1 O lenei sa i ai i Semulona se nofoaga sa faapotopoto faatasi i ai e afafine o sa Lamanā i latou lava e pepese, ma sisiva, ma latou fiafia ai.

2 Ma sa oo ina sa i ai se tasi aso sa faapotopoto faatasi ai se vaega toaitiiti o i latou e pepese ma sisiva.

3 Ma o lenei o faitaulaga a le tupu o Noa, ona sa mamā e toe foi atu i le aai o Nifae, ioe, ma sa fefefe foi ne’i fasioti i latou e le nuu, o lea na latou fefefe ai e toe foi atu ia latou avā ma a latou fanau.

4 Ma ona sa latou nonofo i le vao, ma ina ua latou iloa afafine o sa Lamanā, sa latou lalafi ma lamalama ia te i latou.

5 Ma ina ua na’o se toaitiiti o i latou sa potopoto faatasi e sisiva, sa latou o mai i fafo mai o latou lafitaga ma pu’e i latou ma ave i latou i le vao; ioe, e lua sefulu ma le fa afafine o sa Lamanā sa latou ave i le vao.

6 Ma sa oo ina ua iloa e sa Lamanā ua leiloloa o latou afafine, sa latou feita i le nuu o Limae, ona sa latou manatu o le nuu o Limae ua faia lenei mea.

7 O lea na latou auina mai ai a latou autau; ioe, e oo i le tupu sa muamua mai i luma o ona tagata; ma sa latou o mai i le laueleele o Nifae, e faaumatia le nuu o Limae.

8 Ma o lenei sa iloa mai i latou e Limae mai le ’olo, e oo ia latou sauniuniga uma mo le taua sa iloa mai e ia; o lea na faapotopoto faatasi ai e ia ona tagata, ma lalafi faatalitali mo i latou i fanua ma vaomatua.

9 Ma sa oo ina ua oo mai sa Lamanā, sa amata ona osofaia o i latou e tagata o Limae mai o latou nofoaga faatalitali, ma amata ona fasioti i latou.

10 Ma sa oo ina matuā vevesi tele lava le taua, ona sa latou tau e pei o leona o tuli a latou manu e ’ai.

11 Ma sa oo ina amata ona tutuli sa Lamanā e tagata o Limae mai i o latou luma; ae sa lē tusa lo latou toatele ma le ’afa o sa Lamanā. Peitai sa latou tau mo o latou ola, ma mo a latou avā, ma mo a latou fanau; o lea sa latou faamalolosi atu ai ma latou tau e pei o ni tarako.

12 Ma sa oo ina latou maua le tupu o sa Lamanā i totonu o o latou tagata oti; peitai sa le’i oti o ia, ae sa manu’a ma ua tuua o ia i luga o le eleele, ona o le vave tele o le sola’aga a ona tagata.

13 Ma sa latou ave o ia ma fusifusi i ona manu’a, ma aumai o ia i luma o Limae, ma fai mai: Faauta, o le tupu lenei o sa Lamanā; sa pa’ū o ia faatasi ma o latou tagata oti ona ua manu’a o ia, ma ua latou tuua ai o ia; ma faauta, ua matou aumai o ia i ou luma; ma o lenei ia tatou fasioti ia te ia.

14 Peitai sa fai atu Limae ia te i latou: Tou te lē fasioti ia te ia, a ia aumai o ia iinei sei ou vaai atu ia te ia. Ma sa latou aumai o ia. Ma sa fai atu Limae ia te ia: O le a le pogai ua outou o mai ai e sii taua faasaga mai i lo’u nuu? Faauta, e lei solia e lo’u nuu le tautoga na ou faia ia te oe; o lea, aisea ua outou solia ai le tautoga na e fai mai i lo’u nuu?

15 Ma o lenei sa fai mai le tupu: Ua ou solia le tautoga ona ua ave e lou nuu afafine o lo’u nuu; o lea, o lo’u ita na ou faia ai ia o mai lo’u nuu e tau faasaga i lou nuu.

16 Ma o lenei sa lei faalogo lava Limae i se mea e uiga i lenei mataupu; o lea na fai atu ai o ia: O le a ou suesue i totonu o lo’u nuu ma o ai lava se tasi na faia lenei mea, o le a fano. O lea na fai ai e ia ia faia se suesuega i totonu o lona nuu.

17 O lenei ina ua faalogo Kitiona i nei mea, ona o ia o le kapeteni a le tupu, sa alu atu o ia i luma ma fai atu i le tupu: Ou te ’aioi atu ia te oe sei taofi, ma aua le suesueina lenei nuu, ma aua le tuua’ia lenei mea ia te i latou.

18 Ona e te lē manatua faitaulaga a lou tamā, o ē na saili lenei nuu e faaumatia? Ma e lē o i ai ea i latou i le vao? Ma e lē o i latou ea ia o ē na gaoia afafine o sa Lamanā?

19 Ma o lenei, faauta, ta’u atu nei mea i le tupu, ina ia mafai ona ta’u atu e ia i lona nuu ina ia mafai ona faamalilieina i latou faasaga mai ia te i tatou; aua faauta, ua latou sauniuni nei e o mai e faasagatau mai ia te i tatou; ma faauta foi ua toaitiiti lava i tatou.

20 Ma faauta, latou te o mai ma a latou autau e toatele; ma vagana ai ua faamalilieina i latou e le tupu e faasaga ia te i tatou, o le a tatou fano.

21 Ona pe lē ua faataunuuina ea upu a Apinati, ia na vavalo ai o ia e faasaga mai ia te i tatou—ma o nei mea uma ona o lo tatou lē fia faalogo i afioga a le Alii, ma liliu ese mai ia tatou amioletonu?

22 Ma o lenei se’i tatou faamalieina le tupu, ma tatou faataunuu le tautoga na tatou faia ia te ia; ona e sili lo tatou pologa nai lo le aveesea o o tatou ola; o lea, ia tatou taofi ia le faamasaaina o le toto ua matuā tele.

23 Ma o lenei sa oo ina ta’u atu e Limae i le tupu mea uma lava e uiga i lona tamā, ma faitaulaga na sosola i le vao, ma tuua’i le aveina o o latou afafine ia te i latou.

24 Ma sa oo ina faamalieina le tupu e faasaga i le nuu o Limae; ma sa fai mai o ia ia te i latou: Tatou o atu e feiloa’i ma lo’u nuu, e aunoa ma ni auupega; ma ou te tauto atu ia te oe i se tautoga o le a lē fasiotia lou nuu e lo’u nuu.

25 Ma sa oo ina latou mulimuli atu i le tupu, ma o atu e aunoa ma ni auupega e feiloa’i ma sa Lamanā. Ma sa oo ina latou feiloa’i ma sa Lamanā; ma sa ifo atu i lalo le tupu lava ia o sa Lamanā i o latou luma, ma ’aioi atu o ia mo le nuu o Limae.

26 Ma ina ua vaai mai sa Lamanā i tagata o Limae, ua leai ni a latou auupega, sa latou alolofa ia te i latou ma ua faamalilieina aga’i mai ia te i latou, ma toe foi atu ai faatasi ma lo latou tupu i le filemu i lo latou lava laueleele.