1 Ma o lenei, sa oo ina ua mavae ona maua e le tupu o Mosaea le filemu sa faaauau pea mo le va o tausaga e tolu, sa ia fia iloa e uiga i tagata o e na o a’e e nonofo i le laueleele o Liae-Nifae, po o le aai o Liae-Nifae; ona sa leai se mea sa faalogoina e lona nuu mai ia te i latou mai le taimi na latou tuua ai le laueleele o Sara’emila; o lea, sa latou faafiufiu ai ia te ia i lo latou fesili soo.

2 Ma sa oo ina faataga e le tupu o Mosaea ni o latou alii malolosi e toasefuluono e o a’e i le laueleele o Liae-Nifae, e saili e uiga i o latou uso.

3 Ma sa oo ina amata ona latou o a’e i le aso na sosoo ai, ma sa faatasi ma i latou se tasi tagata e igoa ia Amona, o ia o se tagata aumalosi ma le tino malosi tele, ma o se e tupuga mai ia Sara’emila; ma o ia foi sa taitai ia te i latou.

4 Ma o lenei, sa latou le iloa le ala sa tatau ona latou malaga ai i le vao e o a’e ai i le laueleele o Liae-Nifae; o lea na latou fesēta’i ai i le vao i aso e tele, e fa sefulu lava aso na latou fesēta’i ai.

5 Ma ina ua mavae aso e fa sefulu o latou fesēta’i, sa latou tau atu i se mauga, e i matu o le laueleele o Seloma, ma o iina na latou faatutu ai o latou faleie.

6 Ma sa ave e Amona ni ona uso e toatolu, ma o o latou igoa o Amaleki, Helema, ma Hema, ma sa latou o ifo i le laueleele o Nifae.

7 Ma faauta, sa latou fetaia’i ma le tupu o tagata o e sa i ai i le laueleele o Nifae, ma i le laueleele o Seloma; ma sa si’omia i latou e leoleo a le tupu, ma ave i latou, ma saisai, ma tuu i le falepuipui.

8 Ma sa oo ina ua lua aso o i ai i latou i le falepuipui sa toe aumai i latou i luma o le tupu, ma sa tatala o latou noanoaga; ma sa latou tutulai i luma o le tupu, ma sa faatagaina, pe sa faatonuina foi i latou, ia latou tali atu i fesili o le a fesili mai e ia ia te i latou.

9 Ma sa fai mai o ia ia te i latou: Faauta, o a’u o Limae, o le atalii o Noa, o ia o le atalii o Senifa, o lē na sau mai le laueleele o Sara’emila e fai mo ona tofi le laueleele lenei, o le laueleele lea o o latou tamā, o lē na faia e avea o se tupu i le finagalo o le nuu.

10 Ma o lenei, ou te fia iloa le pogai ua outou totoa ai lava e o mai latalata i pa o le aai, a’o a’u lava lenei, ou te faatasi ma a’u leoleo i fafo o le faitotoa?

11 Ma o lenei, o le pogai lenei ua ou tuu atu ai ia faasaoina outou, ina ia mafai ona ou fesiligia outou, a na leai po ua ou faia ia fasiotia outou e a’u leoleo. Ua faatagaina outou tou te tautatala mai.

12 Ma o lenei, ina ua vaai atu Amona ua faataga o ia e tautala atu, sa alu atu o ia ma ifo atu o ia lava i luma o le tupu; ma ina ua toe tulai a’e o ia sa ia fai atu: Le tupu e, ou te matuā faafetai tele i luma o le Atua i lenei aso ona ua ou ola pea, ma ua faatagaina a’u ou te tautala atu; ma o le a ou taumafai e tautala atu ma le lototele.

13 Ona ua ou mautinoa a na e silafia a’u po ua e lē tuuina ia noatia a’u i nei maea. Ona o a’u o Amona, ma o a’u o se e tupuga mai ia Sara’emila, ma ua ou sau mai le laueleele o Sara’emila e saili e uiga i o matou uso, o e na aumai e Senifa mai lena laueleele.

