1 Ut kik’ulman naq laj Limhi ut eb’ lix tenamit ke’sutq’i sa’ li tenamit Nefi, ut ke’ok chi wank wi’chik sa’ li ch’och’ sa’ tuqtuukilal.

2 Ut kik’ulman naq chirix k’iila kutan eb’ laj Lamanita ke’ok wi’chik chi eek’asiik sa’ josq’il rik’ineb’ laj Nefita, ut ke’ok chi chalk sa’eb’ lix nub’aal li ch’och’ li wankeb’ sa’ xsutam.

3 Anajwan moko ke’chal ta xch’ool chixkamsinkileb’, sa’ xk’ab’a’ li xaqab’anb’il aatin ki’ok wi’ chaq lix reyeb’ rik’in laj Limhi; a’b’anan ke’xsak’eb’ sa’ xk’atqeb’ li re, ut ke’xk’anjela li wankilal sa’ xb’eeneb’; ut ke’ok chixk’eeb’al li aalal iiq sa’ xb’eeneb’, ut chixtiikisinkileb’ jo’ jun li b’uur mem—

4 Relik chi yaal, chixjunil a’in kib’aanuman re taatz’aqloq ru li raatin li Qaawa’.

5 Ut anajwan ninqeb’ chaq lix ch’a’ajkilaleb’ laj Nefita, ut maak’a’ junaq b’e re te’xkol rib’ sa’ ruq’eb’, xb’aan naq eb’ laj Lamanita wankeb’ chi sutsu chirixeb’.

6 Ut kik’ulman naq eb’ li tenamit ke’ok chixwech’b’al rix li rey xb’aan xch’a’ajkilaleb’; ut ke’ok chirajb’al xik chi pleetik rik’ineb’. Ut k’a’jo’ naq ke’xtawasi li rey rik’in lix wech’omeb’; jo’kan naq kixkanab’eb’ chixb’aanunkil jo’ chanru li ke’raj.

7 Ut ke’xch’utub’ wi’chik rib’, ut ke’xk’e lix kolb’a-ib’ aq’ej chirixeb’, ut ke’wulak rik’ineb’ laj Lamanita re ralinasinkileb’ chaq sa’ lix ch’och’eb’.

8 Ut kik’ulman naq eb’ laj Lamanita ke’xq’axeb’ ru, ut ke’xsutq’isiheb’ chirix, ut ke’xkamsi naab’al reheb’.

9 Ut anajwan kiwan nimla rahil ch’oolejil ut yaab’ak sa’ xyanqeb’ lix tenamit laj Limhi, li xmalka’an kiraho’ xch’ool xb’aan lix b’eelom, li alalb’ej ut li rab’inb’ej ke’raho’ xch’ool xb’aan lix yuwa’, ut eb’ li iitz’inb’ej xb’aaneb’ li ras.

10 Anajwan q’axal k’iheb’ li xmalka’an ke’wan sa’ li ch’och’, ut kaw ke’yaab’ak wulaj wulaj, xb’aan naq xchal chaq sa’ xb’eeneb’ jun nimla xiw chirixeb’ laj Lamanita.

11 Ut kik’ulman naq ink’a’ neke’xkanab’ yaab’ak, ut a’in kireek’asiheb’ li jun ch’ol chik xtenamit laj Limhi chi josq’o’k rik’ineb’ laj Lamanita; ut xkoheb’ wi’chik chi pleetik, a’b’anan ke’sutq’isiik wi’chik chirix, ut k’a’jo’ li sachk ke’xk’ul.

12 Relik chi yaal, xkoheb’ wi’chik rox sut, ut jo’kan wi’chik ke’xk’ul; ut eb’ li ink’a’ ke’kamsiik ke’sutq’i wi’chik sa’ li tenamit Nefi.

13 Ut ke’xtuulanob’resi rib’ toj sa’ li poqs, ut ke’xk’e rib’ rub’el li iiqleb’ re li moosil, ut ke’xkanab’ rib’ chi sak’e’k, ut chi tiikisiik yalaq b’ar, ut chi k’ehe’k li iiq sa’ xb’eeneb’, jo’ chanru li rajomeb’ li xik’ neke’ilok reheb’.

14 Ut ke’xtuulanob’resi rib’ toj sa’ xchamal li tuulanil ch’oolej; ut ke’elajin chi anchaleb’ xmetz’ew chiru li Dios; relik chi yaal, chiru chixjunil li kutan ke’elajin chiru lix Dios, re naq a’an tixkoleb’ sa’ lix ch’a’ajkilaleb’.

