1 Anajwan laj Alma, rik’in naq yeeb’il re xb’aan li Qaawa’ naq te’chalq li teep aj pleet re li rey aj Noe sa’ xb’eeneb’, ut chirix xk’eeb’al chixnaw lix tenamit, jo’kan naq ke’xch’utub’eb’ lix ketomq, ut ke’xk’am xkomon li riyaj li nak’uxman, ut ke’el sa’ li yamyookil ch’och’ chiruheb’ li teep aj pleet re li rey aj Noe.

2 Ut li Qaawa’ kixk’eheb’ xmetz’ew, jo’kan naq eb’ lix tenamit li rey aj Noe ink’a’ ke’ru chixtawb’aleb’ re xsachb’aleb’.

3 Ut ke’eelelik waqxaqib’ kutan xxikikeb’ chiru li yamyookil ch’och’.

4 Ut ke’wulak sa’ jun li ch’och’, relik chi yaal, jun li ch’och’ q’axal ch’ina-us ut sa rilb’al, jun li ch’och’ wan wi’ saq ruhil ha’.

5 Ut ke’xyiib’ lix muheb’aal t’ikr, ut ke’ok chixk’anjelankil li ch’och’, ut ke’ok chixkab’lankil li kab’l; relik chi yaal, ke’wan xsak’ahil, ut ke’k’anjelak chi numtajenaq.

6 Ut eb’ li tenamit ke’raj naq laj Alma taawanq choq’ xreyeb’, xb’aan naq a’an raab’il xb’aan lix tenamit.

7 A’b’anan a’an kixye reheb’: K’ehomaq reetal, moko na’ajman ta naq taawanq jun qarey; xb’aan naq jo’ka’in naxye li Qaawa’: Moko taak’ehe’q ta xwankil junaq tz’ejwalej sa’ xb’een li jun chik, malaj junaq winq moko tixk’oxla ta naq taqenaq sa’ xb’een li jun chik; jo’kan naq ninye eere naq moko na’ajman ta naq taawanq junaq eerey.

8 A’b’anan, wi ta taaruuq naq junelik te’wanq li tiikil winq choq’ eerey, us raj naq taawanq jun lee rey.

9 A’b’an chijultiko’q eere lix maa’usilal li rey aj Noe ut eb’ laj tij chiru; ut laa’in ajwi’ kinchape’ sa’ jun li ra’al, ut kinb’aanu naab’al li k’a’aq re ru yib’ob’aal ru sa’ rilob’aal li Qaawa’, xb’aan wi’ kinnumsi li rahil jalb’a-k’a’uxlej;

10 A’b’anan, chirix xnumsinkil li nimla rahilal, li Qaawa’ kirab’i lin elajihom, ut a’an kixsume ru lin tij, ut kinixk’e choq’ k’anjeleb’aal sa’ li ruq’, re xk’amb’al eek’ihal chixnawb’al chirix lix yaalil na’leb’.

11 A’b’anan moko ninnima ta inloq’al rik’in a’in, xb’aan naq laa’in moko k’ulub’ejin ta re tinnima inloq’al injunes.

12 Ut anajwan ninye eere, laa’ex xexrahob’tesiik xb’aan li rey aj Noe, ut wanjenaqex chi moosil chiru a’an ut eb’ laj tij chiru, ut kexk’ame’ sa’ li maa’usilal xb’aaneb’; jo’kan naq b’ak’b’ilex chaq’ rik’in xb’ak’leb’ li maa’usilal.

13 Ut anajwan, jo’ chanru naq xexkole’ xb’aan lix wankil li Dios chiru li b’ak’leb’ a’in; relik chi yaal, sa’ ruq’ chaq li rey aj Noe ut eb’ lix tenamit, ut chiru ajwi’ lix b’ak’leb’ li maa’usilal, jo’kan ajwi’ nawaj naq chexaqab’ eerib’ chi kaw sa’ li ach’ab’aak a’in li kex’ach’ab’aak wi’, ut naq maajun winq teekanab’ chi wank choq’ rey sa’ eeb’een.

