Te Buka a Omoni

1 Inaha, i muri a’era, ’ua fa’auehia vau, ’o Omoni, e tō’u metua tāne, ’o Iaroma, ’ia pāpa’i au i te tahi ma’a parau iti i ni’a iho i teie nei mau ’api, ’ia fa’ahereherehia tō mātou tuatāpapara’a tupuna—

2 Nō reira, tē hina’aro nei au ’ia ’ite ’outou ē, i tō’u nei pu’e mahana, ’ua ’aro rahi au ma te ’o’e nō te fa’aora i tō’u mau ta’ata, te mau ’āti Nephi, ’ia ’ore rātou ’ia ma’iri i roto i te rima o tō rātou ra mau ’enemi, te mau ’āti Lamana. Inaha rā, e ta’ata parauti’a ’ore au, ’e ’aita ho’i au i ha’apa’o i te mau ture ’e te mau fa’auera’a a te Fatu mai tei ti’a iā’u ’ia ha’apa’o.

3 ’E i muri a’era, ’ua hope a’era e piti hānere e hitu ’ahuru ’e ma ono matahiti, ’e ’ua rahi tō mātou mau tau hau ; ’e ’ua rahi ato’a ho’i tō mātou mau tau ’arora’a rahi ’e te ha’amani’ira’a toto. ’Oia ïa, ’ua hope e piti hānere e va’u ’ahuru ’e ma piti matahiti, ’e ’ua ha’apa’o noa vau i teie nei mau ’api mai te au i te mau fa’auera’a a tō’u ra mau metua ; ’e ’ua hōro’a atu vau i te reira i tā’u ra tamaiti ’o Amarona. ’E tē fa’aoti nei au i teienei.

4 ’E i teienei, e pāpa’i ato’a vau, ’o Amarona, i te mau mea tā’u e pāpa’i i roto i te buka a tō’u ra metua tāne, ’e e ’ere te reira i te mea rahi.

5 Inaha, i muri a’era, ’ua hope a’era e toru hānere e piti ’ahuru matahiti, ’e ’ua mou roa te pae rahi o te mau ta’ata parauti’a ’ore o te mau ’āti Nephi ra.

6 ’E oti a’era ho’i tā te Fatu arata’ira’a mai ia rātou mai te fenua nō Ierusalema mai, ’e tāna tīa’ira’a ia rātou, ’e tāna fa’ahereherera’a ia rātou i te rima o tō rātou ra mau ’enemi, ’aita ’oia i fa’ati’a ’ia ’ore tāna mau parau ’ia tupu, tāna i parau atu i tō rātou ra mau metua, i te nā-’ō-ra’a ē : ’Ia ’ore ’outou e ha’apa’o i tā’u mau fa’auera’a, e ’ore roa ’outou e manuia i ni’a i te fenua nei.

7 Nō reira, ’ua tā’iri te Fatu ia rātou nā roto i te ha’avāra’a rahi ; ’ua fa’aora rā ’oia i te feiā parauti’a ’ia ’ore rātou ’ia pohe, ’e ’ua fa’aora ho’i ’oia ia rātou i te rima o tō rātou ra mau ’enemi.

8 ’E i muri a’era, ’ua hōro’a atu vau i te mau ’api i tō’u ra taea’e ia Kemisa.

9 I teienei, e pāpa’i au, ’o Kemisa, i te mau mea iti tā’u e pāpa’i i roto i te hō’ē ā buka tā tō’u taea’e i pāpa’i ra ; inaha ho’i, ’ua ’ite au i te parau hope’a tāna i pāpa’i, ’e ’ua pāpa’i ’oia i te reira i tōna ihora rima ; ’e ’ua pāpa’i ho’i ’oia i te reira i te mahana i hōro’a mai ai ’oia i teie nei mau mea iā’u ra. ’E ’ua nā reira mātou i te pāpa’i i te mau pāpa’a parau, ’e ’ua au ho’i i te mau fa’auera’a a tō mātou ra mau metua. ’E tē fa’aoti nei au i teienei.

10 Inaha, e tamaiti au, ’o Abinadoma, nā Kemisa. Inaha, i muri a’era, ’ua ’ite au i te mau ’arora’a ’e te mau mārōra’a e rave rahi i rotopū i tō’u ra mau ta’ata, te mau ’āti Nephi ’e te mau ’āti Lamana ; ’e ’ua taparahi ho’i au i te mau ’āti Lamana e rave rahi i tā’u iho ’o’e, nō te pāruru i tō’u ihora mau taea’e.

11 ’E inaha, ’ua ’ō’otihia te pāpa’a parau o teie nei feiā i ni’a iho i te mau ’api tei ha’apa’ohia e te mau ari’i, mai te au i te mau u’i o te mau ari’i ; ’e ’aita ho’i au i ’ite i te hō’ē a’e heheura’a ’e ’aore rā i te hō’ē a’e tohura’a, maori rā te reira ’o tei pāpa’ihia ; nō reira, ’ua nava’i tei pāpa’ihia. ’E tē fa’aoti nei au i teienei.

