1 Ma sa oo ina ua uma ona faaiu e le Tupu o Limae le tautala atu i lona nuu, ona e tele mea sa tautala atu ai o ia ia te i latou ma ua na’o ni nai mea itiiti o ia mea ua ou tusia i lenei tusi, sa ta’u atu e ia i lona nuu mea uma e uiga i o latou uso o e sa i le laueleele o Sara’emila.

2 Ma sa faia e ia ia tulai Amona i luma o le motu o tagata, ma faamatala atu ia te i latou mea uma sa tutupu i o latou uso mai le taimi na alu ese ai Senifa mai le laueleele seia oo mai lava i le taimi na alu ese ai o ia lava mai le lauelele.

3 Ma sa faamatala atu foi e ia ia te i latou upu mulimuli sa a’oa’o mai e le tupu o Peniamina ia te i latou, ma faamalamalama atu i latou i le nuu o le tupu o Limae, ina ia mafai ona latou malamalama i upu uma na tautala ai o ia.

4 Ma sa oo ina ua uma ona faia e ia nei mea uma, sa oo ina auina atu e le tupu o Limae le motu o tagata, ma faatonuina ia latou taitoatasi ma toe foi atu le tagata i lona lava fale.

5 Ma sa oo ina faia e ia ia aumai papatusi ia sa i ai le talafaamaumau o lona nuu mai le taimi na latou tuua ai le laueleele o Sara’emila, i luma o Amona, ina ia mafai ona faitau e ia.

6 O lenei, ina ua uma ona faitau e Amona le talafaamaumau, sa fesili mai le tupu ia te ia i le fia iloa pe mafai ona ia faaliliuina gagana, ma sa fai atu Amona ia te ia e na te lē mafaia.

7 Ma sa fai mai le tupu ia te ia: Ona o lo’u faanoanoa ona o puapuaga o lo’u nuu, na ou faatonuina ai ia alu se malaga a se toafa sefulu ma le tolu o tagata o lo’u nuu i le vao, ina ia mafai ona latou maua o le laueleele o Sara’emila, ina ia mafai ona matou tagi atu i o matou uso e laveai i matou mai le pologa.

8 Ma sa sē i latou i le vao mo le va o aso e tele, peitai sa latou filigā, ma sa lē maua le laueleele o Sara’emila ae toe foi mai i le laueleele lenei, i le latou malaga e ala mai i se laueleele sa tele ai le suāvai, ma sa latou maua ai se laueleele sa ufitia i ivi o tagata, ma ivi o manu, ma sa ufitia foi i toega malepelepe o ituaiga o fale eseese, ua latou maua se laueleele sa ’ainā e ni tagata sa tusa lo latou toatele ma ’au o Isaraelu.

9 Ma ina ia fai ma molimau o le moni o mea na latou fai mai ai o lea na latou aumai ai ni papatusi e lua sefulu fa ua faatumulia i togitogiga, ma ua gaosia mai le auro mao’i.

10 Ma faauta, sa latou aumai foi ufifatafata, sa tetele, ma sa gaosia mai le apamemea ma le kopa, ma sa lelei atoatoa.

11 O lenei foi, sa latou aumai pelu, o o latou ’au ua pala, ma o o latou lau ua ’elea i le ele; ma ua leai se tasi i le nuu e mafai ona ia faamatala le gagana po o togitogiga ua i ai i luga o papatusi. O lea na ou fai atu ai ia te oe: E mafai ona e faaliliuina?

12 Ma ou te toe fai atu ia te oe: E te silafia se tasi e mafai ona ia faaliliuina? Ona ou te manao e faaliliu nei talafaamaumau i la matou gagana; ona atonu, o le a tuu mai ai ia te i matou se malamalamaaga e uiga i se vaega o totoe o tagata o le nuu o e ua faaumatia, e afua mai ai nei talafaamaumau; pe, atonu, o le a latou tuu mai ai ia te i matou se malamalamaaga e uiga i nei lava tagata o e ua faaumatia; ma ou te fia iloa le pogai o lo latou faafanoga.

13 O lenei sa fai atu Amona ia te ia: E mafai ona ou ta’u atu faamaoni ia te oe, le tupu e, se tagata e mafai ona faaliliuina e ia talafaamaumau; ona ua ia te ia ni mea e mafai ona ia tagai i ai, ma faaliliu ai talafaamaumau uma mai aso anamua; ma o se meaalofa mai le Atua. Ma o ia mea ua ta’ua o faaliliu upu, ma e leai se tasi e mafai ona vaai i ia mea vagana ua poloaiina ai o ia, ne’i vaai o ia i mea e lē tatau ona ia vaai i ai ma fano ai o ia. Ma o soo se tasi e poloaiina e taga’i i totonu o ia mea, o ia lava lea ua ta’ua o le tagatavāai.

14 Ma faauta, o le tupu o tagata o e o loo i le laueleele o Sara’emila o le tagata lea ua poloaiina na te faia ia mea, ma o lē ua i ai lenei meaalofa maualuga mai le Atua.

15 Ma sa fai mai le tupu ua sili atu le tagatavāai nai lo se perofeta.

16 Ma sa fai atu Amona o se tagatavāai o se talifaaaliga ma o se perofeta foi; ma e leai se tagata e mafai ona ia maua se meaalofa e sili atu, vagana ai ua maua e ia le mana o le Atua, e lē mafai e se tagata ona maua; peitai e mafai e se tagata ona maua le mana tele e tuuina mai ia te ia mai le Atua.

17 Ae o se tagatavāai e mafai ona iloa e ia mea ua mavae, ma mea foi o le a oo mai, ma e ala mai ia te i latou o le a faaali mai ai o mea uma lava, po o, le sa’o tonu, o le a faaalitino mai ai mealilo, ma o le a faamalamalama mai ai mea ua natia, ma o mea ua lē iloa o le a faailoa mai e i latou, ma o le a faailoa mai foi e i latou mea semanū e lē mafai ona iloa.

18 Ua faapea ona saunia e le Atua se ala e mafai ona faia ai e le tagata vavega tetele, e ala i le faatuatua; o lea e avea ai o ia ma manuia tele i ona uso-a-tagata.

19 Ma o lenei, ina ua faai’u e Amona ona tautala atu i nei upu sa olioli tele le tupu, ma faafetai atu i le Atua, e faapea: E le masalomia ua i ai se mealilo tele i totonu o nei papatusi, ma e lē masalomia sa saunia nei faaliliu upu mo le faamoemoe o le fofolaina mai o mealilo uma faapea i le fanauga a tagata.

20 E, ua matuā ofoofogia lava galuega a le Alii, ma ua matuā loa lava lona tautiga mo ona tagata; ioe, ma ua matua tauaso lava ma lē maulufia le malamalamaaga o le fanauga a tagata; ona latou te lē saili le poto, latou te lē mananao foi na te pulea i latou.

21 Ioe, ua pei i latou o se lafu ’aivao ua sosola ese mai le leoleo mamoe, ma faataapeapeina, ma ua tulia, ma ua ’aina e manu fe’ai o le vao.