1 Iwe iei non ewe fansoun pwe ewe eriaffou minne a fis ngeni ewe mwichefen seni ekkewe rese nuku a napeno iwe ewe mwichefen a poputa ne ngunungun, me ra anini ngeni nour kewe sou emmwen usun ewe mettoch; me ra anini ngeni Alma. Iwe Alma a awewei ewe osukosuk me mwen nour we king, Mosaia. Iwe Mosaia a apungupung ngeni noun kewe pris.

2 Iwe non ewe fansoun pwe king Mosaia a tinano ew porous non unusen ewe fonu unukur pwe ekkewe rese nuku resap eriaffou emon me nein ekkewe ra choni ewe mwichefenin Kot.

3 Iwe a wor ew annuk mi tichik non unusen ekkewe imwen fan meinisin pwe esap wor eriaffou me neir, pwe epwe wor nonnofengen me nein aramas meinisin;

4 Pwe resap mut ngeni namanam tekia me sikaseni epwe osukosuka ar kinamwe; pwe emon me emon aramas epwe sufonu chon orun usun a pwisin asufonu inisin, repwe angang ren pwisin pour fan iten aninisir.

5 Ewer, me pwan nour kewe pris me sense meinisin repwe angang ren pwisin pour fan iten aninisir, non mettoch meinisin tiwenon chok non semwen, are non watten woungaw; iwe ren ar fori ekkei mettoch, ra napeno non chenin Kot.

6 Iwe a poputa an a wor watten kinamwe sefan non ewe fonu; iwe ekkewe aramas ra poputa ne fokkun chommongono, me poputa ne toropas fetan won unungen ewe fonufan, ewer, non ennefen me non eor, non otiw me non notou, ra aueta watten teninimw me sopw me non ekkewe kinikinin ewe fonu meinisin.

7 Iwe ewe Samon a churi ir me efeiochur, iwe ra winiti ew aramas watte me pisekisek.

8 Iei ekkewe anuon noun Mosaia ra anneanong nein ekkewe rese nuku; me pwan emon me nein ekkewe anuon noun Alma a anneaong me neir, ewe a iteni Alma, mwirin seman we; nge inamo, a winiti emon mwan mi fokkun ngaw me a fen ngeni niosun anu muan. Iwe i emon mwan a angoch ne kapas, me a kapas chommong eingeing mi chofona ngeni ekkewe aramas; iei minne a emmwenano chommong me nein ekkewe aramas ar repwe fori usun chok an kewe angangangaw.

9 Iwe i a winiti ew ennetin eppet ngeni feiochunon ewe mwichefenin Kot; a sonaieno netipen ekkewe aramas; a fori watten etinepat me nein ekkewe aramas; a awora ew fansoun an ewe chon koum ngeni Kot epwe aea an pochokun wor.

10 Iwe iei non ewe fansoun pwe nupwen a no fetan an epwe atai ewe mwichefenin Kot, pun a fein fetan non monomon fiti ekkewe anuon noun Mosaia ar repwe achocho ne atano ewe mwichefen, me emmwenano ekkewe aramasen ewe Samon, ar repwe ungeni ekkewe annukun Kot, are pwan ewe king—

11 Iwe usun ua apasa ngenikemi, nupwen ar fein fetan ne ungeni Kot, nengeni, ewe chon nangin ewe Samon a pwato rer; iwe a feitiw usun ita non ew kuchu; iwe a kapas usun ita ren ew mongungun chopunap, minne a fori ewe puun an epwe chech ewe minne ra uta won;

12 Iwe a fokkun watte ar mairu, ra turuno ngeni ewe puun, me rese weweiti ekkewe kapas minne i a apasa ngeni ir.

13 Nge inamo a puchor sefan, a apasa: Alma, uta me mareto, pun pwata ka eriaffou ewe mwichefenin Kot? Pun ewe Samon a fen apasa: Iei ai mwichefen, iwe upwe forata; iwe esap wor och mettoch epwe akkufu, tiwenon chok ewe atai annuk an nei kewe aramas.

