1 Laa’in, aj Tzeniff, rik’in naq tzolb’ilin sa’ chixjunil li raatinob’aaleb’ laj Nefita, ut rik’in naq wan innawom chirix li ch’och’ Nefi, malaj xch’och’il li xb’een reechanihomeb’ li qayuwa’, ut kintaqlaak choq’ aj muqmuukil k’ehol eetal sa’ xyanqeb’ laj Lamanita re tink’e reetal jo’ nimal xmetz’eweb’, re naq te’chalq li qateep aj pleet sa’ xb’eeneb’ ut te’xsacheb’—a’b’anan naq kiwil li k’a’ru chaab’il sa’ xyanqeb’ kiwaj raj naq ink’a’ te’sachmanq.

2 Jo’kan ut, kinwech’ok rik’ineb’ li was wiitz’in sa’ li yamyookil ch’och’, xb’aan naq kiwaj naq laj taqlahom qe tixk’e rib’ sa’ aatin rik’ineb’; a’b’anan a’an, rik’in naq josq’ aj winq ut aj rahom kik’, kixtaqla naq tinkamsiiq; a’ut kikole’ wix rik’in naab’al li kik’ kihoyman; xb’aan naq kipleetik li yuwa’b’ej rik’in li yuwa’b’ej, ut li asb’ej rik’in li iitz’inb’ej, toj reetal naq ke’sache’ xk’ihal rajlankil li qateep aj pleet sa’ li yamyookil ch’och’; ut koosutq’i, jo’ k’ihal qe li ke’kole’ xyu’am, sa’ li ch’och’ Tzarahemla, re xseraq’inkil li esil a’an reheb’ li rixaqil ut eb’ li ralal xk’ajoleb’.

3 A’ut laa’in, rik’in naq numtajenaq watawom chireechaninkil lix ch’och’eb’ li qayuwa’, kinch’utub’ jo’ k’ihaleb’ li te’ajoq re taqe’k chireechaninkil li ch’och’, ut kiqatikib’ wi’chik b’eek sa’ li yamyookil ch’och’ re taqe’k sa’ li ch’och’; a’ut koosak’e’ rik’in we’ej ut rahil ch’a’ajkilal; xb’aan naq timilo chaq chixk’oxlankil li Qaawa’ li qaDios.

4 A’b’anan, chirix b’eek k’iila kutan chiru yamyookil ch’och’ kiqayiib’ li qamuheb’aal t’ikr sa’ li na’ajej ke’kamsiik wi’ li qas qiitz’in, li nach’ wan rik’in lix ch’och’eb’ li qayuwa’.

5 Ut kik’ulman naq wochb’een kaahib’eb’ lin winq xkohin wi’chik sa’ li tenamit, rik’in li rey, re tinnaw xch’ool li rey, ut re tinnaw ma taaruuq tin’ok wochb’een lin tenamit ut tinweechani li ch’och’ sa’ tuqtuukilal.

6 Ut koxin’okaq rik’in li rey, ut a’an ki’ok sa’ sumwank wik’in naq taaruuq tinweechani li ch’och’ Lehi-Nefi, ut li ch’och’ Xilom.

7 Ut jo’kan ajwi’ kixtaqlaheb’ lix tenamit chi elk chaq sa’ li ch’och’, ut laa’in wochb’een lin tenamit koo’ok sa’ li ch’och’ re taqeechani.

8 Ut koo’ok chixkab’lankileb’ li kab’l, ut chixtuqub’ankil lix xaqxookil tz’ak li tenamit; relik chi yaal, lix xaqxookil tz’akil li tenamit Lehi-Nefi, ut li tenamit Xilom.

9 Ut koo’ok chixk’anjelankil li ch’och’, relik chi yaal, rik’in li k’iila paay chi iyaj, rik’in riyajil ixim, ut trigo, ut cebada, ut rik’in neas, ut rik’in xeum, ut rik’in riyajil li k’iila paay chi ru che’; ut koo’ok chi k’ihank ut chi usaak sa’ li ch’och’.

