1 Im kiiō, ālikin men kein ke kiin̄ Benjamin eaar dedeļo̧k an kōnono n̄an armej ro an, eaar jilkinļo̧k ilubwiljier, im kōņaan jeļā jān armej ro an eļan̄n̄e raar tōmak ilo naan ko eaar kōnono n̄an er.

2 Im raar aolep lam̧ōj kōn juon ainikien, im ba: Aaet, kōmij tōmak aolep naan ko kwaar kōnono n̄an kōm; im barāinwōt, kōm jeļā kōn aer jejjet im m̧ool, kōnke Jetōb eo an Irooj Ekajoor Bōtata, eo Eaar jerbali juon oktak ekajoor ilo kōm, ak ilo būruōm̧, bwe kōmin jab bar itok wōt in kōm̧m̧an nana, ak n̄an kōm̧m̧an em̧m̧an wōt.

3 Im kōj, kōj make, barāinwōt, kōn em̧m̧an eo an Anij ejjeļo̧k jem̧ļo̧kin, im kōn kaalikkar ko an jetōb eo an, ewōr ad laleļo̧k ko reļļap kōn ta eo enaaj itok; im eļan̄n̄e eaar mennin aorōk, jemaron̄ kar kanaan kōn aolep men kein.

4 Im e ej tōmak eo eaar pād ipped kōn men ko kiin̄ eo ad eaar kōnono n̄an kōj kaki eaar bōktok kōj n̄an jeļā in eļap, en̄in jej m̧ōņōņō kōn lan̄lōn̄ eo ekanooj ļap.

5 Im jej m̧ōņōņō n̄an deļo̧n̄ļo̧k ilo juon bujen ippān ad Anij n̄an kōm̧m̧an ankilaan, im n̄an pokake kien ko An ilo men otemjej ko Enaaj jiron̄ kōj, aolep bwe in raan ko ad, bwe jen maron̄ jab bōktok iood make juon kaen̄tanaan eo ejjeļo̧k jem̧ļo̧kin, āinwōt kar kōnono kake jān enjeļ eo, bwe jen maron̄ jab idaak jān kap in illu an Anij.

6 Im kiiō, erkein naan ko kiin̄ Benjamin eaar kōņaan jān er; im kōn menin eaar ba n̄an er: Kom̧ ar kōnono naan ko iaar kōņaan; im bujen eo kom̧ ar kōm̧m̧ane ej juon bujen ejim̧we.

7 Im kiiō, kōnke bujen eo kom̧ ar kōm̧m̧ane naaj ān̄inn̄in kom̧ ro nejin Kraist, m̧aan ro nejin, im kōrā ro nejin; bwe lo, rainin Eaar keotak kom̧ ilo jetōb; bwe kom̧ij ba bwe būruōmi raar oktak kōn tōmak ilo Etan; kōn menin, kom̧ij ļotak ilo E im kar erom m̧aan ro im kōrā ro nejin.

8 Im ium̧win jeban in kar kaanemkwōj kom̧, im ejjeļo̧k bar juon jeban eo naaj kaanemkwōj kom̧. Ejjeļo̧k bar āt letok eo lo̧mo̧o̧r ej itok; kōn menin ikōņaan bwe kom̧in bōk ioomi etan Kraist, aolep kom̧ ro raar deļo̧n̄e bujen eo ippān Anij bwe kom̧in pokake n̄an jem̧ļo̧kin mour ko ami.

9 Im jabdewōt eo ej kōm̧m̧ane men in naaj lo ilo anbwijmaron̄ in pein Anij, bwe Enaaj jeļā āt eo ān̄inn̄in e kake; bwe naaj ān̄inn̄ini e kōn etan Kraist.

10 Im kiiō ālikin men kein, bwe jabdewōt eo e jamin naaj bōk ioon etan Kraist aikuj naaj ān̄inn̄in e kōn bar jet āt; kōn menin, ej lo e make ianmiin̄ in pein Anij.

11 Im ikōņaan bwe kom̧in keememej barāinwōt, bwe en̄in ej āt eo iaar ba inaaj kar lewōj n̄an eok eo jamin naaj bukweļo̧k, ijello̧kun wōt n̄e kōn jero̧wiwi; kōn menin, ron̄jake bwe kom̧in jab jero̧wiwi, bwe āt in jamin bukweļo̧k jān būruōmi.

12 Ij ba n̄an kom̧, ikōņaan bwe kom̧in keememej in dāpij āt in jeje iien otemjej ilo būruōmi, bwe jamin lo ko ilo anmiin̄ in pein Anij; a bwe kom̧in ron̄ im jeļā ainikien eo naaj ān̄inn̄in kom̧, im barāinwōt, āt eo Enaaj ān̄inn̄in kom̧.

13 Bwe ekōjkan an juon armej jeļā karo eo eaar jab jerbal n̄an e, ak eo ej juon ruwamāejet n̄an e, im ej ettoļo̧k jān ļōmņak ko im jibadbad ko an būruōn.

14 Im bar juon alen, juon armej ej bōk ke donkey eo ej an riturin, im dāpiji? Ij ba n̄an kom̧, Jaab; e ban kōtļo̧k em̧ool bwe en m̧ōn̄ā ilubwiljin mennin mour ko an, ak enaaj lukwarkwareļo̧k, im kadiwōjļo̧k e. Ij ba n̄an kom̧, bwe āindein enaaj āinwōt ilubwiljimi eļan̄n̄e kom̧ij jab jeļā āt eo ān̄inn̄in kom̧ kake.

15 Kōn menin, ikōņaan bwe kom̧in pen im dim, iien otemjej baptoami ilo jerbal ko rem̧m̧an, bwe Kraist, Irooj Anij Ekajoor Bōtata, en maron̄ sili kom̧ An, bwe kom̧in maron̄ bōkļo̧k kom̧ n̄an lan̄, bwe kom̧in maron̄ ami lo̧mo̧o̧r ejjeļo̧k jem̧ļo̧kin im mour indeeo, kōn ļoļātāt eo, im kajoor, im jim̧we eo, im tūriam̧o eo an eo Eaar kōm̧anm̧an men otemjej, ilo lan̄ im ilo laļ, eo ej Anij ioon aolep. Amen.