1 O lenei o Alema, ina ua lapata’ia o ia e le Alii o le a o mai autau a le tupu o Noa e osofa’ia i latou, ma ina ua uma ona faailoa atu i ona tagata, o lea na latou faapotopoto faatasi ai a latou lafu, ma ave a latou saito, ma o ese atu i le vao ae le’i oo mai ’autau a le tupu o Noa.

2 Ma sa faamalolosi i latou e le Alii, ma sa lē mafai e tagata o le tupu o Noa ona maua mai i latou e faaumatia i latou.

3 Ma sa latou sosola i le vao i se malaga i aso e valu.

4 Ma sa latou taunuu i se laueleele, ioe, o se laueleele matagofie tele ma lafulemu, o se laueleele o vai mamā.

5 Ma sa latou faatutu o latou faleie, ma amata ona galuea’iina le eleele, ma amata ona fausia fale; ioe, sa latou toaaga, ma galulue malolosi.

6 Ma sa mananao le nuu ia avea Alema ma o latou tupu, ona sa pele o ia i lona nuu.

7 Peitai sa fai atu o ia ia te i latou: Faauta e lē tatau ona i ai o se tupu ia te i tatou; ona ua faapea ona fetalai mai o le Alii: ’Aua tou te faasili i o outou manatu le tasi tagata i le isi tagata; pe manatu se tagata e toatasi ua sili o ia lava i luga atu o se isi tagata; o lea Ou te fai atu ai ia te outou e lē tatau ona i ai so outou tupu.

8 Ae ui i lea, a na faapea e mafai ona outou maua pea ni tagata amiotonu e avea mo o outou tupu e lelei ona fai o so outou tupu.

9 Ae ia manatua le amioletonu o le tupu o Noa ma ana faitaulaga; ma sa maua foi a’u lava ia i se mailei, ma ou faia mea e tele sa inosia i le silafaga a le Alii, na oo mai ai ia te a’u le salamo tigā.

10 Ae ui i lea, ina ua mavae lo’u puapuaga tele, sa oo ina faafofoga mai le Alii i a’u tagi, ma tali mai i a’u talosaga, ma ua faia a’u e ia o se meafaigaluega i ona aao i le aumaia o le toatele na’ua o outou i se malamalama o lana upumoni.

11 Ae ui i lea, ou te lē mitamita i lenei mea, ona ua ou lē agavaa ou te mitamita ia te a’u lava ia.

12 Ma o lenei ou te fai atu ia te outou, sa sauāina outou e le tupu o Noa, ma sa outou pologa ia te ia ma ana faitaulaga, ma sa aumai outou i le amioletonu e i latou; o lea na noanoatia ai outou i noanoaga o le amioletonu.

13 Ma o lenei e pei ona laveaiina outou e le mana a le Atua mai nei noanoaga; ioe, i fafo lava mai lima o le tupu o Noa ma ona tagata, ma mai noanoaga foi o le amioletonu, ua faapea foi ona ou manao ia outou tutulai mausalī i lenei saolotoga ua faasaolotoina ai outou, ma ia outou lē faalagolago i se tagata ia avea ma tupu i o outou luga.

14 O lenei foi ia outou lē faalagolago i se tasi e avea ma o outou aoao po o so outou faifeau, vagana ai o ia o se tagata o le Atua, o loo savali i ona ala ma tausi i ana poloaiga.

15 Sa faapea ona aoao e Alema lona nuu, ia alofa tagata taitoatasi i lē la te tuaoi e pei o ia lava ia te ia, ina ia leai se finauga i totonu o i latou.

16 Ma o lenei, sa avea Alema ma o latou faitaulaga sili, ona o ia na faavaeina la latou ekalesia.

17 Ma sa oo ina sa leai se tasi ua faaee i ai le pule e tala’i pe a’oa’o atu ai vaganā ai ua ia te ia mai le Atua. O lea sa faauu ai e ia o latou faitaulaga uma ma o latou a’oa’o uma; ma sa leai ni isi na faauuina vaganā ai o i latou o ni tagata amiotonu.

18 O lea sa latou leoleo ai i lo latou nuu, ma tausi i latou i mea tau i le amiotonu.

19 Ma sa oo ina amata ona latou manuia tele i le laueleele; ma sa latou faaigoaina le laueleele o Helama.

20 Ma sa oo ina latou uluuluola ma manuia tele i le laueleele o Helama; ma sa latou faatuina se aai, lea sa latou faaigoaina o le aai o Helama.

