1 Ut kik’ulman naq chirix naq li rey aj Limhi kixk’e xraqik raatinankil lix tenamit, xb’aan naq kixye k’iila k’a’aq re ru chiruheb’ ut yal junjunq reheb’ kintz’iib’a sa’ li hu a’in, a’an kixye re lix tenamit chixjunil li k’a’aq re ru chirixeb’ li ras riitz’ineb’ li wankeb’ sa’ li ch’och’ Tzarahemla.

2 Ut kixk’e naq laj Ammon taaxaqliiq chiru li ch’utch’uukil tenamit, ut tixseraq’i reheb’ chixjunil li k’a’ru ke’xk’ul chaq li ras riitz’ineb’ chalen chaq sa’ li kutan ki’el wi’ chaq laj Tzeniff sa’ li ch’och’ toj reetal naq a’an ajwi’ ki’el chaq sa’ li ch’och’.

3 Ut jo’kan ajwi’ kixnumsi chiruheb’ lix ch’otonel aatin kixtzoleb’ wi’ li rey aj Benjamin, ut kixch’olob’ a’an chiru lix tenamit li rey aj Limhi, re naq te’ruuq chixtawb’al ru chixjunil li aatin li kixye.

4 Ut kik’ulman naq chirix naq kixb’aanu chixjunil a’in, naq li rey aj Limhi kixkanab’ chi xik li ch’utch’uukil tenamit, ut kixk’eheb’ chi sutq’iik, li junjunq sa’ tz’aqal li rochoch.

5 Ut kik’ulman naq kixtaqla naq eb’ li perel ch’iich’ wan wi’ li tz’iib’anb’il esil chirix lix tenamit chalen chaq naq ke’el chaq sa’ li ch’och’ Tzarahemla, te’k’ame’q chiru laj Ammon re naq taaruuq chirilb’al xsa’.

6 Ut tikto chirix naq laj Ammon kiril xsa’ li tz’iib’anb’il esil, li rey kipatz’ok rik’in a’an re tixnaw ma naru chixk’utb’al xyaalalileb’ li jalanil aatinob’aal, ut laj Ammon kixye re naq ink’a’ naru chiru.

7 Ut li rey kixye re: Rik’in naq xraho’ inch’ool xb’aan lix ch’a’ajkilaleb’ lin tenamit, kintaqla naq oxib’ roxk’aal reheb’ lin tenamit te’xchap xb’e chiru li yamyookil ch’och’, re naq chi jo’kan te’ruuq chixtawb’al li ch’och’ Tzarahemla, re naq taaruuq taqatz’aama chiruheb’ li qas qiitz’in naq toohe’xkol chaq chiru li moosil.

8 Ut eb’ a’an ke’sach sa’ li yamyookil ch’och’ chiru xnumik k’iila kutan, a’b’anan ke’xyal xq’e, ut moko ke’xtaw ta li ch’och’ Tzarahemla; ke’sutq’i b’an sa’ li ch’och’ a’in, chirix b’eek sa’ jun li ch’och’ sa’ xyanqatq k’iila ha’, chirix xtawb’al jun li ch’och’ hirho wi’ xb’aqeleb’ li winq, ut li xul, ut hirho ajwi’ aran li jar paay chi po’lem kab’l, chirix xtawb’al jun li ch’och’ wanjenaq chaq jun li tenamit li ke’wan chaq xk’ihal jo’ chanru xk’ihal lix k’iila teep laj Israel.

9 Ut re xch’olob’ankil xyaalal naq yaal li k’a’aq re ru ke’xye, ke’xk’am chaq kaahib’ xka’k’aal perel chi ch’iich’ li nujenaqeb’ rik’in tz’iib’, ut a’aneb’ tz’aqal oor okenaq.

10 Ut k’e reetal, jo’kan ajwi’, ke’xk’am chaq li xramb’al ru ch’oolej, li ninqeb’, ut ch’iich’ bronce ut kaqi ch’iich’ okenaqeb’ wi’, ut tz’aqaleb’ re ru.

11 Ut jo’kan wi’chik, ke’xk’ameb’ chaq li yok’leb’ ch’iich’, oso’jenaqeb’ li roq, ut lix q’esnaleb’ po’b’il rik’in mo’; ut maajun wan sa’ li ch’och’ li naruhan chixk’utb’al xyaalalil li aatinob’aal malaj li k’a’ru tz’iib’anb’il chiruheb’ li perel ch’iich’. Jo’kan naq kinye aawe: ma nakatru chixjaltesinkil ru li aatin?