14 Ma o lenei, sa oo ina ua uma ona faalogo mai o Limae i upu a Amona, sa matua fiafia tele lava o ia, ma fai mai: O lenei, ua ou iloa ma le mautinoa o loo ola pea o’u uso o e o i ai i le laueleele o Sara’emila. Ma o lenei, o le a ou olioli; ma o le aso a taeao o le a ou faia ai ia olioli foi lo’u nuu.

15 Aua faauta, o loo matou pologa nei ia sa Lamanā, ma ua totogi lafoga i matou i se lafoga ua faigata lava ona tauave. Ma o lenei, faauta, o le a laveaiina i matou e o matou uso mai lo matou pologa, po o mai lima o sa Lamanā, ma o le a avea i matou ma a latou pologa; ona e sili lo matou pologa i tagata sa Nifaē nai lo le totogi o lafoga i le tupu o sa Lamanā.

16 Ma o lenei, sa faatonu e le tupu o Limae ana leoleo ia aua ne’i o latou toe saisaia Amona po o ona uso, ae faatonu ia latou o atu i le maupu’epu’e sa i le itu i mātū o Seloma, ma aumai o latou uso i le aai, ina ia mafai ai ona latou aai, ma feinu, ma malolo i latou lava mai fita o la latou malaga; ona sa latou mafatia i mea e tele; sa latou mafatia i le fia ’a’ai, fia feinu, ma le vaivai.

17 Ma o lenei sa oo ina auina atu e le tupu o Limae i le aso na sosoo ai se folafolaga i lona nuu atoa, ina ia mafai ona latou faapotopoto mai faatasi i latou lava i le malumalu, e faalogo i upu o le a tautala atu ai o ia ia te i latou.

18 Ma sa oo ina ua latou faapotopoto mai faatasi i latou lava, sa tautala atu o ia ia te i latou i lenei ala, e faapea: E, outou e, o lo’u nuu, ia ea ia i luga o outou ulu ma ia faamafanafanaina outou; aua faauta, ua oo mai le taimi, pe ua lē o mamao, le taimi o le a tatou lē toe i ai i le puleaga a o tatou fili, e ui i le tele o a tatou tauiviga, ia sa lē aoga; peitai ou te faalagolago o loo totoe se tauiviga aoga e tatau ona faia.

19 O lea, ia ea i luga o outou ulu, ma ia olioli, ma tuu atu lo outou faalagolago i le Atua, i lena Atua o lē na fai ma Atua o Aperaamo, ma Isaako, ma Iakopo; ma i lena Atua foi, o lē na aumaia le fanauga a Isaraelu mai le laueleele o Aikupito, ma faia e ia ia latou savavali i totonu o le Sami Ulaula i luga o le eleele matutu, ma fafaga i latou i le manai ina ia latou lē fano i le vao; ma le tele o isi mea na faia e ia mo i latou.

20 Ma lea foi, o lena Atua e tasi na ia aumaia o tatou tamā mai le laueleele o Ierusalema, ma ia tausia ma faasaoina ona tagata e oo mai i le taimi nei; ma faauta, ona o a tatou amioletonu ma mea inosia ua aumai ai e ia i tatou i le pologa.

21 Ma o outou uma o molimau i le asō, o Senifa, o lē na fai ma tupu i lenei nuu, ona o lona soona-naunau e fai mo ona tofi le laueleele o ona tamā, o lea na faaseseina ai o ia i le poto ma le faitogafiti o le tupu o Lamana, o lē na faasese ia te ia ina ua uma ona faia e ia o se maliega ma le tupu o Senifa, ma ina ua uma ona ia tuuina mai i ona lima le mauaina o se vaega o le laueleele, po o le aai o Liae-Nifae, ma le aai o Seloma; ma le laueleele faataamilo ai—

