1 Ut anajwan, kik’ulman naq chirix naq li rey aj Mosiah ak wanjenaq rajlal sa’ tuqtuukilal chiru xnumik oxib’ chihab’, kiraj xnawb’al chirixeb’ li tenamit li koxe’taqe’q chaq re te’wanq sa’ li ch’och’ Lehi-Nefi, malaj sa’ li tenamit Lehi-Nefi; xb’aan naq eb’ lix tenamit maak’a’ ke’rab’i chirixeb’ chalen chaq relikeb’ chaq sa’ li ch’och’ Tzarahemla; jo’kan naq ke’xtitz’ob’resi rik’in patz’ink.

2 Ut kik’ulman naq li rey aj Mosiah kixkanab’ naq waqlaju lix winqeb’ li kaweb’ rib’ toxe’taqe’q sa’ li ch’och’ Lehi-Nefi re xtawb’al xyaalal chirixeb’ li ras riitz’ineb’.

3 Ut kik’ulman naq chi wulajaq ke’xtikib’ taqe’k, ut wan rik’ineb’ jun aj Ammon xk’ab’a’, a’an jun winq kaw rib’ ut nim xmetz’ew, ut ralal xk’ajol laj Tzarahemla; ut a’an ajwi’ li najolomin reheb’.

4 Ut anajwan, ink’a’ ke’xnaw li b’e li taa’aje’q naq te’xik wi’ sa’ li yamyookil ch’och’ re te’taqe’q sa’ li ch’och’ Lehi-Nefi; jo’kan naq chiru k’iila kutan yookeb’ chi b’eek sa’ li yamyookil ch’och’, ut ka’k’aal kutan tz’aqal yookeb’ chi b’eek.

5 Ut chirix naq ke’b’eek chiru ka’k’aal kutan ke’wulak sa’ jun li tzuul, li wan chixk’atq li ch’och’ Xilom sa’ xnim li saq’e, ut aran ke’xyiib’ lix muheb’aal t’ikreb’.

6 Ut laj Ammon kixk’am chirix oxib’ lix komon, ut a’aneb’ laj Amaleki, laj Helem, ut laj Hem xk’ab’a’eb’, ut eb’ a’an ke’kub’e sa’ li ch’och’ Nefi.

7 Ut k’ehomaq reetal, ke’xk’ul rib’ rik’in li rey sa’ xb’een li tenamit li wankeb’ sa’ li ch’och’ Nefi, ut sa’ li ch’och’ Xilom; ut ke’sutiik rix xb’aaneb’ lix moos aj kolol rix li rey, ut ke’chape’, ut ke’b’ak’e’, ut ke’tz’ape’ sa’ tz’alam.

8 Ut kik’ulman, chirix naq ke’wan sa’ tz’alam chiru wiib’ kutan ke’k’ame’ wi’chik chiru li rey, ut ke’hite’ lix bak’leb’, ut ke’xaqli chiru li rey, ut ke’kanab’aak, malaj ut ke’taqlaak, naq te’xchaq’b’e li patz’om li tixpatz’ a’an reheb’.

9 Ut a’an kixye reheb’: K’ehomaq reetal, laa’in aj Limhi, ralal laj Noe, a’an chaq ralal laj Tzeniff, li kitaqe’ chaq sa’ li ch’och’ Tzarahemla re reechaninkil li ch’och’ a’in, a’an chaq xch’och’eb’ lix yuwa’eb’, ut a’an kik’ehe’ choq’ rey xb’aan lix yaab’ xkuxeb’ li tenamit.

10 Ut anajwan, nawaj xnawb’al k’a’ut naq kiwan xkawilal eech’ool chi nach’ok rik’in lix xaqxookil tz’akil li tenamit, naq laa’in ajwi’ kinwan wochb’een lin moos aj kolol wix chirix li okeb’aal?

11 Ut anajwan, xb’aan a’in kinkanab’ chi kole’k lee yu’am, re naq tinruuq chi patz’ok eerik’in; wi ta ink’a’ jo’kan, kintaqla raj naq eb’ lin moos aj kolol wix kexxk’e raj chi kamk. Kanab’anb’ilex chi aatinak.

12 Ut anajwan, naq kiril laj Ammon naq kanab’anb’il chi aatinak, koxkub’si rib’ chiru li rey; ut sa’ wakliik wi’chik, kixye: At rey, k’a’jo’ inb’antioxihom chiru li Dios sa’ li kutan a’in naq toj yo’yookin, ut kanab’anb’ilin chi aatinak, ut tinyal inq’e chi aatinak rik’in xkawilal inch’ool.

13 Xb’aan naq ch’olch’o chiwu naq wi ta xenaw wu ink’a’ raj xekanab’ naq xwan chiwix li bak’leb’ a’in. Xb’aan naq laa’in aj Ammon, ut laa’in ralal xk’ajol laj Tzarahemla, ut taqenaqin chaq sa’ li ch’och’ Tzarahemla re tintaw xyaalal chirixeb’ li qas qiitz’in, li kixk’am chaq laj Tzeniff sa’ li ch’och’ a’an.

