1 Anajwan chirix naq laj Mosiah kixb’aanu a’in kixtaqla chiru chixjunil li ch’och’, sa’ xyanqeb’ chixjunil li tenamit, kiraj xnawb’al li rajomeb’ xch’ool chirix ani taawanq choq’ xreyeb’.

2 Ut kik’ulman naq kichal xyaab’ xkux li tenamit, kixye: Naqaj naq laj Aaron laa walal taawanq choq’ qarey ut qataqlanel.

3 Anajwan laj Aaron xikenaq chaq sa’ li ch’och’ Nefi, jo’kan naq li rey ink’a’ kiru chixq’axtesinkil li awa’b’ejihom sa’ xb’een; chi moko kixk’ul raj laj Aaron li awa’b’ejihom sa’ xb’een; chi moko kiwan xch’ool anihaq reheb’ li ralal laj Mosiah chixk’ulb’al sa’ xb’eeneb’ li awa’b’ejihom.

4 Jo’kan naq li rey aj Mosiah kixtaqla wi’chik sa’ xyanq li tenamit; relik chi yaal, jun li tz’iib’anb’il aatin kixtaqla sa’ xyanq li tenamit. Ut a’in li aatin kitz’iib’aman, kixye:

5 K’ehomaq reetal, ex intenamit, malaj ex was wiitz’in, xb’aan naq jo’kan nekexink’oxla, nawaj naq teek’oxla li na’leb’ li b’oqb’ilex chixk’oxlankil—xb’aan naq nekeraj naq taawanq junaq eerey.

6 Anajwan ninch’olob’ cheru naq li ani xk’ulub’ raj reechaninkil li awa’b’ejihom ink’a’ kiraj, ut moko tixk’ul ta li awa’b’ejihom sa’ xb’een.

7 Ut anajwan wi taaxaqab’amanq jalan chik sa’ xna’aj, k’ehomaq reetal, ninxuwa naq te’wakliiq li wech’ok-ib’ sa’ eeyanq. Ut ani nanawok re ma li walal, li tz’aqal raj aj eechanihom re li awa’b’ejihom, ink’a’ tixsutq’isi rib’ re taajosq’o’q ut tixk’am jun raqal li tenamit a’in rik’in, li taatikib’anq raj re li pleet ut li wech’ok-ib’ sa’ eeyanq, ut rik’in a’an taa’uxq raj xhoyb’al naab’al li kik’ ut xpo’b’al ru lix b’e li Qaawa’, relik chi yaal, ut a’an tixsach raj raameb’ naab’al li tenamit.

8 Anajwan ninye eere, chiwanq qana’leb’ ut chiqak’oxla li k’a’aq re ru a’in, xb’aan naq moko xk’ulub’ ta choq’ qe xsachb’al li walal, chi moko xk’ulub’ choq’ qe xsachb’al jalan chik wi taaxaqab’aaq sa’ xna’aj.

9 Ut wi ta li walal tixsutq’isi rib’ wi’chik rik’in lix q’etq’etil ut jo’maajo’il na’leb’, a’an taarisi raj li k’a’aq re ru kixye, ut taaraj raj xk’ulb’al li awa’b’ejihom jo’ reechanihom, ut chi jo’kan, a’an ut jo’kan ajwi’ li tenamit a’in te’k’ehe’q chixb’aanunkil naab’al li maak.

10 Anajwan ut chiwanq qana’leb’ ut chiqil chi uub’ej li k’a’aq re ru a’in, ut chiqab’aanu li k’a’ru tixk’am chaq xtuqtuukilal li tenamit a’in.

11 Jo’kan naq laa’in tinwanq choq’ eerey chiru rela’ lin kutan; a’ut chiqaxaqab’eb’ laj raqol aatin, re te’raqoq aatin sa’ xb’een li tenamit a’in jo’ chanru li qachaq’rab’, ut taqak’uub’ chi ak’il li na’uxman rik’in li tenamit a’in, xb’aan naq taqaxaqab’eb’ li winq chaab’ileb’ xna’leb’ re te’wanq choq’ aj raqol aatin, li te’raqoq aatin sa’ xb’een li tenamit a’in jo’ chanru lix taqlahom li Dios.

12 Anajwan q’axal us wi’chik naq junaq winq taaraqe’q aatin chirix xb’aan li Dios chiru naq xb’aan li winq, xb’aan naq lix raqb’a-aatin li Dios junelik tiik ru, a’b’an lix raqb’a-aatin li winq moko junelik ta tiik ru.

