1 Iwe non ewe fansoun pwe Limai me noun kewe aramas ra niwin ngeni ewe teninimwen Nifai, me poputa ne nonnom non ewe fonu sefan non kinamwe.

2 Iwe non ewe fansoun pwe mwirin chommong ran ekkewe chon Leiman ra poputa sefan ne mwasangasangeta non ar song ngeni ekkewe chon Nifai, iwe ra poputa ne feito non ekkewe kianin ewe fonu nepekir.

3 Iei rese pwaracho ar repwe nireno, pokiten ewe pwon nour we king a akkaponu minne a fen fori ngeni Limai; nge ra wichir won saper, me aea pochokunen pung wor; me poputa ne wata oser mi chou won nukunuper, me asufetaner usun ar repwe asufetanei emon tongki ese tongeni kapas.

4 Ewer, ekkei meinisin a fis pwe ewe kapasen ewe Samon epwe tongeni pwonueta.

5 Iwe iei riaffoun ekkewe chon Nifai ra fokkun pochokun, iwe ese wor aanen ar repwe tongeni angasano inisir seni ne pour, pun ekkewe chon Leiman ra rokopwanireno won nepekir meinisin.

6 Iwe non ewe fansoun ekkewe aramas ra poputa ne ngunungun ngeni ewe king pokiten ar kewe riaffou; iwe ra poputa ne wesen mochen pwe repwe no ungeni ir pwe repwe maun. Iwe ra unusen ariaffou ewe king ren ar kewe anini; iei minne a mut ngeni ir pwe repwe fori usun met ra mochen.

7 Iwe ra ioifengenir sefan, me pwinitanong ufer kewe fouten eppet, me feino ngeni ekkewe chon Leiman pwe repwe asureno seni fonuer we.

8 Iwe non ewe fansoun pwe ekkewe chon Leiman ra akkufur, me asusefanir, me nieno chommong me neir.

9 Iwe iei mi wor ew netipeta me ennetin noninen napanap nein ekkewe aramasen Limai, ekkewe fefin a mano punuwer ra netipeta fan iten punuwer kewe, ekkewe anuon me ekkewe fopun ra netipeta fan iten semer kewe, me ekkewe mwan fan iten pwir kewe.

10 Iei a fokkun chommong fefin a mano punuwer non ewe fonu, iwe ra unusen pupuchor seni ran ngeni ran, pokiten ennetin ar nuokusun ekkewe chon Leiman a feito wor.

11 Iwe non ewe fansoun ar kewe soposoponon ngunungun a amwasangata songen ekkewe nussun aramasen Limai ngeni ekkewe chon Leiman; iwe ra feino sefan pwe repwe maun, nge ekkewe chon Leiman ra asusefanir, ra riaffouni chommong mano.

12 Ewer, ra feino sefan pwan mwo aunungatin fansoun, me ra pwan riaffou non ewe chok usun napanap; iwe ekkewe rese mano ra niwin sefan ngeni ewe teninimwen Nifai.

13 Iwe ra atipetekisoner pwan mwo ngeni ewe puun, ra mut ngeni inisir repwe nom fan nemenien ewe choun fotek, ra mut ngeni inisir repwe wichiwich, me repwe susufetan, me choutiw, anongonong won mochenin ekkewe chon koum ngeni ir.

14 Iwe ra atipetekisoner pwan mwo ren anonnonun tipetekison; iwe ra unusen sio ngeni Kot; ewer, pwan mwo non unusen nangatamen ewe ran ra sio ngeni ar Kot pwe epwe tongeni angasereno seni ar riaffou.

15 Iwe iei ewe Samon a mang ne rongorong ar sio pokiten ar angangangaw; nge inamo ewe Samon a rongorong ar sio, me a poputa ne apweteteno netipen ekkewe chon Leiman iwe ra poputa ne ekisano achour kewe; inamo ewe Samon ese ekieki pwe mi fich pwe epwe angasereno seni fotek.

16 Iwe non ewe fansoun pwe ra poputa ne feiochuno ekis me ekis non ewe fonu, me poputa ne amari chommong grain, me penen man, me pwin man, iwe rese riaffou ren echik.

17 Iei a wor chommongun chochon fefin, nap seni chochon mwan; iei minne king Limai a annuku pwe emon me emon mwan epwe fangeno ekis an epwe anisi ekkewe fefin mi mano punuwer me nour kewe, pwe resap tongeni mano ren echik; iwe ei ra fori pokiten watten chochon nour kewe ra fen ninnino.

18 Iei ekkewe aramasen Limai ra nom fengen non ew mwich ren ukukun ar tongeni, me tumunu ar kewe grain me nour kewe penen man;

19 Iwe ewe king pwisin ese nukunuk non i an epwe tou nukun ekkewe tittin ewe teninimw, tiwenon chok ika epwe uwei ngeni i noun kewe chon mas, a nuokus ika ren ekkoch popun epwe turunong ne poun ekkewe chon Leiman.