14 Ut anajwan, kik’ulman naq chirix naq laj Limhi kirab’i li raatin laj Ammon, kisaho’ xch’ool chi numtajenaq, ut kixye: Anajwan ninnaw chi ch’olch’o naq eb’ li was wiitz’in li ke’wan chaq sa’ li ch’och’ Tzarahemla toj yo’yookeb’. Ut anajwan taasaho’q inch’ool, ut sa’ li kutan wulaj tink’e chi saho’k ajwi’ sa’ xch’ooleb’ lin tenamit.

15 Xb’aan naq k’ehomaq reetal, laa’o wanko chi moosil chiruheb’ laj Lamanita, ut k’eeb’il sa’ qab’een xtojb’al jun li tojleb’ chiru li tenamit li ra xkuyb’al. Ut anajwan, k’ehomaq reetal, eb’ li qas qiitz’in toohe’xkol chiru li qamoosil, malaj sa’ ruq’eb’ chaq laj Lamanita, ut laa’o toowanq choq’ loq’b’il moos chiruheb’; xb’aan naq q’axal us wi’chik naq toowanq choq’ loq’b’il moos chiruheb’ laj Nefita chiru naq taqatoj li tojleb’ chiru lix reyeb’ laj Lamanita.

16 Ut anajwan, li rey aj Limhi kixtaqlaheb’ lix moos aj kolol rix naq ink’a’ chik te’xb’ak’ laj Ammon chi moko eb’ lix komon, kixtaqla b’an naq te’xik sa’ li tzuul li wan chixk’atq Xilom sa’ xnim li saq’e, ut te’xk’am lix komoneb’ sa’ li tenamit, re naq chi jo’kan te’ruuq chi wa’ak, ut chi uk’ak, ut chi hilank chiru li k’anjel sa’ xb’eenikeb’; xb’aan naq k’iila ch’a’ajkilal ke’xnumsi chaq; ke’xnumsi li tz’okaak, ut li chaqi-eel, ut li tawaak.

17 Ut anajwan, wulajaq chik kik’ulman naq li rey aj Limhi kixtaqla xjek’inkil jun li aatin sa’ xyanq chixjunil lix tenamit, re naq chi jo’kan te’xch’utub’ rib’ sa’ li santil ochoch, re rab’inkil li aatin li tixye reheb’.

18 Ut kik’ulman naq chirix naq ke’xch’utub’ rib’, naq a’an kiraatinaheb’ chi jo’ka’in, kixye: Ex intenamit, taqsihomaq laa’ex lee jolom, ut chik’ojob’aaq eech’ool; xb’aan naq k’ehomaq reetal, xnach’ok chaq li kutan, malaj moko najt ta chik wan, naq ink’a’ chik toowanq rub’el xwankileb’ li xik’ neke’ilok qe, us ta maak’a’jo’ xyalom qametz’ew, li maak’a’ ki’ok wi’; a’ut nink’oxla naq wan jun li yalok-u toj taab’aanumanq, li us taa’elq.

19 Jo’kan ut, taqsihomaq lee jolom, ut chisaho’q sa’ eech’ool, ut kanab’omaq eerib’ chiru li Dios, chiru li Dios a’an li kiwan choq’ xDios laj Abraham, ut laj Isaak, ut laj Jakob; ut jo’kan ajwi’, li Dios li ki’isink chaq reheb’ li ralal xk’ajol laj Israel sa’ li ch’och’ Egipto, ut kixk’e naq te’b’eeq sa’ xyi li Kaqi Palaw chiru chaqi b’e, ut kixk’e li mana choq’ xtzakemqeb’ re naq ink’a’ te’oso’q sa’ li yamyookil ch’och’; ut naab’al chik li k’a’aq re ru kixb’aanu choq’ reheb’.

20 Ut jo’kan wi’chik, li Dios a’an li ki’isink chaq reheb’ li qayuwa’ sa’ li ch’och’ Jerusalen, ut kixk’uula ut kixkol rix lix tenamit toj anajwan; ut k’ehomaq reetal, a’ sa’ xk’ab’a’ li qamaa’usilal ut li qatz’eqb’eetalil naq kooxk’am chi moosil.

