1 Iei non ewe fansoun pwe a chommong me nein ewe maritan tappin aramas ekkewe rese weweiti ewe kapas an king Benjamin, pokiten ir mi chok kukkun semirit atun ewe fansoun a kapas ngeni noun kewe aramas; iwe rese nuku eerenien semer kewe.

2 Rese nuku met a fen makketiw usun ewe manausefanin ekkewe mi mano, rese pwan nuku usun wareton Kraist.

3 Iwe iei pokiten ar rese nuku rese tongeni weweiti ewe kapasen Kot; iwe netiper a pochokununo.

4 Iwe rese mochen repwe papatais; rese pwan mochen choni ewe mwichefen. Iwe ra ew kaimunon aramas ren ar nuku, me ra soposopono non ena sokkun feinfeino, pwan mwo non ar ekiekin mochenin fonufan me nikinikin tipis; pun rese mochen kokkori ewe Samon ar Kot.

5 Iwe iei non muun Mosaia we rese nonno ngeni esopun chochon ekkewe aramasen Kot; nge pokiten ewe etinepat me nein ekkewe chochon ewe mwichefen ra chommongono.

6 Pun non ewe fansoun ra atupano chommong ren ar kewe kapas mi eingeing mi chofona, ekkewe ir mi nom non ewe mwichefen, me ra forir pwe repwe fori chommong tipis; iei minne a winiti ew mettoch mi namwot pwe ekkewe ra fori tipis, ekkewe ir mi nom non ewe mwichefen, repwe fon me ren ewe mwichefen.

7 Iwe non ewe fansoun ra uweireto me mwen ekkewe pris, iwe ra uweiareno ngeni ekkewe pris seni ekkewe sense; iwe ekkewe pris ra uweiareto me mwen Alma, i ewe pris mi nap.

8 Iei king Mosaia a ngeni Alma ewe mumutan pochokun won ewe mwichefen.

9 Iwe non ewe fansoun pwe Alma ese sinei usur; nge mi wor chommong chon pwarata usur; ewer, ekkewe aramas ra uta me pwarata usun ar chommong angangangaw.

10 Iei esemo wor och sokkun mettoch a fen fis akkom me non ewe mwichefen; iei minne Alma a osukosuk non ngunun, iwe a fori pwe repwe uweiareno me mwen ewe king.

11 Iwe a apasa ngeni ewe king: Nengeni, ikkei ir chommong ekkewe am aua uweiareto me mwom, ekkewe ra fen tipis me ren pwir kewe; ewer, iwe ra fen ono me non sokopaten angangangaw. Iwe rese aier seni ar kewe angangangaw; iei minne am aua uweireto me mwon, pwe kopwe tongeni apungur anongonong won ar atai annuk.

12 Nge king Mosaia a apasa ngeni Alma: Nengeni, usap apungur; iei minne ua fangenong ir non poum pwe kopwe apungur.

13 Iwe iei ngunun Alma a pwan osukosuk sefan; iwe a feino me eisini ewe Samon met i epwe fori usun ei mettoch a fis, pun a nuokus ika i epwe fori och mettoch mi muan me ne mesen Kot.

14 Iwe non ewe fansoun pwe mwirin i a wau unusen ngunun ngeni Kot, ewe mongungun ewe Samon a feito ngeni i, a apasa:

15 Feioch en, Alma, me feioch ir ekkewe ra papatais non ekkewe konikin Mormon. Ka feioch pokiten om ennetin nuku chok non ekkewe kapas an nei we chon angang Apinatai.

16 Me feioch ir pokiten ar ennetin nuku non ekkewe kapas chok minne ka fen apasa ngeni ir.

17 Me feioch en pokiten ka fen forata ew imwen fan me nein ekkei aramas; iwe repwe tumunoch, iwe repwe nei aramas.

18 Ewer, feioch ekkei aramas ekkewe ra mochen uwei itei we; pun non itei we repwene iteni; iwe ir nei.

19 Me pokiten ka fen eis seni ei usun ewe chon atai annuk, ka feioch.

20 En emon nei chon angang; iwe ua fori ew pwon mi pin ngonuk pwe epwe wor om manau esemuch; iwe kopwe angang ngeniei me feino non itei, me kopwe ionfengeni nei kewe siip.

