1 Ma sa oo ina toe foi mai Limae ma ona tagata i le aai o Nifae, ma amata ona latou toe nonofo i le laueleele i le filemu.

2 Ma sa oo ina ua mavae aso e tele sa amata ona toe oso le ita o sa Lamanā e faasaga ia sa Nifaē, ma sa amata ona latou o mai i tuaoi o le laueleele o faataamilo ai.

3 O lenei sa latou fefefe e fasioti ia te i latou, ona o le tautoga na fai e lo latou tupu ia Limae; ae sa latou fepo o latou alafau, ma faatino le pule i luga o i latou; ma amata ona latou tuu o avega mamafa i luga o o latou tua, ma tulituli i latou e pei ona latou faia i se asini gūgū.

4 Ioe, sa faia nei mea uma ina ia mafai ona faataunuuina o le afioga a le Alii.

5 Ma o lenei sa matuā tetele lava puapuaga o sa Nifaē, ma sa leai se auala sa mafai ona latou laveaiina ai i latou lava mai lima o sa Lamanā, ona sa siosiomia i latou e sa Lamanā i itu uma.

6 Ma sa oo ina amata ona muimui o tagata i le tupu ona o o latou puapuaga; ma sa amata ona latou mananao ia latou o atu e tau ma i latou. Ma sa latou faatigā tele i le tupu i a latou muimuiga; o lea na tuu atu ai e ia ia te i latou, ia latou faia e tusa ma o latou manao.

7 Ma sa latou toe faapotopoto faatasi i latou lava, ma oofu o latou ofutau, ma ua o atu e tau ma sa Lamanā e tutuli ese i latou mai lo latou laueleele.

8 Ma sa oo ina faatoilalo i latou e sa Lamanā, ma toe tutuli mai i latou i tua, ma fasioti le toatele o i latou.

9 Ma o lenei sa i ai se faanoanoaga ma se auega tele i totonu o le nuu o Limae, o le fafine ua oti lana tane ua faanoanoa mo lana tane, o le atalii ma le afafine ua faanoanoa mo lo la’ua tamā, ma uso mo o latou uso.

10 O lenei sa toatele se aofai o fafine i le nuu sa feoti a latou tane, ma sa latou fetagisi tele mai lea aso i lea aso, ona ua oo mai i luga o i latou se mata’u tele ia sa Lamanā.

11 Ma sa oo ina o lo latou tagi e lē aunoa na oso ai le ita o le vaega na totoe o le nuu o Limae e faasaga ia sa Lamanā; ma sa latou toe o atu e tau, peitai sa toe tutuli mai i latou i tua, ma le mafatia i le toatele na maliliu ai.

12 Ioe, sa latou toe o atu faatolu, ma faapena ona latou mafatia i le ala lava e tasi; ma o i latou o e sa le’i fasiotia sa toe foi mai i le aai o Nifae.

13 Ma sa latou faamaualaloina i latou lava e oo ifo i le efuefu, ma tuu atu i latou lava i le amo o le pologa, ma tuu atu i latou lava ia taia, ma tutuli mai lea mea i lea mea, ma faafafa i avega mamafa, e tusa ma manao o o latou fili.

14 Ma sa latou faamaualaloina i latou lava seia oo i le loloto o le lotomaualalo; ma sa latou tagi faatauanau atu i le Atua; ioe, sa latou tagi atu lava i lo latou Atua i le aso atoa ia laveai e ia i latou mai i o latou puapuaga.

15 Ma o lenei sa telegese ona faafofoga mai o le Alii i la latou tagi atu ona o a latou amioletonu; ae ui i lea sa faafofoga mai le Alii ia latou tagi, ma amata ona faamalūlū e ia o loto o sa Lamanā sa amata ona latou faamāmāina a latou avega; peitai sa le’i tusa ai ma le silafaga a le Alii ia laveaiina i latou mai le pologa.

16 Ma sa oo ina latou amata ona faasolo ina manuia i le laueleele, ma amata ona atia’e le saito sili atu ona tele, ma lafu, ma fagaga, sa latou lē mafatia ai i le fia aai.

17 O lenei sa toatele le aofai o fafine, sa sili atu i lo tane; o lea na poloaiina ai e le tupu o Limae e tatau i tane taitoatasi ona faasoa atu se vaega o ana mea mo le lagolagoina o fafine ua oti a latou tane ma a latou fanau, ina ia latou lē fano i le fia aai; ma sa latou faia lenei mea ona o le toatele o lo latou aofai ua fasiotia.

18 O lenei sa faatasitasi le nuu o Limae i se vaega e tasi i taimi uma sa mafai ai, e puipui a latou saito ma a latou lafu;

19 Ma sa lē faatuatuaina e le tupu lava ia le i ai o lona tagata i tua o pa o le aai, vagana ai ua ia ave ana leoleo faatasi ma ia, i le fefe ne’i i ai se ala atonu e pa’ū atu ai o ia i lima o sa Lamanā.