12 Ut ninye wi’chik aawe: Ma nakanaw ru anihaq li naru chixjaltesinkil ru li aatinob’aal? Xb’aan naq nawaj naq taajaltesimanq ru li tz’iib’anb’il esil a’in sa’ li qaatinob’aal; xb’aan naq maare tixk’e qana’leb’ chirix jun rela’ li tenamit li ke’sache’, li kichal wi’ li tz’iib’anb’il esil a’in; malaj ut maare tixk’e qana’leb’ chirix ajwi’ li tenamit a’in li sachb’il; ut nawaj raj xnawb’al k’a’ut naq ke’sache’.

13 Anajwan laj Ammon kixye re: Naru tinye chi yaal aawe, at rey, chirix jun li winq li naru chixjaltesinkil ru li tz’iib’anb’il esil; xb’aan naq wan rik’in a’an k’a’ru naru wi’ chi ilok, ut chixjaltesinkil ru chixjunil li tz’iib’anb’il esil li najter xyiib’ankil; ut a’an jun li maatan k’eeb’il xb’aan li Dios. Ut li k’a’ re ru a’an k’utleb’aal aatin nayeeman re, ut maajun winq naru chi ilok chiru, ka’ajwi’ wi taqlanb’il, maare anchal tixsik’ li k’a’ru moko xk’ulub’ ta chiru, ut taa’oso’q raj a’an. Ut li ani taqlanb’il chi ilok chiru, a’an aj ilol na’leb’ nayeeman re.

14 Ut k’e reetal, lix reyeb’ li tenamit li wankeb’ sa’ li ch’och’ Tzarahemla, a’an li winq li taqlanb’il chixb’aanunkil li k’a’aq re ru a’in, ut li xk’uluk re li taqenaqil maatan a’in rik’in li Dios.

15 Ut li rey kixye naq jun aj ilol na’leb’ naxq’ax xnimal ru jun li profeet.

16 Ut laj Ammon kixye naq jun aj ilol na’leb’ a’an ajwi’ aj k’utb’esinel ut profeet; ut maajun winq naru chixk’ulb’al junaq maatan li naq’axok ta re xnimal ru a’an, ka’ajwi’ wi ta tixk’ul lix wankilal li Dios, ut maajun winq naru chi jo’kan; a’b’anan junaq winq naru nawan nimla wankilal k’eeb’il re xb’aan li Dios.

17 A’b’an jun aj ilol na’leb’ naru naxnaw chirix li k’a’aq re ru xnume’, ut jo’kan ajwi’ chirix li k’a’aq re ru toj chalel, ut xb’aaneb’ a’an taak’utb’esiiq chixjunil li k’a’aq re ru, malaj ut, li k’a’aq re ru moko k’utb’il ta taak’utb’esimanq, ut k’a’aq re ru muqmu taak’ame’q chi kutankil, ut k’a’aq re ru moko nawb’il ta taak’ehe’q chi nawmank xb’aaneb’; ut jo’kan ajwi’ taak’ehe’q chi nawmank xb’aaneb’ k’a’aq re ru li ink’a’ raj taaruuq chi nawmanq wi ta ink’a’ jo’kan.

18 Chi jo’kan li Dios kixk’e chanru naq li winq, rik’in paab’aal, taaruuq chixk’anjelankil li xninqal ru sachb’a-ch’oolej; chi jo’kan na’ok choq’ nimla chaab’ilal chiruheb’ li rech winqilal.

19 Ut anajwan, chirix naq laj Ammon kixk’e xraqik xyeeb’al li aatin a’in, li rey kisaho’ xch’ool chi numtajenaq, ut kib’antioxin chiru li Dios, kixye: Ch’olch’o ru naq natawman jun xnimal ru muqmuukil na’leb’ sa’eb’ li perel ch’iich’ a’in, ut ch’olch’o ru naq kikawresiman li k’utleb’aal aatin a’in re naq taateeliiq chixjunil xkomon li muqmuukil na’leb’ a’in chiruheb’ li ralal xk’ajoleb’ li winq.

20 Aay, k’a’jo’ xsachb’a-ch’oolejileb’ lix k’anjel li Qaawa’, ut k’a’jo’ najtil naxkuyeb’ lix tenamit; relik chi yaal, ut k’a’jo’ xmutz’ileb’ ru ut xtz’aptz’ookil ru lix k’a’uxleb’ li ralal xk’ajoleb’ li winq; xb’aan naq moko te’xsik’ ta li chaab’il na’leb’, chi moko neke’raj naq a’an taataqlanq sa’ xb’eeneb’.

21 Relik chi yaal, chanchaneb’ jun teep chi xul re k’iche’ li na’eelelik chiru laj ilol karneer, ut najek’iman, ut neke’alinasiik, ut neke’k’uxiik xb’aaneb’ lix xulel li k’iche’.