1 Ma o lenei, sa oo ina ua uma ona saunoa atu faapea le tupu o Peniamina i lona nuu, sa auina atu e ia ni avefeau i totonu ia te i latou, i le fia iloa mai lona nuu pe ua latou talitonu i upu na tautala atu e ia ia te i latou.

2 Ma sa latou alalaga uma mai i le leo e tasi, fai mai: Ioe, ua matou talitonu i upu uma na e saunoa mai ai ia te i matou; o lenei foi, ua matou iloa lo latou mautinoa ma le moni, ona o le Agaga o le Alii Mamana Aoao, lea ua ia faia se liuga tele i totonu o i matou, po o i totonu o o matou loto, ua lē toe i ai so matou manao e fai mea leaga, ae ia faia mea lelei e lē aunoa.

3 Ma o i matou, lava, foi, ua maua ni vaaiga sili o mea o le a oo mai, e ala i le agalelei lē faatuaoia o le Atua, ma faaaliga a lona Agaga; ma a na tatau ai, e mafai ona matou vavalo e uiga i mea uma.

4 Ma o le faatuatua sa ia te i matou e uiga i mea na saunoa mai ai lo matou tupu ia te i matou ua aumai ai i matou i lenei malamalama sili, o lea ua matuā faafiafiaina ai i matou i le olioli tele lava.

5 Ma ua matou loto e ulu atu i se feagaiga ma lo matou Atua e fai lona finagalo, ma usiusitai i ana poloaiga i mea uma e poloaiina ai i matou e ia, i o matou aso uma o totoe, ina ia matou lē aumaia i o matou lava luga le mafatia e lē gata, e pei ona fetalai i ai le agelu, ina ia matou lē inu mai le ipu o le toasa o le Atua.

6 Ma o lenei, o upu nei na manao i ai le tupu o Peniamina mai ia te i latou; ma o lea na fai atu ai o ia ia te i latou: Ua outou fai mai upu na ou manao i ai; ma o le feagaiga ua outou faia o se feagaiga amiotonu.

7 Ma o lenei, ona o le feagaiga ua outou faia, o le a ta’ua ai outou o le fanau a Keriso, o ona atalii, ma ona afafine; ona faauta, o le asō ua fanauina ai e ia outou faaleagaga; ona ua outou fai mai ua liua o outou loto e ala i le faatuatua i lona suafa; o lea, ua fanauina ai outou e ia ma ua avea ai outou ma ona atalii ma ona afafine.

8 Ma o lalo o lenei suafa ua faasaoloto ai outou, ma ua leai se isi lava suafa e mafai ona faasaoloto ai outou. Ua leai se isi lava suafa ua tuuina mai e mafai ona oo mai ai le olataga; o lea, ou te manao ai ia outou ave i o outou luga le suafa o Keriso, outou uma ua ulu atu i le feagaiga ma le Atua o le a outou usiusitai e oo i le iuga o o outou ola.

9 Ma o le a oo mai, soo se tasi e faia lenei mea o le a nofo o ia i le itu taumatau o le Atua, ona o le a iloa e ia le suafa o le a valaauina ai o ia; ona o le a valaauina o ia i le suafa o Keriso.

10 Ma o lenei foi o le a oo mai, soo se tasi e lē avea i ona luga le suafa o Keriso o le a valaauina i se isi igoa; o lea, o le a maua e ia o ia lava i le itu tauagavale o le Atua.

11 Ma ou te manao ia outou manatua foi, o le igoa lenei sa ou fai atu o le a ou avatu ia te outou e lē tatau lava ona soloiesea, vagana ai i le solitulafono; o lea, ia outou faaeteete ai ia outou lē solitulafono, ina ia lē soloiesea le suafa mai o outou loto.

12 Ou te fai atu ia te outou, ou te manao ia outou manatua ia faatumauina le suafa ia tusia pea i o outou loto, ina ia lē maua outou i le aao tauagavale o le Atua, ae ia outou lagona ma iloa le leo o le a valaauina ai outou, ma le igoa foi, o le a valaauina ai outou e ia.

13 Aua pe faapefea ona iloa e se tagata le matai e lei auauna i ai o ia, ma o ai se tagata ese ia te ia, ma ua mamao mai i mafaufauga ma faamoemoega o lona loto?

14 O lenei foi, e ave ea e se tagata se asini e ā lona tua’oi ma taofi ia te ia? Ou te fai atu ia te outou, E leai; e lē tuua lava e ia o ia, ia ’ai i totonu o lana lafu, ae na te tuli ese o ia, ma tuli o ia i fafo. Ou te fai atu ia te outou, o le a faapea lava i totonu ia te outou pe afai tou te lē iloa le suafa ua valaau ai outou.

15 O lea, ou te manao ai ia outou tutumau ma lē masi’i’ese, ma faatumulia e lē aunoa i galuega lelei, ina ia mafai ona faamauina outou e Keriso, le Alii le Atua Mamana Aoao, e fai mona, ina ia mafai ona aumai o outou i le lagi, ina ia mafai ona outou maua le olataga tumau e faavavau ma le ola e faavavau, e ala i le poto, ma le mana, ma le faamasinotonu, ma le alofa mutimutivale o ia o lē na foafoaina mea uma, i le lagi ma le lalolagi, o lē o le Atua o mea uma. Amene.