1 Dóó kʼad, áádóó éí aláahdi naatʼáanii Benjamin bidineʼé yichʼįʼ haadzíiʼgo, diné łaʼ bidineʼé bitahgóó ayííłʼaʼ, shizaad deidiiztsʼą́ʼą́ą daatsʼí deiyoosdląąd nízingo.

2 Dóó tʼáá ałtso tʼáá ahąąh iinééʼ tʼááłáʼí hadadeeshghaazh, kódaaníigo: Aooʼ, tʼáá ałtso saad bee nihichʼįʼ yéíníłtiʼígíí deiniidlą́; dóó ałdóʼ tʼáá aaníí dóó doo tʼóó átʼéego nihił béédahoozin, hálálá Bóhólníihii Aláahdi Bidziilii biiʼSizíinii, éí ayóó átʼáo niheʼiinaʼ łahgo áyiilaa, éí doodago nihijéí biyiʼdi, bąąhági átʼéii baa nínáádiikahgo doo daniidzin da, ndi tʼáá áłahjįʼ yáʼátʼéehii ádeilʼį́į dooleełgo tʼéiyá daniidzin.

3 Dóó nihí, tʼáá nihí, ałdóʼ, Diyin God biyáʼátʼéehii doo ninítʼiʼii binahjįʼ, dóó biiʼSizíinii nihił ííshją́ą́ áyiilaaígíí bee, náásgóó ádahodooníłígíí deiitʼį́; dóó danízingo éí, tʼáá ałtsoní náásgóó ádahodooníłígíí baa dahodiilnih.

4 Dóó aláahdi nihinaatʼáanii yee haadzíʼígíí deiniidlą́ągo biniinaa díí ayóó átʼáo ééhózinii nihił béédahoozin, áko índa tʼáá íiyisíí nihił dahóózhǫǫd.

5 Dóó nihiDiyin God bił ałhadadiʼdiitʼááł daniidzin yinízinígíí bidaʼdiilníiłgo, dóó bibeehazʼáanii bikʼeh dahoniilʼį́įgo tʼáá ałtso yichʼįʼ nihidoołʼaałígíí, ńléí anoonééł biih yiidzáajįʼ, ákotiʼhooʼnííh doo ninítʼiʼii doo ádąąh ńdiilyéeł da, Diyin God yá naalʼaʼii yee haadzíʼę́ę bikʼehgo, áko Diyin God beʼáháchįʼ doo biiʼ ńdiidáał da biniiyé.

6 Dóó kʼad, aláahdi naatʼáanii Benjamin éí díigi átʼáo saad yididootsʼį́įłgo yinízin; dóó éí bąą kóyidííniid: Saad dideestsʼį́į́ł nisinígíí éí bee hadasoohdzííʼ; dóó bee ałhaʼditʼaah tʼáá ákogo átʼéhígíí bee ałhadadiʼnoohtʼánígíí átʼé.

7 Dóó kʼad, háálá bee ałhadadiʼnoohtʼánígíí biniinaa Christ baʼáłchíní bee nihiʼdójíi dooleeł, biyeʼ dóó bitsiʼ nihidiʼníi dooleeł; jó áko, díí jį́ iiʼsizį́kʼeh nánihishchį́; háálá bízhiʼ deiyiniidlánígíí binahjįʼ nihijéí łahgo ádeiilyaa dadohní; éí bąą, ńdanihiishchį́ dóó biyeʼ dóó bitsiʼ dasoolį́į́ʼ.

8 Dóó díí ázhiʼ binahjįʼ tʼáá nííkʼe ndaahkai dasoolį́į́ʼ, dóó doo nááná łaʼ ázhiʼ bee tʼáá nííkʼe naahkai da dooleeł. Doo éí nááná łaʼ ázhiʼ binahjįʼ yisdánáʼiildéeh da; éí bąą, Christ bízhiʼ ákʼidadidoohtʼááł nisin, tʼáá ánółtso niheʼiinaʼ ninítʼiʼjįʼ Diyin God bikʼeh dahoniilʼį́į dooleeł dadohníigo bił ałhadadiʼnoohtʼánígíí.

