1 Dóó kʼad, áádóó aláahdi naatʼáanii Benjamin Bóhólníihii yá naalʼaʼí saad bił ííshją́ą́ áyiilaaígíí ałtso yee yááłtiʼgo, tʼáá ałtso diné yitaazghal, jó áádóó Bóhólníihii tʼáá íiyisíí bił daazlį́įʼgo biniinaa, niʼjįʼ naaʼaheezhtłizh.

2 Dóó ndaʼiisíiʼgo bił hazʼánígíí yaa ákodaniizį́į́ʼ, azhą́ nahasdzáán bikáaʼgi łeezh ndi tʼáá biʼohgo ádaa ntsídaakeesgo daazlį́į́ʼ. Dóó tʼáá átʼé binééʼ tʼááłáʼígo yéigo daacha, kódaaníigo: Christ bidił bee nihibąąhági átʼéii bikʼé nináʼílyáhígíí, O bee nihaa jiiníbaʼgo, nihí dééłníigo ánílééh, áko nihibąąhági ádaatʼéii bee nihaa ndiʼdootʼááł, dóó nihijéí hadaałtʼée dooleeł; háálá Jesus Christ, Diyin God biYeʼ, yáʼąąsh dóó nahasdzáán, índa tʼáá ałtsoní áyiilaaígíí deiniidlą́; éí éiyá nihookááʼ dineʼé yitahgóó ndoogaał.

3 Áádóó díí saad yee hadaasdzíiʼgo Bóhólníihii biiʼSizíinii bikʼidahooleʼ, dóó ił hózhóonii biiʼ hadadéébįįd, háálá bibąąhági ádaatʼéii bee bańdaʼdeestʼą́, dóó bíniʼ hashtʼedadíitʼeʼ, háálá Jesus Christ doogáłígíí tʼáá íiyisíí dayoodlánígíí biniinaa, aláahdi naatʼáanii Benjamin bizaad yee yichʼįʼ haadzíʼígíí binahjįʼ.

4 Dóó aláahdi naatʼáanii Benjamin éí bizééʼ ąą ánááyiidlaa dóó yichʼįʼ hanáánáádzííʼ, kóníigo: Shikʼisóó dóó shilahké, shikʼéí dóó shidineʼé danohłíinii, náádashíídóołtsʼįįł nisin, áko shizaad tʼáá yidziihígíí ałtso bee nihichʼįʼ hadeesdzih binahjįʼ dadidoohtsʼį́į́ł dóó bikʼidadiʼdoohtį́į́ł.

5 Jó áko, Diyin God biyáʼátʼéehii baa ákodanoozį́įʼgo kʼad doo nihee hólónígíí, dóó doo danohłíní da, dóó doo daʼnohłį́į da dóó asoosiihgo nihił hazʼą́ą́jígo chʼéénihinísid—

6 Ánihidishní, Diyin God biyáʼátʼéehii baa ákodanoozį́įʼgo, dóó beʼadziilii aláahdi átʼéii, dóó bihoodzáanii dóó bihaʼólníinii, dóó nihookááʼ dineʼé hazhóʼó áłtsé yił naalnishígíí baa ákodanoozį́įʼgo; dóó ałdóʼ hodeeyáádą́ą́ʼ nahasdzáán ályaadą́ą́ʼ bąąhági átʼéii bikʼé nináʼdoolyéełgo bee nihootʼánígíí, áko tʼáá háiida Bóhólníihii yaʼólíhígíí éí yinahjįʼ yisdáńdoodááł, dóó áłahjįʼ bibeehazʼáanii yikʼeh hółʼínígíí, dóó beʼiinaʼ nítʼiʼjįʼ ndi náás oodlą́ągo, tʼáá bitsʼíís yee hináajįʼ éí ááłdishní—

7 Ádíshní, díí diné éí yisdánáʼiildééh beilyá, bąąhági átʼéii bikʼé nináʼílyá nahasdzáán nihookááʼ dineʼé bá álnéhę́ędą́ą́ʼ hashtʼeelyaaígíí bee, diné Adam asiihgo adáátłizh dóó wóshdę́ę́ʼ, éí doodago kʼad, éí doodago nihoníyáajįʼndi, dahináa dooleełígíí bá niilyá.