21 Ae ui i lea sa finagalo le Alii e talafeagai ona a’oa’iina ona tagata; ioe, sa ia tofotofoina lo latou onosai ma lo latou faatuatua.

22 Ae ui i lea—soo se tasi e tuu atu lona faalagolago ia te ia o ia lava lea o le a sii a’e i le aso gataaga. Ioe, ma sa faapea lava ona faia i lenei nuu.

23 Auā faauta, o le a ou faaali atu ia te outou sa aumai i latou i le pologa, ma sa leai se tasi sa mafai ona lavea’ia i latou ua na’o le Alii lava lo latou Atua, ioe, le Atua lava lea o Aperaamo ma Isaako ma Iakopo.

24 Ma sa oo ina lavea’iina lava i latou e ia, ma faaali mai e ia lona mana malosi ia te i latou, ma sa tele lava lo latou olioli.

25 Auā faauta, sa oo ina a’o i ai i latou i le laueleele o Helama, ioe, i le aai o Helama, a’o latou galuea’iina le laueleele o faataamilo ai, faauta sa i ai se ’autau a sa Lamanā i tuaoi o le laueleele.

26 Ma o lenei sa oo ina sosola uso o Alema mai o latou fanua, ma latou faapotopoto faatasi i latou lava i le aai o Helama; ma sa latou fefefe tele ona o le oo mai o sa Lamanā.

27 Peitai sa alu atu Alema ma ua tu i totonu o i latou, ma apoapoai atu ia te i latou ia aua ne’i o latou fefefe, ae ia latou manatua le Alii lo latou Atua ma o le a ia lavea’iina i latou.

28 O lea na latou faato’afilemu ai lo latou matata’u, ma amata ona latou tagi atu i le Alii ia faamalūlūina e ia loto o sa Lamanā, ina ia latou faasaoina i latou, ma a latou avā, ma a latou fanau.

29 Ma sa oo ina faamalūlūina e le Alii loto o sa Lamanā. Ma sa o atu Alema ma ona uso ma tuu atu i latou lava i o latou lima; ma sa ave e sa Lamanā le laueleele o Helama mo i latou.

30 O lenei o ’autau a sa Lamanā, ia sa tuliloaina mai le nuu o le tupu o Limae, sa sē i le vao mo aso e tele.

31 Ma faauta sa latou maua na faitaulaga a le tupu o Noa, i se nofoaga sa latou faaigoaina o Amulona; ma sa amata ona latou fai mo i latou le laueleele o Amulona ma amata ona latou galuea’iina le laueleele.

32 O lenei o le igoa o le ta’ita’i o na faitaulaga, o Amulona.

33 Ma sa oo ina ’aioi atu Amulona ia sa Lamanā; ma sa auina atu foi e ia a latou avā, o e o afafine o sa Lamanā, e ’aioi atu i o latou tuagane, ia latou lē faaumatiaina a latou tane.

34 Ma sa alofagia Amulona ma ona uso e sa Lamanā, ma sa latou lē faaumatiaina i latou, ona o a latou avā.

35 Ma sa ’au atu Amulona ma ona uso faatasi ma sa Lamanā, ma sa latou malaga atu i le vao e su’e le laueleele o Nifae ae latou maua ai le laueleele o Helama, lea sa nonofo ai Alema ma ona uso.

36 Ma sa oo ina folafola mai e sa Lamanā ia Alema ma ona uso, afai latou te faaali atu ia te i latou le ala e tau atu i le laueleele o Nifae, o le a latou tuu atu ia te i latou o latou ola ma lo latou saolotoga.

37 Ae ina ua uma ona faaali atu e Alema ia te i latou le ala i le laueleele o Nifae, sa lē tausia e sa Lamanā la latou folafolaga; a ua latou faatulaga faataamilo leoleo i le laueleele o Helama, i luga o Alema ma ona uso.

38 Ma o le vaega na totoe o i latou sa o atu i le laueleele o Nifae; ma o se vaega o i latou ia, sa toe foi mai i le laueleele o Helama, ma sa latou aumai foi faatasi ma i latou avā ma fanau a leoleo o ē sa tuu i le laueleele.

39 Ma sa tuu atu e le tupu o sa Lamanā ia Amulona ia avea o ia ma tupu ma pule i luga o ona tagata, o ē sa i le laueleele o Helama; ae ui i lea, sa lē ia te ia se malosi’aga na te faia ai soo se mea, e lē tusa ai ma le finagalo o le tupu o sa Lamanā.