1 Anajwan wan jun li na’ajej aran Xemlon b’ar wi’ eb’ lix rab’ineb’ laj Lamanita neke’xch’utub’ rib’ chi b’ichank, ut chi xajok, ut chixsaylankil rib’.

2 Ut kik’ulman naq sa’ jun kutan wan junjunq rajlankileb’ li ch’utch’uukeb’ chi b’ichank ut chi xajok.

3 Anajwan ut eb’ laj tij re laj Noe, rik’in naq neke’xutaanak chi sutq’iik sa’ li tenamit Nefi, relik chi yaal, ut jo’kan ajwi’ neke’xxuwa naq eb’ li tenamit te’xkamsiheb’, jo’kan naq ink’a’ ke’chal xch’ool chi sutq’iik rik’ineb’ li rixaqil ut eb’ li ralal xk’ajol.

4 Ut chirix wank sa’ li yamyookil ch’och’, ut chirix xtawb’aleb’ lix rab’ineb’ laj Lamanita, ke’xk’aak’aleheb’ sa’ muqmu;

5 Ut naq yal junjunq reheb’ li ch’utch’uukeb’ chi xajok, kole’elq chaq sa’ lix muqmuukil na’ajeb’ ut ke’xchapeb’ ut ke’xk’ameb’ sa’ li yamyookil ch’och’; relik chi yaal, kaahib’ xka’k’aal reheb’ lix rab’ineb’ laj Lamanita ke’xk’am sa’ li yamyookil ch’och’.

6 Ut naq ke’xtaw laj Lamanita naq sachenaqeb’ lix rab’ineb’, kik’ulman naq ke’josq’o’ rik’ineb’ lix tenamit laj Limhi, xb’aan naq neke’xk’oxla naq a’an lix tenamit laj Limhi.

7 Jo’kan naq ke’xtaqlaheb’ lix teep aj pleet; relik chi yaal, li rey ajwi’ xko’o chiru lix tenamit, ut koxe’taqe’q sa’ li ch’och’ Nefi re xsachb’aleb’ lix tenamit laj Limhi.

8 Ut anajwan laj Limhi kixk’e reetaleb’ sa’ xb’een chaq li najt xteramil kab’l, ut chixjunil lix kawresihomeb’ choq’ re li pleet kixk’e reetal; jo’kan naq kixch’utub’eb’ lix tenamit, ut ke’royb’eniheb’ sa’ muqmu sa’eb’ li ch’och’ ut sa’eb’ li k’iche’.

9 Ut kik’ulman naq chirix naq ke’taqe’ chaq laj Lamanita, naq eb’ lix tenamit laj Limhi sa’eb’ li na’ajej muqmuukeb’ wi’, ke’ok chaq chi t’ane’k sa’ xb’eeneb’, ut chixkamsinkileb’.

10 Ut kik’ulman naq kiniman xrahil li pleetik chi numtajenaq, xb’aan naq ke’pleetik chanchan li kaqkojl choq’ re lix yohom.

11 Ut kik’ulman naq eb’ lix tenamit laj Limhi ke’ok chiralinasinkileb’ laj Lamanita chiruheb’; a’ut moko wankeb’ ta xk’ihal jo’ ta lix yijacheb’ laj Lamanita. A’b’anan ke’pleetik choq’ re lix yu’ameb’, ut li rixaqileb’, ut li ralal xk’ajoleb’; jo’kan naq ke’xyal xq’e, ut chanchan li josq’ aj xul ke’pleetik.

12 Ut kik’ulman naq ke’xtaw lix reyeb’ laj Lamanita sa’ xyanqeb’ li rajlankileb’ lix kamenaqeb’; a’b’an moko kamenaq ta, toch’enaq chaq ut kanab’anb’il sa’ xb’een li ch’och’, xb’aan naq q’axal sa’ junpaat ke’eelelik chaq lix tenamit.

13 Ut a’an ke’xk’am ut ke’xlaneb’ lix toch’olal, ut ke’xk’am chiru laj Limhi, ut ke’xye: K’e reetal, wahi’ lix reyeb’ laj Lamanita; a’an, chi ak kixk’ul jun xtoch’olal, kit’ane’ sa’ xyanqeb’ lix kamenaqeb’, ut ke’xkanab’; ut k’e reetal, xqak’am chaq chawu; anajwan ut chiqakamsi.

