1 Iei Alma, pokiten a fen aurour me ren ewe Samon pwe ekkewe sounfiun king Noah repwe feito wor, me pokiten a fen affata ngeni noun kewe aramas, iei minne ra ionfengeni nour kewe penen man, me angei ar kewe grain, me feino ngeni non ewe fonu pon mwen ekkewe sounfiun king Noah.

2 Iwe ewe Samon a apochokuner, pwe ekkewe aramasen king Noah resap tongeni tori ir ar repwe nireno.

3 Iwe ra su non ar sai ukukun wanu ran non ewe fonu pon.

4 Iwe ra feito ngeni ew fonu, ewer, pwan mwo ew fonu mi ningoch me menoch, ew fonuen konik mi nimenimoch.

5 Iwe ra aueta imwer kewe imw mangaku, me poputa ne anganga ewe puun, me poputa ne kau imw; ewer, ra fokkun angang öch, me ra fokkun angang weires.

6 Iwe ekkewe aramas ra fokkun mochen pwe Alma epwe nour king, pun a achengicheng me ren noun kewe aramas.

7 Nge i a apasa ngeni ir: Nengeni, ese auchea pwe epwe wor emon nouch king; pun iei anon ewe Samon: Ousap aucheani emon aramas nap seni pwan emon, are emon esap ekieki inisin pwe mi nap seni pwan emon; iei minne ua apasa ngenikemi pwe ese auchea pwe epwe wor emon noumi king.

8 Nge inamo, ika pwe mi tufich pwe epwe wor mwan mi pung fansoun meinisin ar repwe noumi king iwe epwe murino an epwe wor emon noumi king.

9 Nge chechemeni ewe angangangawen king Noah me noun kewe pris; iwe ngang pwisin ua tup non ew sar, me fori chommong mettoch minne mi anieput me nemesen ewe Samon, minne a esenipato ngeniei aier mi eriaffou;

10 Nge inamo, mwirin chommong riaffou, ewe Samon a rongorong ai kewe sio, me a ponueni ai kewe iotek, me a fori ai upwe pisekin aninis me non poun kewe ne uwei fokkun chommong me neimi ngeni ew mirit usun an we ennet.

11 Nge inamo, non ei ngang use sikaseni, pun ngang use fich ai upwe sikaseni inisi.

12 Iwe iei ua apasa ngenikemi, oua fen riaffou me ren king Noah, me oua fen fotek ngeni i me noun kewe pris, me oua fen tonong non angangangaw pokiter; iei minne oua fen fofo ren ekkewe senin angangangaw.

13 Iwe iei nupwen oua fen ngaseno me ren ewe manamanen Kot seni ekkei fofo; ewer, pwan mwo seni ne poun king Noah me noun kewe aramas, me pwan seni ekkewe fofon angangangaw, iei usun ua fokkun mochen pwe oupwe nukuchar non ei napanapen ngaseno ren minne oua fen ngaseno, me pwe ousap apinukunuku emon mwan an epwe king womi.

14 Me ousap pwan apinukunuku emon an epwe emon noumi sense are noumi chon afanafan, tiwenon chok ika epwe emon mwanin Kot, a fetan non an kewe aan me aneasochisi an kewe annuk.

15 Iei Alma a aiti noun kewe aramas, pwe emon me emon epwe tongei chon orun usun a pwisin tongei inisin, pwe esap wor anini fengen neir.

16 Iwe iei, Alma nour pris mi nap, pokiten i ewe chon forata ar we mwichefen.

17 Iwe non ewe fansoun pwe ese wor emon a angei mumuta an epwe afanafan are assukun tiwenon chok ika epwe me ren i seni Kot. Iei minne a epinano nour kewe pris meinisin me nour kewe sense meinisin; iwe ese wor a epinipinino tiwenon chok ika repwe mwan mi pung.

18 Iei minne ra nenengeniochu nour kewe aramas, me tumunur non mettoch ren pekin wenechar.

19 Iwe non ewe fansoun pwe ra poputa ne fokkun feiochuno me non ewe fonu; iwe ra eita ngeni ewe fonu Helam.

20 Iwe non ewe fansoun pwe ra chommongono me fokkun feioch non ewe fonuen Helam; iwe ra aueta ew teninimw, minne ra eita ngeni ewe teninimwen Helam.

