’axtesi li rey aj Noe sa’ ruq’eb’ laj Lamanita, ut te’xq’axtesi li k’a’ru reheb’, toj xyijach chixjunil li k’a’ru reheb’, xyijach lix ooreb’, ut lix plaateb’, ut chixjunil li k’a’ru terto xtz’aq reheb’, ut chi jo’kan te’xtoj li tojleb’ chiru lix reyeb’ laj Lamanita chiru li junjunq chihab’.

16 Anajwan ut kiwan jun reheb’ li ralal li rey sa’ xyanqeb’ li ke’k’ame’ chi preexil, aj Limhi xk’ab’a’.

17 Ut anajwan laj Limhi kiraj naq ink’a’ taasache’q lix yuwa’; a’b’anan moko muqmu ta chiru laj Limhi lix maa’usilal lix yuwa’, xb’aan naq a’an jun winq tiik xna’leb’.

18 Ut kik’ulman naq laj Gideon kixtaqlaheb’ li winq chiru yamyookil ch’och’ sa’ muqmu, re xsik’b’al li rey ut eb’ li ani wankeb’ rik’in. Ut kik’ulman naq ke’xk’uleb’ chixjunil sa’ li yamyookil ch’och’, ka’ajwi’ b’an li rey ut eb’ laj tij ink’a’.

19 Anajwan eb’ a’an ke’xxaqab’ chaq aatin sa’ xch’ooleb’ naq te’sutq’iiq sa’ li ch’och’ Nefi, ut wi kamsinb’ileb’ li rixaqil ut eb’ li ralal xk’ajol, ut jo’kaneb’ ajwi’ li ke’kana chaq rochb’eeneb’, naq te’xsik’ xk’eeb’al reeqaj lix kamikeb’, ut te’kamq ajwi’ rochb’eeneb’.

20 Ut li rey kixtaqlaheb’ naq ink’a’ te’sutq’iiq; ut eb’ a’an ke’josq’o’ rik’in li rey, ut ke’xk’e chi rahob’tesiik, toj reetal li kamk rik’in xam.

21 Ut okeb’ raj re chixchapb’aleb’ ajwi’ laj tij ut chixk’eeb’aleb’ chi kamk, ut eb’ a’an ke’eelelik chiruheb’.

22 Ut kik’ulman naq okeb’ raj re chi sutq’iik sa’ li ch’och’ Nefi, ut ke’xk’uleb’ lix winq laj Gideon. Ut eb’ lix winq laj Gideon ke’xye resil reheb’ chixjunil li ke’xk’ul chaq li rixaqileb’ ut li ralal xk’ajoleb’; ut naq eb’ laj Lamanita ke’xk’e reheb’ naq te’reechani li ch’och’ rik’in xtojb’al jun li tojleb’ chiruheb’ laj Lamanita, a’ xyijach chixjunil li k’a’ru reheb’.

23 Ut eb’ li tenamit ke’xye reheb’ li winq re laj Gideon naq ak ke’xkamsi li rey, ut eb’ laj tij chiru, ak ke’eelelik chiruheb’ chi najt sa’ li yamyookil ch’och’.

24 Ut kik’ulman naq chirix naq ke’xchoy li aatinak, naq ke’sutq’i sa’ li ch’och’ Nefi, rik’in saho’k sa’ xch’ooleb’, xb’aan naq moko kamsinb’ileb’ ta li rixaqil ut eb’ li ralal xk’ajol; ut ke’xye re laj Gideon k’a’ru ke’xb’aanu chaq re li rey.

25 Ut kik’ulman naq lix reyeb’ laj Lamanita kixxaqab’ li raatin rik’ineb’, naq eb’ lix tenamit ink’a’ te’xkamsiheb’.

26 Ut jo’kan ajwi’ laj Limhi, rik’in naq a’an ralal li rey, ut q’axtesinb’il li awa’b’ejihom sa’ xb’een xb’aan li tenamit, ki’ok sa’ xaqab’anb’il aatin rik’in lix reyeb’ laj Lamanita naq lix tenamit te’xtoj li tojleb’ chiru, a’an xyijach chixjunil li k’a’ru reheb’.

27 Ut kik’ulman naq laj Limhi ki’ok chixxaqab’ankil li awa’b’ejihom ut chixxaqab’ankil li tuqtuukilal sa’ xyanq lix tenamit.

28 Ut lix reyeb’ laj Lamanita kixk’ojob’eb’ laj k’aak’alenel chixsutam li ch’och’, re naq tixrameb’ rix lix tenamit laj Limhi sa’ li ch’och’, re naq ink’a’ te’elq chiru yamyookil ch’och’; ut kixk’e li k’a’ru nak’anjelak reheb’ laj k’aak’alenel rik’in li tojleb’ kixk’ul rik’ineb’ laj Nefita.

29 Ut anajwan li rey aj Limhi kiwan rajlal sa’ tuqtuukilal sa’ li rawa’b’ejihom chiru xnumik wiib’ chihab’, jo’kan naq eb’ laj Lamanita ink’a’ ke’xch’i’ch’i’iheb’, chi moko ke’xsik’ xsachb’aleb’.