21 Ut chejunilex eenawom xyaalal sa’ li kutan a’in, naq laj Tzeniff, li kik’ehe’ choq’ rey sa’ xb’een li tenamit a’in, rik’in naq numtajenaq ratawom chireechaninkil lix ch’och’eb’ lix yuwa’, jo’kan ut, b’alaq’inb’il xb’aan xseeb’al xch’ool ut xb’alaq’ li rey aj Laman, li kixk’e rib’ sa’ aatin rik’in li rey aj Tzeniff, ut kixq’axtesi sa’ ruq’ reechaninkil jun raqal li ch’och’, malaj ut li tenamit Lehi-Nefi, ut li tenamit Xilom; ut li ch’och’ chixsutam—

22 Ut chixjunil a’in kixb’aanu, ka’ajwi’ re xk’amb’al li tenamit a’in rub’el xwankil, malaj chi moosil. Ut k’ehomaq reetal, laa’o sa’ li kutan a’in naqatoj li tojleb’ chiru lix reyeb’ laj Lamanita, a’an xyijach li qixim, ut li qasebada, ut chixjunil ajwi’ li jar paay chi iyaj nak’uxman, ut xyijach li ralom qaketomq ut qateep chi xul; ut jo’kan ajwi’ lix yijach chixjunil li k’a’ru wan qe malaj li eechaninb’il qab’aan, naxmaq’ lix reyeb’ laj Lamanita chiqu, malaj li qayu’am.

23 Ut anajwan, ma ink’a’ ra xkuyb’al a’in? Ut ma ink’a’ nim li qach’a’ajkilal a’in? Anajwan k’ehomaq reetal, maak’a’jo’ rajb’al naq naraho’ qach’ool.

24 Relik chi yaal, ninye eere, nim rajb’al li naraho’ wi’ qach’ool; xb’aan naq k’ehomaq reetal jo’ k’ihaleb’ li qas qiitz’in ke’kamsiik, ut lix kik’eleb’ kihoye’ chi maak’a’ ki’ok wi’, ut chixjunil sa’ xk’ab’a’ li maa’usilal.

25 Xb’aan naq wi ta li tenamit a’in ink’a’ ke’t’ane’ sa’ li q’etok aatin, li Qaawa’ ink’a’ raj kixkanab’ naq taachalq li nimla rahilal a’in sa’ xb’eeneb’. A’ut k’ehomaq reetal, ink’a’ ke’raj ab’ink chiru li raatin; kiwakli b’an li wech’ok-ib’ sa’ xyanqeb’, toj reetal naq ke’hoyok kik’ chirib’ileb’ rib’.

26 Ut jun lix profeet li Qaawa’ ke’xkamsi; relik chi yaal, jun xwinq li Dios sik’b’il ru, li kiyehok reheb’ chirix lix maa’usilaleb’ ut lix tz’eqb’eetalileb’, ut ki’aatinak jo’ profeet chirix k’iila k’a’aq re ru li taachalq, relik chi yaal, chirix ajwi’ lix k’ulunik li Kristo.

27 Ut rik’in naq kixye reheb’ naq li Kristo a’an li Dios, lix Yuwa’il chixjunil li k’a’aq re ru, ut kixye naq tixk’ul sa’ xb’een jo’ xjalam-uuch li winq, ut a’anaq li jalam-uuch li kiyo’ob’tesiik wi’ chaq li winq sa’ xtiklajik; malaj sa’ jalan chik aatin, kixye naq eb’ li winq ke’yo’ob’tesiik jo’ chanru xjalam-uuch li Dios, ut naq li Dios taakub’eeq sa’ xyanqeb’ li ralal xk’ajol li winq, ut tixk’ul sa’ xb’een kik’elej ut tib’elej, ut taaxik chiru lix b’een li ch’och’—

28 Ut anajwan, xb’aan naq kixye a’in, ke’xk’e chi kamk; ut naab’al chik k’a’aq re ru ke’xb’aanu li kixk’am chaq xjosq’il li Dios sa’ xb’eeneb’. Jo’kan ut, ani pe’ nasach xch’ool naq wankeb’ chi moosil, ut naq sak’b’ileb’ rik’in rahil ch’a’ajkilal?

29 Xb’aan naq k’ehomaq reetal, li Qaawa’ xye: Ink’a’ tink’e xtenq’ankileb’ lin tenamit sa’ li kutan naq neke’q’etok aatin; tinram b’an lix b’eheb’ re naq ink’a’ te’usaaq; ut lix b’aanuhomeb’ taawanq choq’ tichk’ob’aal chiruheb’.

30 Ut jo’kan wi’chik, naxye: Wi eb’ lin tenamit te’raw li tz’ajleb’aal ru, te’xq’ol lix k’ajil a’an sa’ li sut iq’; ut a’an nak’anjelak jo’ b’an re kamsink.

31 Ut jo’kan wi’chik naxye: Wi eb’ lin tenamit te’raw li tz’ajleb’aal ru, te’xq’ol li iq’ nachal sa’ releb’ saq’e, li nachal wi’ li sache’k sa’ jun k’amok.

32 Ut anajwan, k’ehomaq reetal, tz’aqlojenaq ru lix yeechi’ihom li Qaawa’, ut laa’ex sak’b’ilex ut tawasinb’ilex.

33 A’b’anan wi texsutq’iiq rik’in li Qaawa’ chi anchal li rajom eech’ool, ut teekanab’ eerib’ chiru, ut texk’anjelaq chiru chi yalb’il anchal xq’e lee k’a’uxl, wi nekeb’aanu a’in, a’an, jo’ chanru li naraj ut li nasaho’ wi’ xch’ool, texxkol chiru li moosil.