20 Iwe a fori pwe noun kewe aramas repwe nenengeni ewe fonu nepekir, pwe ren ekkoch popun repwe tongeni angei ekkewe pris ekkewe ra suno ngeni ewe fonu pon, ekkewe ra sonani ekkewe fopun noun ekkewe chon Leiman, me ekkewe ra efisi ew kiteter mi napanap epwe feito wor.

21 Pun ra fokkun mochen pwe repwe angei ir pwe repwe tongeni ariaffour; pun ra fen feito non ewe fonuen Nifai fansoun pwin, me uweiano ar kewe grain me chommong me nein ar kewe mettoch mi auchea; iei minne ra opetiw me witir.

22 Iwe non ewe fansoun pwe ese chiwen wor osukosuk nefinen ekkewe chon Leiman me ekkewe aramasen Limai, pwan mwo tori ewe fansoun Ammon me pwin kewe ra feito ngeni ewe fonu.

23 Iwe nupwen ewe king a tou nukun ekkewe tittin ewe teninimw fiti noun chon mas, a kuna Ammon me pwin kewe; iwe a ekieki pwe ir ekkewe pris noun Noah iei minne a fori pwe repwe ono, me fofo, me katurunong non kanapus. Iwe ika ita pwe ir ekkewe pris noun Noah i epwe fen fori pwe repwe ninnino.

24 Iwe nupwen a sinei pwe esap ir ekkewe pris, nge ir pwin, me ra feito seni ewe fonuen Saraemla, i a uren fokkun pwapwa napanap.

25 Iei king Limai a fen tinano, me mwen wareton Ammon, ew kukkun mwichen mwan pwe repwe kutta ewe fonuen Saraemla; nge rese tongeni kuna, iwe ra monucheno non ewe fonu pon.

26 Nge inamo, ra kuna ew fonu a fen pin aramaseno; ewer, ew fonu minne a pwonuno ren chu mi pwas; ewer, ew fonu minne mi pin aramaseno me minne ra fen mano; iwe ir, pokiten ra ekieki pwe ina ewe fonuen Saraemla, ra niwin ngeni ewe fonuen Nifai, ra fen tori ekkewe kianin ewe fonu ese chommong ran a fen no me mwen wareton Ammon.

27 Iwe ra uweiato ngeni ir ew uruo, pwan mwo ew uruon ekkewe aramas minne chur kewe ra fen kuna; iwe a makketiw won seleichen mecha.

28 Iwe iei Limai a pwan uren pwapwa sefan nupwen a sinei seni awen Ammon pwe a wor ren king Mosaia ew niffang seni Kot, ren ewe popun i a tongeni awewei ekkewe sokkun mak; ewer, iwe Ammon a pwan pwapwa.

29 Nge Ammon me pwin kewe ra uren netipengaw pokiten chommongun me nein pwir kewe ra fen ninnino;

30 Me pwan pokiten king Noah me noun kewe pris ra efisi an ekkewe aramas repwe fori chommong tipis me angangangaw ngeni Kot; iwe ra pwan netipeta ren manon Apinatai we; me pwan ren an Alma suno me ekkewe aramas minne ra fiti, ekkewe ra fori ew mwichefenin Kot seni ewe pochokun me manamanen Kot, me nuku won ekkewe kapas minne a fen kapas me ren Apinatai.

31 Ewer, ra netipeta ren ar we suno, pun rese sinei ika ian ra suno ie. Iei ita repwe fen pwapwa ne fitir, pun ir pwisin ra fen tonong non ew pwon mi pin ngeni Kot pwe repwe angang ngeni i me aneasochisi an kewe annuk.

32 Iwe iei seni ewe fansoun wareton Ammon, king Limai a pwan tonong non ew pwon mi pin ngeni Kot, me pwan chommong me nein noun kewe aramas, pwe repwe angang ngeni i me aneasochisi an kewe annuk.

33 Iwe non ewe fansoun king Limai me chommong me nein noun kewe aramas ra fokkun mochen pwe repwe papatais; nge ese wor emon non ewe fonu a wor an mumuta me ren Kot. Iwe Ammon ese etiwa an epwe fori ei, a ekieki pwe i esap emon chon angang mi fich ngeni.

34 Iei minne non ena fansoun rese achufengeni ir non ew mwichefen, ra witiwit won Ngunun ewe Samon. Iei ra fokkun mochen repwe pwan winiti usun Alma me pwin kewe, ekkewe ra fen suno ngeni ewe fonu pon.

35 Ra fokkun mochen pwe repwe papatais pwe pisekin pwarata me kapasen pwarata pwe ra ennetin mochen angang ngeni Kot ren unusen netiper; nge inamo ra ammangano ewe fansoun; iwe ew uruon ar papatais epwe kawor mwirin.

36 Iwe iei meinisin ekiekin Ammon me noun kewe aramas, me king Limai me noun kewe aramas, pwe repwe angasereno seni ne poun ekkewe chon Leiman me seni fotek.