13 Jo’kan ut, wi ta taaruuq naq te’wanq tiikil winq choq’ eerey, li te’xaqab’anq raj re lix chaq’rab’ li Dios, ut te’raqoq raj aatin sa’ xb’een li tenamit a’in jo’ chanru lix taqlahom, relik chi yaal, wi ta taaruuq te’wanq choq’ eerey li winq li te’b’aanunq jo’ chanru ajwi’ kixb’aanu laj Benjamin inyuwa’ choq’ re li tenamit a’in—ninye eere, wi ta junelik taawanq chi jo’kan, taa’ajmanq raj ru naq junelik te’wanq li rey chi taqlank sa’ eeb’een.

14 Ut laa’in ajwi’ injunes kink’anjelak chi anchal li metz’ew ut li seeb’al li wan we, re xk’utb’al cheru lix taqlahom li Dios, ut re xxaqab’ankil li tuqtuukilal chiru li ch’och’, re naq maajun pleet chi moko wech’ok-ib’ taawanq, maajun elq’ak, chi moko poqlenk, chi moko kamsink, chi moko k’a’ruhaq paay chi maa’usilal;

15 Ut ani kib’aanunk re li maa’usilal, a’an kink’e xtojb’a-maak a’ yaal jo’ li maak li kixb’aanu, jo’ chanru li chaq’rab’ li k’eeb’il qe xb’aaneb’ li qayuwa’.

16 Anajwan ninye eere, naq rik’in naq moko chixjunileb’ ta li winq tiikeb’ xna’leb’, moko na’ajman ta ru naq taawanq junaq rey, malaj eb’ li rey chi taqlank sa’ eeb’een.

17 Xb’aan naq k’ehomaq reetal, k’a’jo’ li maa’usilal naxk’e chi b’aanumank jun li rey aj maak, relik chi yaal, k’a’jo’ xnimal li sache’k!

18 Relik chi yaal, chijultiko’q eere li rey aj Noe, lix maa’usilal ut lix tz’eqb’eetalil, jo’ ajwi’ xmaa’usilaleb’ ut xtz’eqb’eetalileb’ lix tenamit. K’ehomaq reetal jo’ nimal li sache’k kichal sa’ xb’eeneb’; ut jo’kan ajwi’ sa’ xk’ab’a’ lix maa’usilaleb’ ke’k’ame’ chi moosil.

19 Ut wi ta ink’a’ ke’tenq’aak xb’aan laj Yo’obt’esihom reheb’ li numtajenaq xna’leb’, ut a’in xb’aan naq anchaleb’ xch’ool chixjalb’al xk’a’uxleb’, ke’kana raj sa’ li moosil toj anajwan, chi maak’a’ xjalb’al.

20 A’b’an k’ehomaq reetal, a’an kixkoleb’ xb’aan naq ke’xtuulanob’resi rib’ chiru; ut xb’aan naq ke’elajin chi anchaleb’ xmetz’ew chiru, a’an kixkoleb’ chiru li moosil; ut chi jo’kan nak’anjelak li Qaawa’ rik’in xwankilal sa’ chixjunil k’a’ru na’ux sa’ xyanqeb’ li ralal xk’ajoleb’ li winq, ut naxye’ ruq’ li uxtaan reheb’ li neke’xkanab’ rib’ chiru.

21 Ut k’ehomaq reetal, anajwan ninye eere, ink’a’ naru nekerisi jun li rey li nab’aanunk maa’usilal, ka’ajwi’ rik’in naab’al li wech’ok-ib’, ut xhoyb’al naab’al li kik’.

22 Xb’aan naq k’ehomaq reetal, wankeb’ li neke’ochb’eenink re sa’ xb’aanunkil maa’usilal, ut a’an naxk’ojob’eb’ lix moos aj kolol rix chi sutsu chirix, ut naxpeji lix chaq’rab’eb’ li ke’awa’b’ejin chaq sa’ tiikilal rub’elaj chaq a’an; ut naxyeq’i rub’el roq lix taqlahom li Dios.

23 Ut a’an naxk’uub’ chaq’rab’, ut naxtaqlaheb’ sa’ xyanq lix tenamit, relik chi yaal, li chaq’rab’ jo’ chanru tz’aqal lix maa’usilal a’an, ut ani ink’a’ na’ab’in chiru lix chaq’rab’ naxtaqla xsachb’al; ut ani naxpo’resi xch’ool rik’in, tixtaqlaheb’ lix teep aj pleet chixpleetinkileb’, ut wi naru chiru, tixsacheb’; ut chi jo’kan jun li rey moko tiik ta naxpo’ ru xb’ehil chixjunil li tiikilal.

24 Ut anajwan k’ehomaq reetal ninye eere, moko na’ajman ta naq taachalq xkomon li tz’eqb’eetalil a’in sa’ eeb’een.

25 Jo’kan ut, sik’omaq ru rik’in xyaab’ xkuxeb’ li tenamit a’in, raqoleb’ aatin, re taaraqe’q aatin cherix jo’ chanruheb’ li chaq’rab’ li k’eeb’il eere xb’aaneb’ li qayuwa’, li yaal, ut li k’eeb’il reheb’ xb’aan ruq’ li Qaawa’.