8 Dóó díí bee yisdáńdaʼdiyooldah. Doo éí nááná łaʼ bee yisdánáádaʼiildéeh da tʼáá hazhóʼó díí baa yaʼíítiʼígíí tʼéiyá; dóó ałdóʼ doo éí nááná łaʼ biʼdoolníłígíí bikʼehgo diné yisdáńdoodáał da tʼáá hazhóʼó bidaʼdoolnííł bee nihił hweeshneʼígíí bikʼehgo tʼéiyá.

9 Diyin God deinohdlą́; tʼáá aaníí hólǫ́, dóó tʼáá aaníí yáʼąąsh dóó nahasdzáán biyiʼ dóó bikáaʼgi hólónígíí, tʼáá ałtso áyiilaa; yáʼąąsh dóó nahasdzáán biyiʼ tʼáá ałtsojįʼ hóyą́, dóó tʼáá ałtsojįʼ bidziil; díí deinohdlą́ Bóhólníihii bił bééhózinígíí diné doo tʼáá ałtsoní bił bééhózin da.

10 Dóó nááná, niheʼiinaʼ łahgo áńdaahdléehgo nihibąąhági átʼéii yóó adahidohʼaah dóó tsʼídá doo baa nínáádoohkahgo deinohdlą́, dóó Diyin God bidááhdóó nihaa hojoobaʼí ídaʼdółnééh; dóó tʼáá íiyisíí shaa ndiníʼaah bidohní; dóó kʼad, díí tʼáá ałtso deinohdlą́ągo bidaʼohłééh.

11 Dóó nááná ánihidííniidgo átʼáo ánáánihidishní, éí Diyin God beʼayóó átʼéii baa ákodanoozį́įʼgo, éí doodago biyáʼátʼéehii baa ákonoozį́įʼgo dóó beʼayóó óʼóʼníinii nihił ádzaago, dóó nihibąąhági ádaatʼéii bee nihaa nídaʼdeestʼą́ągo, binahjįʼ tʼáá íiyisíí ił hózhóonii nihitsʼíís dóó nihiyiʼsizíinii biyiʼ silį́į́ʼ, ákótʼée ndi díí éí béédaohłniih dooleeł nisin, dóó tʼáá áłahjįʼ éí béédaohłniih dooleeł, Diyin God éí beʼaláahdi átʼéii, dóó nihí éí doo ndi danohłíní da, dóó biyáʼátʼéehii dóó nízaadgo nihąąh tiʼhooʼníhígíí, doo danohłíinii, dóó tʼáá íiyisíí nihaa hojoobaʼígo ádaʼdołnééh, tʼáá ákwííjį́ Bóhólníihii bichʼįʼ sodadołzingo, dóó áhodooníłígíí deinohdlą́ągo bee ndasoozį́įgo, éí Diyin yá naalʼaʼí yee haadzíʼę́ę átʼé.

12 Jó áádóó, díí bidaʼohłéehgo éí tʼáá áłahjįʼ nihił dahózhǫ́ǫ dooleeł nihidishní, dóó Diyin God beʼayóó óʼóʼníinii éí nihiyiʼ hadeezbin dooleeł, dóó áłahjįʼ nihibąąhági ádaatʼéii bee nihaa ńdiitʼaah dooleeł; dóó ánihiilaaígíí beʼayóó átʼéii bééhózinígíí bee dínóosééł, éí doodago tʼáá aaníinii dóó tʼáá ákogi átʼéii bééhózinígíí bee.

13 Dóó doo atídaʼahidoohłíiłgo ntsídaahkees da dooleeł, ndi kʼékʼehgo kéédahohtʼį́, dóó diné tʼáá ałtso daabíhígíí baa dahidohʼaah.

14 Dóó nihaʼáłchíní dichin dóó beʼééʼ ádaadingo doo tʼóó danółʼį́į da dooleeł; dóó doo tʼóó tʼáá bíniʼ Diyin God bibeehazʼáanii kʼideiyiitíih da dooleeł, dóó tʼáadoo daʼahigání dóó saad ałchʼįʼ adeiyiníłí, dóó tʼáadoo chʼį́įdii beʼiiníziinii yá ndaalteʼé, éí éiyá bąąhági átʼéii yá sizį́, éí doodago éí éiyá iiʼsizį́ beʼiiníziinii nihizhéʼé yaa yádaałtiʼę́ę átʼį́, tʼáá ałtso diyin biyáʼátʼéehii yikʼijįʼ nilį́.