14 Ut jo’kan ajwi’ maajun teekanab’ chi wank choq’ aj tzolonel malaj aj k’ehol na’leb’ cheru, ka’ajwi’ wi re li Dios li winq a’an, ut nab’eek sa’ lix b’e ut naxpaab’ lix taqlahom.

15 Chi jo’kan laj Alma kixtzoleb’ lix tenamit, naq li junjunq chi winq chixra li ras riitz’in jo’ naxra rib’ xjunes, ut naq maajun wech’ok-ib’ chiwanq sa’ xyanqeb’.

16 Ut anajwan, laj Alma kiwan choq’ taqenaqil aj tij chiruheb’, rik’in naq a’an kitikib’ank re lix igleeseb’.

17 Ut kik’ulman naq maajun kixk’ul wankilal chi jultikank aatin malaj chi k’utuk, ka’ajwi’ rik’in a’an, chi k’eeb’il xb’aan li Dios. Jo’kan naq a’an kixk’ojob’ chixjunileb’ laj tijeb’ ut chixjunileb’ lix tzoloneleb’; ut maajun neke’k’ojob’aak, ka’ajwi’ wi a’aneb’ tiikil winq.

18 Jo’kan naq ke’xk’aak’aleheb’ lix tenamit, ut ke’xch’olaniheb’ rik’in li k’a’aq re ru re li tiikilal.

19 Ut kik’ulman naq ke’ok chi usaak chi numtajenaq sa’ li ch’och’; ut Helam ke’xye re li ch’och’.

20 Ut kik’ulman naq ke’k’ihan ut ke’usa chi numtajenaq sa’ li ch’och’ Helam; ut ke’xyiib’ jun li tenamit, ut lix tenamit laj Helam ke’xye re.

21 A’b’anan li Qaawa’ naxk’oxla naq us xq’usb’aleb’ lix tenamit; relik chi yaal, naxyal rix lix kuyumeb’ ut lix paab’aaleb’.

22 A’b’anan—ani naxkanab’ rib’ chiru, a’an taawaklesiiq sa’ roso’jik li kutan. Relik chi yaal, ut chi jo’kan naq kiwan rik’in li tenamit a’in.

23 Xb’aan naq k’ehomaq reetal, laa’in tink’ut cheru naq ke’k’ame’ chi moosil, ut maajun kiru chi kolok reheb’, ka’ajwi’ li Qaawa’ lix Dios, relik chi yaal, a’an lix Dios laj Abraham, laj Isaak, ut laj Jakob.

24 Ut kik’ulman naq a’an kixkoleb’; ut kixk’ut xnimal lix wankilal chiruheb’, ut nim li saho’k kiwan sa’ xch’ooleb’.

25 Xb’aan naq k’ehomaq reetal, naq wankeb’ sa’ li ch’och’ Helam, relik chi yaal, sa’ li tenamit Helam, naq yookeb’ chixk’anjelankil li ch’och’ sa’ xsutam, k’ehomaq reetal, kik’ulman naq jun teep aj pleet reheb’ laj Lamanita kiwan sa’eb’ lix nub’aal li ch’och’.

26 Anajwan kik’ulman naq eb’ lix komon laj Alma ke’eelelik chaq sa’eb’ lix ch’och’, ut ke’xch’utub’ rib’ sa’ li tenamit Helam; ut k’a’jo’ naq ke’xuwak xb’aan xk’utunikeb’ chaq laj Lamanita.

27 A’ut laj Alma xko’o ut kixaqli sa’ xyanqeb’, ut kixye reheb’ naq me’xuwak; chijultiko’q b’an reheb’ li Qaawa’ lix Dios, ut a’an tixkoleb’.