21 Iwe i ewe epwe rongorong neuwei epwe nei siip; iwe i kopwe etiwanong non ewe mwichefen, iwe i upwe pwan etiwa.

22 Pun nengeni, iei ai mwichefen; ion epwe papatais epwe papatais ngeni aier. Me ion chok kopwe etiwa epwe nuku non itei; iwe i upwe kisasew ne omusano.

23 Pun ngang ewe ua wata woi tipisin fonufan; pun ngang ewe a forireta; me ngang ewe a mut ngeni ir ekkewe ra nuku tori nesoponon ew neni ren peniemwani.

24 Pun nengeni, non itei ir repwe iteni; iwe ika repwe sineiei repwe feito, me epwe wor ew nenier ren peniemwani feinfeino chok.

25 Iwe ewe fansoun epwe feito pwe nupwen ewe aruwen rappwa epwe tik iwe ir ekkewe rese sisineiei repwe feito me repwe uta me mwei.

26 Iwe non na fansoun repwe sinei pwe ngang ewe Samon ar Kot, pwe ngang nour we Chon Angasano; nge resap ngaseno.

27 Iwe non na fansoun upwe affata ngeni ir pwe use sisiner; iwe repwe feino ngeni ewe ekkei esemuch a fen monneta fan iten ewe tefin me noun kewe chon nang.

28 Iei minne ua apasa ngonuk, pwe i ewe esap rongorong mongungui, i esap pwan ketiwenong non ai we mwichefen, pun i usap etiwa non ewe ranin soponon.

29 Iei minne ua apasa ngonuk, Feino; iwe ion chok epwe atai annuk an epwe ungeniei, i kopwe apungu anongonong won ekkewe tipis minne i a fen fori; iwe ika a pwarata an tipis me mwom me ngang, me aier non ennetin netipan, i kopwe omusano, iwe upwe pwan omusano.

30 Ewer, iwe fan chommongun an nei kewe aramas repwe aier upwe omusano ar kewe atai annuk ngeniei.

31 Iwe ami oupwe pwan omusano fengeni ami kewe atai annuk; pun ennetin ua apasa ngenikemi, i ewe ese omusano an chon orun atai annuk nupwen a apasa pwe a aier, i a pwisin watiw inisin fan nemenien kapung.

32 Iei ua apasa ngonuk, Feino; me ion chok esap aier seni an tipis i esap pwan anneanong me nein nei kewe aramas; iwe ei oupwe aneasochisi seni ei fansoun feino.

33 Iwe non ewe fansoun nupwen Alma a rongorong ekkei kapas a makkeretiw pwe epwe annomur, me pwe epwe tongeni apungu ekkewe aramasen ewe mwichefen anongonong won ekkewe annukun Kot.

34 Iwe non ewe fansoun pwe Alma a feino me apungu ekkewe ra fen ono non ar angangangaw anongonong won ewe kapasen ewe Samon.

35 Iwe ion chok a aier seni an tipis me a pwarareta, ir epwe anneanirenong me nein ekkewe aramasen ewe mwichefen;

36 Iwe ekkewe resap pwarata ar kewe tipis me aier seni ar angangangaw, ir resap pwan anneaong me nein ekkewe aramasen ewe mwichefen, iwe iter kewe ra tottonuu.

37 Iwe non ewe fansoun pwe Alma a emmweni mwokutukutun ewe mwichefen meinisin; iwe a poputa sefan an a wor ar kinamwe me ra fokkun feioch non mwokutukutun ewe mwichefen, ra fetanoch me mwen Kot, ra etiwa chommong, me papataisei chommong.

38 Iwe iei ekkei mettoch meinisin Alma me chiechian kewe chon angang ra fori ir ekkewe ra nemenem won ewe mwichefen, ra fetan non unusen nikitu, ra afanafana ewe kapasen Kot non mettoch meinisin, ra riaffouni sokopaten riaffou meinisin, ra riaffou me ren ekkewe resap chon ewe mwichefenin Kot meinisin.

39 Iwe ra fonou pwir kewe; iwe ra pwan fon, emon me emon me ren ewe kapasen Kot, anongonong won an tipis, are ren ekkewe tipis minne i a fen fori, iwe ra annuk me ren Kot pwe resap kouno ne iotek, me repwe kinisou non mettoch meinisin.