10 Ut a’an xseeb’al ut xb’alaq’ li rey aj Laman, re xk’amb’aleb’ lin tenamit chi moosil, naq a’an kixq’axtesi li ch’och’ re naq laa’o taqeechani.

11 Jo’kan ut kik’ulman, chirix naq koowan sa’ li ch’och’ chiru xnumik kab’laju chihab’, naq li rey aj Laman ki’ok chi po’k xch’ool, maare anchal te’nimanq xkawilaleb’ lin tenamit sa’ li ch’och’, re naq ink’a’ te’ruuq chi numtaak sa’ xb’eeneb’ ut chixk’amb’aleb’ chi moosil.

12 Anajwan, a’aneb’ jun tenamit aj q’em ut aj loq’onihom pak’b’il dios; jo’kan naq ke’raj raj naq toohe’xk’am chi moosil, re naq taaruuq te’numtaaq xsahilal rik’in lix k’anjel li quq’; relik chi yaal, re taaruuq te’xnujob’resi rib’ rik’in lix ketomq li qach’och’.

13 Jo’kan naq kik’ulman naq li rey aj Laman ki’ok chireek’asinkileb’ xch’ool lix tenamit re te’xwech’eb’ lin tenamit; jo’kan naq ki’ok chi wank li pleet ut li wech’ok-ib’ sa’ li ch’och’.

14 Xb’aan naq sa’ li roxlaju chihab’ lin awa’b’ejil sa’ li ch’och’ Nefi, aran chirix li ch’och’ Xilom sa’ xtz’e li saq’e, naq yookeb’ lin tenamit chixk’eeb’al xha’ ut xtzakemq lix ketomq, ut chixk’anjelankil lix ch’och’eb’, kichal sa’ xb’eeneb’ jun teep chi aj Lamanita li k’i rajlankil ut ke’ok chixkamsinkileb’, ut chixk’amb’aleb’ lix ketomq, ut li riximal lix ch’och’eb’.

15 Relik chi yaal, ut kik’ulman naq ke’eelelik, chixjunileb’ li moko ke’tawe’ ta, toj sa’ li tenamit Nefi, ut ke’xtz’aama chiwu xkolb’aleb’ rix.

16 Ut kik’ulman naq kinkawresiheb’ rik’in tzimaj, ut rik’in roq tzimaj, rik’in yok’leb’ ch’iich’, ut rik’in k’onk’ookil ch’iich’, ut rik’in tenleb’ che’, ut rik’in jok’, ut rik’in li k’iila paay chi k’anjeleb’aal re pleet li kiqayo’ob’ xyiib’ankil, ut laa’in wochb’een lin tenamit xkohin chixk’ulb’aleb’ laj Lamanita sa’ pleet.

17 Relik chi yaal, rik’in xmetz’ew li Qaawa’ naq xookoho chixpleetinkileb’ laj Lamanita, xb’aan naq laa’in ut eb’ lin tenamit koo’elajin chaq chi anchal qametz’ew chiru li Qaawa’ naq tooxkol sa’ ruq’eb’ chaq li xik’ neke’ilok qe; xb’aan naq ki’aj qu sa’ xjultikankil lix kolb’aleb’ li qayuwa’.

18 Ut li Dios kirab’i li qelajihom ut kixsume ru li qatij; ut laa’o koxoo’elq rik’in xnimal lix metz’ew a’an; relik chi yaal, koo’el chixpleetinkileb’ laj Lamanita, ut chiru jun kutan ut jun q’ojyin kiqakamsi oxib’ mil rik’in oxib’ roxk’aal; ut kiqakamsiheb’ toj reetal naq kiqalinasiheb’ chaq sa’ li qach’och’.

19 Ut laa’in injunes, rik’in tz’aqal wuq’, kintenq’an chixmuqb’aleb’ lix kamenaqeb’. Ut k’ehomaq reetal, k’a’jo’ naq kiraho’ qach’ool ut kooyaab’ak rik’in naq ke’kamsiik wiib’ cient rik’in b’elelaju xkaak’aleb’ li qas qiitz’in.