14 Iwe pwan, ewe chon nang a apasa: Nengeni, ewe Samon a fen rongorong ngeni ekkewe iotek an noun kewe aramas, me pwan ekkewe iotekin noun we chon angang, Alma, i semom we; pun a fen iotek ren watten nuku usum pwe kopwe tongeni emmwen ngeni ewe mirit usun ewe ennet; iei minne, ren ei popun ua feito pwe upwe pesek usun ewe manaman me mumuta an Kot, pwe ekkewe iotek an noun kewe chon angang repwe tongeni ponu anongonong won ar nuku.

15 Iwe iei nengeni, kopwe tipemwaramwarei ewe manamanen Kot? Pun nengeni, met mongungui ese achechechi ewe puun? Me kose tongeni pwan nengeniei me mwom? Iwe ngang ua ekkuneto seni Kot.

16 Iei ua apasa ngonuk: Feino, me chechemeni ewe fotekin semom kewe non ewe fonuen Helam, me non ewe fonuen Nifai; me chechemeni met auchean mettoch i a fen fori fan iter; pun ir mi nom non fotek, me i a fen angasereno. Iwe iei ua apasa ngonuk, Alma, feino, me kutta om kosap chiwen atano ewe mwichefen, pwe ar kewe iotek epwe ponu, iwe ei ika pwe kopwe fori mettoch ka mochen kopwe katuruu.

17 Iwe iei non ewe fansoun pwe ikkei ekkewe amuchunon kapas minne ewe chon nang a apasa ngeni Alma, iwe a feino.

18 Iwe iei Alma me ekkewe ra nom ren ra turuno sefan ngeni ewe puun, pokiten a napanap ar mairu; pun ren pwisin meser ra kuna emon chon nangin ewe Samon; me mongungun a usun chopunap, minne a achechechi ewe puun; iwe ra sinei pwe ese wor och mettoch tiwenon chok ika ewe manamanen Kot a tongeni achechechi ewe puun me fori an epwe chung usun ita epwe kinifesen non ru kinikin.

19 Iwe iei ewe mairun Alma a fokkun napanap ese chiwen tongeni kapas, ese tongeni suki awan; ewer, iwe a apwangapwangeno, ese pwan mwo tongeni amwokutu poun; iei minne a kakino me ren ekkewe ir mi nom ren, ra eki non an apwangapwang, pwan mwo tori ar ra ekietiw me mwen seman we.

20 Iwe ra apasa sefani ngeni seman we ekkewe mettoch meinisin a fen fis ngeni ir; iwe seman we a pwapwa, pun a sinei pwe ina ewe manamanen Kot.

21 Iwe a fori pwe ew mwicheich epwe ionfengen pwe repwe tongeni kuna met ewe Samon a fen fori ngeni noun we anuon, me pwan ngeni ekkewe ir mi nom ren.

22 Iwe a fori pwe ekkewe pris repwe ionfengeni inisir; iwe ra poputa ne echikipin, me ra iotek ngeni ewe Samon ar Kot pwe epwe suki awen Alma, pwe epwe tongeni kapas, me pwan poun me pechen repwe angei pochokuner—pwe mesan ekkewe aramas repwe tongeni suk pwe repwe kuna me sinei usun ewe kirekirochun me ningen Kot.

23 Iwe non ewe fansoun mwirin ar ra echikipin me iotek ren ukukun ru ran me ru pwin, poun me pechen Alma kewe ra angei pochokuner, iwe a uta me poputa ne kapas ngeni ir, a urenir pwe repwe kinamwe:

24 Pun, a apasa, ua fen aier seni ai kewe tipis, me ua fen ngaseno me ren ewe Samon; nengeni ua uputiw me ren ewe Ngun.

25 Iwe ewe Samon a apasa ngeniei: Kosap mairu pwe aramas meinisin, ewer, mwan me fefin, muu meinisin, einang, sokopaten kapas me aramas, repwe upusefan; ewer, uputiw me ren Kot, repwe siwin seni ar ekiekin mochenin fonufan me ar turutiwen nikinik, ngeni ew nikinikin wenechar, repwe ngaseno me ren Kot, repwe winiti noun anuon me fopun;

