1 Iwe non ewe fansoun pwe ekkewe sounfiun ewe king ra niwin, pokiten ra kut non namotmwan ren ekkewe aramas noun ewe Samon.

2 Iwe iei nengeni, ekkewe mwichen sounfiun ewe king ra kukkun, pokiten ra chokukkununo, iwe a poputa ew keimufesen nefinen nussun ekkewe aramas.

3 Iwe ewe kukkunun kinikin a poputa ne ngasepwichinau kapasen efeiengaw ngeni ewe king, iwe a poputa ne wor ew pochokunen anini fengen nefiner.

4 Iwe iei mi wor emon mwan me neir ewe a iteni Gideon, iwe i emon mwan pochokun me emon chon koum ngeni ewe king, iei minne a uwau noun we ketinas, me akkapon non an ningeringer pwe i epwe nieno ewe king.

5 Iwe non ewe fansoun i a fiu ngeni ewe king; iwe nupwen ewe king a kuna pwe i epwene akkufu, a su me sa me tota won ewe tower minne mi nom unukun ewe tempel.

6 Iwe Gideon a tapweno mwirin me ita epwene tota won ewe tower an epwe nieno ewe king, iwe ewe king a nenenoi mesan ngeni ewe fonuen Semlan, iwe nengeni, ekkewe sounfiun ekkewe chon Leiman ra nom non kianin ewe fonu.

7 Iwe iei ewe king a siou non riaffoun ngunun, a apasa: Gideon, amanauaei, pun ekkewe chon Leiman repwene feito woch, iwe repwene niikicheno; ewer, repwene nieno nei kewe aramas.

8 Iwe iei ewe king ese kon noninen fan iten noun kewe aramas usun an nonineniti pwisin manauan; nge inamo, Gideon a mut ngeni manauan.

9 Iwe ewe king a annuku ekkewe aramas pwe repwe su me mwen ekkewe chon Leiman, iwe i pwisin a feino akkom me mwer, iwe ra su ngeni ewe fonu pon, fiti punuwer kewe me nour kewe.

10 Iwe non ewe fansoun ekkewe chon Leiman ra tapweno mwirir, me ra torir, me poputa ne nireno.

11 Iei non ewe fansoun ewe king a annuku ngenir pwe ekkewe mwan meinisin repwe nikiti punuwer kewe me nour kewe, me su me mwen ekkewe chon Leiman.

12 Iwe mi chommong ekkewe rese tongeni nikitir, nge repwe fen nometiw me mano rer. Iwe ekkewe nussun meinisin ra nikiti punuwer kewe me nour kewe me suno.

13 Iwe non ewe fansoun ekkewe ra nometiw ren punuwer kewe me nour kewe ra fori pwe nour kewe fopun mi murino repwe uta me sio ngeni ekkewe chon Leiman pwe resap nireno.

14 Iwe non ewe fansoun ekkewe chon Leiman a wor ar kirekiroch wor, pun ra mwar ren niochun nour kewe fefin.

15 Iei minne ekkewe chon Leiman ra mut ngeni ir manauer, me ra fotekinir me uwei sefanireno ngeni ewe fonuen Nifai, me mut ngenir pwe repwe tongeni fonueni ewe fonu, anongonong won ekkoch apungupung pwe repwe fangeta king Noah ngeni ne poun ekkewe chon Leiman, me fangeta pisekir kewe, pwan mwo esopun mettoch meinisin mi wor rer, esopun nour gold, me nour silver, me ar kewe mettoch meinisin mi auchea, iwe iei repwe moni takises ngeni ewe kingen ekkewe chon Leiman seni ier ngeni ier.

16 Iwe iei mi wor emon me nein noun ewe king kewe anuon a nom nein ekkewe ra ono non fotek, ewe a iteni Limai.

17 Iwe iei Limai a fokkun mochen pwe seman we esap ninnino; nge inamo, Limai ese amam usun angangangawen seman we, pokiten i emon mwan mi pung.

18 Iwe non ewe fansoun Gideon a tinano ekkoch mwan non ewe fonu pon non monomon, ar repwe kutta ewe king me ekkewe ir mi nom ren. Iwe non ewe fansoun ra churi ekkewe aramas non ewe fonu pon, meinisin tiwenon chok ewe king me noun kewe pris.

19 Iwe ra fen akkapon me non netiper pwe repwe niwin ngeni ewe fonuen Nifai, iwe ika punuwer kewe me nour kewe ra fen ninnino, me pwan ekkewe ra fen nomwetiw rer, pwe repwe kutta niwinin an ekkoch foffor ngeni ir, me pwan mano rer.

20 Iwe ewe king a annuku ngenir pwe resap niwin; iwe ra song ren ewe king, me fori pwe epwe riaffou, pwan mwo tori mano ren ekkei.

21 Iwe ita repwene angei pwan ekkewe pris me nireno, iwe ra su me mwer.

22 Iwe non ewe fansoun pwe ita repwene niwin ngeni ewe fonuen Nifai, iwe ra churi ekkewe mwanin Gideon. Iwe ekkewe mwanin Gideon ra ureni ir usun mettoch meinisin a fen fis ngeni punuwer kewe me nour kewe; me ekkewe chon Leiman ra mut ngeni ir pwe repwe tongeni fonueni ewe fonu ren ar moni ew takises ngeni ekkewe chon Leiman ren esopun mettoch meinisin a wor rer.

23 Iwe ekkewe aramas ra ureni ekkewe mwanin Gideon pwe ra fen nieno ewe king, me noun kewe pris ra fen suno seni ir towaweno non ewe fonu pon.

24 Iwe non ewe fansoun pwe mwirin ra fen awesano ewe mwichen chufengen, ra niwin ngeni ewe fonuen Nifai, ra pwapwa, pokiten punuwer kewe me nour kewe rese ninnino; iwe ra ureni Gideon usun met ra fen fori ngeni ewe king.

25 Iwe non ewe fansoun ewe kingen ekkewe chon Leiman a fori ew pwon a akkaponu ngeni ir, pwe noun kewe aramas resap nireno.

26 Me pwan Limai, pokiten i ewe noun ewe king, ewe muu a no ngeni i me ren ekkewe aramas, a fori ew pwon a akkaponu ngeni ewe kingen ekkewe chon Leiman pwe noun kewe aramas repwe moni takises ngeni i, pwan mwo ew esopun mettoch meinisin a wor rer.

27 Iwe non ewe fansoun Limai a poputa ne etetteni ewe muu me forata kinamwe nein noun kewe aramas.

28 Iwe ewe kingen ekkewe chon Leiman a enenia chon mas nepekin ewe fonu, pwe i epwe tongeni annomwatiw ekkewe aramasen Limai non ewe fonu, pwe resap tongeni su ngeni ewe fonu pon; iwe i a anisi noun kewe chon mas seni ewe monien takises minne i a angei seni ekkewe chon Nifai.

29 Iwe iei a wor an king Limai soposoponon kinamwe non muu we ren ukukun ru ier, ekkewe chon Leiman rese turunufaser are kutta ar repwe nireno.