Lix Hu laj Mosiah

1 Ut anajwan maajun chik wech’ok-ib’ kiwan sa’ chixjunil li ch’och’ Tzarahemla, sa’ xyanqeb’ chixjunil li tenamit li wankeb’ rub’el xwankil li rey aj Benjamin, jo’kan naq li rey aj Benjamin kiwan rajlal sa’ tuqtuukilal chiru chixjunil li rela’ lix kutan.

2 Ut kik’ulman naq ke’wan oxib’ li ralal; ut kixk’e choq’ xk’ab’a’eb’ aj Mosiah, ut aj Helorum, ut aj Helaman. Ut kixk’e naq te’tzole’q sa’ chixjunil li raatinob’aaleb’ lix yuwa’ a’an, re naq chi jo’kan te’ok choq’ winq xtawomeb’ xna’leb’; ut re naq te’ruuq chixnawb’al chirixeb’ li profeetil aatin li yeeb’il chaq rik’in xtz’uumaleb’ re lix yuwa’eb’, li q’axtesinb’il chaq reheb’ xb’aan li ruq’ li Qaawa’.

3 Ut kixtzoleb’ ajwi’ chirixeb’ li tz’iib’anb’il esil li wankeb’ chi tz’iib’anb’il chiruheb’ li perel ch’iich’ bronce, kixye: Ex walal, nawaj raj naq chijultiko’q eere naq wi ta moko wankeb’ ta li perel ch’iich’ a’in, tz’iib’anb’il wi’ li esil a’in ut eb’ li taqlahom a’in, kiqak’ul raj rahilal chi maak’a’ qanawom, sa’ ajwi’ li kutan a’in, chi ink’a’ raj qanawom lix muqmuukil na’leb’ li Dios.

4 Xb’aan naq ink’a’ raj kiru naq li qayuwa’, aj Lehi, kijultiko’ ta raj re chixjunil li k’a’aq re ru a’in, re tixk’ut chiruheb’ li ralal, ka’ajwi’ wi tenq’anb’il xb’aaneb’ li perel ch’iich’ a’in; xb’aan naq rik’in naq tzolb’il sa’ li raatinob’aaleb’ laj Egipcio, chi jo’kan kiru chirilb’al li na’leb’ a’in tz’iib’anb’il, ut chixk’utb’al chiruheb’ li ralal xk’ajol, re naq chi jo’kan eb’ a’an te’xk’ut chiruheb’ li ralal xk’ajoleb’, ut chi jo’kan taatz’aqloq ru lix taqlahom li Dios, toj reetal sa’ li kutan anajwan.

5 Ninye eere, ex walal, wi ta moko wan ta li k’a’aq re ru a’in, li k’uulanb’il ut kolb’il rix xb’aan li ruq’ li Dios, re naq tooruuq chirilb’al li tz’iib’anb’il ut chixtawb’al ru chirix lix muqmuukil na’leb’, ut taaruuq te’wanq lix taqlahom junelik chiru qilob’aal, naq a’eb’ ajwi’ li qayuwa’ ke’laj raj chi maak’a’eb’ raj xpaab’aal, ut laa’o koowan raj jo’eb’ li qas qiitz’in aj Lamanita, li maak’a’ neke’xnaw chirix li k’a’aq re ru a’in, malaj ut ink’a’ ajwi’ neke’xpaab’ naq k’utb’il chiruheb’, sa’ xk’a’b’a’ li na’leb’ kanab’anb’il chaq xb’aaneb’ lix yuwa’, li moko yaal ta.

6 Ex walal, nawaj raj naq taajultiko’q eere naq yaaleb’ li yehom a’in, ut jo’kan ajwi’ naq yaaleb’ li tz’iib’anb’il esil a’in. Ut k’ehomaq reetal, jo’kan ajwi’ eb’ lix perel ch’iich’ laj Nefi, li wan wi’ lix tz’iib’anb’il esileb’ ut lix yehomeb’ li qayuwa’ chalen chaq relikeb’ chaq Jerusalen toj anajwan, ut yaaleb’ ajwi’ a’an; ut naru naqanaw lix yaalalileb’ xb’aan naq wankeb’ chiru li qilob’aal.

7 Ut anajwan, ex walal, nawaj raj naq taajultiko’q eere xtz’ilb’aleb’ rix chi yalb’il eeq’e, re naq teek’ul eechaab’ilal rik’in, ut nawaj raj naq teepaab’ lix taqlahom li Dios, re naq tex’usaaq sa’ li ch’och’ jo’ chanru lix yeechi’ihom li Qaawa’ reheb’ li qayuwa’.

8 Ut naab’al chik li k’a’aq re ru kixk’ut li rey aj Benjamin chiruheb’ li ralal, li moko tz’iib’anb’il ta sa’ li hu a’in.

