1 N̄a, Zeniff, kōnke kar katakin eō ilo aolep kajin eo an riNipai ro, im kar wōr aō jeļā kōn āneen Nipai, ak kōn āneo ro jemām kar jolōte m̧oktata, im kar jilkinļo̧k āinwōt juon riiaron̄ron̄ ilubwiljin riLeman ro bwe in maron̄ iaron̄ron̄ e jarin tariņae ko aer, bwe jarin tariņae ko am̧ ren maron̄ itok ioer im ko̧kkure er—ak ke iaar ko ta eo em̧m̧an ilubwiljier iaar jab kōņaan bwe ren jab jako.

2 Kōn menin, iaar aitwerōk ippān ro jeiū im jatū ilo āne jem̧aden, bwe iaar kōņaan bwe ripepe eo am en kōm̧m̧ane juon bujen jem̧jerā ippāer; a kōnke eaar juon em̧m̧aan elāj im eo emaro bōtōktōk eaar jiron̄ bwe ij aikuj in mej; a kar lo̧mo̧o̧ren eō jān kōto̧o̧rļo̧k eļap bōtōktōk; bwe jemān eaar ire ņae jemān, im ļeo jein im jatin ņae ļeo jein im jatin, m̧ae m̧ōttan eo eļap in jarin tariņae eo am eaar jako ilo āne jem̧aden; im kōm ar ro̧o̧l, kōm ro rekar mour wōt, n̄an āneen Zaraemla, n̄an kwaļo̧k bwebwenato in n̄an kōrā ro pāleer im ro nejier.

3 Im mekarta, kōnke iaar tōn̄tōn̄ in kōņaan jolōte āneo āneen ro jemām, iaar aintok jon̄an lōn̄ in wōt eo raar kōņaan wanlōn̄ļo̧k n̄an bōk āneo, im bar jino ilo ito-itak eo am ļo̧k ilo āne jem̧aden n̄an wanlōn̄ļo̧k n̄an āneo; ak kōm kar en̄taan kōn n̄ūta im nan̄inmej ko rōkōmmetak; bwe kōm ar rum̧wij n̄an keememej Irooj am̧ Anij.

4 Mekarta, ālikin elōn̄ raan ko in jebwābwe ilo āne jem̧aden kōm ar kajutak im̧ōn kōppād ko am ilo jikin eo ijo ro jeiūm̧ im jatūm̧ raar mej ie, eo eaar epaakļo̧k n̄an āneo āneen ro jemām.

5 Im ālikin men kein iaar bar ilo̧k ippān emān iaan em̧m̧aan ro aō ilo jikin kwelo̧k eo, ļo̧k n̄an kiin̄ eo, bwe in maron̄ jeļā kijjien kiin̄ eo, im bwe in maron̄ jeļā eļan̄n̄e imaron̄ ilo̧k kōn armej ro im bōk āneo ilo aenōm̧m̧an.

6 Im iaar deļo̧n̄ļo̧k ippān kiin̄ eo, im eaar kōm̧m̧an bujen ippa bwe imaron̄ bōk āneen Liai-Nipai, im āneen Silom.

7 Im eaar barāinwōt jiron̄ armej ro an bwe ren diwōjļo̧k jān āneo, im n̄a im armej ro aō kōm ar deļo̧n̄ļo̧k ilo āneo bwe kōmin maron̄ bōk e.

8 Im kōm ar jino kalōk m̧ōko, im n̄an kōkōm̧anm̧anļo̧k wōrwōr ko an jikin kwelo̧k eo, aaet, em̧ool wōrwōr ko an jikin kwelo̧k in Liai-Nipai, im jikin kwelo̧k Silom.

9 Im kōm ar jino kōpooj bwidej eo n̄an kallib, aaet, em̧ool kōn aolep ine ko otemjeļo̧k, kōn ine ko in ko̧o̧n, im kōn wit, im kōn barli, im kōn neas, im kōn sheum, im kōn ine ko in leen ko otemjeļo̧k; im kōm ar jino n̄an wōrļo̧k im jeraam̧m̧an ilo āneo.

10 Kiiō eaar kōn etao im m̧oņ an kiin̄ Leman, n̄an bōktok armej ro aō ilo ineen kōm̧akoko, bwe eaar kōtļo̧k āneo bwe kōmin maron̄ bōk e.

11 Kōn menin ālikin men kein, ke em̧ōj am kar jokwe ilo āneo ium̧win kōtaan eo jon̄oulruo iiō ko bwe kiin̄ Leman eaar jino eddek an ekkōl, n̄e ab jān jabdewōt wāween armej ro aō renaaj kanooj kajoor ilo āneo, im bwe remaron̄ anjo̧ ioer im bōktok er ilo ineen kōm̧akoko.

12 Kiiō raar juon armej rejowan im rikabun̄-jar n̄an ekjab; kōn menin raar kōņaan n̄an bōktok kōm ilo ineen kōm̧akoko, bwe ren maron̄ kōjeban er make kōn jerbal ko an peim; aaet, bwe ren maron̄ kakwōjkwōj e er make kōn bwijin in mennin mour ko am im meļaaj ko am.

13 Kōn menin, ālikin men kein kiin̄ Leman eaar jino kalim̧otak armej ro an bwe ren aitwerōk ippān armej ro aō; kōn menin eaar jino wōr tariņae ko im aitwerōk ko ilo āneo.

14 Bwe, ilo iiō eo kein kajon̄ouljilu in aō irooj ilo āneen Nipai, ettoļo̧k ilo turōk in āneen Silom, ke armej ro raar keidaak im naajdik mennin mour ko aer, im kōpooj bwidej eo n̄an kallib, juon bwijin ebwijlep in riLeman ro raar itok ioer im jino n̄an m̧an er, im n̄an ko kaki mennin mour ko aer, im kōn ko̧o̧n in meļaaj ko aer.

15 Aaet, im ālikin men kein raar ko, aolep ro raar jab bōk er, em̧oolļo̧k ilo jikin kwelo̧k in Nipai, im kar kūr n̄an eō kōn likōpejn̄ak.

16 Im ālikin men kein iaar kōpālpel er kōn lippo̧ņ ko, im kōn m̧ade ko, kōn jāje ko, im kōn jāje ko reddik, im kōn kein den̄den̄ ko, im kōn buwat ko, im kōn aolep kein tariņae otemjeļo̧k ko kōm maron̄ eje, im n̄a im armej ro aō kōm ar ilo̧k ņae riLeman ro n̄an tariņae.

17 Aaet, ilo kajoor an Irooj kōm ar ilo̧k n̄an tariņae ņae riLeman ro; bwe n̄a im armej ro aō raar kūr ilo kajoor n̄an Irooj bwe en maron̄ kōtļo̧k kōm jān pein rikōjdat ro am, bwe kōm ar ruj n̄an juon ememej kōn kōtļo̧k eo an ro jemām.

18 Im Anij eaar ron̄ kūr ko am im Eaar uwaak jar ko am; im kōm ar ilo̧k ilo kajoor eo An; aaet, kōm ar ilo̧k ņae riLeman ro, im ilo juon raan im juon bon̄ kōm ar m̧an jilu to̧ujin im en̄ouljilu; kōm ar m̧an er em̧ool m̧ae am kar lukwarkware er jān āneo āneem.

19 Im n̄a, make, kōn peiū make, iaar jipan̄ n̄an kalbwin rimej ro aer. Im lo, n̄an am būrom̧ōj im liaajlo̧ļ eļap, rūbukwi jiljilimjuonn̄oul im ruwatimjuon in ro jeiūm̧ im jatūm̧ rekar mej.