20 Ma sa faia e ia ia vaavaai faataamilo e lona nuu le laueleele, atonu latou te maua ai se auala latou te pu’e ai faitaulaga ia na sosola i le vao, o ē na gaoia afafine o sa Lamanā, ma ua mafua ai ona oo mai o se faafanoga tele faapea i o latou luga.

21 Ona sa latou mananao e pu’e i latou ina ia mafai ona latou faasalaina i latou; ona sa latou o mai i le nuu o Nifae i le po, ma ave a latou saito ma le tele o a latou mea taua; o lea na latou lamalama faatalitali ai i latou.

22 Ma sa oo ina lē toe i ai se faalavelave i le va o sa Lamanā ma le nuu o Limae, e oo mai i le taimi na o mai ai Amona ma ona uso i le laueleele.

23 Ma a’o i ai le tupu i tua o pa o le aai faatasi ma ana leoleo, sa latou maua Amona ma ona uso; ma i le manatu o i latou ia o faitaulaga a Noa, o lea na faia ai e ia ia pu’e i latou, ma saisai, ma lafo i le falepuipui. Ma a na fai o i latou ia o faitaulaga a Noa, po ua ia faatonu ia fasioti i latou.

24 Ae ina ua iloa e ia e lē o i latou ia, ae o i latou ia o ona uso, ma na o mai mai le laueleele o Sara’emila, sa faatumulia o ia i le olioli sa matuā tele lava.

25 O lenei, a’o le’i sau Amona, sa auina atu e le tupu o Limae se vaega toaitiiti o tagata e su’e le laueleele o Sara’emila; peitai sa latou lē mauaina, ma sa sē i latou i le vao.

26 Ae ui i lea, sa latou maua se laueleele sa ainā e ni tagata; ioe, o se laueleele sa ufitia i ivi mamago; ioe, o se laueleele sa ainā e ni tagata ma ua faaumatia; ma o i latou, i lo latou manatu o le laueleele lea o Sara’emila, sa latou toe foi mai i le laueleele o Nifae, ma latou taunuu mai ai i tuaoi o le laueleele i ni aso sa le’i tele a’o le’i sau Amona.

27 Ma sa latou aumai faatasi ma i latou se talafaamaumau, o se talafaamaumau lava lea o tagata e ona ivi na latou maua; ma sa togitogia lea talafaamaumau i luga o papatusi o minerale u’amea.

28 Ma o lenei sa toe faatumulia Limae i le olioli ina ua iloa e ia mai le fofoga o Amona o loo i ai i le tupu o Mosaea se meaalofa mai le Atua, e mafai ona faaliliu ai e ia togitogiga faapea; ioe, ma sa olioli foi Amona.

29 Peitai sa faatumulia Amona ma ona uso i le faanoanoa, ona o le toatele o o latou uso ua fasiotia;

30 Ma le faaosoina foi e le tupu o Noa ma ana faitaulaga le nuu i le faia o agasala ma amioletonu e tele e faasaga i le Atua; ma sa latou faanoanoa foi i le maliu o Apinati; ma le o ese atu foi o Alema ma tagata o ē sa o atu faatasi ma ia, o lē na faatuina se ekalesia a le Atua e ala i le malosi ma le mana o le Atua, ma le faatuatua i upu na tautala i ai Apinati.

31 Ioe, sa latou faanoanoa i lo latou o ese atu, ona sa latou lē iloa le mea ua latou sosola atu i ai. O lenei semanu ua latou fiafia e auai faatasi ma i latou, ona ua ulu atu foi i latou lava i se feagaiga ma le Atua e auauna atu ia te ia ma tausi i ana poloaiga.

32 Ma o lenei talu mai le oo mai o Amona, ua ulu atu foi le tupu o Limae i se feagaiga ma le Atua, ma le toatele foi o lona nuu, e auauna atu ia te ia ma tausi i ana poloaiga.

33 Ma sa oo ina mananao le tupu o Limae ma le toatele o lona nuu ia papatisoina i latou; peitai sa leai se tasi i le nuu sa i ai le pule mai le Atua. Ma sa teena e Amona lona faia o lenei mea, i le manatu ifo ia te ia lava o ia o se auauna lē agavaa.

34 O lea sa latou lē faatulagaina ai i latou lava i lena taimi i se ekalesia, a ua faatalitali i le Agaga o le Alii. O lenei sa latou mananao ia avea i latou e pei o Alema ma ona uso, o ē na sosola i le vao.

35 Sa latou mananao ia papatisoina i latou e avea o se mau ma se molimau ua latou loto e auauna atu i le Atua ma o latou loto atoa; ae ui i lea sa latou tolopōina le taimi; ma o le a tuuina atu i se taimi mulimuli mai se tala o lo latou papatisoga.

36 Ma o lenei o suesuega uma a Amona ma ona tagata, ma le tupu o Limae ma lona nuu, o le laveaiina lea o i latou lava mai lima o sa Lamanā ma mai le pologa.