28 Jo’kan naq ke’xch’anab’ lix xiweb’, ut ke’ok chi elajink chiru li Qaawa’ re tixq’unob’resi xch’ooleb’ laj Lamanita, re naq eb’ a’an te’xkol xyu’ameb’ a’an, ut li rixaqileb’, ut li ralal xk’ajoleb’.

29 Ut kik’ulman naq li Qaawa’ kixq’unob’resi xch’ooleb’ laj Lamanita. Ut laj Alma ut eb’ li ras riitz’in xkoheb’ ut ke’xq’axtesi rib’ sa’ ruq’eb’; ut eb’ laj Lamanita ke’reechani li ch’och’ Helam.

30 Anajwan eb’ li teep aj pleet reheb’ laj Lamanita, li ke’taaqenk chaq reheb’ lix tenamit li rey aj Limhi, ke’wan chi sachso sa’ li yamyookil ch’och’ chiru k’iila kutan.

31 Ut k’ehomaq reetal, ke’xtaweb’ laj tij a’an re li rey aj Noe, sa’ jun li na’ajej Amulon ke’xye re; ut eb’ a’an ak ke’ok chaq chireechaninkil li ch’och’ Amulon ut ke’ok chaq chixk’anjelankil li ch’och’.

32 Anajwan li najolomink reheb’ laj tij a’an, aj Amulon xk’ab’a’.

33 Ut kik’ulman naq laj Amulon kixtz’aama chiruheb’ laj Lamanita; ut jo’kan ajwi’ kixtaqlaheb’ li rixaqileb’, a’aneb’ xrab’ineb’ laj Lamanita, re te’xtz’aama chiruheb’ li ras riitz’in, naq ink’a’ te’xsach lix b’eelomeb’.

34 Ut eb’ laj Lamanita ke’xtoq’ob’aheb’ ru laj Amulon ut eb’ lix komon, ut ink’a’ ke’xsacheb’, sa’ xk’ab’a’eb’ li rixaqil.

35 Ut laj Amulon ut eb’ lix komon ke’xjunaji rib’ rik’ineb’ laj Lamanita, ut yookeb’ chi xik sa’ li yamyookil ch’och’ re xsik’b’al li ch’och’ Nefi naq ke’xtaw li ch’och’ Helam, li eechaninb’il xb’aan laj Alma ut eb’ lix komon.

36 Ut kik’ulman naq eb’ laj Lamanita ke’xyeechi’i re laj Alma ut eb’ li ras riitz’in, naq wi te’xk’ut chiruheb’ li b’e naxik sa’ li ch’och’ Nefi, naq te’xkanab’eb’ chi yo’yo ut chi ach’ab’anb’il.

37 A’b’anan chirix naq laj Alma kixk’ut chiruheb’ li b’e naxik sa’ li ch’och’ Nefi, eb’ laj Lamanita ink’a’ ke’xb’aanu li ke’xyeechi’i chaq; ke’xxaqab’eb’ b’an laj k’aak’alenel chixsutam li ch’och’ Helam, sa’ xb’een laj Alma ut eb’ lix komon.

38 Ut li jun ch’ol chik reheb’ xkoheb’ sa’ li ch’och’ Nefi, ut jun jachal reheb’ a’an ke’sutq’i sa’ li ch’och’ Helam, ut ke’xk’am ajwi’ chirixeb’ li rixaqileb’ ut lix kok’aleb’ laj k’aak’alenel li ke’kanab’aak chaq sa’ li ch’och’.

39 Ut lix reyeb’ laj Lamanita kixk’e re laj Amulon naq taawanq choq’ rey ut choq’ aj taqlanel sa’ xb’een lix tenamit li wankeb’ sa’ li ch’och’ Helam; a’b’an moko taawanq ta xwankil chixb’aanunkil k’a’ruhaq li moko naxk’am ta rib’ rik’in li naraj lix reyeb’ laj Lamanita.