9 Dóó tʼáá háiida díí yeʼiilaaígíí Diyin God bílaʼ binishʼnáájígo sizį́įgo bikʼídíʼnóotááł, háálá ázhiʼ binahjįʼ bee biʼdójíhígíí bił bééhózin dooleeł; háálá Christ bízhiʼ bee biʼdójíi dooleeł.

10 Dóó kʼad áhodoonííł, tʼáá háiida Christ bízhiʼ doo ákʼiiditʼaahígíí éiyá nááná łaʼ ázhiʼ bee biʼdójíi dooleeł; éí bąą, Diyin God bílaʼ binishtłʼajígo bá hazʼą́ą dooleeł.

11 Dóó díí ałdóʼ béédaohłniih dooleeł, áko díí ázhiʼ bee nihíídéeshiił dishnínę́ę tsʼídá doo kʼééʼdoolchǫǫł da, tʼáá hazhóʼó beehazʼáanii kʼízhnítiʼgo tʼéiyá; éí bąą, ádaa ádahołyą́ beehazʼáanii łaʼ kʼídanohtííh lágo; áko ázhiʼ nihijéí biyiʼ dóó doo kʼééʼdoolchǫǫł da.

12 Shí ánihidishní, éí ázhiʼígíí tʼáá áłahjįʼ nihijéí biyiʼdi bee bikʼidaʼashchį́įgo béédaohłniih, áko doo Diyin God bílaʼ binishtłʼajígo nihikʼidinóotáał da dooleeł, ndi iinééʼ bee danihidíʼdóojiiłígíí dadidoohtsʼį́į́ł dóó nihił béédahózin dooleeł, dóó ázhiʼ yee nihíídóozhiiłígíí ałdóʼ.

13 Háálá haash yitʼáo diné bilą́ąjįʼ sizíinii tʼah doo yá naalnishígíí yééhósin dooleeł, dóó diné doo bééhoʼdílzinii nilį́įgo, dóó bintsékees dóó bijéí yinízinígíí tsʼídá nízaadę́ę́ʼ hólǫ́?

14 Dóó nááná, daʼ ákoósh diné łaʼ bikʼéí bitélii néididoołtééł, dóó tʼáá neilóoz dooleeł? Shí ánihidishníigo éí, Ndagaʼ; doo ndi bíniʼdii bí bilį́į́ʼ bitah naʼałchozh da dooleeł, ákondi yíwohjįʼ íidínóołchééł, dóó doo atah naagháágóó íidoolííł. Shí ánihidishníigo nihídóʼ tʼáá ákódoohnííł ázhiʼ bee nihiʼdójíhígíí doo nihił bééhózingóó.

15 Éí bąą, tʼáá íiyisíí danihidziil dóó doo nahjįʼ kóhnééhgóó nisoozį́, dóó tʼáá áłahjįʼ naanish yáʼátʼéehii bindaałnish, áko Christ, Bóhólníihii Diyin God Aláahdi Bidziilii, hoolʼáágóó bígo ánihiidoolííł, áko yáʼąąshdi nihiʼdoodlóós, áko hoolʼáágóó yisdáʼiildééh nihee dahólǫ́ǫ dooleeł dóó hoolʼáágóó Diyin God bił iiná nihí dooleeł, yáʼąąsh dóó nahasdzáán biyiʼ, tʼáá ałtsoní áyiilaaí bibee ééhózinii, dóó bibee adziilii, dóó tʼáá ákogi átʼáo bibee ánihwiitʼaahii dóó bibee ajoobaʼ biníkááʼ góneʼ éʼélʼį́, Diyin God tʼáá ałtso yiláahdi nilíinii. Amen.