26 Iwe iei ra winiti aramas minafo; iwe tiwenon chok repwe fori ei, rese tongeni muuni ewe muun Kot.

27 Ua apasa ngonuk, tiwenon chok ei epwe fis, repwe katuruno; iwe ei ua sinei, pokiten ua nokun katuruno.

28 Nge inamo, mwirin ai mefi weires chapur, ua aier arap ngeni mano, ewe Samon non an umoumoch a ekieki pwe a fich an epwe mwitir angeieiu seni ew kar esemuch, iwe ua uputiw me ren Kot.

29 Nguni a fen ngaseno seni ewe unusen kipwinin riaffou me ekkewe fofon angangangaw. Ua fen nom non ewe pekin rochopwaken pwang; nge iei ua kuna ewe amwararen saramen Kot. Nguni a fen riaffou ren metek esemuch; nge ua fen mwitir ngaseno, iwe nguni ese chiwen metek.

30 Use etiwa ai we Chon Angasano, me ua amam ewe minne a fen kapas me ren semem kewe; nge iei repwene osini pwe i epwe wareto, me pwe i epwe chechemeni aramas meinisin ekkewe a fen forireta, i epwe pwisin pwarano inisin ngeni meinisin.

31 Ewer, pwuku meinisin repwe chappetiw, me channaw meinisin repwe pwarata me mwen i. Ewer, pwan mwo atun ewe ranin soponon, nupwen aramas meinisin repwe uta pwe repwe kapung me ren, non na fansoun repwe pwarata pwe i ewe Kot; non na fansoun repwe pwarata; ekkewe ra manau nge rese apinukunuk non Kot non ewe fonufan, pwe ewe kapungun niwinin tipis esemuch mi pung a nom wor; iwe repwe pouk, me chechech, me nurufengen me fan nerikin mesan we mi manaman a tongeni kuna mettoch meinisin.

32 Iwe iei non ewe fansoun pwe Alma a poputa seni ei fansoun feino ne aiti ekkewe aramas, me ekkewe ir mi nom ren Alma atun ewe fansoun ewe chon nang a pwato ngeni ir, ra rokopwani fetan unusen ewe fonu; ra afanafan ngeni ekkewe aramas meinisin ekkewe mettoch minne ra fen rongorong me kuna, me ra afanafana ewe kapasen Kot non weires chapur, me ra riaffou me ren ekkewe rese nuku, me ra wichiwich me ren chommong me neir.

33 Nge inamo ekkei mettoch meinisin, ra fang chommong aninis ngeni ewe mwichefen, ra apochokunano ar nuku, me peser ren ar engino me riaffou napanap ne aneasochi ekkewe annukun Kot.

34 Iwe fomon me neir ir ekkewe anuon noun Mosaia; iwe iei iter kewe Ammon, me Aaron, me Omner, me Imnai; ikkei iten ekkewe anuon noun Mosaia.

35 Iwe ra sai non unusen ewe fonuen Saraemla, me nein ekkewe aramas ir mi nom fan nemenien king Mosaia, ra wesewesen achocho ne forsefani ekkewe feiengaw meinisin minne ra fen fori ngeni ewe mwichefen, ra pwarata ar kewe tipis meinisin, me afanafana ekkewe mettoch meinisin minne ra fen kuna, me awewei ekkewe osini me ekkewe pukefel ngeni ekkewe meinisin ra mochen rongorong ngeni ir.

36 Iwe ra pisekin aninis me non poun Kot ne uwei chommong ngeni ewe mirit usun ewe ennet, ewer, ngeni ewe mirit usun ar we Chon Angasano.

37 Iwe ifa me ningen ir! Pun ra afanafana kinamwe; ra afanafana porousen pwapwan mettoch mi och; iwe ra affata ngeni ekkewe aramas pwe ewe Samon a nemenem.