12 Inaha, ’o Amaleki au, te tamaiti a Abinadoma. Inaha, e parau ri’i au ia ’outou nō ni’a ia Mosia, ’o tei fa’arirohia ’ei ari’i i ni’a i te fenua ra nō Zarahemela ; inaha ho’i, ’ua fa’aarahia ’oia e te Fatu ’ia haere ’ē atu ’oia i rāpae i te fenua ra nō Nephi, ’e te mau ta’ata ato’a ’o tē ha’apa’o i te reo o te Fatu ’ia haere ato’a atu rātou i roto i te mēdēbara—

13 ’E i muri a’era, ’ua nā reira ’oia mai te au i tā te Fatu i fa’aue mai iāna. ’E ’ua haere atu rātou i rāpae i te fenua ē tae atu i roto i te mēdēbara, ’e te mau ta’ata ato’a ho’i e fa’aro’o i te reo o te Fatu ; ’e ’ua arata’ihia rātou e te mau a’ora’a ’e te mau tohura’a e rave rahi. ’E ’ua a’o-pinepine-hia rātou e te parau a te Atua ; ’e ’ua arata’ihia ho’i rātou e te mana nō tōna ra rima, nā roto i te mēdēbara ē tae roa atu i raro i te fenua i ma’irihia te i’oa, te fenua nō Zarahemela.

14 ’E ’ua ’ite ihora rātou i te tahi mau ta’ata i reira, ’o tei parauhia te mau ta’ata o Zarahemela. I teienei, ’ua tupu te ’oa’oa rahi i rotopū i te mau ta’ata o Zarahemela ; ’e ’ua ’oa’oa roa ho’i ’o Zarahemela, nō te mea ’ua tono mai te Fatu i te mau ta’ata o Mosia ’e te mau ’api veo, tei roto ho’i i te reira te pāpa’a parau o te mau ’āti Iuda.

15 Inaha, i muri a’era, ’ua ’ite a’era Mosia ē, ’ua haere mai te mau ta’ata o Zarahemela mai Ierusalema mai i te tau i hōpoi-tītī-hia ai Zedekia, te ari’i nō Iuda, i Babulonia ra.

16 ’E ’ua haere atu rātou nā roto i te mēdēbara, ’e ’ua arata’ihia ho’i rātou e te rima o te Fatu nā ni’a i te mau pape rahi, ē tae atu ai i te fenua i ’iteahia ai rātou e Mosia ra ; ’e ’ua pārahi noa rātou i reira mai taua atu taime ra.

17 ’E i te tau i fārerei ai Mosia ia rātou ra, ’ua riro ïa rātou ’ei nūna’a rahi roa. ’Āre’a rā, ’ua rahi tā rātou mau tama’i ’e te mau mārōra’a rahi, ’e ’ua pohe ho’i rātou i te ’o’e i terā tau ’e i terā tau ; ’e ’ua fa’ahuru-’ē-hia ho’i tō rātou reo ; ’e ’aita rātou i hōpoi mai i te hō’ē a’e pāpa’a parau nā muri iho ia rātou ; ’e ’ua huna ho’i rātou i Tei Hamani ia rātou ; ’e ’aita roa Mosia ’e te mau ta’ata o Mosia i ta’a i tā rātou mau parau.

18 ’E i muri a’era, ’ua fa’aue atu ra Mosia ’ia ha’api’ihia rātou i tōna ra reo. ’E i muri a’era, ’ia oti a’era rātou i te ha’api’ihia i te reo o Mosia, ’ua fa’a’ite mai ra Zarahemela i te tuatāpapara’a tupuna o tōna ra mau metua, mai tei ha’amana’ohia e ana ra ; ’e ’ua pāpa’ihia te reira, ’eiaha rā i ni’a i teie nei mau ’api.

19 ’E i muri a’era, ’ua ’āmui tāhō’ē ihora te mau ta’ata o Zarahemela ’e te mau ta’ata o Mosia ; ’e ’ua mā’itihia ihora Mosia ’ei ari’i nō rātou.

20 ’E i muri a’era, i te mau mahana o Mosia, ’ua hōpoihia mai ra te hō’ē ’ōfa’i rahi iāna, ’e tei ni’a iho i te reira te tahi mau parau i te ’ō’otira’ahia ; ’e ’ua ’īriti ’oia i te mau parau i ’ō’otihia nā roto i te hōro’ara’a e te mana o te Atua.

21 ’E ’ua tuatāpapa mai te reira i te ’ā’amu nō te hō’ē ta’ata ’o Korianetumera, ’e te taparahira’ahia o tōna ra mau ta’ata. ’E ’ua ’itehia Korianetumera ’e te mau ta’ata o Zarahemela ; ’e ’ua pārahi ho’i ’oia i pīha’i iho ia rātou nō te ārea e iva marama te maoro.