15 Ut anajwan li Qaawa’ kixb’ay rib’ chirab’inkil li relajihomeb’ sa’ xk’ab’a’ lix maa’usilaleb’; a’b’anan li Qaawa’ kirab’i li relajihomeb’, ut ki’ok chixq’unob’resinkil li raameb’ laj Lamanita jo’kan naq ke’ok chixkotzb’al li riiqeb’; a’ut li Qaawa’ ink’a’ kixk’ulub’a xch’ool chixkolb’aleb’ chiru li moosil.

16 Ut kik’ulman naq timil timil ke’ok chi usaak sa’ li ch’och’, ut ki’ok chi ka’ch’inaq chi tamk chiruheb’ li iyaj nak’uxman, ut lix ketomq, ut lix teep chi xul, jo’kan naq ink’a’ ke’rahob’tesiik rik’in tz’okaak.

17 Anajwan k’a’jo’ xk’ihaleb’ li ixq, neke’xq’ax xk’ihaleb’ li winq; jo’kan naq li rey aj Limhi kixtaqla naq li junjunq chi winq tixk’e li taak’anjelaq reheb’ li xmalka’an ut eb’ lix kok’al, re naq ink’a’ te’oso’q rik’in tz’okaak, ut a’in ke’xb’aanu xb’aan xnimal xk’ihaleb’ li ke’kamsiik chaq.

18 Anajwan eb’ lix tenamit laj Limhi ke’kana chi ch’utch’u chi junajeb’ ru a’ yaal jo’ kiru chiruheb’, ut ke’xk’aak’ale li riyajeb’ nak’uxman, ut lix ketomqeb’;

19 Ut li rey ajwi’ ink’a’ kixkanab’ rib’ chi wank chirix lix xaqxookil tz’akil li tenamit, wi ink’a’ naxk’am chirix lix moos aj kolol rix, xb’aan naq naxxuwa naq maare chan naq taat’ane’q sa’ ruq’eb’ laj Lamanita.

20 Ut kixtaqla naq eb’ lix tenamit te’xk’aak’ale li ch’och’ chixsutam, re naq maare chan naq te’xchapeb’ laj tij a’an li ke’eelelik chaq chiru li yamyookil ch’och’, li ke’maq’ok chaq reheb’ lix rab’ineb’ laj Lamanita, ut ke’xk’e xnimal li sache’k a’in chi chalk sa’ xb’eeneb’.

21 Xb’aan naq ke’raj raj xchapb’aleb’ re naq taaruuq te’xk’eheb’ chixtojb’al rix xmaakeb’; xb’aan naq ke’chal sa’ li ch’och’ Nefi chi q’eq, ut ke’xk’am li riyajeb’ nak’uxman, ut naab’al li k’a’aq re ru reheb’ terto xtz’aq; jo’kan naq ke’royb’eniheb’ sa’ muqmu.

22 Ut kik’ulman naq maajun chik ch’a’ajkilal ke’wan wi’ lix tenamit laj Limhi rik’ineb’ laj Lamanita, toj reetal naq kixtaw xq’ehil naq ke’chal laj Ammon ut eb’ lix komon sa’ li ch’och’.

23 Ut li rey, naq xikenaq chirix li rokeb’aal li tenamit rochb’een lix teep chi moos aj kolol rix, kixtaw laj Ammon ut eb’ lix komon; ut kixk’oxla naq a’aneb’ laj tij re laj Noe, jo’kan naq kixtaqla naq te’chape’q, ut te’b’ak’e’q, ut te’tz’ape’q sa’ tz’alam. Ut wi ta a’aneb’ laj tij re laj Noe, kixk’eheb’ raj chi kamsiik.

24 A’b’anan naq kixk’e reetal naq maawa’eb’, a’aneb’ b’an li ras riitz’in ut ke’chal chaq sa’ li ch’och’ Tzarahemla, kinujak rik’in sahil ch’oolejil chi numtajenaq xnimal.

25 Anajwan li rey aj Limhi kixtaqla, naq toj maji’ nachal laj Ammon, jun ch’ina ch’uut chi winq re xsik’b’al li ch’och’ Tzarahemla; a’ut ink’a’ ke’ru chixtawb’al, ut ke’wan chi sachso sa’ li yamyookil ch’och’.