14 A’b’an laj Limhi kixye reheb’: Moko teekamsi ta; teek’am chaq b’an re naq taaruuq tinwil. Ut ke’xk’am chaq. Ut laj Limhi kixye re: K’a’ru eerajom naq kexchal chixpleetinkil lin tenamit? K’e reetal, eb’ lin tenamit ink’a’ ke’xq’et li xaqab’anb’il aatin kin’ok wi’ aawik’in; jo’kan ut, k’a’ put ru naq laa’ex teeq’et li xaqab’anb’il aatin kex’ok wi’ rik’in lin tenamit?

15 Ut anajwan li rey kixye: Kinq’et li aatin li xaqab’anb’il xb’aan naq eb’ laa tenamit ke’xk’am lix rab’ineb’ lin tenamit; jo’kan naq sa’ injosq’il kink’e naq eb’ lin tenamit te’taqe’q chaq chixpleetinkil laa tenamit.

16 Ut anajwan laj Limhi maak’a’ kirab’i chaq chirix li na’leb’ a’in; jo’kan naq kixye: Laa’in tinsik’oq sa’ xyanq lin tenamit ut li ani xb’aanunk re li na’leb’ a’in taa’oso’q. Jo’kan naq kixtaqla sik’ok sa’ xyanq lix tenamit.

17 Anajwan naq kirab’i laj Gideon li k’a’aq re ru a’in, rik’in naq a’an xb’eenil aj pleet chiru li rey, a’an xko’o ut kixye re li rey: Maab’aanu nintz’aama, ut matsik’ok sa’ xyanq li tenamit a’in, ut maak’e li maak a’in sa’ xb’eeneb’ a’an.

18 Xb’aan naq ma ink’a’ jultikeb’ aawe laj tij re laa yuwa’, li ke’xsik’ li tenamit a’in xsachb’al? Ut ma ink’a’ wankeb’ a’an sa’ li yamyookil ch’och’? Ut ma maawa’eb’ a’an li ke’elq’ank reheb’ lix rab’ineb’ laj Lamanita?

19 Ut anajwan, k’e reetal, ut ye re li rey resil li k’a’aq re ru a’in, re naq tixye re lix tenamit, re naq te’tuqub’aaq xch’ool chiqix; xb’aan naq k’e reetal, ak yookeb’ chixkawresinkil rib’ chi chalk sa’ qab’een, ut k’e ajwi’ reetal naq moko k’iho ta laa’o.

20 Ut k’e reetal, chalkeb’ re rik’ineb’ lix teep li k’i rajlankileb’; ut wi li rey ink’a’ tixtuqub’eb’ xch’ool chiqix, tento too’oso’q.

21 Xb’aan naq ma ink’a’ xtz’aqlok ru li raatin laj Abinadi, li kixch’olob’ jo’ profeet chiqix—ut chixjunil a’in xb’aan naq ink’a’ kiqaj ab’ink chiru li raatin li Qaawa’, ut elk chaq rik’in li qamaa’usilal?

22 Anajwan ut chiqatuqub’ xch’ool li rey, ut taqatz’aqob’resi ru li aatin kiqaxaqab’ rik’in; xb’aan naq q’axal us wi’chik naq toowanq chi moosil chiru naq taasachq li qayu’am; jo’kan ut, chiqak’e xraqik li nimla hoyok kik’ a’in.

23 Ut anajwan laj Limhi kixye re li rey chixjunil li k’a’aq re ru chirix lix yuwa’, ut eb’ laj tij li ke’eelelik chaq chiru li yamyookil ch’och’, ut kixk’e xmaakeb’ a’an naq ke’k’ame’ lix rab’ineb’.

24 Ut kik’ulman naq li rey kituqla xch’ool chirix lix tenamit; ut a’an kixye reheb’: Yo’qeb’ chixk’ulb’al lin tenamit, chi maak’a’ qak’anjeleb’aal re pleet, ut laa’in ninye eere rik’in xaqab’anb’il aatin naq eb’ lin tenamit ink’a’ te’xkamsi laa tenamit.

25 Ut kik’ulman naq ke’xtaaqe li rey, ut xkoheb’ chi maak’a’eb’ xk’anjeleb’aal re pleet, re xk’ulb’aleb’ laj Lamanita. Ut kik’ulman naq ke’xk’uleb’ laj Lamanita, ut lix reyeb’ laj Lamanita kixkub’si rib’ chiruheb’, ut kitz’aamank chiruheb’ choq’ re lix tenamit laj Limhi.

26 Ut naq eb’ laj Lamanita ke’ril lix tenamit laj Limhi, naq maak’a’eb’ xk’anjeleb’aal re pleet, ke’xtoq’ob’aheb’ ru ut ke’tuqub’aak xch’ool chirixeb’, ut ke’sutq’i rochb’een lix reyeb’ sa’ tuqtuukilal sa’ xch’och’eb’ a’an.