22 ’Ua fa’a’ite ato’a mai te reira i te tahi mau parau ri’i nō ni’a i tōna ra mau metua. ’Ua haere mai tōna mau metua mātāmua mai te pare mai ra i te tau i fa’ahuru ’ē ai te Fatu i te reo o te mau ta’ata ; ’e ’ua tae mai ho’i te ha’avāra’a rahi a te Fatu i ni’a iho ia rātou mai te au i tāna mau ha’avāra’a parauti’a ; ’e tē vai noa nei ā tō rātou mau ivi i ni’a i te fenua i te pae apato’erau ra.

23 Inaha, ’ua fānauhia vau, ’o Amaleki, i te mau mahana o Mosia ; ’e ’ua ’ite ho’i au i tōna pohera’a ’a ora ai au ; ’e ’ua fa’atere mai ra tāna tamaiti, ’o Beniamina, ’ei mono nōna.

24 ’E inaha, i te mau mahana o te ari’i Beniamina, ’ua ’ite au i te hō’ē ’arora’a rahi ’e te ha’amani’ira’a toto i rōpū i te mau ’āti Nephi ’e te mau ’āti Lamana. Inaha rā, ’ua ha’avī te mau ’āti Nephi ia rātou ; ’oia ïa, ’e nō reira ’ua ti’avaru atu ra te ari’i Beniamina ia rātou i rāpae i te fenua nō Zarahemela.

25 ’E i muri a’era, ’ua ruhiruhiā vau ; ’e ’aita ho’i tā’u e tamari’i, ’e nō te mea ’ua ’ite au ē, e ta’ata parauti’a te ari’i Beniamina i mua i te Fatu, nō reira, e hōro’a atu vau i teie nei mau ’api iāna, ma te tītau atu i te mau ta’ata ato’a ’ia haere mai i te Atua, i Tei Mo’a i ’Īserā’ela nei, ’e ’ia ti’aturi i te mau tohura’a ’e te mau heheura’a, ’e te utuutura’a a te mau melahi, ’e te hōro’ara’a nō te paraura’a i te parau ’ē, ’e te hōro’ara’a nō te ’īriti i te parau ’ē, ’e te mau mea maitata’i ato’a ra ; ’e ’aita ho’i e mea maita’i, maori rā nō ’ō mai i te Fatu ra : ’e te mau mea ’ino ra, nō ’ō mai ïa i te diabolo ra.

26 ’E i teienei, e tō’u mau taea’e here, ’ua hina’aro vau ’ia haere mai ’outou i te Mesia, i Tei Mo’a i ’Īserā’ela nei, ’e ’ia fāri’i i tāna fa’aorara’a, ’e te mana nō tāna fa’aorara’a. ’Oia ïa, ’a haere mai iāna, ’e ’a pūpū mai i tō ’outou mau vārua ato’a ’ei ō nāna ; ’e ’a tāmau noa i te ha’apae i te mā’a ’e i te pure, ’e ’a fa’aitoito noa ē tae noa atu i te hope’a ra ; e mai te Fatu e ora nei, e fa’aorahia ïa ’outou.

27 ’E i teienei, e parau ri’i au nō ni’a i te tahi mau ta’ata ’o tei haere atu i te mēdēbara nō te ho’i atu i te fenua ra nō Nephi ; e rave rahi ho’i mau ta’ata tei hina’aro ’ia roa’a fa’ahou mai tō rātou fenua ’āi’a.

28 Nō reira, ’ua haere atu rātou i ni’a i roto i te mēdēbara. ’E tō rātou ta’ata fa’atere ra, e ta’ata pūai ïa ’e te mana, ’e e ta’ata ’ā’au ’eta’eta ho’i, nō reira ’ua fa’atupu ’oia i te mārōra’a i rotopū ia rātou ; ’e ’ua taparahihia rātou ato’a i roto i te mēdēbara, maori rā e pae ’ahuru, ’e ’ua ho’i fa’ahou mai ra rātou i te fenua ra nō Zarahemela.

29 ’E i muri a’era, ’ua arata’i fa’ahou atu ra rātou i te tahi ā pupu huru rahi, ’e ’ua ho’i fa’ahou atu ra i te mēdēbara.

30 ’E tē vai ra to’u, ’o Amaleki, te hō’ē taea’e ’o tei haere ato’a atu nā muri ia rātou ; ’e ’aita vau i fa’aro’o fa’ahou i te parau nō ni’a ia rātou. ’E ’ua fātata vau i te haere atu i raro i tō’u mēnema ; ’e ’ua ’ī teie nei mau ’api. ’E tē fa’aoti nei au i tā’u nei parau.