26 A’b’anan, ke’xtaw jun li ch’och’ kiwan wi’ chaq tenamit junxil; relik chi yaal, jun li ch’och’ li hirho wi’ li chaqi b’aq; relik chi yaal, jun li ch’och’ ke’wan wi’ chaq tenamit ut kisachman chaq; ut eb’ a’an, xb’aan naq ke’xk’oxla naq a’an li ch’och’ Tzarahemla, ke’sutq’i sa’ li ch’och’ Nefi, ut ke’wulak sa’ xnub’aal li ch’och’ moko k’iila kutan ta ma nak’ulun laj Ammon.

27 Ut ke’xk’am chaq jun li tz’iib’anb’il esil rik’ineb’, a’an jun tz’iib’anb’il esil chirixeb’ li tenamit li ke’xtaw wi’ xb’aqel; ut tz’iib’anb’il chiru jar perel chi ch’iich’.

28 Ut laj Limhi kinujak wi’chik rik’in sahil ch’oolejil naq kixtzol rik’in xtz’uumal re laj Ammon naq li rey aj Mosiah wan jun xmaatan k’eeb’il xb’aan li Dios, taaruuq tixk’ut wi’ xyaalalil xkomon a’an li tz’iib’anb’il; relik chi yaal, ut kisaho’ ajwi’ xch’ool laj Ammon.

29 A’ut laj Ammon ut eb’ li ras riitz’in ke’nujak rik’in rahil ch’oolejil xb’aan naq q’axal k’iheb’ li ras riitz’in li ke’kamsiik chaq;

30 Ut jo’kan ajwi’ naq li rey aj Noe ut eb’ laj tij chiru ke’xk’eheb’ chaq li tenamit chixb’aanunkil k’iila maak ut maa’usilal chiru li Dios; ut jo’kan ajwi’ ke’raho’ xch’ool xb’aan xkamik laj Abinadi; ut jo’kan ajwi’ xb’aan xxikik laj Alma ut eb’ li ani xkoheb’ chirix, li ke’xk’uub’ chaq jun x’iglees li Dios rik’in lix metz’ew ut lix wankil li Dios, ut li paab’aal chirix li aatin li yeeb’il chaq xb’aan laj Abinadi.

31 Relik chi yaal, ke’raho’ xch’ool xb’aan xxikikeb’, xb’aan naq ink’a’ neke’xnaw b’ar ke’eelelik. Anajwan, ke’xjunaji raj rib’ rik’ineb’ chi saheb’ sa’ xch’ool, xb’aan naq eb’ a’an ke’ok ajwi’ sa’ jun sumwank rik’in li Dios re k’anjelak chiru, ut xpaab’ankil lix taqlahom.

32 Ut anajwan chirix xk’ulunik laj Ammon, li rey aj Limhi ki’ok ajwi’ sa’ jun sumwank rik’in li Dios, ut jo’kan ajwi’ naab’al reheb’ lix tenamit, re k’anjelak chiru ut xpaab’ankil lix taqlahom.

33 Ut kik’ulman naq li rey aj Limhi ut naab’al reheb’ lix tenamit ke’raj naq te’kub’eeq xha’; a’b’anan maajun wan sa’ li ch’och’ li k’eeb’il xwankil xb’aan li Dios. Ut laj Ammon ink’a’ kiraj xb’aanunkil a’in, rik’in naq kixk’oxla rib’ naq a’an jun moos li moko k’ulub’ej ta.

34 Jo’kan naq sa’ li q’ehil a’an ink’a’ ke’xk’uub’ rib’ choq’ iglees, ke’royb’eni b’an lix Musiq’ li Qaawa’. Anajwan ke’raj wank jo’ chanru ajwi’ laj Alma ut eb’ li ras riitz’in, li ke’eelelik chaq sa’ li yamyookil ch’och’.

35 Ke’raj naq te’kub’eeq xha’ re xk’utb’al ut xch’olob’ankil xyaalal naq wankeb’ xch’ool chi k’anjelak chiru li Dios chi anchaleb’ xch’ool; a’b’anan ke’xnajtob’resi li kutan; ut moqon taayeemanq resil lix kub’ikeb’ xha’.

36 Ut anajwan chixjunil lix k’oxlahom laj Ammon ut eb’ lix tenamit, ut li rey aj Limhi ut eb’ lix tenamit, a’an xkolb’al rib’eb’ sa’ ruq’eb’ laj Lamanita ut sa’ li moosil.