15 Ndi tʼáá aaníinii dóó hojoobaʼ áhwiinidzinjígo oodááł bee ndanohtin dooleeł; ayóó ádaʼahóʼníigo, dóó ahíłká ańdaajahgo bee ndanohtin dooleeł.

16 Dóó ałdóʼ, tʼáá háiida shíká adoolwoł danízinígíí bíká adadoohłwoł; tʼáá háiida bichʼįʼ anáhóótʼiʼígíí nihinaalyeʼé łahjįʼ bee bíká adoohłwoł; dóó iʼdókeedii tʼáadoo tʼóó chʼééh áníigo ádaoohłeʼé, dóó tʼáadoo ádin dooleełgo tʼóó yíwohjįʼ kódaoohłeʼé.

17 Kódidoohniił daatsʼí: Diné éí tʼáá bí átʼį́įgo tiʼhooʼnííh; éí bąą doo éí bíká adeeshwoł da, dóó doo baʼdeestsoł da, éí doodago doo shinaalyeʼé łaʼ baa deeshłéeł da áko doo tiʼhooʼníih da dooleeł, háálá atíbiʼdilʼínígíí éí tʼáá ákogi átʼé—

18 Ndi ánihidishní, O nihookááʼ dineʼé da, tʼáá háiida kódzaaígíí éí tʼáá íiyisíí beʼiinaʼ łahgo ánéidoodlííł; dóó tʼáá hazhóʼó beʼiinaʼ łahgo ánáyiidlaago iiʼsizíiniikʼeh hoolʼáágóó ájídin dooleeł, dóó doo Diyin God bił hazʼą́ądi bá hazʼą́ą da dooleeł.

19 Jó áko, nihíísh doo iʼdókeedii daniidlį́į da? Doósh tʼáá áníiltso tʼáá éí Diné bichʼįʼ chodaʼiilʼį́į da, Diyin God ndi, nihinaalyeʼé tʼáá ałtsoní bee, chʼiyáán dóó ééʼ, dóó béésh óola, dóó béésh łigai, dóó tʼáá ałtso ałʼąą átʼéii bee daʼatʼíinii bee?

20 Jó áádóó, kʼad ndi, bichʼįʼ sodadołzin, dóó nihibąąhági ádaatʼéii nihaa ndiníʼaah dadohníigo ńdaookąąh. Dóó doósh tʼáadoo biniiyéhé tiʼdahooʼnííh ńtʼę́ę́ʼ? Ndagaʼ; biʼIiʼsizíinii tʼáá íiyisíí yee nihikʼihojisdliʼ, dóó nihijéí yił dahóóshǫǫd, dóó tsʼídá doo hanáádoohzihgóó ánihiilaa, tsʼídá tʼáá íiyisíí nihił dahóózhǫǫdígíí biniinaa.

21 Dóó kʼad, Diyin God, ánihiilaaígíí, niheʼiinaʼ bee badaʼíínóhłíhígíí dóó tʼáá ałtso nihee dahólǫ́ dóó bee hadinohtʼéhígíí bee badaʼíínóhłí, tʼáá ałtsoní tʼáá ákogi átʼéii yínóhkeedígíí nihainílá, niheʼoodląʼ binahjįʼ, ńdaʼoohkąąhgo, dóó éí niheʼoodląʼ bee, tʼáá aaníí shaʼdoolyéél nohsingo, O índa nihinaalyeʼé tʼáá íiyisíí bee ahíłká adoohjahą́ą.

22 Dóó íʼdókeedii nihinaalyeʼé łaʼ yókeedgo bá nihonooʼą́ągo bitsʼą́ą́dóó doo ádin silį́į́ʼgóó, dóó tʼóó yíwohdi biʼdooʼniidgo, tʼáá íiyisíí tʼáá ákogi átʼáo naʼiilyé nihikʼijįʼ siláa doo háálá doo aʼnohłéégóó, éí doo ndi nihí da ndi Diyin God éí bí, éí éí niheʼiinaʼ ałdóʼ bí; dóó ákondi doo ndi náʼoohkąąh da, dóó baa nisooyáhígíí doo łahgo ánáhdléeh da.