22 Ma sa faia e ia nei mea uma, mo le faamoemoe e tasi, o le aumaia lea o lenei nuu i le toilalo po o i le pologa. Ma faauta, o tatou i le taimi nei o loo tatou totogi atu lafoga i le tupu o sa Lamanā, o le aofai o le ’afa o a tatou saga, ma a tatou karite, ma e oo lava ia tatou saito o ituaiga eseese uma, ma le ’afa e tasi o faaopoopoga o a tatou lafu ma fagaga; ma e oo lava i le ’afa o mea uma ua ia te i tatou po o mea ua tatou maua ua faamalosia e le tupu o sa Lamanā mai ia te i tatou, a leai, o o tatou ola.

23 Ma o lenei, pe ua lē faigata ea ona tatou gafatia lenei mea? Ma ua lē tele ea lo tatou nei puapuagatia? O lenei faauta, ua telē lava le mafuaaga ua tatou faanoanoa ai.

24 Ioe, ou te fai atu ia te outou, ua tele lava mafuaaga ua ia te i tatou e faanoanoa ai; aua faauta e toafia o tatou uso ua fasiotia, ma ua faamaligiina maumau o latou toto, o nei mea uma ua mafua ona o le amioletonu.

25 Ona a na le pa’u’ū atu lenei nuu i le soligatulafono po ua lē tuua e le Alii lenei mea leaga tele ia oo mai i o latou luga. Ae faauta, sa latou lē fia faalogo i ana afioga; ae sa tutupu a’e finauga i totonu o i latou, sa oo lava ina matuā tetele sa oo ai ina latou faamaligi le toto i totonu o i latou lava.

26 Ma sa latou fasiotia se perofeta a le Alii; ioe, o se tagata filifilia o le Atua, o lē na ia ta’u atu ia te i latou a latou amioleaga ma mea inosia, ma vavalo atu e uiga i le tele o mea o le a oo mai, ioe, e oo lava i le afio mai o Keriso.

27 Ma ona sa fai atu o ia ia te i latou o Keriso o le Atua lea, o le Tamā o mea uma lava, ma fai atu o le a ave e ia i ona luga foliga o le tagata, ma o foliga lava ia na faatusa e foafoa i ai le tagata i le amataga; po o i ni isi upu, na fai mai o ia na foafoaina le tagata i foliga o le Atua, ma o le a afio ifo le Atua i le fanauga a tagata, ma ave i ona luga le tino ma le toto, ma femaliua’i ai i luga o le fogaeleele—

28 Ma o lenei, ona sa fai atu e ia nei mea, sa latou fasioti ia te ia; ma e tele atu isi mea na latou faia na oo mai ai i o latou luga le toasa o le Atua. O lea, o ai e ofo ua latou i ai i le pologa, ma ua taiaina i latou i puapuaga mata’utia?

29 Aua faauta, na fetalai mai le Alii: Ou te lē fesoasoani i lo’u nuu i le aso o lo latou solitulafono; ae o le a Ou punia o latou ala ina ia latou lē manuia; ma o a latou mea e fai o le a fai ma ma’a tu’ia i o latou luma.

30 Ma lea foi, ua fetalai mai o ia: Afai e lūlū e lo’u nuu mea ’eleelea o le a latou selesele mai ai ia aputi i le asiosio; ma o lona iuga o le vai ’ona.

31 Ma sa toe fetalai mai o ia: Afai e lūlū e lo’u nuu mea eleelea o le a latou selesele le matagi mai sasa’e, lea e vave ai ona oo mai le faafanoga.

32 Ma o lenei, faauta, ua faataunuuina le folafolaga a le Alii, ma ua taia outou ma puapuagatia.

33 Ae afai tou te liliu atu i le Alii ma le faamoemoe atoa o le loto, ma tuu atu lo outou faalagolago ia te ia, ma auauna atu ia te ia ma le filigā atoa o le mafaufau, afai tou te faia lena mea, o le a laveaiina outou e ia e tusa ma lona lava loto ma lona finagalo, mai le pologa.