26 Anajwan ink’a’ na’ux chi kok’ aj xsa’ naq lix yaab’ xkux li tenamit tixpatz’ k’a’ruhaq li moko naxk’am ta rib’ rik’in li k’a’ru tiik, a’b’anan kok’ aj xsa’ na’uxman naq lix ka’ch’inaleb’ xk’ihal li tenamit te’raj li k’a’ru moko tiik ta; jo’kan naq a’in teeb’aanu ut teek’e choq’ eechaq’rab’—naq teeb’aanu li k’a’ru b’aanunb’il sa’ eeyanq jo’ chanru xyaab’ xkux li tenamit.

27 Ut wi taachalq xq’ehil naq lix yaab’ xkux li tenamit tixsik’ ru li maa’usilal, a’anaq li hoonal naq taachalq lix raqb’a-aatin li Dios sa’ eeb’een; relik chi yaal, a’anaq li hoonal naq a’an texrula’ani rik’in nimla sachok jo’ chanru naq kirula’ani li ch’och’ a’in chi rub’eetal.

28 Ut anajwan wi wankeb’ eeraqol aatin, ut ink’a’ neke’raqok aatin cherix jo’ chanru li chaq’rab’ li k’eeb’il, taaruuq teek’e chi raqe’k aatin sa’ xb’eeneb’ xb’aan jun aj raqol aatin taqenaq wi’chik xwankil.

29 Wi eb’ lee raqol aatin li taqenaqeb’ xwankil ink’a’ neke’raqok aatin rik’in tiikil raqb’a-aatin, teek’e chi ch’utub’aak ka’ch’in xk’ihaleb’ lee raqol aatin li kub’enaqeb’ xwankil, ut eb’ a’an te’xraq aatin chirix lee raqol aatin li taqenaqeb’ xwankil, jo’ chanru xyaab’ xkux li tenamit.

30 Ut nekexintaqla chixb’aanunkil li k’a’aq re ru a’in rik’in xxuwankil ru li Qaawa’; ut nekexintaqla chixb’aanunkil li k’a’aq re ru a’in, ut naq maajun eerey taawanq, re naq wi li tenamit a’in te’xb’aanu li maak ut maa’usilal, taasumeeq ru sa’ xb’een jolomeb’ a’an.

31 Xb’aan naq k’ehomaq reetal, ninye eere, xe’uxman xmaakeb’ naab’al li tenamit xb’aan xmaa’usilaleb’ lix reyeb’; jo’kan naq neke’sumeek ru lix maa’usilaleb’ sa’ xb’een xjolomeb’ lix reyeb’.

32 Ut anajwan nawaj naq ink’a’ chik taawanq li ink’a’ juntaq’eetalil a’in sa’ li ch’och’ a’in, ut k’a’jo’ wi’chik sa’ xyanq lin tenamit a’in; nawaj b’an naq li ch’och’ a’in taawanq choq’ xch’och’il li ach’ab’aak, ut li junjunq chi winq taaruuq chi saho’k sa’ xch’ool sa’ juntaq’eetalil, rik’in li k’a’ru xk’ulub’ ut li kanab’anb’il chixb’aanunkil, chiru jo’ najtil naxk’oxla li Qaawa’ naq us naq taawanq qayu’am ut taqeechani li ch’och’, relik chi yaal, chiru jo’ najtil taakanaaq xkomon li qalal qak’ajol chiru lix b’een li ch’och’.

33 Ut naab’al chik li k’a’aq re ru kixtz’iib’a li rey aj Mosiah reheb’, ut kixte chiruheb’ chixjunil li yale’k rix ut li rahilal naxk’ul jun li rey tiik xch’ool; relik chi yaal, chixjunil lix tawajik li raam sa’ xk’ab’a’ lix tenamit, ut jo’kan ajwi’ chixjunil li xwech’b’al rix lix rey neke’xb’aanu li tenamit, ut kixch’olob’ chixjunil chiruheb’.

34 Ut kixye reheb’ naq ink’a’ raj tento taawanq li k’a’aq re ru a’in, tento b’an taachalq li iiq sa’ xb’eeneb’ chixjunil li tenamit, ut naq li junjunq chi winq tixk’am li k’a’ru natz’aq.