9 Ut kik’ulman chirix naq li rey aj Benjamin kixk’e xraqik xtzolb’aleb’ li ralal, naq kitix, ut kiril naq sa’ junpaat chik taaxik chiru li b’e naxik wi’ chixjunil li ruchich’och’; jo’kan ut, kixk’oxla naq aajel ru naq tixq’axtesi li awa’b’ejihom sa’ xb’een jun reheb’ li ralal.

10 Jo’kan ut, kixtaqla xk’amb’al laj Mosiah chiru; ut a’aneb’ a’in li aatin li kiraatina wi’, kixye: At walal nawaj naq chataqla xjek’inkil jun li aatin chiru chixjunil li ch’och’ a’in sa’ xyanq chixjunil li tenamit a’in, malaj lix tenamit laj Tzarahemla, ut lix tenamit laj Mosiah, li neke’wan sa’ li ch’och’, re naq chi jo’kan te’ch’utub’aaq sa’ junajil; xb’aan naq sa’ li kutan wulaj tinch’olob’ re lin tenamit rik’in tz’aqal lix tz’uumal we naq laa’at chik jun li rey ut aj taqlanel sa’ xb’een li tenamit a’in, li kixk’e chaq qe li Qaawa’ qaDios.

11 Ut jo’kan ajwi’, tink’e re li tenamit a’in jun li k’ab’a’ej, re naq chi jo’kan te’nawe’q ru sa’ xb’eeneb’ chixjunil li tenamit li kixk’am chaq li Qaawa’ Dios sa’ li ch’och’ Jerusalen; ut a’in ninb’aanu xb’aan naq a’aneb’ jun tenamit yalyookeb’ xq’e sa’ xpaab’ankil lix taqlahom li Qaawa’.

12 Ut nink’e reheb’ jun li k’ab’a’ej li maajo’q’e taasachmanq reetalil, ka’ajwi’ ma xb’aan q’etok aatin.

13 Relik chi yaal, ut ninye ajwi’ aawe, naq wi ta li tenamit a’in li q’axal usilanb’il xb’aan li Qaawa’ te’t’ane’q sa’ li q’etok aatin, ut te’ok choq’ jun tenamit aj maak ut aj muxul sumsu, li Qaawa’ tixq’axtesiheb’, re naq chi jo’kan q’unaqeb’ xmetz’ew chanchaneb’ li ras riitz’in; ut ink’a’ chik tixkoleb’ rix rik’in lix wankilal maak’a’ xjuntaq’eetankil ut sachol ch’oolej, jo’ chanru naq kixkoleb’ rix li qayuwa’ toj anajwan.

14 Xb’aan naq ninye aawe, naq wi ta ink’a’ kixye’ li ruq’ sa’ xkolb’aleb’ rix li qayuwa’, ch’olch’o naq ke’t’ane’ raj sa’ ruq’eb’ laj Lamanita, ut ke’ok raj choq’ aj k’ulum re lix kaqaleb’ xch’ool.

15 Ut kik’ulman naq chirix naq li rey aj Benjamin kixk’e xraqik xyeeb’al a’in re li ralal, naq kixk’e xchaq’rab’inkil chirix chixjunil li k’a’ru na’uxman sa’ li awa’b’ejihom.

16 Ut jo’kan ajwi’, kixk’e xchaq’rab’inkil chirixeb’ li tz’iib’anb’il esil li wankeb’ chi tz’iib’anb’il chiruheb’ li perel ch’iich’ bronce, ut jo’kan ajwi’ eb’ lix perel ch’iich’ laj Nefi; ut jo’kan ajwi’ lix yok’leb’ ch’iich’ laj Laban, ut li t’ort’ookil ch’iich’ malaj b’eresinel ch’iich’, li kixk’ameb’ xb’e li qayuwa’ chiru li yamyookil ch’och’, li kikawresiik xb’aan ruq’ li Qaawa’ re naq chi jo’kan te’k’ame’q xb’e, li junjunq a’ yaal jo’ chanru neke’xk’e xxik ut neke’xyal xq’e chirix.

17 Jo’kan ut, naq moko tiikeb’ ta chi paab’ank, ink’a’ ke’usa chi moko ke’wan chi chaab’ilo’k sa’ xb’eenikeb’; ke’tiikisiik b’an chi q’ajel-ix, ut ke’xb’oq lix josq’il li Dios sa’ xb’eeneb’, ut xb’aan a’an ke’sak’e’ rik’in we’ej ut rahil ch’a’ajkilal, re reek’asinkileb’ xch’ool sa’ xjultikankil li k’a’ru teneb’anb’il sa’ xb’eeneb’.

18 Ut anajwan, kik’ulman naq laj Mosiah xko’o ut kixb’aanu jo’ chanru kitaqlaak xb’aan lix yuwa’, ut kixtaqla resil chiruheb’ chixjunil li tenamit li wankeb’ sa’ li ch’och’ Tzarahemla re naq chi jo’kan te’ruuq chixch’utub’ankil rib’, re te’xik sa’ li santil ochoch chirab’inkil li aatin tixye lix yuwa’ reheb’.