1 Ut anajwan kik’ulman naq laj Ammon ut li rey aj Limhi ke’ok chixk’uub’ankil lix na’leb’eb’ rochb’een li tenamit chan ru naq te’xkol rib’ chiru li moosil; ut ke’xtaqla ajwi’ xch’utub’ankileb’ chixjunil li tenamit, ut a’in ke’xb’aanu re taaruuq te’xk’ul lix yaab’ xkuxeb’ li tenamit chirix li na’leb’ a’an.

2 Ut kik’ulman naq ink’a’ neke’xtaw chan ta wi’ ru te’xkol rib’ chiru li moosil, ka’ajwi’ wi te’xk’am li rixqilal ut lix kok’aleb’, ut lix ketomq ut lix teepeb’ chi xul, ut lix muheb’aal t’ikr, ut te’xik chiru li yamyookil ch’och’; xb’aan naq rik’in naq q’axal k’iheb’ laj Lamanita, moko kiruhan ta chiruheb’ lix tenamit laj Limhi naq te’xyal ru rik’ineb’, ut te’xk’oxla xkolb’al rib’ chiru li moosil rik’in li yok’leb’ ch’iich’.

3 Anajwan kik’ulman naq laj Gideon xko’o ut kixaqli chiru li rey, ut kixye re: Anajwan, at rey, toj anajwan kawab’i k’iila sut li waatin naq yooko chixyalb’al qu rik’ineb’ li qas qiitz’in aj Lamanita.

4 Ut anajwan, at rey, wi ink’a’ xinaawil jo’ moos li maak’a’ na’ok wi’, malaj ut wi toj anajwan xawab’i li waatin chi yal ta ka’ch’inaq, ut xk’anjelak aawe, chi jo’kan nawaj naq chawab’i li waatin sa’ li hoonal a’in, ut laa’in tinwanq choq’ aamoos ut tinkol li tenamit a’in chiru li moosil.

5 Ut li rey kixk’e re a’an naq taa’aatinaq. Ut laj Gideon kixye re:

6 K’e reetal li eleb’aal wan chi ixej, sa’ li xaqxookil tz’ak li wan chi ixej, sa’ li jun raqal re li tenamit li wan chi ixej. Eb’ laj Lamanita, malaj ut eb’ laj k’aak’alenel reheb’ laj Lamanita, chi q’eq neke’wan chi kalajenaq; jo’kan ut, chiqataqla xjek’inkil jun aatin sa’ xyanqeb’ chixjunil li tenamit a’in, re te’xch’utub’eb’ lix ketomq ut lix teepeb’ chi xul, re naq te’xtiikisiheb’ sa’ li yamyookil ch’och’ chi q’eq.

7 Ut laa’in tinxik chi taqlanb’il aab’aan, ut tintoj jun sutaq chik li tojleb’ viin reheb’ laj Lamanita, ut eb’ a’an kalajenaqaqeb’; ut laa’o toonume’q chiru li muqmuukil eleb’aal sa’ xtz’e lix na’aj lix teepeb’ naq kalajenaqeb’ ut warenaqeb’.

8 Chi jo’kan too’elq qochb’eeneb’ li qixqilal ut li qakok’al, li qaketomq ut li qateep chi xul, chiru li yamyookil ch’och’; ut tooxik sa’ xsutam li ch’och’ Xilom.

9 Ut kik’ulman naq li rey ki’ab’in chiru li raatin laj Gideon.

10 Ut li rey aj Limhi kixtaqla naq eb’ lix tenamit te’xch’utub’eb’ lix ketomq, ut kixtaqla li tojleb’ viin reheb’ laj Lamanita; ut jo’kan ajwi’ kixtaqla chik xkomon li viin, re xsiib’al reheb’; ut ke’ruk’ chi naab’al li viin li kixtaqla chaq li rey aj Limhi reheb’.

11 Ut kik’ulman naq lix tenamit li rey aj Limhi ke’el chi q’eq chiru li yamyookil ch’och’ rik’ineb’ lix ketomq ut lix teepeb’ chi xul, ut xkoheb’ sa’ xsutam li ch’och’ Xilom sa’ li yamyookil ch’och’, ut ke’xjal lix b’e sa’ xjayal li ch’och’ Tzarahemla, chi k’amb’ileb’ xb’e xb’aan laj Ammon ut eb’ lix komon.

12 Ut ke’xk’am chaq rik’ineb’ chixjunil lix oor, ut lix plaat, ut li k’a’ru reheb’ li terto xtz’aq, li ke’ru chixk’amb’al, ut jo’kan ajwi’ li k’a’ru nak’anjelak reheb’, toj sa’ li yamyookil ch’och’; ut ke’xchap lix b’e.

13 Ut chirix naq ke’wan k’iila kutan chiru yamyookil ch’och’ ke’wulak sa’ li ch’och’ Tzarahemla, ut ke’xjunaji rib’ rik’in lix tenamit laj Mosiah, ut ke’xk’e rib’ chi taqlaak xb’aan.

14 Ut kik’ulman naq laj Mosiah kixk’uleb’ rik’in sahil ch’oolejil; ut kixk’ul ajwi’ li esil tz’iib’anb’il xb’aaneb’, ut jo’kan ajwi’ li tz’iib’anb’il esil li kitawe’ xb’aan xtenamit laj Limhi.

15 Ut anajwan kik’ulman chirix naq ke’xtaw laj Lamanita naq elenaqeb’ chaq lix tenamit laj Limhi sa’ li ch’och’ chi q’eq, naq ke’xtaqla jun teep aj pleet sa’ li yamyookil ch’och’ re xtaaqenkileb’;

16 Ut chirix naq ke’xtaaqeheb’ chiru wiib’ kutan, ink’a’ chik ke’ru chixtaaqenkil reetalil li roqeb’; jo’kan naq ke’wan chi sachso sa’ li yamyookil ch’och’.