35 Ut kixte ajwi’ chiruheb’ chixjunil li ch’a’ajkilal neke’k’anjelak wi’ rik’in naq jun li rey moko tiik ta taataqlanq sa’ xb’eeneb’;

36 Relik chi yaal, chixjunil lix maa’usilal ut lix tz’eqb’eetalil a’an, ut chixjunileb’ li pleet, ut li wech’ok-ib’, ut li hoyok kik’, ut li elq’ak, ut li poqlenk, ut xb’aanunkil yumb’eetak ko’b’eetak, ut li k’iila paay chi maa’usilal li ink’a’ naru rajlankil—ut kixye reheb’ naq ink’a’ raj te’wanq li k’a’aq re ru a’in, naq yib’eb’ ru chi ch’olch’o chiru lix taqlahom li Dios.

37 Ut anajwan kik’ulman, chirix naq li rey aj Mosiah kixtaqla li k’a’aq re ru a’in sa’ xyanq li tenamit, ke’q’unb’esiik xch’ool naq yaal li raatin.

38 Jo’kan naq ke’xkanab’ rajb’al jun li rey, ut q’axal anchaleb’ chik xch’ool naq li junjunq chi winq juntaq’eetaq li taaruuq chixb’aanunkil chiru chixjunil li ch’och’; relik chi yaal, ut li junjunq chi winq kixye naq wan xch’ool chixsumenkil ru tz’aqal lix maak.

39 Jo’kan ut, kik’ulman naq ke’xch’utub’ rib’ sa’eb’ li jar ch’uut chiru chixjunil li ch’och’, re xk’eeb’al xyaab’eb’ xkux chirix ani te’wanq choq’ xraqol aatin, re raqok aatin chirixeb’ jo’ chanru li chaq’rab’ li k’eeb’il chaq reheb’; ut numtajenaq xsahileb’ xch’ool sa’ xk’ab’a’ li ach’ab’aak li kik’eeman chaq reheb’.

40 Ut eb’ a’an ke’niman xrahomeb’ choq’ re laj Mosiah; relik chi yaal, q’axal chaab’il wi’chik ke’xk’oxla chiru anihaq chik chi winq; xb’aan naq ink’a’ neke’ril jo’ aj rahob’tesinel li naxsik’ b’ihomo’k, relik chi yaal, xk’ulb’al li tumin a’an li naxpo’ ru li aamej; xb’aan naq moko kixpatz’i ta b’ihomal rik’ineb’, chi moko kisaho’ sa’ xch’ool rik’in xhoyb’al li kik’; kixxaqab’ b’an li tuqtuukilal sa’ li ch’och’, ut kixk’e reheb’ lix tenamit naq te’kole’q chiru li jar paay chi moosil; jo’kan naq raab’il xb’aaneb’, relik chi yaal, chi numtajenaq, chi maak’a’ xb’isb’al.

41 Ut kik’ulman naq ke’xxaqab’eb’ laj raqol aatin chi taqlank sa’ xb’eeneb’, malaj ut chi raqok aatin chirixeb’ jo’ chanru li chaq’rab’, ut a’in ke’xb’aanu chiru chixjunil li ch’och’.

42 Ut kik’ulman naq laj Alma kixaqab’aak re taawanq xb’een wa choq’ xb’eenil aj raqol aatin, ut a’an ajwi’ li taqenaqil aj tij, rik’in naq lix yuwa’ kixq’axtesi chaq sa’ xb’een li opiis a’in, ut kixk’e chaq xchaq’rab’inkil chirix chixjunil li na’uxman sa’ li iglees.

43 Ut anajwan kik’ulman naq laj Alma kib’eek sa’eb’ lix b’e li Qaawa’, ut kixpaab’ lix taqlahom, ut kiraqok aatin rik’in tiikil raqb’a-aatin; ut kiwan li tuqtuukilal chi rajlal chiru li ch’och’.

44 Ut chi jo’kan kitikla li rawa’b’ejileb’ laj raqol aatin chiru chixjunil li ch’och’ Tzarahemla, sa’ xyanqeb’ chixjunil li tenamit laj Nefita yeeb’ileb’ re; ut a’ laj Alma li xb’een ut li xb’eenil aj raqol aatin.

45 Ut anajwan kik’ulman naq kikam lix yuwa’, naq wiib’ ro’k’aal chihab’ xyu’am, ut sa’ xyu’am kixtz’aqob’resi ru lix taqlahom li Dios.

46 Ut kik’ulman naq kikam ajwi’ laj Mosiah, sa’ roxlaju xka’k’aal chihab’ li rawa’b’ejil, chi ak oxib’ xkaak’al chihab’ xyu’am; ut chi jo’kan chi sumub’anb’il, ak oob’ cient rik’in b’eleeb’ chihab’ relik chaq laj Lehi aran Jerusalen.

47 Ut chi jo’kan kiraqe’ li rawa’b’ejileb’ li rey sa’ xb’een lix tenamit laj Nefi; ut chi jo’kan kiraqe’ lix kutan laj Alma, li kik’ojob’ank re lix igleeseb’.