1 Im kiiō, kiin̄ Benjamin eaar ļōmņak emennin aikuj, ālikin eaar dedeļo̧k an kōnono n̄an armej ro, bwe en bōk etan aolep ro raar deļo̧n̄ ilo bujen eo ippān Anij n̄an kōjparok kien ko An.

2 Im ālikin men kein eaar ejjeļo̧k juon armej, ijello̧kun wōt ajri ro reddik, ro raar deļo̧n̄ ilo bujen eo im kar bōk ioer etan Kraist.

3 Im bar juon alen, ālikin men kein ke kiin̄ Benjamin eaar kōm̧m̧ane jem̧ļo̧kin aolep men kein, im kar kapit ļeo nejin Mosaia bwe en juon irooj im kiin̄ ioon armej ro an, im kar leļo̧k n̄an e aolep eddo ko kōn aelōn̄ in kiin̄ eo, im barāinwōt jitōn̄ pris ro n̄an katakin armej ro, bwe jān katak kein ren maron̄ ron̄ im jeļā kien ko an Anij, im n̄an kalim̧otak er n̄an keememej kanejnej eo raar kōm̧m̧ane, eaar kōro̧o̧l jarlepju eo, im raar ro̧o̧l, aolep kajjojo, ekkar n̄an baam̧le ko aer, n̄an m̧ōko im̧weer make.

4 Im Mosaia eaar jino irooj ilo ijo jikin jemān. Im eaar jino irooj ilo iiō eo kein kajiln̄uul iiō dettan, im kōm̧m̧an dipiio in, enan̄in ābukwi im jiljilimjuonn̄ouljiljino iiō jān iien eo Liai eaar likūt Jerusalem.

5 Im kiin̄ Benjamin eaar mour jilu iiō im eaar mej.

6 Im ālikin men kein kiin̄ Mosaia eaar etetal ilo iaļ ko an Irooj, im eaar ļoor ekajet ko im kakien ko An, im eaar kōjparok kien ko An ilo aolep men ko jabdewōt Eaar jiron̄ e.

7 Im kiin̄ Mosaia eaar kōm̧m̧an bwe armej ro an ren kalbwin bwidej eo. Im e barāinwōt, e make, eaar kalbwin bwidej eo, bwe ilo wāween in en jab maron̄ erom eddo n̄an armej ro an, bwe en maron̄ kōm̧m̧an ekkar n̄an men eo jemān eaar kōm̧m̧ane ilo men otemjej. Im eaar ejjeļo̧k aitwerōk ilubwiljin aolep armej ro an ilo kōtaan in jilu iiō ko.