23 Shí ánihidishníigo, yíi diné doo yáʼátʼéehii bikʼijįʼ siláa doo, háálá binaalyeʼé yił ádin dooleeł; dóó kʼad, díí éí diné tʼáadoo leʼé daʼílíinii nahasdzáánkʼehgo bee dahólónígíí ááłdíshní.

24 Dóó nááná, nihaa dahojoobáʼí ánihidishní, nihí tʼáadoo leʼé doo nihee dahólóonii dóó ákondi tʼáá ákwíí jį́ bee hinohnáanii nihee dahólǫ́; tʼáá ánółtso doo daʼohtʼíinii biniinaa ááłdishní, ídaʼdókeedii doo baʼnohłéii; díí nihijéí biyiʼdi kódadidoohniił nisin éí: Doo tʼáadoo leʼé aa hashníił da háálá tʼáadoo leʼé shee ádin, ndi tʼáadoo leʼé shee hólǫ́ǫgo éí aa deeshnił ńtʼę́ę́ʼ.

25 Dóó kʼad, díí nihijéí biyiʼdi kódadohníigo éí doo baa danihíniʼí da dooleeł, doodago éí nihá nihodootʼááł; dóó nihikʼijįʼ ánihootʼaahii éí tʼáá áko dooleeł háálá doo nihee hólóonii bidádanółʼį́.

26 Dóó kʼad, díí bee nihichʼįʼ yááłtiʼígíí biniinaa—eii éí, áko nihibąąhági ádaatʼéii haańdítʼaahgo tʼáá ákwíí jį́, áko Diyin God binááł doo niʼayosííhgóó woháał da dooleeł—áko nihá íinisin nihinaalyeʼé diné baa dahojoobáʼí łahjįʼ baa dahohnííł dooleeł, tʼáá ałtso diné bee hólónígíí, kótʼáo ááłdishní dichin danilínígíí bidaʼiyohsą́, beʼééʼ ádaadinígíí ééʼ baa dahohnííł, bitah dahoneezgaiígíí baa ńdaahkah dóó bíká adaahłyeed, iiʼsizíinii dóó atsʼíískʼehgo, deinízinígíí bikʼehgo.

27 Dóó díí éí tʼáá ałtso hódzáaniikʼehgo dóó hazhóʼó ałkééʼ sinilgo ádaołʼį́į dooleeł; háálá diné éí bidziilii yiláahgo yilwoł doo bee bá hazʼą́ą da. Áádóó, tʼáá áłahjįʼ yéigo yidadiilkaal doo áko woobįįhígíí yidoołbįįł; áko, tʼáá ałtsoní ałkééʼ aznilgo ádaʼdoolnííł.

28 Dóó díí éí béédaohłniih dooleeł nisin, bił kééhóhtʼíinii tʼáadoo leʼé nihaʼníláago éí tʼáá éí baa ńdoohdłééł, nihaʼníláhígíí bił ałhadiʼnoohtʼánę́ę bikʼehgo, éí doodago bąąhági átʼéii biʼdoohłííł; dóó éí diné baʼnooláhígíí da bąąhági átʼéii ałdóʼ yiʼdoolííł.

29 Dóó akéeʼdi, haitʼáo ałʼąą átʼáo bąąhági átʼéii bizhdoolíłígíí tsʼídá doo ałtso baa hojoolneʼ átʼée da; háálá tsʼídá tʼóó ahayóí ałʼąą ádaatʼé dóó ałʼąą ádaʼdoolnííł, tʼóó ahayóí léiʼ yídéeshtahígíí ndi doo bííníshghah da.

30 Ndi kóníłtsogo bee nihił hodeeshnih, doo ádaa ádahołyą́ą́góó, dóó nihintsékees, dóó nihizaad, dóó bindaałnishígíí, dóó Diyin God bibeehazʼáanii doo bikʼeh dahonołʼį́į́góó, dóó Bóhólníihii doogááł baa dahosidootsʼą́ą́ʼígíí doo tʼah deinohdlą́ą́góó, ńléí náádanihiʼdiilyáajįʼ kónóhtʼéego, ádin doohłeeł. Dóó kʼad, O nihookááʼ dineʼé, béédaohłniih, doo ádin dadoohłeeł da.