21 Nge inamo ewe Samon a ekieki pwe mi öch an epwe fonou noun kewe aramas; ewer, a sotuni ar tipepos me ar nuku.

22 Nge inamo—ion ewe epwe wanong an apinukunuk non i ewe pwan chok epwe seikita non ewe ranin soponon. Ewer, iwe a iei usun ren ekkei aramas.

23 Pun nengeni, upwe pwar ngenikemi pwe ra katonong non fotek, iwe ese wor a tongeni angasereno nge ewe Samon ar Kot, ewer, pwan mwo ewe Koten Abraham me Isaac me Jacob.

24 Iwe non ewe fansoun pwe a angasereno, me a pwarano an manaman mi napanap ngeni ir, iwe a pochokun ar we pwapwa.

25 Pun nengeni, non ewe fansoun pwe nupwen ar we nom non ewe fonuen Helam, ewer, non ewe teninimwen Helam, nupwen ar anganga ewe fonu nepekir, nengeni ew mwichen sounfiun ekkewe chon Leiman a nom non kianin ewe fonu.

26 Iei non ewe fansoun pwe pwin Alma kewe ra suno seni ar kewe atake, me ionfengeni inisir non ewe teninimwen Helam; iwe ra fokkun nuokus pokiten feiton ekkewe chon Leiman.

27 Nge Alma a feino me uta me neir, me peser pwe resap nuokus, nge repwe chechemeni ewe Samon ar Kot me i epwe angasereno.

28 Iei minne ra akkouno ar nuokus, me poputa ne sio ngeni ewe Samon pwe i epwe apwetetei netipen ekkewe chon Leiman, pwe repwe amanauer, me punuwer kewe, me nour kewe.

29 Iwe non ewe fansoun ewe Samon a apwetetei netipen ekkewe chon Leiman. Iwe Alma me pwin kewe ra feino me fangeta inisir ngeni ne pour; iwe ekkewe chon Leiman ra angei nemenem won ewe fonuen Helam.

30 Iei ekkewe sounfiun ekkewe chon Leiman, ekkewe ra tapweno mwirin ekkewe aramasen king Limai, ra monucheno non ewe fonu pon non chommong ran.

31 Iwe nengeni, ra fen kuna ekkewe pris noun king Noah, non ew neni minne ra eita ngeni Amulon; iwe ra poputa ne fonueni ewe fonuen Amulon me poputa ne anganga ewe puun.

32 Iei iten ewe sou emmwenin ekkewe pris itan Amulon.

33 Iwe non ewe fansoun pwe Amulon a sio ngeni ekkewe chon Leiman; me a pwan tinano punuwer kewe, ekkewe fopun noun ekkewe chon Leiman, pwe repwe sio ngeni aramaser kewe, pwe resap nieno punuwer kewe.

34 Iwe a wor an ekkewe chon Leiman kirekiroch won Amulon me pwin kewe, iwe rese nireno, pokiten punuwer kewe.

35 Iwe Amulon me pwin kewe ra choni ekkewe chon Leiman, iwe ra sai non ewe fonu pon ar repwe kutta ewe fonuen Nifai nupwen ra kuna ewe fonuen Helam, minne a masow me ren Alma me pwin kewe.

36 Iwe non ewe fansoun pwe ekkewe chon Leiman ra pwon ngeni Alma me pwin kewe, pwe ika repwe pwar ngeni ir ewe aan minne a emmwenino ngeni ewe fonuen Nifai pwe repwe mut ngeni ir manauer me ar ngaseno.

37 Nge mwirin an Alma pwar ngeni ir ewe aan minne a emmwenino ngeni ewe fonuen Nifai ekkewe chon Leiman rese apwonueta ar we pwon; nge ra enenia chon mas nepekin ewe fonuen Helam, won Alma me pwin kewe.

38 Iwe ekkewe nussun me neir ra feino ngeni ewe fonuen Nifai; iwe ew kinikinin me neir a niwin ngeni ewe fonuen Helam, me ra pwan uwei ngeni ir punuwan me noun ekkewe chon mas ekkewe ra fen nomwetiw non ewe fonu.

39 Iwe ewe kingen ekkewe chon Leiman a mut ngeni Amulon pwe epwe emon king me emon chon nemenem won noun kewe aramas, ekkewe ra nom non ewe fonuen Helam; nge inamo esap wor an pochokun an epwe fori och mettoch mi ungeni mochenin ewe kingen ekkewe chon Leiman.